Heydər Əliyev Fondu insanlığa, bəşəriyyətə, ulu öndərin ölməz ideyalarının reallaşdırılmasına xidmət edir

...Heydər Əliyev Fondu, sözün əsl mənasında, ümumxalq fondu olmuşdur. Bu fondun xətti ilə aparılan işlər, görülən tədbirlər, irəli sürülmüş təşəbbüslər göz qabağındadır. İstər təhsil, istər səhiyyə sahəsində, mədəniyyət sahəsində, mənəvi irsimizin qorunması işində, Azərbaycanın dünya birliyində təbliğ edilməsi işində, Azərbaycanın olduğu kimi təqdimatı işində, Ermənistan-Azərbaycan, Dağlıq Qarabağ münaqişəsinin geniş mənada dünya birliyinə düzgün şəkildə çatdırılması işində Heydər Əliyev Fondunun rolunu mən çox yüksək qiymətləndirirəm. Bu fond sübut etdi ki, əgər istək olarsa, əgər iradə olarsa və əgər xoş niyyət olarsa, istənilən sahədə istənilən məsələ həll oluna bilər. Bu fondun çoxşaxəli fəaliyyətini əgər bir sözlə xarakterizə etmək mümkündürsə, mən "Xoş niyyət" deyərdim. Çünki bütün sahələrdə biz bunu görürük.

İlham ƏLİYEV,

Azərbaycan Respublikasının Prezidenti

XX əsr Azərbaycan tarixinə dövlətçilik rəmzi, Vətənə və xalqa sonsuz məhəbbət və xidmət nümunəsi kimi daxil olan Heydər Əliyevin həyatı və fəaliyyəti bir vətəndaş üçün örnəkdir. Dahi şəxsiyyət həyatın bütün sahələrinə, cəmiyyətin bütün təbəqələrinə diqqət və qayğı göstərməyi bacarır, millətin gələcəyi naminə strateji əhəmiyyətli işlərə xüsusi önəm verir, gənc nəslin də bu ruhda, bu amalda böyüməsini zəruri hesab edirdi. Heydər Əliyev Fondu yaradılarkən ulu öndərin ömür yolunu, həyat amallarını davam etdirmək başlıca məqsəd olub. Yarandığı gündən xalqın mənəvi sərvətinin və milli mədəniyyətinin təbliği və inkişafı istiqamətində mühüm işlər görən Heydər Əliyev Fondu, ilk növbədə, ümummilli liderin müdrikliyə əsaslanan həyat fəlsəfəsini, xalqa xidmət missiyasının əbədiyaşarlığını təmin edən mühüm ideoloji-humanitar mərkəzdir.

Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın çoxşaxəli fəaliyyəti məhz bəşəriyyətin xilasına yönələn milli-mənəvi idealların cəmiyyətdə daha möhkəm əsaslarla intişar tapmasına, ictimai şüura hakim kəsilməsinə yönəlmişdir. Fondun prezidenti Mehriban xanım Əliyevanın rəhbərliyi ilə həyata keçirilən layihələr məhz Heydər Əliyevin fikir və ideyalarını, fəlsəfə və ideologiyasını yaşatmaq, davam etdirmək istəyinə əsaslanır. Ötən illərə nəzər saldıqda aydın görünür ki, Heydər Əliyev Fondu məram və məqsədlərinə doğru inamla irəliləyir, ictimai həyatda mühüm rol oynamaqla cəmiyyətin etimadını qazanır və müasir Azərbaycanın inkişafına layiqli töhfələrini verir.

