Salyan: Yeni quruculuq dövrünün uğurları artır

Genişmiqyaslı tədbirlər nəticəsində rayonun siması sürətlə dəyişir

Son illərdə Azərbaycan Respublikası sosial-iqtisadi inkişaf sahəsində qazandığı uğurlarla təkcə Cənubi Qafqaz respublikaları arasında deyil, bütün MDB məkanında öncül mövqelərə sahib olub. Bu gün ölkəmizin inkişaf tempi haqqında yaxın xarici ölkələrdə ciddi söhbətlər gedir. Avropa Birliyi enerji sahəsində Azərbaycanla əməkdaşlığı özünün prioritet vəzifəsi elan edib. Və bu əməkdaşlıq təkcə enerji sektoru ilə məhdudlaşmır, bir sıra digər sahələri də əhatə edir. Artıq bir neçə ildir ki, nüfuzlu beynəlxalq təşkilatların maliyyə hesabatlarında Azərbaycanın sosial-iqtisadi uğurları ardıcıl olaraq qeyd edilir. Dünya İqtisadi Forumunun hesabatlarına görə, Azərbaycan bu gün rəqabət qabiliyyətinə görə MDB məkanında birinci yerdədir. İnsan inkişafı indeksi ilə əlaqədar ən böyük irəliləyiş də Azərbaycanın payına düşür.

Bu da təsadüfi deyildir. Ölkə iqtisadiyyatının dinamik inkişafının baza prinsipləri Azərbaycan xalqının ümummilli lideri Heydər Əliyev tərəfindən qoyulmuşdur. Prezident İlham Əliyevin rəhbərliyi dövründə isə ölkənin təkcə siyasi deyil, həm də iqtisadi tərəqqisi, demək olar ki, hər gün nəzarətdə və diqqət mərkəzində saxlanılmış, qarşıya qoyulan sosial-iqtisadi vəzifələrlə bağlı konkret plan və proqramlar cəsarətlə icra edilmişdir. Nəticədə Azərbaycan regionun ən qüdrətli dövlətinə çevrilmiş, iqtisadi uğurlar təkcə neft və qaz sahəsini deyil, bütün sahələri əhatə etmişdir.

Sosial problemlərin həlli iqtisadi inkişafdan keçir

Bütün ölkədə müşahidə edilən sosial-iqtisadi inkişafı Salyan rayonunda da görmək mümkündür. Prezident İlham Əliyevin 14 aprel 2009-cu il tarixli fərmanı ilə təsdiq edilmiş "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı" çərçivəsində rayonda davamlı olaraq mühüm əhəmiyyətli işlər görülür. 2011-ci ilin birinci yarısında sosial-iqtisadi göstəricilər artmış, nəticədə məhsul buraxılışının həcmi 6,7 faiz artaraq 73 milyon 696 min manat olmuşdur. Sənaye məhsulunun ümumi həcmi 8,5 faiz, pərakəndə ticarət dövriyyəsi 12,1 faiz, əhaliyə göstərilən pullu xidmət 17,6 faiz, kənd təsərrüfatı məhsullarının həcmi 5,3 faiz, rabitə işlərinin həcmi 15,8 faiz artmış, əsas kapitala yönəldilən investisiyanın həcmi 10,9 dəfə artaraq 41 milyon 118 min manat olmuşdur. Bir nəfərə düşən orta aylıq əmək haqqı 192 manata çatmışdır.

Əhalinin sosial problemlərinin həlli daim rayon icra hakimiyyətinin diqqət mərkəzindədir. Rayonda 2600 ailənin 11180 nəfər üzvü sosial yardım alır. Hazırda 5077 nəfərə sosial müavinət ödənilir. İlin birinci yarısında rayon büdcəsinin gəlirləri 2 milyon 694 min manata qarşı 3 milyon 460 min manat, yəni 128,5 faiz yerinə yetirilmişdir. Büdcə təşkilatlarında çalışan işçilərin əmək haqları, pensiya və müavinətlər plastik kartlarla ödənilir. Bu məqsədlə "Kapital Bank"ASC-nin rayon filialı tərəfindən 7, o cümlədən, kəndlərdə 3 bankomat quraşdırılmış, Yenikənd ərazisində 1 bankomatın yaxın günlərdə quraşdırılması nəzərdə tutulmuşdur.

