Heydər Əliyevin gənclər siyasəti uğurla davam etdirilir

Proqram sadəcə olaraq, hansısa xoş niyyətin ifadə edilməsi üçün deyil, konkret nəticələrə gətirib çıxarmalıdır. Eyni zamanda ... proqram elə olmalıdır ki, orada hazırda gəncləri narahat edən məsələlər öz əksini, öz həllini tapsın.

İlham ƏLİYEV,

Azərbaycan Respublikasının Prezidenti

"Azərbaycan gəncliyi Dövlət Proqramı"nın hazırlanması haqqında sərəncam böyük məmnunluq və razılıqla qarşılandı

Tarixən bütün dövrlərdə müdrik insanlar qarşıya qoyulan istənilən vəzifəni reallaşdırmaq üçün yaşlı nəslin biliyindən, təcrübəsindən və gənclərin enerjisindən, gücündən, yaradıcılıq imkanlarından istifadə ediblər. Bu amilin nəzərə alınması böyük uğurların qazanılmasına səbəb olub. Eyni zamanda, tarix bizə əsrlərdən bəri başqa dərslər də verib.

Belə ki, gəncliyin imkanlarını nəzərə almayan hansısa yaşlılar qrupunun həyata keçirmək istədiyi layihələr uğursuzluqla nəticələnib, yaşlıların, ağsaqqalların köməyindən imtina edən gənclərdən ibarət dəstələr isə daha mənfi nəticələrlə üzləşiblər. Əbəs deyil ki, bir qədim hind məsəlində bu həqiqətləri ifadə etmək üçün xüsusi obrazdan istifadə edilir: "Yaşlılar dünyada bütün yolları bilirlər, cavanlar isə həmin yolları getməyi bacarırlar. Əgər yolgöstərən varsa". Deməli, ulu öndər Heydər Əliyev həm 1969-82-ci illərdə ölkəyə birinci dəfə rəhbərlik etdiyi dövrdə, həm də 1993-2003-cü illərdə ölkə gəncliyinin təşkilatlanması üçün çoxsaylı layihə, plan və proqramları həyata keçirərkən məhz Şərq müdrikliyinə istinad edirmiş. Əlbəttə, ulu öndərin özü Şərq tarixinin ən müdrik simalarından biri idi.

Azərbaycan gənclərinin təşkilatlanma prosesinin ikinci mərhələsi - qeyd etdiyimiz kimi, birinci mərhələ 1993-cü ilin yayından 2003-cü ilin payızına qədər olan dövrü əhatə edirdi - 2003-cü ilin oktyabrından başlansa da son üç-dörd ildə bu istiqamətdə daha böyük işlər görülür. Prezident İlham Əliyev təkcə təhsil sisteminin inkişafı ilə bağlı 16 Dövlət Proqramı təsdiq edib ki, bu proqramların hamısının icrası bilavasitə ölkə gəncliyinin mənəvi və fiziki cəhətdən sağlam böyüməsinə, əsl vətəndaş kimi yetişməsinə, Azərbaycanı beynəlxalq aləmdə yüksək səviyyədə təmsil edə biləcək nüfuz qazanmasına xidmət edir. Azərbaycan gənclərinin normal təhsil alması üçün 2000-ə qədər yeni məktəb binası tikilib, gənc nəslin işlə təmin edilməsini maksimuma çatdırmaq üçün 900 mindən artıq yeni iş yeri yaradılıb, bütün bölgələrdən olan gənclərin idmanla məşğul olmasına zəmin yaratmaq üçün 35 şəhər və rayonda Olimpiya İdman Kompleksi tikilib, gənclərin xaricdə təhsil almasını asanlaşdırmaq və həmin prosesin maliyyələşdirilməsini təmin etmək üçün xüsusi Dövlət Proqramı təsdiq olunub, müasir dünyanın ən böyük tələbinə cavab olaraq "gənclərin informasiya-kommunikasiya texnologiyalarından istifadəsini sürətləndirmək" məqsədilə xüsusi proqram və layihələr icra olunub və sair.

Bu gün Prezident Administrasiyasında, Nazirlər Kabinetində, Milli Məclisdə yüzlərlə gənc çalışır. Parlament üzvləri arasında gənclərin sayı ildən-ilə artır. Azərbaycan gənclərinin 100 minə qədəri tələbə kimi sabahımızın daha yaxşı qurulmasını təmin etməyə hazırlaşır. Bütün bunlar xoşdur və sevindiricidir. Ancaq bu gün Azərbaycan gəncliyinin ən böyük uğuru möhtəşəm hərbi vətənpərvərlik tərbiyəsi ruhunda yetişməsidir. Fəxr və iftixar etməli məqamdır ki, bu gün Azərbaycan Ordusu regionun ən qüdrətli Silahlı Qüvvələri kimi ölkəmizin ərazi bütövlüyünü bərpa etmək iqtidarındadır. Ötən il iki azərbaycanlı gəncin nümayiş etdirdiyi vətənpərvərlik nümunəsi dünyanın bütün sülhsevər insanları üçün örnək, dərs olacaq bir səviyyədə dildən-dilə gəzdi. İdmançılarımızın şanlı qələbələrinin durmadan artması da elə vətənpərvərlik tərbiyəsinin yüksək səviyyəsindən xəbər verir.