Heydər Əliyev Fondunun fəaliyyəti geniş və çoxşaxəlidir. Fondun rəhbərliyi və təşkilatçılığı ilə həyata keçirilən layihələr təhsil və səhiyyə sisteminin, mədəniyyətin inkişafına, ölkəmizin dünyada tanınmasına, mədəni irsimizin qorunmasına, xalqın rifah halının yüksəlməsinə istiqamətlənir. Müasir tələblərə cavab verən təhsil müəssisələrinin inşası, tarixi mədəniyyət obyektlərinin əsaslı surətdə yenidən qurulması, dünya standartlarının tələblərinə cavab verən muzey və muzey mərkəzlərinin yaradılması, dini məbədlərin və qədim tarixi abidələrin beynəlxalq səviyyədə bərpası, zəngin mədəniyyətimizin, xüsusilə, muğamın təbliği, Azərbaycan həqiqətlərinin dünyaya yayılması əsas diqqətçəkən məqamlardandır. Heydər Əliyev Fondu fəaliyyətini xeyirxah insanların dəstəyinə arxalanaraq həyata keçirir. Mərhəmət və nəcibliyə, humanizmə söykənən bu fəaliyyətin nəticəsidir ki, hazırda Heydər Əliyev Fondu insanların ümid, pənah yerinə çevrilib. Xalqın böyük məhəbbətini və etimadını qazanan Mehriban xanım Əliyevanın uğurları Heydər Əliyev ucalığını başlıca meyar götürməsindən, eləcə də Azərbaycanın birinci xanımının zəngin mənəvi və intellektual potensialından qaynaqlanır. Məhz bu cür mükəmməl fəaliyyətin məntiqi nəticəsi olaraq indi Heydər Əliyev Fondunun gördüyü işlərin sorağı dünyanın sayılıb-seçilən ölkələrindən, ən mötəbər beynəlxalq qurumların tribunalarından gəlir.

Yarandığı gündən bu vaxta qədər Heydər Əliyev Fondu Azərbaycanda təhsilin inkişafına mühüm tofhələr verib. Azərbaycan cəmiyyətində hər kəs üçün bərabər təhsil imkanlarının yaradılmasını, gənc nəslin zəruri biliklərə yiyələnməsini, milli təhsilimizin beynəlxalq təhsil sisteminə inteqrasiyasını əsas fəaliyyət meyarlarından biri kimi müəyyənləşdirmiş Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın bu sahədə həyata keçirdiyi missiya isə cəmiyyətimizdə yeni bir ənənənin əsasını qoymaqdadır. Bu ənənə ilk növbədə Azərbaycanın sosial-iqtisadi yüksəlişinin ölkəmizin mədəni tərəqqisinə, ictimai şüur səviyyəsinin yüksəlişinə yönəlməsi zərurətindən çıxış edir. Ulu öndərimizin adını daşıyan fondun prezidenti Mehriban xanım Əliyevanın bu gün milli təhsilimizin inkişafı istiqamətində həyata keçirdiyi ardıcıl fəaliyyəti isə bu ənənələrin illər sonra da Azərbaycan dövlətinin yüksəlişini təmin edəcək əsas amil kimi qorunmasına, zamanın dəyişən tələblərinə uyğunlaşdırılması məqsədlərinə hesablanmışdır. Mehriban xanım Əliyevanın irəli sürdüyü, böyük uğurla həyata keçirilməkdə olan "Yeniləşən Azərbaycana yeni məktəb" proqramının prioriteti də bundan ibarətdir. Bu proqram özündə təkcə respublikamızın ucqar əyalətlərində yeni məktəb binalarının tikilməsi, bu binaların ən müasir standartlara cavab verən maddi-texniki baza ilə təchiz edilməsi məzmununu ehtiva etmir. Həm də insanlara qayğı, uşaqlara, yeniyetmə və gənc nəslə diqqət timsalında bütövlükdə ölkəmizin parlaq gələcəyə aparılması strategiyasını ehtiva edir. Artıq hər il yeni dərs ilini minlərlə məktəbli beynəlxalq standartlara uyğun müasir təhsil ocaqlarında qarşılamağa bir növ adət edib. Bütün bunlar sübuta yetirdi ki, aydın məqsəd, xalqın rifahına söykənən amal, inam və iradə ilə birləşəndə hər bir çətinlik bu qüdrətin qarşısında geri çəkilir.

