Azərbaycanda məktəb tikintisi prioritet sahədir

Əsası ulu öndər tərəfindən qoyulan müstəqil Azərbaycanın təhsil siyasəti bu gün ölkə Prezidenti cənab İlham Əliyev tərəfindən uğurla davam etdirilməkdədir. Aparılan islahatların nəticəsində ölkəmizdə təhsil sahəsi sürətlə inkişaf etmiş, milli təhsilimizin dünyaya inteqrasiyası sürətlənmişdir.

Bu gün Azərbaycanda məktəb tikintisi prioritet sahələrdən biridir və bu sahədə bir neçə Dövlət Proqramı qəbul olunmuşdur. Əldə etdiyimiz məlumata görə, son illər Azərbaycanda yeni tikilən, əlavə korpuslar inşa edilən, əsaslı təmir olunan məktəblərin sayı 2000-i keçmişdir. Məktəblərin infrastrukturunun yeniləşdirilməsi sahəsində Heydər Əliyev Fondunun müstəsna xidmətləri olmuşdur. Fondun təşəbbüsü ilə 300-ə yaxın yeni məktəb, uşaq bağçası, uşaq evi, internat məktəbi binası tikilib istifadəyə verilmiş, əsaslı təmir və bərpa olunmuş, müasir avadanlıqlarla təchiz edilmişdir. Heydər Əliyev Fondunun təşəbbüsü ilə 2010-cu ildə Gürcüstanda soydaşlarımızın yaşadığı bölgələrdə 3 məktəb - Tbilisi şəhər 73, Qardabani şəhər 3 və Dmanisi şəhər 2 nömrəli məktəblər əsaslı təmir və bərpa edilmiş, müasir avadanlıqlarla təchiz olunmuşdur.

Son illər məktəb tikintisi ilə bağlı bir neçə fakta müraciət edək. 2009-cu ildə 68 yeni məktəb və əlavə korpuslar tikilib, 28 məktəb əsaslı təmir olunub, 87 məktəbin istilik sistemi bərpa edilib. 2010-cu ildə 17434 yerlik 49 yeni məktəb inşa edilib, 10 məktəb üçün 1418 yerlik əlavə korpuslar tikilib, 7 məktəb əsaslı təmir olunub, 356 məktəbdə təmir işləri aparılıb, 6980 yerlik 25 yeni məktəb binasının tikintisinə başlanılıb. Əlbəttə, yeni məktəblər həm də yeni avadanlıqlarla təmin olunub.

Dövlət Proqramına əsasən 2005-2010-cu illərdə 1100 məktəb 4 adda zəruri avadanlıqla - şagird masası, yazı löhvəsi, müəllim masası və stulu ilə təchtz edilmişdir.

Məktəb tikintisi digər Dövlət Proqramında da nəzərdə tutulur. Məsələn, regionların sosial-iqtisadi inkişafı, yoxsulluğun azaldılması, məcburi köçkünlərin həyat şəraitinin yaxşılaşdırılması və məşğulluğunun artırılması ilə bağlı dövlət proqramlarında məktəb tikintisinə də xüsusi önəm verilir. Bakı və Abşeronun sosial-iqtisadi inkişafı ilə bağlı qəbul olunan dövlət proqramlarında yeni məktəblərin tikintisi, eyni zamanda, mövcud məktəblərin əsaslı təmirinə xüsusi diqqət yetirilir.

Hazırda Bakının təhsil müəssisələri nəhəng tikinti meydançasını xatırladır. "2011-2013-cü illərdə Bakı şəhərinin və qəsəbələrinin sosial-iqtisadi inkişafına dair Dövlət Proqramına uyğun olaraq Bakı şəhərində 6320 şagird yerlik məktəb binalarının tikintisi həyata keçirilir. Ümumiyyətlə, son illərdə Bakıda 30 yeni məktəb, 28 tədris korpusu istifadəyə verilib, əksər tədris müəssisələrinin istilik problemi həll edilib. Söz yox ki, bütün bunlar təhsil şəraitinin yaxşılaşdırılmasına, təhsilin maddi-texniki bazasının möhkəmləndirilməsinə əsaslı təsir göstərir.

Yeni təhsil müəssisələrinin tikintisi, mövcud məktblər üçün əlavə korpusların inşası, onların əsaslı təmiri, müasir avadanlıqlarla, laboratoriyalarla təminatı, istilik sisteminin bərpası nəticəsində ümumilikdə ölkə üzrə 1 milyondan çox şagirdin, yəni bütün şagirdlərin 80 faizinin təlim şəraiti yaxşılaşdırılmışdır. Məktəb tikintisi sahəsində həyata keçirilən proqramlar nəticəsində ikinövbəli məktəblər 73 faizdən 44-ə, ikinci növbədə təhsil alan şagirdlər 34,5 faizdən 21-ə enmişdir.

Bu gün Azərbaycanın elə regionu yoxdur ki, orada yeni məktəb binası tikilməsin, mövcud məktəblər təmir edilməsin. Ümumiyyətlə, ötən il təhsil müəssisələrinin tikintisi və təmiri üçün büdcədən 80 milyon manat vəsait ayrılmışdır. Həmin vəsaitin 50 milyon manatı ötən ildən yarımçıq qalmış məktəblərin tikintisinə və təmirinə sərf olunmuş, qalan vəsait isə yeni məktəb binalarının tikintisinə və təmirinə yönəldilib. Təhsil naziri Misir Mərdanovun hələ mart ayında Lent.az saytına verdiyi müsabiqədə bildirdiyinə görə bu vəsait yeni məktəblərin tikintisinə kifayət etmir. Çünki görüləsi işlər daha çoxdur.

Yeni dərs ilində Azərbaycanda yeni məktəblərin də açılışı olacaq. Ancaq ilin sonuna kimi daha bir neçə yeni məktəb də istifadəyə veriləcək.

Ölkə Prezidenti cənab İlham Əliyev bu yaxınlarda Bakının Yasamal rayonunun 225 və Nəsimi rayonunun 35 nömrəli məktəblərində olmuş və buradakı təmir işlərinin gedişi ilə maraqlanmışdır. Ölkə başçısı mütəmadi olaraq məktəb tikintisi ilə tanış olmuş, dəfələrlə Prezidentin Ehtiyat Fondundan yeni məktəblərin tikintisinə vəsait ayrılmasına sərəncam vermişdir.

Yaxın gələcəkdə Azərbaycanın bütün ümumtəhsil məktəblərinin yeniləşəcəyi üçün ölkədə davamlı iş aparılır.

M.MÜKƏRRƏMOĞLU

Xalq qəzeti.- 2011.- 17 avqust.- S. 6.