"Soyqırımı abidəsinin dastanı"

Bu günlərdə "Aktyor evi"nin səhnəsində türk yazarı Zihni Papaqçının "Soyqırımı abidəsinin dastanı" əsərinin tamaşası kecirildi. C.Cabbarlı adına İrəvan Dövlət Azərbaycan Dram Teatrının tamaşaya qoyduğu bu pyesin ideya müəllifi İrşad Əliyev, baş məsləhətçisi Hidayət Orucov, şeir və tamaşanın müəllifi əməkdar mədəniyyət işçisi İftixar Piriyev, məsləhətçisi Seyfəttin Ayakyay, rejissoru Hacıbaba Məmmədov, bəstəkarı Muxtar Abseynov, musiqi tərtibatçısı isə Çingiz Xəlilovdur.

Tamaşa Azərbaycan Respublikasının dövlət müstəqilliyinin bərpasının iyirminci ildönümünə həsr olunmuşdur. Zihni Papaqçı bu əsərdə ermənilərin qondarma türk genosidi məsələsinə tarixi faktlara əsaslanaraq tutarlı və dolğun cavab verməyə çalışmışdır. Zaman axarında ermənilərin azərbaycanlıların başlarına gətirdikləri müsibətləri, eləcə də onların necə silahlanmaları, 12-13 yaşlı uşaqların xaç suyuna salınmaları, türkləri qırmaq üçün kecirdikləri andiçmə mərasimləri, daşnak ideologiyalı müxtəlif erməni partiyalarının yaranması, zorla məscidə doldurularaq diri-diri yandırılan türklərin kürəyinə qaynar samovar baglanan Aşıq Nəcəfin taleyi və bu kimi digər vəhşilikləri müəllif ustalıqla qələmə almışdır. İstedadlı rejissor fantaziyası və gözəl aktyor oyunu sayəsində tamaşa dolğun və təsirli alınmışdır.

Ən çətin məqamlarda Nuru Paşanın öz qoşunu ilə Azərbaycana gəlməsi, türk və Azərbaycan xalqlarının əbədi dostluğunun bu tamaşada öz əksini tapması da rejissor işinin uğurudur. Tamaşanın premyerası martın 30-da Beyləqan rayonundakı "Soyqırımı abidəsi" meydanında açıq havada oynanılmışdır.

Xalq artistləri Elmira İsmayılova - nənə, Tamilla Abdullayeva - ana, əməkdar artistlərdən Vidadi Əliyev - dədə, Vaqif Kərimov - ata və digər aktyorların oyunları alqıslarla qarşılandı. Bu əsər türk yazarı Zihni Papaqçının İrəvan teatrında səhnəyə qoyduğu sayca ikinci pyesidir. İki il bundan öncə İrəvan teatrı türk teatrı ilə birgə "Çanaqqalaya can verənlər" əsərini tamaşaya qoymuşdur. İstanbulda və Türkiyənin bir neçə şəhərində uğurla oynanılan tamaşa Çanaqqalada döyüşmüş, qəhrəmanlıq göstərmiş, iki mindən çox şəhid olmuş azərbaycanlıların həyatından, Çanaqqala hadisəsindən bəhs edir.

Rafiq SALMANOV

Xalq qəzeti.- 2011.- 17 aprel.- S. 8.