Təhsil sahəsində reallaşan "Yeniləşən Azərbaycana yeni məktəb" layihəsi fondun həyata keçirdiyi ən böyük layihələrdən biridir. Qısa müddət ərzində Azərbaycanın bütün regionlarında müasir tələblərə cavab verən məktəblərin inşası geniş vüsət aldı. Layihə çərçivəsində respublikanın müxtəlif bölgələrində 300-dək yeni məktəb inşa edildi. Bu, indiki şəraitdə müasir tələblər səviyyəsində təhsil almaq imkanı qazanan yüz mindən artıq şagirdin həyatında ciddi dəyişiklik, yenilik deməkdir. Əgər bu gün biz ucqar dağ kəndində yaşayan məktəblinin internet vasitəsi ilə ümumrespublika olimpiadasında iştirakının şahidi oluruqsa, bu, artıq görülən işin parlaq təzahürüdür.

Məlum olduğu kimi, təhsil elə bir ictimai hadisədir ki, cəmiyyətin keçəcəyi inkişaf yolu əksər hallarda bu sahəyə münasibətdən asılı olur. Təhsilin millətin, dövlətin və bir qədər də qlobal məcrada götürsək, ümumilikdə, bəşəriyyətin gələcəyi olduğunu söyləməklə, əslində, yeni bir nəzəriyyə kəşf etmirik. Son yeddi ildə millət və dövlət maraqları baxımından müstəsna əhəmiyyətə malik bir sıra layihələri uğurla gerçəkləşdirərək cəmiyyətdə mərhəmət və xeyirxahlığın ali ünvanına çevrilmiş Heydər Əliyev Fondunun qarşıya qoyduğu hər bir xoş məram, ilk növbədə, ümummilli liderin ali ideallarını özündə ehtiva edir. Fondun reallaşdırdığı layihələr Mehriban xanımın yüksək təşkilatçılığı sayəsində peşəkarların birgə məhsulu olduğundan bənzərsizliyi ilə diqqəti cəlb edir. Heydər Əliyev Fondunun layihələri qlobal xarakteri və keyfiyyətinə görə hətta beynəlxalq layihələri üstələyir. Bu, qürur doğuran reallıqdır. BMT, İslam Əməkdaşlığı Təşkilatı, YUNESKO, İSESKO və onlarca mötəbər qurumun dünyanın dörd bir tərəfində çalışan, peşəkarcasına müqayisə aparmaq imkanına malik yüksək vəzifəli şəxslərinin Heydər Əliyev Fondunun layihələrindən təsirlənərək gördüklərini sözə çevirməkdə aciz qaldıqlarının dəfələrlə şahidi olmuşuq. Çoxlarının vurğuladığı kimi, bu layihələr mahiyyətcə yeni üslub, etalon xarakteri daşıyır və əksər hallarda beynəlxalq səviyyədə tətbiqini tapır. Uşaqlara qayğı, internat məktəblərinin əsaslı təmiri və uşaq bağçalarının bərpası bu layihələr içərisində özünəməxsus yer tutur. Bu gün uşaq bağçalarının təkcə yenidən qurulması deyil, həm də ən müasir tələblərə cavab verməsi istiqamətində çoxşaxəli işlər aparılır. Fondun həyata keçirdiyi layihələr çərçivəsində artıq onlarla uşaq bağçası istifadəyə verilib. Bu uşaq müəssisələri müasir avadanlıq, tədris vəsaiti, plakatlar, multimedia diskləri, oyunlar və digər vəsaitlərlə təmin olunub. Uşaqlara qayğı fondun prioritet istiqamətlərindən biridir. Bu baxımdan "Uşaq evləri və internat məktəblərinin inkişafı" Proqramını xüsusi qeyd etmək lazımdır. Bu proqram ata-ana qayğısından məhrum uşaqların həyatında ciddi dönüş yaratdı. Layihə çərçivəsində fondun himayə etdiyi 30-dan çox uşaq müəssisəsinin sosial vəziyyətində, məişət və təhsil sistemlərində əsaslı dəyişiklik yarandı. Bu gün valideyn qayğısından məhrum olmuş uşaqların asudə vaxtlarının səmərəli keçirilməsi üçün yay düşərgələri yaradılır. Uşaq evlərində tərbiyə alanların taleyi də daim diqqət mərkəzində saxlanılır.

