Musiqi dünyamızın yeni pöhrəsi

Hər bir ölkə, hər bir xalq mədəniyyəti, sənətkarları ilə sayılıb seçilir. Onu da qeyd etmək lazımdır ki, gənc sənət adamları mədəniyyətimizin gələcəyinin təminatçılarıdır. Hər bir yeniyetmənin uğuru, nailiyyəti, Vətənimizin çiçəklənməsinə töhfədir. Azərbaycan Milli Konservatoriyası tərkibində Respublika İncəsənət Gimnaziyasının VIII sinif şagirdi Minirə Nəcəfzadə də belə istedadlı gənclərdən biridir.

Minirə fortepiano ifaçılığının sirlərini dərindən öyrənməyi qarşısına məqsəd qoymuşdur. Orta məktəb fənlərini əla qiymətlərlə oxumaqla bərabər, Minirə Azərbaycan və xarici ölkə bəstəkarların yaradıcılığına müraciət edərək onların əsərlərini ustalıqla ifa edir. O, ölkəmizdə keçirilən bir sıra konsert-müsabiqələrin fəxri fərman və diplomlarını qazana bilmişdir.

Şagirdin fitri istedadı ilk dəfə I sinfi bitirərkən 2003-2004- tədris ili üzrə məktəbin yekun hesabat konsertində, Ü.Hacıbəyov adına Azərbaycan Dövlət Simfonik Orkestrinin müşayiəti və respublikanın əməkdar incəsənət xadimi Azad Əliyevin dirijorluğu ilə səslənən "Fortepiano ilə simfonik orkestr üçün konsert" əsərinin ifası zamanı üzə çıxmışdır.

Minirə II sinifdə oxuyarkən "Fortepiano və orkestr üçün konsertlərinin ən yaxşı ifası" müsabiqənin ən gənc iştirakçısı və "Pyeslərin ən yaxşı ifası" müsabiqəsinin II dərəcəli diplomlarına layiq görülmüşdür.

Dünya şöhrətli violençel ifaçısı Yo-Yo Ma 2006-cı ilin may ayında Azərbaycan Milli Konservatoriyasının müəllim və tələbələri üçün verdiyi "master-klass"da III sinif şagirdi M.Nəcəfzadənin fortepianoda ifa etdiyi Niyazinin "Xoreoqrafik vals" əsərini respublikamızın görkəmli incəsənət xadimlərindən A.Məlikov, F.Əlizadə, S.Kərimi və başqaları ilə birgə dinləmiş və təqdir etmişdi.

Konsertin sonunda Yo-Yo Ma Minirə ilə bağlı fikirlərini belə ifadə etmişdir: "Bu istedadlı qızın ifasını dinləməklə belə qənaətə gəlirəm ki, əgər onun yaradıcılıq potensialı inkişaf etdirilərsə, gələcəkdə Azərbaycanın ümidverən musiqiçilərindən ola bilər".

V sinifdə oxuyarkən Minirəyə Dövlət Proqramı Çərçivəsində "Xüsusi istedada malik olan uşaqların potensialının üzə çıxarılması üzrə" keçirilən tədbirdə həmçinin Parisdə keçirilən N.Rubinşteyn adına IX beynəlxalq müsabiqədə 2-ci yer tutması münasibətilə Fəxri fərmanlara, VI sinifdə isə İtaliyada keçirilən müsabiqəyə görə "Pietro Argento" medalına layiq görülmüşdür.

VII sinifdə oxuyanda da bu istedadlı qızın uğurları davam etmişdir. "Mysterous World of Young Talents" adlı festivalda uğurlu çıxışına görə "Azərsun" tədris mərkəzinin "Fəxri diplomuna" layiq görülmüşdür. Ardınca fortepiano musiqi festivalında I yerin qalibi olaraq Fəxri fərmanın sahibi olmuşdur.

Fərəhləndiricidir ki, 12 yaşlı M.Nəcəfzadə artıq xarici ölkə pianoçular ictimaiyyəti tərəfindən bəyənilərək, digər müsabiqələr üçün də dəvət və təkliflər almışdır.

2008-ci ildə Parisdə keçirilən Nikolay Rubinşteyn adına IX müsabiqənin diplomuna, 2009-cu ildə İtaliyanın Bari şəhərində keçirilən müsabiqədə "Pietro Argento" medalına, XII Beynəlxalq musiqi müsabiqəsinin qalibi olaraq II yer diplomuna layiq görülmüşdür. 2010-cu ildə isə ölkəmizin ilk dəfə qatıldığı İspaniyanın Palma de Mallorca şəhərində keçirilən fortepiano ifaçılarının XVII Beynəlxalq müsabiqəsinin qran-pri mükafatını əldə etməklə dövlətimizin adını və bayrağını ucaltmışdır. Həmin ilin noyabr- dekabr aylarında İngiltərənin Nyukasl şəhərində keçirilən gənc fortepiano ifaçılarının Beynəlxalq müsabiqəsinin I dərəcəli diplomu ilə də mükafatlandırılmışdır.

Azərbaycan Milli Konservatoriyasının rektoru, xalq artisti, professor Səyavuş Kərimi Minirə haqqında demişdir: "Zəngin musiqimiz bu gün özünün yeni dövrünü yaşayır. Biz ondan böyük qələbələr və parlaq istedadlar gözləyirik. Belə istedadlar xarici ölkələrdə Azərbaycanı uğurla, müvəffəqiyyətlə təmsil edərək dövlətimizin adını, bayrağını ucaldırlar".

"Azərbaycanda gənc istedadlara dövlət qayğısı haqqında" Fərmana uyğun olaraq, 17 sentyabr 2010-cu il tarixdə Azərbaycan Respublikası Prezidentin sərəncamı ilə Minirənin adı Azərbaycan istedadlarının "Qızıl kitabı"na yazılaraq, Prezident təqaüdünə layiq görülmüşdür.

Bu istedadlı qızın musiqidən əlavə xoşladığı məşğuliyyəti də vardır. Gözəl rəsmlər çəkir.

Minirənin nəaliyyətləri bizi çox sevindirir. Uca Tanrıdan bu istedadlı və gözəl qızımızın xoşbəxtliyini diləyirik.

İradə ZÜLFƏLİQIZI

Xalq qəzeti.-2011.- 24 aprel.- S. 8.