Azərbaycan dövləti xalqın rifahının yüksəldilməsini prioritet vəzifə hesab edir

Xətai Rayon İcra Hakimiyyətinin başçısı Razim Məmmədovun növbəti səyyar qəbul günü aprelin 13-də şəhərin "Naximov" deyilən yaşayış massivinin ərazisindəki 221 saylı məktəbdə və 13 saylı musiqi məktəbində keçirildi. Hər iki qəbulda 200-dən artıq sakin iştirak edirdi.

Rayonun idarə və təsərrüfat rəhbərlərinin də qatıldığı görüşlərdə icra hakimiyyətinin başçısı R.Məmmədov Azərbaycan Respublikasının Prezidenti İlham Əliyevin bu yaxınlarda Xətai rayonunun Əhmədli qəsəbəsində olarkən verdiyi tapşırıq və göstərişlərdən danışaraq bildirdi ki, dövlət başçısı əhalinin sosial məişət problemlərinin ən qısa zamanda aradan qaldırılması üçün onların istək və arzularını, təkliflərini öyrənib təhlil etməyi və aidiyyatı dövlət strukturları qarşısında məsələ qaldırmağı tövsiyə etmişdir.

Doğrudur, biz son bir neçə ildə rayonun daxili imkanları hesabına əhalinin qaz, su və işıq təchizatının fasiləsiz təmin olunması, istirahətlərinin səmərəli təşkili, sosial-məişət problemlərinin həlli istiqamətində xeyli işlər görmüşük. Xüsusilə, quruculuq, abadlıq və tikinti işlərinin həyata keçirilməsi rayonumuzun simasını xeyli dəyişmişdir. Lakin dövlət başçısının qarşımızda qoyduğu tələblər daha böyük səylə işləməyimizi, yeni-yeni layihələrin reallaşması üçün imkan və bacarığımızı əsirgəməməyi tələb edir.

Natiq onu da vurğuladı ki, Prezident İlham Əliyevin rayonumuza - Əhmədli qəsəbəsinə gəlişi və burada sakinlərlə görüşü bu qəsəbə üçün əlamətdar bir hadisə ilə yadda qaldı. Dövlət başçımız zaman gözləmədən sakinlərin arzu və istəklərini nəzərə alıb, burada yeni xəstəxana binasının tikintisinə dövlət vəsaiti ayrılmasına sərəncam verdi.

Bütün bunlar bir daha onu göstərir ki, Azərbaycan Respublikasının Prezidenti İlham Əliyev əhalinin həyat səviyyəsinin, sosial rifahının durmadan yaxşılaşdırılması işində birbaşa onların öz istəklərinə, arzu və təkliflərinə əsaslanır. Qarşımıza əhaliyə xidmət etmək vəzifəsi qoyan dövlət başçısının bu təcrübəsi bizi də sizin problemlərinizi, arzu və istəklərinizi daha yaxından öyrənməyə, onlardan çıxış edərək işimizi qurmağa çağırır.

Sonra söz sakinlərə verildi. Mirvari Abdulova, Rəhim Əsgərov, Faiq İbrahimov, Ehtiram Miriyev, Abdulla Eminov və başqaları çıxış edərkən ilk növbədə Prezident İlham Əliyevin həyata keçirdiyi xarici və daxili siyasəti dəstəklədiklərini bildirdilər. Qeyd olundu ki, son günlər dövlət başçısının imzaladığı əhalinin içməli su və kanalizasiya xidməti borclarının ləğv olunması barədə sərəncam hamının ürəyindən xəbər vermişdir. Ötən il qaz borclarının, bu il sudan yaranan borcların ləğvi onu göstərir ki, dövlət öz vətəndaşlarının sosial rifahının yaxşılaşdırılması üçün çox ciddi addımlar atır.

Sakinlər, bütün bunlarla yanaşı, Xətai rayonunda son bir neçə ildə həyata keçirilən quruculuq və abadlıq işlərini də ürəkdən bəyəndiklərini söylədilər. Qeyd olundu ki, rayonda əhalinin elektrik enerjisi, qaz və su təminatında yaradılmış qayda təqdirəlayiq haldır.

Bütün bunlara baxmayaraq, ətraf yaşayış məntəqələrində hələ də bəzi problemlər qalır. Bura bir sıra orta təhsil məktəblərinin əsaslı təmiri, elektrik xətlərinin yeniləri ilə əvəz olunması, kanalizasiya xətlərinin dəyişdirilməsi, küçələrin işıqlandırılması və asfaltlaşdırılmasını da aid etmək olar.

Xətai Rayon İcra Hakimiyyətinin başçısı Razim Məmmədov verilən təkliflərin, göstərilən problemlərin və çatışmazlıqların qeydə alındığını və onların ən qısa zamanda aradan qaldırılması üçün tədbirlər görüləcəyini diqqətə çatdırdı.

İlqar RÜSTƏMOV

Xalq qəzeti.- 2011.- 14 aprel.- S. 5.