Qaçqın və məcburi köçkün ailələrindən olan uşaqların təhsili də fondun diqqət mərkəzində saxladığı prioritet məsələlərdəndir. 2004-cü ildən başlayaraq fond hər il qaçqın və məcburi köçkün ailələrindən olan birinci sinif şagirdələrinə məktəbli çantaları və dərs ləvazimatları paylayır. Artıq son bir neçə ildir ki, bu proses ölkədəki bütün orta məktəbləri əhatə edir. 2008-2009-cu tədris ilində fond tərəfindən ölkədə 130 min birinci sinif şagirdinə 16 adda məktəbli ləvazimatı ilə təmin edilən çanta paylanılıb. Bununla yanaşı fondun hazırladığı 140 adda əyani vəsait də məktəblərə göndərilib. Keçən il də eyni addım atılıb. Heydər Əliyev Fondunun bu təşəbbüsündən sonra, artıq respublikamızın bütün məktəblərində dərsliklər şagirdlərə pulsuz paylanılır. Onu da qeyd edək ki, Heydər Əliyev Fondu təkcə Azərbaycanda deyil, dünyanın bir sıra ölkələrində yeni təhsil müəssisələrinin tikilməsində yardımçı olub. Hollandiyanın paytaxtı Amsderdamda fəaliyyətə başlayan Azərbaycan məktəbi fondun diqqətindən kənarda qalmayıb. Bu məktəbə kompyuter dəsti və dərs vəsaiti göndərilib. 2008-ci ilin fevralında isə Pakistanın Müzəffərabad şəhərində dağıdıcı zələzələ nəticəsində yararsız vəziyyətə düşən məktəb fond tərəfindən yenidən tikilərək istifadəyə verilib. Təhsil ocağı yüksək səviyyəli tədrisə imkan yaradan avadanlıqla da təmin olunub və vəsaitlərin hamısı Heydər Əliyev Fondu tərəfindən hədiyyə edilib.

Azərbaycan Respublikasının Prezidenti İlham Əliyev Heydər Əliyev Fondunun fəaliyyətini yüksək qiymətləndirərək deyib: "Fondun təşəbbüsü ilə başlanmış geniş məktəb tikintisi, - mən bunu bu gün açıq deməliyəm, - biz bu təşəbbüsü əsas götürüb ölkəmizdə geniş miqyasda məktəb tikintisinə başlamışdıq. Amma ilk məktəblər məhz fondun təşəbbüsü ilə və fond tərəfindən tikilmişdir. O məktəblərdə oxuyan, kompyuterlə məşğul olan, yaxşı imkanlara malik olan uşaqlar gələcəyə nikbinliklə baxırlar. Onlar Azərbaycanın gələcəyidir. Mən birmənalı şəkildə deyə bilərəm ki, Heydər Əliyev Fondu mədəniyyət sahəsində və digər sahələrdə, ölkə həyatında önəmli bir amilə çevrilibdir və əminəm ki, Fondu bundan sonrakı fəaliyyətində də ümumbəşəri prinsipləri irəliyə aparacaqdır. Heydər Əliyev Fondu milli fonddur. Fondun bütün təşəbbüsləri milli ruha əsaslanır. Eyni zamanda, Heydər Əliyev Fondu Azərbaycanı gələcəyə aparan gözəl bir vasitədir. Modernləşmə, müasirləşmə, dünya birliyinə inteqrasiya, Azərbaycanın milli maraqlarının müdafiə edilməsi, Azərbaycanın olduğu kimi dünyada təqdim edilməsi - bütün bu şərəfli funksiyalar bu fondun üzərinə düşübdür. Düşübdür deyəndə, fond və fondun rəhbərliyi bütün bu işləri öz təşəbbüsü ilə görür, mən bunu da deməliyəm. Ona görə mən fondun fəaliyyətini çox təqdir edirəm, çox bəyənirəm və şübhə yoxdur ki, bundan sonra da Azərbaycanın gələcək inkişafında fondun rolu böyük olacaqdır".

