Nəsimi rayonunda ilin birinci rübünə yekun vuruldu

Nəsimi rayonunda 2011-ci ilin birinci rübünün sosial - iqtisadi inkişafının yekunlarına həsr olunmuş iclas keçirilmişdir.

Tədbiri açan rayon icra hakimiyyətinin başçısı Nəsib Məhəməliyev bildirmişdir ki, Azərbaycanda bu ilin birinci rübü də sosial - iqtisadi sahələrdə böyük inkişafla yadda qalmışdır. Bu dövr ərzində iqtisadi artım 1,6 faiz olmuş, əhalinin pul gəlirləri 16 faiz çoxalmışdır. Ölkədə 17 min yeni iş yeri yaradılmış, orta əmək haqqı 340 manata çatmışdır. Ölkəmizdə sosial proqramların həyata keçirilməsi ilə bağlı genişmiqyaslı işlər görülür. Sosial-iqtisadi sahədə əldə edilən uğurlar dövlət başçısı cənab İlham Əliyevin Azərbaycanın hərtərəfli inkişafına yönəlmiş müdrik siyasətinin nəticəsidir. N.Məhəməliyev bildirmişdir ki, 2011-ci ilin birinci rübündə Nəsimi rayonunda da sosial-iqtisadi sahədə bir sıra nailiyyətlər əldə edilmişdir.

Rayon icra hakimiyyəti başçısının müavini Ayaz Əsgərov məruzə ilə çıxış etmişdir. Natiq bildirmişdir ki, bu ilin birinci rübündə rayonda 64,4 milyon manatlıq sənaye məhsulu istehsal edilmiş və xidmətlər göstərilmişdir. Bu, keçən illə müqayisədə 2,1 dəfə çoxdur. Hesabat dövründə əhaliyə 308,5 milyon manatlıq istehlak malları satılmış və pullu xidmətlər göstərilmişdir.

Bu ilin birinci rübündə rabitə müəssisələri tərəfindən 9,4 milyon manatlıq xidmət göstərilib ki, bu da keçən ilin müvafiq dövrü ilə müqayisədə 4 dəfə çoxdur. Rüb ərzində rayonda 308 yeni iş yerləri açılmışdır.

İlin birinci rübündə Nəsimi Rayon Əhalinin Sosial Müdafiəsi Mərkəzi tərəfindən 2013 ailəyə ünvanlı dövlət sosial yardımı verilmişdir. Hər ailəyə düşən yardımın orta aylıq məbləği 130 manat təşkil etmişdir. 362 nəfər ahıl və əlilə evlərdə sosial-məişət xidməti göstərilmişdir.

Hesabat dövründə Ə.Qarayev adına Respublika Uşaq Xəstəxanası əsaslı təmirdən sonra fəaliyyətini tam bərpa etmişdir. Tibb Universitetinin Cərrahiyyə korpusunda tikinti-quraşdırma işləri davam etdirilir. 76 saylı körpələr evi - uşaq bağçası əsaslı təmirdən sonra istifadəyə verilib.

Bu dövrdə Nəsimi Rayon Qaz İstismar İdarəsi tərəfindən istehlakçılara 3,8 milyon manatlıq qaz satılıb. Ümumi satışın 87,4 faizi ödənilib. Keçən ilin eyni dövrü ilə müqayisədə yığım 21,6 faiz artmışdır. 2011- ci ilin 3 ayı ərzində elektrik enerjisinin dəyərinin ödənilməsi keçən ilin eyni dövrü ilə müqayisədə 99 faizə yüksəlmişdir.

Hazırda ölkənin hər yerində olduğu kimi, Nəsimi rayonunda da genişmiqyaslı abadlıq və yenidənqurma işləri həyata keçirilir. İlin 3 ayı ərzində S.Vurğun, Cavadxan, C.Məmmədquluzadə və sair küçələrdə, ümumilikdə 12200 kvadratmetr asfalt örtüyü vurulmuş, R.Behbudov küçəsinə 1500 kvadratmetr tamet döşənmişdir. Ş.Bədəlbəyli küçəsi, 106 saylı binada 300 kvadratmetr fasad və 12 eyvan təmir edilmişdir. Azadlıq prospekti, Ş.Bədəlbəyli və R.Behlbudov küçələrindəki bir sıra binaların fasad və girişlərində elektrik xətləri təmir olunmuşdur.

Hesabat dövründə "Zabitlər" parkının "Bakı Elektrik Şəbəkə" ASC-nin inzibati binasının və 28 May küçəsi ilə Bülbül prospektinin kəsişməsində yerləşən yeraltı keçidin açılışı mərasimləri olmuşdur. Bu tədbirlərdə Azərbaycan Prezidenti cənab İlham Əliyev iştirak etmişdir.

Rayon ərazisində dağ yəhudiləri icması sinaqoqunun tikintisi başa çatmışdır. Hacı Əjdərbəy məscidinin (Göy məscid) yeni binasının inşasına hazırlıq işləri başa çatdırılıb. A.Bakıxanov küçəsində Nəsimi Rayon İcra Hakimiyyətinin inzibati binasının tikintisi davam etdirilir.

Rayon ərazisində istehsal edilən və satılan istehlak mallarının keyfiyyətinə nəzarəti gücləndirmək məqsədilə mütəmadi olaraq reydlər keçirilir. Bu istiqamətdə görülən işlər barədə rayon icra hakimiyyəti başçısına məlumat verilir. Rayondakı "Təzə Bazar" MMC və 3-cü mikrorayondakı "Kəndli yarmarkası" ərazisində hər həftə kənd təsərrüfatı yarmarkaları təşkil edilir. Burada bazar qiymətlərindən aşağı müxtəlif çeşidli 40-50 ton məhsul satılır.

Sakinlərin rayon rəhbərliyinə ünvanlanan müraciət və təkliflərinin hər birinə baxılır və vətəndaşların problemlərinin həll edilməsi üçün lazımi tədbirlər görülür.

Sonra rayon Mənzil Kommunal Təsərrüfatı Birliyinin rəisi Laçın Mustafayev, rayon Enerji Təchizatı və Satışı İdarəsinin rəisi Arif Məmmədov, 15 saylı İstilik Sistemlərinin İstismarı Sahəsinin rəisi Qadir Əliyev, Dövlət Sosial Müdafiə Fondu Nəsimi rayon şöbəsinin sədri Məmməd Nuriyev və başqaları çıxış etdilər. Onlar görülmüş işlər və qarşıda duran vəzifələr barədə danışdılar.

Nəsimi Rayon İcra Hakimiyyətinin başçısı Nəsib Məhəməliyev iclasa yekun vurdu.

Ayaz HƏMİDOĞLU

Xalq qəzeti.- 2011.- 20 aprel.- S. 5.