Azərbaycanın 2003-cü ildən sonrakı inkişafı beynəlxalq aləmdə örnək kimi qəbul edilir

Bizim bütün təşəbbüslərimiz xalq tərəfindən dəstəklənir. Əslində, bizim siyasətimiz xalq siyasətidir... Bu gün Azərbaycan sürətlə inkişaf edən, dinamik, müasir ölkədir.

İlham ƏLİYEV,

Azərbaycan Respublikasının Prezidenti

Tarixən, bütün dövlətlərin inkişafı müxtəlif mərhələlərlə xarakterizə edilib. Hətta ən iti sürətlə inkişaf edən ölkələrdə də müxtəlif illər, on illər fərqli şəkildə səciyyələndirilib. Azərbaycan da istisna təşkil etmir. 1991-ci ildə öz dövlət müstəqilliyini bərpa edən respublikamız elə ilk illərdəcə geriləmə, iqtisadi cəhətdən çökmə, siyasi cəhətdən parçalanma, hərbi cəhətdən məğlubiyyətlər yaşamağa məcbur oldu. Qısa müddət ərzində tez-tez əldən-ələ keçən siyasi hakimiyyət əcaib bir hakimiyyətsizlik formalaşdırırdı. 1993-cü ilin yayından - Böyük Qurtuluşdan 3 oktyabr Prezident sekçilərinədək olan qısa dövr əsəblərin bir qədər sakitləşdiyi aylar olsa da, xalqın həyəcanı hələ davam edirdi. Ölkə əhalisi görür və bilirdi ki, xalq üçün yaşayan, müstəqil Azərbaycan dövlətini əbədi etməyə çalışan siyasi liderin hakimiyyətə gəlməsini istəməyən xarici qüvvələr çoxdur. Ona görə də ölkə əhalisi Heydər Əliyevi daha böyük iradə, qətiyyət və sədaqətlə dəstəkləməyə başladı. Nəticədə, ulu öndər dövlət başçısı seçildi və ... tarıma çəkilmiş əsəblərin sakitləşməsi, cəmiyyət daxilində tüğyan edən həyəcanın aradan qalxması prosesi başlandı.

1993-cü ilin payızından 1996-cı ilin sonlarınadək - tam üç il Azərbaycanda geriləmənin qarşısını almaq üçün ardıcıl dövlət tədbirləri həyata keçirildi. Həmin dövrdə Heydər Əliyev hərtərəfli bərpa işləri ilə məşğul idi. Xalqın dövlətə və dövlət başçısına olan inamı bərpa edildi. İqtisadiyyatın bərpası üçün ölkəyə xarici sərmayənin yatırılması yolları arandı və tapıldı. Ordunun itən nüfuzu özünə qaytarıldı. Beynəlxalq aləmə inteqrasiyanın sürətləndirilməsi üçün beynəlxalq təşkilatların və aparıcı siyasi, güc mərkəzlərinin inamını, etimadını qazana bildik. Elm, təhsil ictimaiyyətinin, yaradıcı ziyalıların dövlət ətrafında birləşdirilməsi təmin edildi. Gənclər təşkilatları mütəşəkkil birləşdirildi və sairə.

Ulu öndər bütün bunların fonunda NATO-nun Sülh Naminə Tərəfdaşlıq Proqramına qoşulmağa, cəbhədə atəşkəs haqqında sazişin imzalanmasına, eləcə də Xəzərin Azərbaycan sektorundakı karbohidrogen ehtiyatlarının birgə işlənməsi üçün dünyanın aparıcı neft şirkətlərinin yaratdığı konsorsiumla Azərbaycan Dövlət Neft Şirkəti arasında "Əsrin müqaviləsi" adlı tarixi neft sazişinin imzalanmasına nail oldu. Artıq Azərbaycanın ilk milli parlamentinin seçilməsinə və yeni Əsas Qanunun qəbul edilməsinə zəmin yarandı. Bütün bunları tarixi reallığa çevirən ümummilli lider, bir daha xatırladırıq - üç ilin tamamında Azərbaycanın dövlət müstəqilliyinin qorunub saxlanılımasına nail oldu. 1996-cı ilin dekabrında ATƏT üzvü olan ölkələrin dövlət başçılarının Lissabon şəhərində keçirilən sammitində dünya siyasətçiləri ilk dəfə hiss etdilər ki, ölkələr arasında qətiyyətli lideri olan qüdrətli Azərbaycan dövləti də vardır.