Heydər Əliyev Fondu həmçinin Azərbaycanın mədəniyyət tarixində silinməz iz buraxacaq layihələr də həyata keçirir. Reallaşdırılan işlərin nəticəsi olaraq Azərbaycan mədəniyyətinə öz töhfəsini verən sənətkarlara, mədəniyyət nümayəndələrinə fəaliyyət göstərmək üçün geniş imkanlar yaradılır. Bu baxımdan Azərbaycan paytaxtında müasir İncəsənət Muzeyinin açılışını yüksək qiymətləndirmək olar.

Azərbaycan muğamının dünya miqyasında təbliğində Heydər Əliyev Fondunun fəaliyyəti ən yüksək qiymətə layiqdir. Azərbaycanın ənənəvi musiqisi olan muğam YUNESKO-nun bəşəriyyətin şifahi və qeyri-maddi irs siyahısına daxil edilib. Mədəni irsin qorunması baxımından muğamın təbliği və inkişafına kömək Heydər Əliyev Fondunun aktiv fəaliyyət istiqamətidir. Gerçəkləşən layihələr möhtəşəm milli mədəniyyətimizi qorumaq, inkişaf etdirməklə yanaşı, həm də sivill dünyada öz layiqli yerimizi tutmağa, xalqımızı tanıtmağa imkan yaradır. Bu sahədə ilk layihələrimizdən biri "Qarabağ xanəndələri" musiqi albomunun nəşridir. Bu albomda 24 virtuoz muğam ustadının ifası cəmlənib. Fondun Azərbaycan muğamına həsr olunmuş digər nəşri "Muğam ensiklopediyası"dır. Burada təmsil olunan ustad və gənc xanəndələrin yaradıcılığı, muğam dəstgahları və digər əsərlər ilk dəfədir ki, muğam irsimizin tam mənzərəsini yaradır. Fond muğam müsabiqələri və festivallara dəstək verir, yaşlı sənətkarlarımıza, yeni istedadlı ifaçılarımıza dayaq olur. Fondun dəstəyi ilə paytaxtda "Beynəlxalq Muğam Mərkəzi", habelə regionlarda müasir standartlara uyğun muğam mərkəzləri inşa olunmuşdur.

Mehriban xanım Əliyevanın peşəkarcasına fəaliyyəti nəticəsində bir-birinin ardınca Azərbaycanın mənəvi inciləri dünya qeyri-maddi mədəni irs siyahısına salınır. Ölkəmiz sözün əsl mənasında fərqli sivilizasiyaların və mədəniyyətlərin dialoqu və ortaq məxrəc axtardığı məkana çevrilir. Tolerantlıq nümunəsi sayılan Azərbaycan Heydər Əliyev Fondunun xətti ilə Parisdə Versal Sarayının parkında abidələri bərpa edir, Strasburqda Müqəddəs Məryəm kafedral kilsəsinin yenidən qurulmasına yardım göstərir, Pakistanda zəlzələdən zərər çəkən qızlar məktəbini yenidən inşa edir, Hollandiya, Rusiya, Gürcüstan, Rumıniya, Misir və digər ölkələrdə təhsil ocaqlarını müasirləşdirir, Afrika ölkələrinin qeyri-maddi mədəni irsinin qorunmasına dəstək verir, Qəbələ Beynəlxalq Musiqi Festivalı kimi onlarca qlobal və mükəmməl layihəyə imza atır.

Heydər Əliyev Fondunun təşəbbüsü ilə səhiyyə sisteminin müasirləşdirilməsi sahəsində mühüm işlər həyata keçirilir, tibb ocaqlarında ən müasir avadanlıqlar quraşdırılır, əhaliyə göstərilən xidmətin səviyyəsi getdikcə yüksəlir. Uşaq müalicə-profilaktika müəssisələrinin yenidən qurulmasında, xarici ölkələrdən mütəxəssislərin yerli klinikalara dəvət olunmasında, treninqlərin keçirilməsində və həkimlərin mübadiləsində fondun köməyi xüsusi qeyd olunmalıdır. Ötən illər ərzində Heydər Əliyev Fonduna müraciət etmiş on mindən çox vətəndaş müayinə və müalicə kursu keçmiş, min nəfərə yaxın xəstə respublikanın müxtəlif tibb müəssisələrində cərrahiyə əməliyyatı olunmuş, çoxlu sayda xəstənin isə əməliyyat və müalicəsi xarici ölkələrdə aparılmışdır. İlk layihələrdən biri kimi bu gün də davam edən "Diabetli uşaqlara ən yüksək qayğı" layihəsi 14 yaşına qədər qeydiyyatda olanların dərman preparatı ilə təmin olunmasına yönəlib.