Rayonda yeni iş yerlərinin yaradılması, işsiz vətəndaşların, xüsusilə gənclərin, sosial müdafiəyə daha cox ehtiyacı olan insanların məşğulluğunun gücləndirilməsi üçün rayonda hər il yeni emal müəssisələri və xidmət sahələri yaradılır. İdarə, müəssisə, təşkilat və özəl strukturlarda olan boş iş yerləri vətəndaşlara təklif olunur. Bu ilin birinci yarısında 751 iş yeri yaradılmışdır ki, bunun da 303-ü daimidir. Bütün bunlarla yanaşı, rayonun idarə, müəssisə və təşkilatlarında 133, dövlət qulluğu vəzifələri üzrə 10 boş (vakant) iş yerləri vardır.

2011-ci ilin birinci yarısınıda Salyanda tikinti-quruculuq və abadlıq işləri geniş vüsət almışdır. Qarabağ müharibəsi əlilləri və şəhid ailələri üçün 16 mənzilli yaşayış binası, 8 saylı Ərazi Dövlət Nəzarəti İdarəsinin inzibati binası, Abadkənd və Parça Xələc kəndlərində yeni poçt şöbəsi tikilib istifadəyə verilmişdir. Yararsız vəziyyətə düşmüş XIX əsrin tarixi abidəsi olan Cümə məscidində təmir-bərpa işləri başa çatdırılmışdır. Hazırda Heydər Əliyev Fondunun dəstəyi ilə Uşaqların Texniki Yaradıcılıq Mərkəzi və Uşaq Kitabxanası üçün yeni binanın tikintisində son tamamlama işləri aparılır. Fövqaladə Hallar Nazirliyinin xətti ilə Kür çayının daşqını zamanı ziyan çəkmiş ailələr üçün əlavə olaraq şəhər ərazisində 59, Qaraçala qəsəbəsində, Çuxanlı, Kərimbəyli və Qarabağlı kəndlərində 11 evin tikintisi davam etdirilir. Şəhərin küçələrində 6100 metr uzunluğunda yağış sularının axıdılması üçün küveytlər qazılıb mişar daşı ilə hörülmüşdür. "Kür" mehmanxanasında, Salyan Olimpiya İdman Kompleksinin stadionunda təmir və tikinti işləri görülür. Prezident İlham Əliyevin bölgəyə səfəri zamanı aparılan tikinti-quruculuq və abadlıq işləri ilə tanış olması və görülən işləri yüksək qiymətləndirməsi rayon ictimaiyyətini ruhlandırmış, qurub-yaratmaq əzmini artırmışdır. Prezidentin 19 aprel 2011-ci il tarixli "Astara, Masallı və Salyan rayonlarının sosial-iqtisadi inkişafinin sürətləndirilməsi ilə bağlı tədbirlər haqqında" sərəncamına əsasən, 2011-ci ilin dövlət büdcəsində nəzərdə tutulmuş Prezidentin ehtiyat fondundan Salyan Rayon İcra Hakimiyyətinə 2 milyon manat, Nazirlər Kabinetinin 2011-ci il 16 iyun tarixli sərəncamı ilə icra hakimiyyətinin inzibati binasının tikintisi üçün 2 milyon manat, Azərbaycan Müəllimlər İnstitutu Salyan filialının inzibati və yataqxana binalarının əsaslı təmiri üçün 500 min manat, şəhər ərazisində evlərin dam örtüyünün dəyişdirilməsi üçün 500 min manat vəsait ayrılmış və bu işlərə başlanmışdır.

