Sabunçu rayonu inkişafın yeni mərhələsinə qədəm qoymuşdur

Bu yaxınlarda Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2011-ci ilin birinci rübünün sosial-iqtisadi inkişafının yekunlarına həsr olunmuş iclası keçirilmişdir. Dövlət başçısı müşavirəni giriş nitqi ilə açaraq cari ilin birinci rübündə də ölkə iqtisadiyyatının uğurla inkişaf etdiyini bildirmişdir. O qeyd etmişdir ki, bu ilin əvvəlində əldə edilmiş nəticələri düzgün təhlil etmək üçün biz bundan əvvəlki illərdə Azərbaycanda mövcud olan iqtisadi inkişafı mütləq nəzərə almalıyıq. Son 7 il ərzində ümumdaxili məhsul təxminən 3 dəfə, hətta böhranlı 2009 və 2010-cu illərdə iqtisadiyyat 14 faiz artmışdır. Bu yüksək baza üzərində cari ilin I rübündə də artım müşahidə olunmuşdur.

Sabunçu rayonunda da bu inkişaf davam etmişdir. Sabunçu Rayon İcra Hakimiyyətinin 2011- ci ilin birinci rübünün yekunlarına həsr olunmuş yığıncağında bu barədə ətraflı bəhs olundu. Yığıncağı giriş sözü ilə açan rayon icra hakimiyyətinin başçısı Əlibaba Əliyev Azərbaycan Prezidenti cənab İlham Əliyevin həyata keçirdiyi siyasətin uğurlarından, ölkədə aparılan davamlı islahatlardan danışdı. Sonra rayonun ilin birinci rübündə sosial - iqtisadi inkişafının yekunları ilə bağlı icra başçısının birinci müavini Qəzənfər Həsənov məruzə etdi. O bildirdi ki, cari ilin birinci rübündə Sabunçu rayonunda qəsəbələrin inkişafına xüsusi diqqət yetirilmişdir. Bu məqsədlə mart ayının 9-da Prezident İlham Əliyevin sədrliyi ilə Bakı Şəhər İcra Hakimiyyətində müşavirə keçirilmiş, yerlərdəki mövcud problemlərin həlli üzrə xüsusi proqram hazırlanması tapşırılmışdır. Qeyd edilməlidir ki, Bakı şəhərinin digər rayonlarında olduğu kimi, Sabunçu rayonunda da qısa müddət ərzində ayrı-ayrı qəsəbələrdəki mövcud problemlər bir daha öyrənilərək 2011-2013-cü illər üçün sosial-iqtisadi inkişaf proqramı layihəsi hazırlanmış, rayonun aidiyyətı idarə, təşkilat rəhbərləri, qəsəbə nümayəndələri, bələdiyyələr və ictimaiyət nümayəndələrinin iştirakı ilə geniş müzakirələrdən sonra növbəti Dövlət Proqramında öz əksini tapmaq üçün Prezident Administrasiyasına, İqtisadi İnkişaf Nazirliyinə və Bakı Şəhər İcra Hakimiyyətinə təqdim olunmuşdur. Ancaq vaxt itirməmək üçün cənab Prezident ehtiyat fondundan Bakı Şəhər İcra Hakimiyyətinə 10 milyon manat vəsait ayırmışdır ki, onun da xeyli hissəsi Sabunçu rayonundakı bir sıra küçə və yolların təmirinə yönəldilmişdir. O da qeyd edilməlidir ki, ölkə Prezidenti bu ilin mart ayında 2 dəfə rayonumuzda olmuş, martın 3-də Zabrat qəsəbəsindəki "Cihazqayırma" zavodunun yeni istehsal sahələrinin açılışında iştirak etmiş, martın 31-də isə istilik kombinatı adlanan yaşayış məntəqəsində aparılan tikinti-abadlıq işləri ilə tanış olaraq sakinlərlə görüşmüşdür. Gələcəkdə şəhərdə və rayonumuzda görüləcək işlərlə bağlı öz tapşırıq və tövsiyələrini vermişdir.