1997-ci ilin əvvəlindən etibarən isə Azərbaycanda cəmiyyət həyatının bütün sahələrində inkişafın, tərəqqinin əlamətləri görünməyə başlandı. Neft sektoru və ya qeyri-neft sektoru kimi qəbul edilməsindən asılı olmayaraq bütün sahələrdə irəliləyiş müşahidə olunmağa başlandı. Elə bir sahə yox idi ki, Heydər Əliyev həmin sahənin inkişafı ilə şəxsən maraqlanmasın.

Əsrin sonuna qədər dörd il davam edən həmin proseslər dünya ictimaiyyətinin diqqətini Azərbaycana cəlb etməyə başladı. Artıq Azərbaycanla əməkdaşlıq edən ölkələrin sayı nəinki ildən-ilə və ya aydan-aya, hətta, gündən-günə artırdı. Heydər Əliyev bu tendensiyanı çox böyük ustalıqla tamamilə bizə sərf edən məcraya yönəldir, Azərbaycanın maraqlarının təmin edilməsinə nail olurdu. Nəticədə, yeni əsrin ilk ilinin ilk ayında Azərbaycan Avropanın və dünyanın ən mötəbər beynəlxalq təşkilatlarından olan Avropa Şurasına tam hüquqlu üzv kimi qəbul edildi.

Ekspertlərin və tarixçilərin fikrincə böyük dövlətçilik təcrübəsi və siyasi müdrikliyi ollan Heydər Əliyev Avropa qarşısında iki dəfə öz həmkarlarının - dünya prezidentlərinin həsədlə baxdığı qətiyyət nümayiş etdirmişdi. Ulu öndər birinci belə addımı ATƏT-in Lissabon sammitində atmışdı. Sammitin yekun sənədini - Azərbaycana sərf etməyən bəyanatı imzalamaqdan imtina edən Prezident Heydər Əliyev sadəcə ATƏT-in adı çəkilən sammitini nəticəsiz başa çatmaq təhlükəsi ilə üz-üzə qoymuşdu. Məhz bu qətiyyətin nəticəsi olaraq sammit 53 dövlətin başçısının təsdiq etdiyi qətnamə ilə, ilk dəfə olaraq Ermənistanın işğalçı dövlət olduğunu rəsmiləşdirmişdi. Ulu öndərin ikinci belə addımı isə 2001-ci ilin yanvarında Strasburqda - Avropa Şurasının mənzil - qəqargahı qarşısında Azərbaycanın bayrağının qaldırılması mərasimində atılmışdı. Heydər Əliyev Avropanın bütün televiziyalarının lentə aldığı, onlarla telekanalın canlı yayımladığı mərasimdə bizə minnət qoyanlara konkret cavab vermişdi: "Bu gün Azərbaycan Avropaya nə qədər lazımdırsa, Avropa da Azərbaycana bir o qədər lazmdır".

Ulu öndərin həmin qətiyyətinin davamını və bir çox hallarda təkrarını ölkəmizin inkişaf tarixinin 2003-cü ildən sonrakı dövründə daha tez-tez gördük. Prezident İlham Əliyev Azərbaycanı təkcə Avropada və ya Avrasiyada deyil, eləcə də bütün dünyada qüdrətli dövlətə, sözü keçən ölkəyə, regionun əsas iqtisadi mərkəzlərindən birinə çevirdi. Davos İqtisadi Forumunun son toplantısında dünyanın bir neçə siyasətçisi açıq şəkildə etiraf etdi ki, Azərbaycan dövlətinin son 7-8 ildə qazandığı hərtərəfli nailiyyətlər beynəlxalq aləmdə örnək kimi qəbul edilə bilər. İlham Əliyev Azərbaycanın Avropanın enerji təhlükəsizliyinin təmin edilməsində əsas ölkələrdən birinə çevrilməsini təmin etdi. Ölkədə Müstəqil Dövlətlər Birliyinə üzv olan ölkələrin heç birində qeydə alınmayan sosial siyasət həyata keçirdi ki, bu siyasət nəticəsində Azərbaycan insanının həyat şəraiti son yeddi ildə dörd dəfə yaxşılaşdı.