Abadlaşdırma ümumölkə tədbiridir

Şəhərin giriş hissəsindən başlayaraq Ələt-Astara yolunun şəhər ərazisindən keçən hissəsində, Dövlət Bayrağı meydanında, Y.Qasımov, X.R.Ulutürk, T.Xəlilbəyli, Heydər Əliyev və Nizami küçələrində genişmiqyaslı quruculuq-abadlıq işləri aparılır. Eni 8 metr, hündürlüyü 11 metr olan "Salyan şəhəri" göstəricisi klassik memarlıq üslubunda tikilmiş və hazırda burada son tamamlama işləri aparılır. 2034 metr uzunluqda istinad divarı tikilmiş və 3254 kvadratmetr sahə "Gülbaxt" ağ lay daşı ilə üzlənmişdir. Dövlət Bayrağı meydanında, "Heydər bulağı", "20 Yanvar" abidə kompleksində, "1941-45-ci il Böyük Vətən müharibəsi" abidə komplekslərinin ətrafında ümumilikdə 1811 kvadratmetr "Gülbaxt" ağ lay daşı ilə üzlənmə işləri görülmüşdür. Şəhərdəki mağazaların və digər sosial obyektlərin fasadları 24076 kvadratmetr "Gülbaxt" ağ lay daşı ilə üzlənmişdir. Y.Qasımov küçəsindəki 4 saylı binanın fasadında 4021, 6 saylı binanın fasadında 3464, X.R.Ulutürk küçəsindəki 28 saylı binanın fasadında 1682, 30 saylı binanın fasadında 3464, T.Xəlilbəyli küçəsindəki 150 saylı binanın fasadında 3464 kvadratmetr sahə "Gülbaxt" ağ lay daşı ilə üzlənərək istifadəyə verilmişdir. Hazırda T.Xəlilbəyli küçəsi 109, 111, 113, 115, 164, 146 saylı iki mərtəbəli kommunal evlərin fasadlarında yenidənqurma işləri aparılır, ağ lay daşı ilə üzlənmə işləri davam etdirilir. X.R.Ulutürk və T.Xəlilbəyli küçələrində 40-a qədər fərdi evin fasadı və hasarı yenidən qurulmuşdur və milli ornamentə uyğun ağ lay daşı ilə üzlənmə işləri görülür. Rayon mərkəzindəki küçələrə 5,8 kilometr uzunluğunda asfalt döşənmişdir. Hazırda şəhərin bütün bina və küçələrində işıqlandırma sistemi əsaslı surətdə yenidən qurulur.

Aparılan belə irimiqyaslı abadlıq-quruculuq işləri fonunda təəssüflə qeyd olunmalıdır ki, bəzi məkrli insanlar tərəfindən şayiələr yayılması, işlərə əngəl törədilməsi halları da baş vermişdir. Elə insanlar olmuşdur ki, işə dəstək vermək əvəzinə, özlərinə məxsus ticarət-iaşə obyektlərini təmir etməkdən yayınmış, eyni zamanda, böhtan xarakterli şikayətlər edərək işə mane olmağa çalışmışlar. Lakin rayon icra hakimiyyətinin başçısı Tahir Kərimovun da haqlı olaraq bildirdiyi kimi, xeyirxah işlər görənləri heç bir hədə-qorxu və şər-böhtan yayındıra bilməz. Əsas odur ki, dövlət başçısı Salyanda həyata keçirilən işləri yüksək qiymətləndirir. Bu da sözsüz ki, gecəsini gündüzünə qatan insanları daha həvəslə çalışmağa ruhlandırır.

Salyanın təhsil müəssisələrində də müəyyən işlər aparılır. Düzənlik kəndində 180 şagird yerlik yeni məktəb binasının tikintisinə başlanılmış, 480 şagird yerlik Qarabağlı kənd tam orta məktəbi binasının tikintisi üçün torpaq sahəsi ayrılmış, texniki sənədlər hazırlanaraq Təhsil Nazirliyinə göndərilmişdir. Boranıkənd və Yolüstü kənd orta məktəbləri üçün sənədlər hazırlanmışdır.

