Çernobılçılara diqqət və qayğı göstərilir

Çernobıl faciəsinin 25-ci ildönümü ilə bağlı Binəqədi Rayon İcra Hakimiyyətində çernobılçılarla görüş keçirilmişdir.Görüşü giriş sözü ilə açan rayon icra hakimiyyətinin başçısı Alı Qocayev demişdir ki,Çernobıl Atom Elektrik Stansiyasında on minlərlə insanın faciəsi ilə nəticələnmiş hadisə tarixin ən böyük texnogen qəzalarından sayılır. Çernobıl qəzasının acı nəticələrinin Azərbaycandan da yan keçmədiyini bildirən icra başçısı vurğulamışdır ki, qəzanın nəticələrinin aradan qaldırılmasında 7 mindən çox həmvətənimiz iştirak etmiş,sonralar onların xeyli hissəsi şüalanmanın təsirindən dünyasını dəyişmişdir.

O, çıxışında çernobılçılara dövlət qayğısından ətraflı danışmış, Prezident İlham Əliyevin bu istiqamətdə həyata keçirdiyi tədbirlərin mühüm önəm daşıdığını diqqətə çatdırmışdır. Ölkə rəhbərinin bu il aprelin 22-də imzaladığı sərəncamın bu baxımdan mühüm əhəmiyyət kəsb etdiyini vurğulamışdır.

A.Qocayev çıxışının sonunda Çernobıl Əlilləri İttifaqının Binəqədi rayon şöbəsinin sədri M.Ağayevə rayonun sosial-iqtisadi həyatında fəal iştirakına görə icra hakimiyyətinin Fəxri fərmanını təqdim etmişdir.

Görüşdə Çernobıl Əlilləri İttifaqının Binəqədi rayon şöbəsinin sədri Məhərrəm Ağayev onlara göstərilən diqqət və qayğıdan, əlillərin dövlət tərəfindən himayə olunmasından, sosial problemlərinin həllinə həssaslıqla yanaşılmasından razılığını ifadə etmişdir. M.Ağayev göstərmişdir ki,sovet dövründə xilasetmə işlərində çalışan insanlar üçün müəyyən pulsuz müalicələr nəzərdə tutulsa da SSRİ dağıldıqdan sonra bu məsələlər arxa plana keçmiş və bu insanların çətin günləri başlamışdır. 1993-cü il dekabr ayının 6-da ümummilli lider Heydər Əliyev Çernobılda baş vermiş qəzanın nəticələrinin aradan qaldırılmasında iştirak etmiş Azərbaycan vətəndaşlarının statusu haqqında qanun imzalamışdır. Həmin vaxtdan başlayaraq çernobılçılara dövlət tərəfindən daimi qayğı göstərilir. Bu qayğı Azərbaycan Prezidenti İlham Əliyevin də diqqət mərkəzindədir. Dövlət başçısının 22 aprel 2011-ci il tarixli sərəncamı bunun bariz nümunəsidir.

Tədbirdə çernobılçılara göstərdiyi diqqət və qayğıya görə RİH başçısı A.Qocayevə respublika Çernobıl Əlilləri İttifaqının sədri tərəfindən imzalanan Fəxri fərman təqdim edilmişdir.

Sonda bir qrup çernobılçıya rayon icra hakimiyyəti tərəfindən maddi yardım göstərilmişdir.

Vaqif BAYRAMOV

Xalq qəzeti.- 2011.- 26 aprel.- S. 6.