Heydər Əliyev Fondunun və şəxsən fondun prezidenti Mehriban xanım Əliyevanın fəaliyyəti təkcə Azərbaycanda deyil, beynəlxalq aləmdə də yüksək qiymətləndirilir. Təsadüfi deyil ki, Azərbaycanın birinci xanımının 2004-cü ildə YUNESKO-nun, 2006-cı ildə İSESKO-nun xoşməramlı səfiri adına, 2007-ci ildə "Qızıl ürək" və Dünya Səhiyyə Təşkilatının İhsan Doğramacı adına Ailə Sağlamlığı Fondunun mükafatlarına, "Əsrlərin xeyriyyəçiləri" Beynəlxalq Fondunun Yaqut Xaç ordeninə, 2009-cu ildə "XXI əsrin böyük qadını" laureatı adına, 2010-cu ildə isə Fransanın "Fəxri Legion" ordeninə, YUNESKO-nun "Qızıl Motsart" medalına, 2011-ci ildə Krans Montana Forumunun qızıl medalına layiq görülməsi Mehriban Əliyevanın bütün dünyada böyük nüfuz qazanmış fəaliyyətinə verilən layiqli qiymətdir. Təbii ki, Azərbaycanın birinci xanımına təqdim olunan mükafatlar sırasında Heydər Əliyev Mükafatının xüsusi yeri vardır.

Fondun ABŞ, Rusiya Federasiyası, Rumıniya və Türkiyədə nümayəndəlikləri fəaliyyət göstərir. Heydər Əliyev Fondunun əsas məqsədlərinə sadiq qalaraq nümayəndəliklər mədəni və sosialyönümlü layihələri həyata keçirirlər: uşaq evlərinə, internat məktəblərinə, qocalar evlərinə baş çəkir, qayğıya ehtiyacı olan insanlara yardım edir, Azərbaycanın tanınmış elm və ictimai xadimlərinin xatirəsinə həsr olunmuş gecələr, Azərbaycan xalqının mədəniyyət və tarixini əks etdirən sərgi və konsertlər təşkil edirlər. Bütün bunlar xalqlar və ölkələr arasında əlaqələrin inkişafına xidmət edir. Fondun Rusiya Federasiyasındakı nümayəndəliyinin fəaliyyəti xüsusi olaraq diqqəti cəlb edir. Bu, fondun Azərbaycandan kənarda yaradılan ilk nümayəndəliyidir. Nümayəndəliyin başçısı Leyla xanım Əliyevanın rəhbərlik etdiyi struktur ümumtəhsil məktəbləri, xüsusilə də, Moskvanın Azərbaycan etnomədəniyyət komponentləri olan 157 saylı məktəbi ilə sıx əlaqə qurur, onları lazımi texniki avadanlıq və tədris vəsaitləri ilə təmin edir. Nümayəndəlik əlil və valideyn qayğısından məhrum olan uşaqları daim diqqət mərkəzində saxlayır, onlar üçün müxtəlif xeyriyyə tədbirləri keçirir, bayram günlərində mərasimlər təşkil edir. Əsas fəaliyyət istiqamətlərindən biri də gənclərlə işdir. Leyla xanım Əliyeva Rusiyanın müxtəlif vilayətlərinə səfər edir, burada yaşayan və təhsil alan azərbaycanlı gənclərin problemləri ilə maraqlanır, onların həlli üçün müəyyən tədbirlər görür, yerli təşkilatlarla əməkdaşlığı daha da möhkəmləndirir.