İşıq, qaz və su təchizatı yaxşılaşıb...

Elektrik təchizatında normal vəziyyəti təmin etmək üçün müəyyən işlər görülmüşdür. 20 ədəd 110/35 kv-luq və 215 ədəd 10/6/0,4 kv-luq transfarmatorlar əsaslı təmir edilmiş, 387 ədəd 10/6/0,4 kv-luq yarımstansiyada cari təmir işləri aparılmışdır. 7,1 kilometr uzunluğunda yararsız naqillər dəyişdirilmiş, Arbatan, Parça Xələc, Yolüstü, Varlı, Kürsəngi kəndlərində giriş sayğacları quraşdırılmışdır. Ümumilikdə 1456 ədəd sayğac quraşdırılmışdır. Şəhərin "SİP" kabelə keçməsi ilə əlaqədar 431 ədəd ağac dirək, 290 ədəd dəmir və beton, Arbatan kəndində 380 ədəd dayaq basdırılmış, 15040 metr SİP kabel çəkilmiş, 466 ədəd smartkart tipli sayğac quraşdırılmışdır. Hazırda şəhər ərazisində beton dirəklərin daha müasir metal dirəklərlə əvəz edilməsinə və smart tipli sayğacların quraşdırılmasına başlanmışdır. Salyan şəhərinin və kəndlərin qaz təchizatının yaxşılaşdırılması məqsədilə bir sıra işlər görülmüşdür. 1512 metr uzunluğunda yeni qaz kəməri çəkilmiş, şəhər ərazisində 800 metr uzunluğunda 200 millimetr diametrli polietilen yeraltı qaz kəməri çəkilərək şəbəkəyə qoşulmuşdur. Həyətlərdəki qaz xətləri və sayğaclar kənara çıxarılmışdır. Sənaye cihaz markalı qaz sayğacları yeni temperatura korrektə olunmuş qaz sayğacları ilə əvəz olunmuşdur. Pambıqkənd kəndində 170 ədəd və Bəşirbəyli kəndində 112 ədəd sayğac quraşdırılmışdır. Yolüstü kəndi üzrə ümumi uzunluğu 29028 metr olan daşıyıcı və kənddaxili qaz kəmərləri birpilləli, polietilen borularla çəkilmiş, 383 ədəd sayğac quraşdırılmış və hazırda sayğaclaşma işləri davam etdirilir.

Rayonda içməli su təchizatı və kanalizasiya xidmətinin yaxşılaşdırılması istiqamətində mühüm tədbirlərin həyata keçirilməsi nəzərdə tutulmuşdur. Prezident İlham Əliyevin 8 fevral 2011-ci il tarixli fərmanı ilə əhalinin içməli su təchizatı və kanalizasiya xidmətlərinə görə borclarının silinməsini salyanlılar da yüksək minnətdarlıq və razılıq hissi ilə qarşılamışdır.

Şəhərin sutəmizləyici stansiyasında nasoslar, Kürüstü nasosxanasında elektrik mühərriki və 350 metr daxili su xətti təmir edilmişdir. Plasmas yaşayış massivində yeni tikilən yaşayış evləri üçün 1100 metr mərkəzi, 1500 metr daxili su xətti çəkilmişdir. Azərbaycan və Yaponiya hökumətləri arasında "Kiçik şəhərlərin su təchizatının və kanalizasiya sisteminin təkmilləşdirilməsi" çərçivəsində Salyan şəhərinin su və kanalizasiya sisteminin yenidən qurulması üçün 68 milyon manatlıq işlərin görülməsi, 2012-ci ildə 30-40 ildən bəri istismarda olan şəhərin su və kanalizasiya sisteminin yenidən qurulması nəzərdə tutulmuşdur.