Natiq bildirmişdir ki, cari ilin birinci rübündə rayonun sənaye müəssisələri və idarələri tərəfindən məhsul istehsalı 22,6 faiz artaraq 35,5 milyon manat, pərakəndə əmtəə dövriyyəsi 162,6 milyon manat, əhaliyə göstərilən pullu xidmətlərin həcmi 1 faiz artaraq 45,2 milyon manat, əsas kapitala yönəldilən investisiyaların həcmi təxminən 3 dəfə artaraq 17,1 milyon manat, öz gücləri ilə yerinə yetirilən podrat işlərinin həcmi 84 faiz artaraq 10,2 milyon manat təşkil etmişdir. Rayon üzrə orta aylıq əmək haqqı ötən ilin müvafiq dövründəkinə nisbətən 24,3 faiz artaraq 342,5 manat olmuş, 3 ay ərzində 207 yeni daimi iş yeri yaradılmışdır ki, bunlarda rayonun həm iqtisadi, həm də sosial sahələrinin dinamik inkişaf etdiyini göstərir.

Cari ilin əvvəlindən rayonun sosial-iqtisadi inkişaf planına uyğun olaraq rayon ərazisində respublikanın və şəhərin müvafiq mərkəzi dövlət orqanları, eləcə də rayonun daxili imkanları hesabına xeyli sosial əhəmiyyətli tədbirlərin, obyektlərin, qurğuların tikinti-quraşdırma və abadlıq işlərinin aparılması təmin edilmişdir. Belə ki, Pirşağı qəsəbəsində yerləşən köhnə ambulatoriya binasında yenidənqurma, əsaslı təmir işləri aparılaraq onun nəzdində 36 saylı müasir tipli şəhər poliklinikası və təcili tibbi yardım stansiyası yaradılaraq cari ilin fevral ayının 25-də Heydər Əliyev Fondunun Prezidenti Mehriban xanım Əliyevanının iştirakı ilə sakinlərin istifadəsinə verilmişdir. Zabrat qəsəbəsi ərazisində ötən ilin dekabrında istifadəyə verilmiş 9 mərtəbəli yaşayış binasının yanında Qarabağ əlilləri və şəhid ailələri üçün yeni 9 mərtəbəli 81 mənzilli yaşayış binasının inşasına başlanmış daha bir binanın tikintisinə isə hazırlıq işləri aparılır. Maştağa qəsəbəsində Milli Təhlükəsizlik Nazirlyinin Sabunçu rayonu idarəsinin Maştağa bölməsi üçün ikimərtəbəli binanın tikintisi başa çatdırılmış, hazırda burada tamamlama işləri aparılır. Bakıxanov qəsəbəsində Sabunçu rayon Əhalinin Sosial Müdafiəsi Mərkəzi üçün 3 mərtəbəli inzibati binanın tikintisi də başa çatdırılmışdır və yaxın vaxtlarda istifadəyə veriləcəkdir. Eyni zamanda, qəsəbədə Dövlət Sosial Müdafiə Fondunun Sabunçu rayon şöbəsi üçün 2 mərtəbəli inzibati binanın tikinisi başa çatdırılmış, hazırda tamamlama işləri aparılır.

Bakıxanov qəsəbəsində Dövət Xəzinədarlığı Agentliyinin 10 saylı Xəzinədarlıq İdarəsi üçün 2 mərtəbəli inzibati binanın tikintisinə başlanmışdır. Hazırda binanın 2-ci mərtəbəsində işlər davam etdirilir. Bu qəsəbənin ərazisində daha bir binanın - Sabunçu Rayon Mühafizə İdarəsi üçün inzibati binanın tikintisi nəzərdə tutulmuşdur.

Bundan başqa, həmin qəsəbədə Y.Əliyev küçəsində A.Bakıxanovun heykəli qoyulacaq parkda təmir-tikinti, abadlıq işləri davam etdirilir. Qəsəbədə Azərbaycan Respublikası Daxili İşlər Nazirliyi tərəfindən Sabunçu Rayon Polis İdarəsi üçün yeni 4 mərtəbəli inzibati bina tikilərək mart ayında istifadəyə verilmişdir. Digər qəsəbələrdə də tikinti quruculuq işləri davam etdirilmişdir. Nardaran qəsəbəsində yerləşən 130 saylı məktəbin dam örtüyü əsaslı təmir olunmuş, Sabunçu qəsəbəsində yerləşən 3 saylı uşaq bağçasında Azərbaycan Respublikası Prezidentinin ehtiyat fondundan Təhsil Naziriyinə ayrılmış vəsait hesabına əsaslı təmir işləri aparılmışdır. Hazırda bağçanın həyətində abadlıq işləri aparılır.

Əhalinin elektrik təchizatının yaxşılaşdırılması məqsədilə 2011-ci ilin birinci rübündə Pirşağı qəsəbəsində 400 KVA-lıq, Zabrat qəsəbəsi ərazisində və Sabunçu qəsəbəsinin Böyük Şor yaşayış məntəqəsində hər biri 630 KVA-lıq yeni trasformator məntəqələri quraşdırılmışdır.