Heydər Əliyev Fondunun vitse-prezidenti Leyla xanım Əliyevanın rəhbərliyi ilə həyata keçirilən "Xocalıya ədalət" kampaniyası çərçivəsində ermənilərin azərbaycanlılara qarşı törətdikləri dəhşətli soyqırımı barədə beynəlxalq ictimaiyyətə geniş məlumat verilmişdir. Bu kampaniya vasitəsilə erməni terror təşkilatlarının Azərbaycana qarşı fəaliyyəti haqqında dünya birliyində geniş məlumatlar yayılmışdır. Bununla əlaqədar Rusiya, Türkiyə, Fransa, Macarıstan, Rumıniya, Belçika, Avstriya, Almaniya, Çexiya, İsveçrə və Gürcüstanda silsilə tədbirlər keçirilmişdir. Belə tədbirlərdə fondun nəşr etdiyi "Qarabağ həqiqətləri" toplusu da ictimaiyyət arasında geniş yayılmışdır. Keçirilən aksiyaların xarici ölkələrin kütləvi informasiya vasitələrində işıqlandırılması üçün hər cür şərait yaradılmışdır.

YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərlik etdiyi Heydər Əliyev Fondu yarandığı ilk gündən etibarən ölkəmizin ictimai-siyasi, mədəni həyatında müstəsna rol oynamaqdadır. Bu gün Azərbaycanda mövcud olan iqtisadi potensialın insan rifahının yaxşılaşdırılmasına yönəldilməsi Prezident İlham Əliyevin hökumət qarşısında müəyyənləşdirdiyi əsas prioritetdir. Bu məqsədin həyata keçirilməsində Heydər Əliyev Fondunun prezidenti Mehriban xanım Əliyevanın xidmətləri xüsui təqdir edilməlidir. Onun irəli sürdüyü faydalı təşəbbüslər, məqsədyönlü proqramlar Azərbaycanın beynəlxalq aləmdəki nüfuzunu xeyli artırıb. Etiraf edək ki, fond daha çox gələcəyə hesablanmış addımlar atmağı bacarır və bu təşkilatın daim diqqət mərkəzindədir. Fondun fəaliyyətinin mərkəzində isə milli genefondumuzun inkişafı və xalqımızın minilliklərdən keçirib bu günə çatdırdığı mədəni-etnoqrafik ənənələr dayanır. Dünya ictimaiyyəti Azərbaycan qadınını məhz Mehriban xanım Əliyevanın siması və xoşməramlı fəaliyyəti ilə tanıyır. Ümumiyyətlə, Heydər Əliyev Fondu öz fəaliyyətini müasir zamanın tələbinə cavab verən şəkildə qurmağa - cəmiyyətdə olan, insanları narahat edən problemləri aşkar etməyə, bu problemlərin həlli yolunda lazımi tədbirləri hazırlamağa, həyata keçirməyə və uğurlu nəticələr əldə etməyə çalışır.

Mehriban xanım Əliyevanın rəhbərliyi altında Heydər Əliyev Fondu dünyada Azərbaycanın təbliği, Qarabağ həqiqətlərinin beynəlxalq ictimaiyyətə çatdırılması, habelə ölkəmizdə elmin, təhsilin, mədəniyyətin, səhiyyənin inkişafı, milli-mənəvi dəyərlərimizin qorunub saxlanılması sahəsində gördüyü titanik işlərə, eləcə də milyonlarla insanlara ünvanlanmış xeyriyyəçilik fəaliyyəti ilə insanlığa, bəşəriyyətə xidmət edir, müdrik şəxsiyyət Heydər Əliyev ideyalarının əbədi yaşamasına inam yaradır. Görülən işlər, həyata keçirilən layihələr, real nəticələr isə bir daha belə deməyə əsas verir ki, Heydər Əliyevin adını dasıyan fond Azərbaycanın bu günü və gələcəyi naminə bundan da artıq islərə hazır və qadirdir.

Əliqismət BƏDƏLOV,

Rauf ƏLİYEV

Xalq qəzeti.- 2011.- 28 avqust.- S. 3.