Əhaliyə və idarə-təşkilatlara rabitə xidmətinin həcminin və keyfiyyətinin yaxşılaşdırılması məqsədilə rayon mərkəzində 5000 nömrəlik ATSKU tipli stansiya 4500 nömrəlik NGN tipli EATS-lə əvəz edilmişdir. Rayonda istifadəyə verilmiş 6068 NN tutumlu NGN tipli EATS üzərindən 968 abunəçiyə geniş zolaqlı internet və diğər multimediya xidmətlərinin göstərilməsinə başlanılmışdır. Dəmiryol qəsəbəsində, Arbatan, Aşağı Kürkənd, Kürqaraqaşlı kəndlərində internet klublar yaradılmışdır.

Etibarlı ərzaq təminatı yaradılır

"Azərbaycan Respublikası regionlarının sosial-iqtisadi inkişafı Dövlət Proqramı" (2009-2013-ci illər) və "2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı"nın icrası ilə əlaqədar aqrar sahədə bir sıra tədbirlər həyata keçirilmişdir. 2010-cu ilin payızında 2011-ci ilin məhsulu üçün 16531 hektar sahədə taxıl əkini aparılmışdır ki, bunun da 6335 hektarını buğda, 10196 hektarını isə arpa əkin sahələri təşkil edir. Rayonda hər hektardan məhsuldarlıq 30,5 sentner olmaqla 43398 ton taxıl istehsal olunmuşdur ki, bu da ötən ilin müvafiq dövrü ilə müqayisədə 6706 ton çoxdur. Bu il Salyanda 50 min tona yaxın taxıl istehsalı gözlənilir. Təsərrüfatlarda 9525 hektar sahədə yazlıq əkinlər aparılmışdır ki, bunun da 284 hektarını qarğıdalı, 308 hektarını yazlıq arpa, 1269 hektarını pambıq, 182 hektarını günəbaxan, 4222 hektarını təzə yonca, 200 hektarını silosluq qarğıdalı, 449 hektarını kartof, 1420 hektarını tərəvəz, 1267 hektarını bostan sahələri təşkil edir. Ümumilikdə rayonda cəmi əkinlər 43065,0 hektar təşkil edir ki, bu da ötən ilin müvafiq dövrü ilə müqaisədə 2 min hektar çoxdur.

İlin birinci yarısında iribuynuzlu heyvanların baş sayı ötən ilin müvafiq dövrü ilə müqayisədə 1,7 faiz artaraq 61104 olmuş, ana inəklərin baş sayı 32636, qoyun və keçilərin baş sayı 180625 olmuşdur. 1 iyula rayonda ət istehsalı 4075,3 ton, ötən ilin müvafiq dövrü ilə müqayisədə 8,6 faiz çox, süd istehsalı 20883 ton, ötən ilin müvafiq dövrü ilə müqayisədə 6,1 faiz çox, yumurta istehsalı 13300 min ədəd, ötən ilin müvafiq dövrü ilə müqayisədə 8 faiz çox, yun istehsalı 325,3 ton, ötən ilin müvafiq dörü ilə müqayisədə 4 faiz çox olmuşdur. 15 süni mayalama məntəqəsi tərəfindən 1072 inək və düyədə süni mayalama işləri aparmaqla, 481 sağlam buzov alınmışdır.

Ümumilikdə rayonda 39 milyon 344 min manatlıq kənd təsərrüfatı məhsulları istehsal olunmuşdur ki, bu da 2010-cu ilin müvafiq dövrü ilə müqayisədə 1 milyon 997 min manat və ya 5,3 faiz çoxdur. Bu ilin altı ayında rayonda kənd təsərrüfatı məhsulları istehsalçılarına dövlət tərəfindən maliyyə dəstəyi davam etdirilmişdir. 17 kənd ərazi komissiyası üzrə 1594 istehsalçıya becərdikləri 5184,34 hektar buğda sahəsinə görə 207373 manat yardım ayrılması barədə qərar qəbul edilmişdir. 2011-ci ilin ikinci rübündə 11232 nəfər kənd təsərrüfatı məhsulları istehsalçısına əkib becərdikləri 32947,51 hektar əkin sahələsinə görə 1milyon 317 min 900 manat subsidiya verilməsi üçün sənədlər ərazi komissiyaları və rayon komissiyası tərəfindən hesablanaraq Respublika Komissiyasına təqdim edilmişdir. Kənd təsərrüfatı məhsulları istehsalçılarına güzəştli şərtlərlə "Aqrolizinq" ASC-nin Salyan filialı və "Aqrokimya" MMC tərəfindən 1100 ton mineral gübrə (azot və fosfor) satılmışdır.