Maştağa şəbəkəsi üzrə yenidənqurma işlərinin həyata keçirilməsi məqsədi ilə 0,4 KV-luq şəbəkədə "ÖİN" (özünü idarə edən) kabellərinin çəkilişi ilə əlaqədar olaraq 2137 ədəd dayaq basdırılmış, 56789 metr kabel çəkilmiş və 42 ədəd TM və KTM-də "ÖİN" kabelləşmə işləri aparılaraq istismara verilmişdir.

Su təchizatını yaxşılaşdırmaq məqsədilə 1500 metr müxtəlif diametrli su boruları dəyişdirilmiş, 1 ədəd su nasosu təmir edilmiş, 230 ünvanda su xətləri bərpa edilmişdir.

Qaz İstehsalat İdarəsinin daxili imkanları hesabına bir sıra işlər yerinə yetirilmişdir. Belə ki, Zabrat, Maştağa, Ramana, Kürdəxanı, Pirşağı, Bilgəh qəsəbələrinə qaz verilişi xeyli təkmilləşdirilmişdir.

Natiq qeyd etdi ki, Sabunçu Telefon Qovşağının Sabunçu rayon xidməti ərazisində olan ATS-lərdə nömrələrin sayı 3248 ədəd artmışdır.

Mənzil Kommunal Təsərrüfatı tərəfindən 2011-ci ilin birinci rübündə Bakıxanov, Sabunçu qəsəbələrində 1000 kvadratmetrə yaxın dam örtüyündə cari təmir işləri aparılmış, Sabunçu və Zabrat qəsəbələrində 850 kvadratmetrə yaxın məhəllədaxili yollara asfalt vurulmuş, 18 ədəd sərnişin lifti təmir edilmişdir.

Cari ilin birinci rübü ərzində rayonun bir sıra qəsəbələrinin yolları təmir edilərək asfaltla örtülmüşdür. Belə ki, Zabrat qəsəbəsinin Göyüşov, N.Nərimanov, R.Axundov, Oktyabr küçələrində, Balaxanı qəsəbəsinin Sabunçu şosesindən II mədən ərazisi ilə Binəqədi rayonuna qədər yolda təmir işləri aparılaraq asfalt vurulmuşdur.

2011-ci ilin birinci rübündə rayon icra hakimiyyəti tərəfindən sanitar-təmizlik işlərinin aparılmasına, küçə və meydanların, istirahət parklarının, məhəllədaxili ərazilərin süpürülüb təmizlənməsinə, zibil meydançalarının vaxtlı-vaxtında daşınmasına diqqət artırılmışdır.

Məruzəçi bildirmişdir ki, respublika rəhbərliyinin göstərişinə əsasən, digər rayonlarda olduğu kimi, hazırda Sabunçu rayonu üzrə də ötən əsrin 50-ci illərindən indiyədək inşa edilmiş sənədsiz evlərin, eləcə də mühəndis qurğularının (elektrik, qaz, rabitə, su, kanalizasiya və s.) mühafizə zolaqlarındakı və neft-mədən sahələrindəki tikililərin inventarizasiyası işlərinə başlanmışdır.

Rayon ərazisində 50 müxtəlif binada məskunlaşmış 2100 məcburi köçkün ailələrinin məişət-kommunal şəraitinin yaxşılaşdırılması, binalarda müəyyən təmir-bərpa işlərinin aparılmasına kömək edilmiş, onlara enerji, su təchizatı, digər kommunal xidmətlərin göstərilməsi nəzarətdə saxlanmışdır. Novruz bayramı ərəfəsində ərazidə məskunlaşmış məcburi köçkün, Qarabağ əlilləri, şəhid ailələri və digər aztəminatlı 2300 ailəyə ərzaq bağlamaları verilmişdir.

Yığıncaqda Dövlət Sosial Müdafiə Fondu Sabunçu rayon şöbəsinin müdiri Məhərrəm Məhərrəmov, icra hakimiyyəti başçısının Maştağa qəsəbəsi üzrə nümayəndəsi Rasim Ağayev, Mənzil Kommunal Təsərrüfat Birliyinin rəis müavini Bəxtiyar Qasımov çıxış edərək cari ilin birinci rübündə rayonda görülən işlərdən danışmışlar.

Sonda rayon icra hakimiyyətinin başçısı çıxış edərək qarşıda duran vəzifələrdən söz açmışdır.

M.MÜKƏRRƏMOĞLU

Xalq qəzeti.- 2011.- 22 aprel.- S. 6