XIV TÜRKSOY rəssamlar görüşü keçirilir

Türkdilli ölkələrin müstəqilliklərinin bərpa olunmasının 20 illiyi münasibətilə Türkiyənin Bitlis vilayətində "XIV TÜRKSOY rəssamlar görüşü" keçirilir. Görüşdə iştirak edən rəssamların əsərləri tədbirin sonunda TÜRKSOY-a hədiyyə olunaraq, təşkilatda saxlanılacaqdır.

Çəkilmiş rəsmlər TÜRKSOY mədəniyyət nazirləri tərəfindən qiymətləndiriləcək və birinci yerə layiq görülən əsərin sahibinə TÜRKSOY tərəfindən 3000 ABŞ dolları məbləğində pul mükafatı veriləcəkdir. Bu il 14-cü dəfə keçirilən rəssamlar görüşündə Azərbaycandan istedadlı rəssam Əlyar Alımirzəyev iştirak edir.

Xatırladaq ki, TÜRKSOY rəssamlar görüşləri 1997-ci il türkdilli ölkələrin Mədəniyyət Nazirləri Daimi Şurasının toplantısında qəbul olunmuş qərarla keçirilir. Hər il keçirilən görüşlərdə türk dünyasının dörd bir yanından tanınmış və istedadlı rəssamlar iştirak etmişlər. Bu sənət elçilərinin ərsəyə gətirdikləri və bu günə kimi TÜRKSOY-a təqdim etdikləri rəsm əsərlərinin sayı 700-ü keçmişdir. Sayı ildən ilə artan bu kolleksiyanın gələcəkdə TÜRKSOY Rəsm Muzeyinə çevrilməsi nəzərdə tutulub.

Türk dünyası rəsm sənətini və bu sənət vasitəsi ilə ölkələrin, xalqların mədəniyyət və incəsənətinin zənginliyini əks etdirən əsərlər dünyanın önəmli mədəniyyət və incəsənət mərkəzlərində sərgilənir, hər dəfə də sənətsevərlər tərəfindən böyük maraqla qarşılanır. Görüşlər zamanı çəkilən əsərlərin kataloqları hazırlanaraq mühüm sənət mərkəzlərinə göndərilir.

Avqustun 5-dən başlanan sərgi ayın 25-nə qədər davam etdiriləcək.

M.MUKƏRRƏMOĞLU

Xalq qəzeti.- 2011.- 7 avqust.- S. 6.