Qeyri-neft sektorunun, o cümlədən, kənd təsərrüfatının inkişaf etdirilməsi, yeni istehsal sahələrinin yaradılması istiqamətində bir sıra tədbirlər həyata keçirilmişdir. İqtisadi İnkişaf Nazirliyi Sahibkarlığa Kömək Milli Fondunun kreditləri və sahibkarların vəsaiti hesabına yeni istehsal və emal sənayesi sahələrinin yaradılması istiqamətində işlər aparılır. Hazırda Çuxanlı kəndi ərazisində "Şəfa" Quşçuluq ASC-nin istehsal gücü 450 min ədəd yumurta olan inkubator sexinin tikitisi davam etdirilir. Qaraçala qəsəbəsi ərazisində fəaliyyət göstərən "Hacı Camalxan" kəndli fermer təsərrüfatı tərəfindən 10 min tonluq taxıl anbarının tikintisi başa çatdırılıb, 2400 başlıq beynəlxalq standartlara uyğun süd-əmtəə kompleksinin tikintisi isə davam etdirilir. "Ələddin Fermer" MMC tərəfindən illik istehsal gücü 580 ton olan meyvəqurutma sexinin tikintisinə başlanılmışdır. "Dövlət vəsaiti hesabına idxal olunan damazlıq heyvanların 50 faiz güzəştlə lizinq yolu ilə heyvandarlıqla məşğul olan kənd təsərrüfatı məhsulları istehsalçılarına satılması qaydaları"na əsasən, "Nurgün" aqroşirkətinin Salyan filialına Avstriyadan lizinq yolu ilə gətirilmiş 62 cins düyənin 58-dən sağlam bala alınmışdır.

Salyanda kənd təsərrüfatının inkişaf etdirilməsi üçün torpaqların meliorativ cəhətdən yaxşılaşdırılması, kənd təsərrüfatı bitkilərinin suvarma suyu ilə vaxtında təmin edilməsi mühüm əhəmiyyət kəsb edir. Bu məqsədlə torpaq sahələrinin su təminatının və meliorativ vəziyyətinin yaxşılaşdırılması məqsədilə 233 kilometr kollektor dren şəbəkəsi, 346 kilometr suvarma kanalı lildən təmizlənmişdir.

Dövlət başçısı İlham Əliyevin təsdiq etdiyi bioloji müxtəlifliyin qorunması və davamlı istifadəsinə dair Milli Strategiya Fəaliyyət Proqramının icrası ilə əlaqədar Salyanda bir sıra tədbirlər həyata keçirilmişdir. Rayon ərazisində olan biomüxtəliflikləri qoruyub saxlamaq üçün yaşayış yerlərinin ətrafında, park və xiyabanlarda yaşıllıqların salınmasına xüsusi diqqət yetirilmişdir. İlin birinci yarısında rayon ərazisində 15 min 800 ədəd ağac və gül kolları əkilmiş, onlara aqrotexniki qaydalara uyğun qulluq göstərilmişdir. Əkilən ağacların əksər hissəsini həmişəyaşıl ağaclar (Eldar şamı, sərv, küknar) təşkil etmişdir.

Yeniliklər salyanlıların da ürəyincədir

Rayonun sosial-iqtisadi inkişafı ilə bağlı söhbət etdiyimiz salyanlılar da son vaxtlar burada aparılmış abadlıq - quruculuq işlərindən həvəslə danışdılar. Təhsil İşçiləri Azad Həmkarlar İttifaqı Salyan Rayon Komitəsinin sədri Yaqut Ələsgərova bildirdi ki, Tahir Kərimovun rayona rəhbərliyə başladığı cəmi bir neçə ay ərzində, sözün əsil mənasında, genişmiqyaslı tədbirlər görülür. Bu işlər, əlbəttə, bütün salyanlıların, o cümlədən, təhsil işçilərinin də ürəyincədir.