Son yeddi-səkkiz ildə Azərbaycanın ümumi daxili məhsulu 3 dəfə artmışdır. Dünya iqtisadçıları indiyədək heç bir ölkədə belə göstəricinin qeydə alınmadığını yazırlar. Son yeddi ildə Azərbaycanda yoxsulluq şəraitində yaşayanların sayı 5 dəfə azalmışdır. İndi Azərbaycan əhalisinin cəmi 9,1 faizi yoxsulluq həddində yaşayır. Avropanın əksər ölkələrində isə bu göstərici 15-22 faizdir. Beynəlxalq təşkilatların Azərbaycan təcrübəsində təqdir etdikləri növbəti məsələ yeni iş yerlərinin yaradılması sahəsində əldə etdiyimiz nailiyyətdir. Son 7 ildə Azərbaycanda 1 milyondan artıq yeni iş yerlərinin yaradılmasını beynəlxalq maliyyə qurumları xüsusi qeyd edir və nümunə kimi göstərirlər.

Avropa miqyaslı beynəlxalq təşkilatlarda və Azərbaycanın ikitərəfli əməkdaşlıq etdiyi ölkələrdə dönə-dönə vurğulanır ki, son illər ərzində rəsmi Bakı enerji siyasətində böyük uğurlar əldə etmişdir. Etiraf edilir ki, Azərbaycan özünün enerji təhlükəsizliyini təmin etməklə yanaşı, başqa ölkələrin də enerji təhlükəsizliyinə xüsusi töhfələr vermişdir. Müxtəlif əlamətdar günlərdə, xüsusən, 28 May - Respublika günü münasibətiylə dünyanın siyasi liderlərinin dövlət başçımıza ünvanladıqları təbrik məktublarında Azərbaycanın bir çox uğurları təqdir olunur. Ən çox yada salınan məqamlar isə uğurlu enerji siyasətinin yeridilməsi və cəmiyyətin daha da demokratikləşdirilməsi istiqamətində həyata keçirilən islahatlardır. Avropalı ekspertlərin fikrincə Azərbaycanda bərqərar olunmuş daxili ictimai-siyasi sabitliyin əsas səbəbi ölkədə vətəndaş cəmiyyətinin formalaşdırılması üçün həyata keçirilən konkret tədbirlərdir.

2003-cü ilin payızından sonra Azərbaycanda keçirilən istənilən seçki beynəlxalq müşahidəçilər və dünya mətbuatı tərəfindən yüksək qiymətləndirilir. Bəzi avropalı müşahidəçilər öz ölkələrində belə açıq və şəffaf seçki görmədiklərini dilə gətirir, Amerika Birləşmiş Ştatlarının təmsilçisi isə "Mən Bakıda eynilə Amerikada keçirilən seçkinin analoqunu gördüm" - deyə etiraf edirlər.

Bu gün respublikamızın ictimai-siyasi həyatı elə bir qaynar inkişaf dövrünü yaşayır ki, onu təkcə ölkə əhalisi deyil, ölkəmizin qonağı olan istənilən əcnəbi siyasətçi etiraf edir. Polşa Prezidentinin dilə gətirdiyi "Sizin böyük uğurlarınızın əsas səbəbi bütün sahələr üzrə konkret inkişaf proqramlarının olmasıdır": Rusiya Prezidentinin qeyd etdiyi "Azərbaycanın inkişafında iqtisadiyyatın şaxələndirilməsinin xüsusi rolu vardır" ifadələri bu deyilənlərin təsdiqi kimi qiymətləndirilir. Dost və qardaş ölkə olan Türkiyənin Baş naziri isə ölkəmizin uğurlarını yada salarkən demişdi ki, siyasət düzgün qurulanda iqtisadiyyatın inkişafı asan olur.

Bütün bunlar bir daha sübut edir ki, Azərbaycanın 2003-cü ildən sonrakı inkişafı həqiqətən, beynəlxalq aləmdə örnək kimi qəbul edilir.

İttifaq MİRZƏBƏYLİ

Xalq qəzeti.- 2011.- 27 avqust.- S. 1.