Bütün bunları nəzərə alan Prezident İlham Əliyev aprelin 21-də müxtəlif sahələrdə uğurlar qazanmış bir qrup gənci və tələbə-gənclər təşkilatlarının nümayəndələrini qəbul etmiş, gəncləri maraqlandıran məsələləri və onları düşündürən problemləri bilavasitə gənclərin öz dilindən eşitmişdir. Dövlət başçısı qeyd etmişdir ki, onun iki həftə əvvəl imzaladığı sərəncam əsasında yaradılmış işçi qrup "Azərbaycan gəncliyi Dövlət Proqramı"nı hazırlayır. Bu proqram 2011-2015-ci illəri əhatə edəcək. Prezident adı çəkilən proqramın çox konkret olmasını, dəqiq vəzifələrin qoyulması zərurətini söyləmiş və demişdir ki, müəyyən edilmiş vəzifələrin icra mexanizmləri də konkret olaraq göstərilməlidir. Dövlət başçısı qarşıya xüsusi olaraq bir vəzifə qoyur ki, hazırlanan proqramda gəncləri narahat edən məsələlər öz əksini tapmalıdır.

Prezidentin gənclərlə görüşündə səsləndirilən bütün fikirlər, bütün faktlar və arqumentlər maraqlı idi. Ancaq dövlət başçımızın müasir Azərbaycan gəncliyi barədə söylədikləri daha diqqətçəkən idi: "Gənclərimiz dövlətçiliyə sadiqdirlər, vətənpərvərlik ruhunda tərbiyə alırlar, bu, çox vacibdir". Prezidentin görüşdə səsləndirdiyi bu fikirləri sitat kimi seçməyimiz təsadüfi deyil. Çünki təxminən iki həftə əvvəl Ermənistan gənclərinin ordudan yayınmasına, xüsusən, ölkəni tərk edən gənclərin günü-gündən çoxalmasına etiraz edən prezident Serj Sarkisyan böyük narahatlıqla bildirmişdi ki, Ermənistan dövlətini qorumalı olan gənc nəsil bu missiyanı yerinə yetirmir. Azərbaycan xalqı və dövlətimiz isə bizim gənclər barədə danışarkən Mübariz İbrahimov, Fərid Məmmədov kimi qəhrəmanlıq nümunəsi olan gənclərimizdən söz açırlar. Erməni əsgərləri hətta, sərhədi keçib Azərbaycan vasitəsilə üçüncü bir dövlətə getmək arzusunu dilə gətirirlər.

Yuxarıda qeyd etdik ki, dövlət başçısı aprelin 21-də gənclərlə görüşərkən gənclərin problemlərini də öyrənmək istəyirdi. Xatırladaq ki, həmin problemlərdən biri də gündən-günə inkişaf edən bölgələrimizdə yaradılmış çoxsaylı müəssisə və təşkilatlarda aparıcı mütəxəssislərin əcnəbilər olmasıdır. Əcnəbilərin Azərbaycana gəlməsini və bütün müəssisələrdə işləyə bilməsini müsbət hal və təbii proses adlandıran Prezident deyir: "Ancaq əlbəttə, mən çox istərdim ki, bax bu mühüm vəzifələrdə yerli kadrlar işləsinlər. Xüsusilə nəzərə alsaq ki, yenə də deyirəm, ölkəmizin bugünkü iqtisadi inkişafı və gələcək planlarımız bunu tələb edir. Çünki burada ən müasir, qabaqcıl texnologiyalar tətbiq olunmalıdır".

Azərbaycan Tələbə Gənclər Təşkilatları İttifaqının sədri Şahin İsmayılovun tələbələrə iqtisadi güzəştlər edilməsi və tələbə təqaüdünün artırılması barədə təkliflərinə münasibət bildirən dövlət başçısı tələbə gənclərin sevincinə səbəb olacaq fikirlər söyləyir: "Əlbəttə, elə etməliyik ki, tələbələrin həyatı həm mənalı olsun, həm dolğun olsun, həm də iqtisadi cəhətdən lazımi səviyyədə təmin edilsinlər. Tələbə təqaüdlərinin qaldırılması bizim planlarımızda var".

Yəni aprelin 21-də keçirilən görüş bir daha sübut etdi ki, Azərbaycan dövləti və şəxsən Prezident İlham Əliyev Azərbaycan gənclərini düşündürən və narahat edən bütün problemlərin həlli üçün heç nəyi əsirgəmir. Bu isə Heydər Əliyev gənclər siyasətinin uğurla davam etdirilməsi deməkdir.

İttifaq MİRZƏBƏYLİ

Xalq qəzeti.- 2011.- 24 aprel.- S. 1.