Ağsaqqal Hacı Xeyrulla Əliyev də icra başçısının Salyanın abadlaşdırılması, sosial-iqtisadi inkişafı üçün əlindən gələn hər şeyi etdiyini məmnunluqla vurğuladı. Görülmüş işlər nəticəsində rayonun simasının əsaslı dərəcədə dəyişdiyini deyən ağsaqqalın sözlərinə görə, əhalinin sosial vəziyyətində də nəzərəçarpan irəliləyişlər baş verib. İndi ən başlıcası odur ki, hər bir sakin özünü sosial cəhətdən tamamilə müdafiə olunmuş hiss edir.

Prezident İlham Əliyevin xalqa yüksək qayğısından razılıqla söz açan ağsaqqal Piralı Musayev isə qeyd etdi ki, ölkə başçısının Salyana yeni və uğurlu təyinatı salyanlıların, demək olar ki, hamısında illərlə yığılıb qalmış problemlərin tezliklə həllinə ümid yaradır. Artıq qısa müddət ərzində hiss edilir ki, insanlara qayğı, doğrudan da artıb, sosial ədalət prinsiplərinə ciddi əməl edilir.

Çernobıl Əlilləri Cəmiyyəti rayon təşkilatının sədri Rasim İbrahimovun sözlərinə görə, rayonda digər imtiyazlı qruplar kimi, Çernobıl əlilləri də dövlətin qayğı və diqqəti ilə əhatə olunub. Onların arzu və istəkləri indi daha yaxşı dinlənilir və onların gerçəkləşməsi üçün imkan daxilində hər şey edilir. Həmsöhbət olduğumuz salyanlıların hamısı son aylar ərzində rayonda formalaşmış sağlam ab-havadan, işgüzar mühitdən razılıq edərək məmnunluq hissi ilə vurğuladılar ki, ölkə başçısı İlham Əliyevin Salyana diqqət və qayğısı ulu öndər Heydər Əliyevin Salyana məxsusi münasibətini xatırladır. Təsadüfi deyil ki, salyanlılar ümummilli liderin 1969-cu ildə ölkə başçısı kimi ilk səfərini Salyana etdiyini, ikinci dəfə hakimiyyətə qayıtdıqdan sonra da bu ənənəni davam etdirərək seçkilər zamanı və digər əlamətdar vaxtlarda da ilk olaraq məhz bu rayona gəldiyini həmişə xoş xatirələrlə yad edirlər. Salyanın yaxın şanlı keçmişində ulu öndərin misilsiz rolu olduğunu və onun layiqli davamçısı Prezident İlham Əliyev tərəfindən bu gün rayonun tarixində və taleyində yeni bir mərhələnin başlandığını dilə gətirən həmsöhbətlərim fərəhlə bildirdilər ki, yaxın bir neçə il ərzində səliqə-sahmanı, yaraşığı göz oxşayan, tamamilə müasir bir Salyanın sakinləri olacaqları üçün indidən özlərini xoşbəxt sayırlar.

... Azərbaycanın cənub bölgəsinin girişi Salyandan başlayır. Belə bir nöqtədə yerləşən strateyi əhəmiyyətli rayonun tərəqqisi və dirçəlişi təkcə salyanlılar tərəfindən deyil, eyni zamanda, bu bölgənin bütün əhalisi tərəfindən müşahidə olunur və sözün əsil mənasında razılıqla, rəğbətlə qarşılanır. Rayonu başdan-başa ağuşuna almış yeniləşmə və inkişaf ruhu həm də Salyanın daha çıraqban günlərinin qarşıda olduğunun müjdəsini verir.

Səməd HÜSEYNOĞLU

Xalq qəzeti.- 2011.- 11 avqust.- S. 4.