Bələdiyyələrə keçirilən təkrar, əlavə və yeni seçkilər demokratik standartlara uyğun baş tutdu

Seçkilərin ədalətli, şəffaf, demokratik keçirilməsi üçün hər cür şərait yaradılmışdır

Nərimanov rayonu

Müstəqillik dövründə dəfələrlə uğurlu seçki prosesinə şahidlik edən ölkəmizdə bu dəfə bələdiyyələrə təkrar, əlavə və yeni seçkilər keçirildi. Ötən illər ərzində qazandığımız seçki təcrübəsi seçki prosesinin yüksək səviyyədə nəticələnəcəyinə şübhə doğurmurdu. Prosesdə birbaşa iştirak edən hazırlıqlı kadrların, mütəxəssislərin, təcrübəli siyasətçilərin kifayət qədər olması və ümumilikdə cəmiyyətin demokratik dəyərləri mənimsəməsi, insanların qanunlara riayət etməsi seçkilərin azad, ədalətli və şəffaf keçirilməsini şərtləndirirdi.

Məlumat üçün deyək ki, seçkilər 86 seçki dairəsindəki 1169 seçki məntəqəsində 330 bələdiyyə üzrə 464 yerə keçirildi. Bələdiyyə üzvlüyünə, ümumilikdə 1567 namizəd qeydə alınmışdı. 16 nəfər namizədliyini geri götürmüş, daha 2 nəfər vəfat etmişdir. Bununla bələdiyyə üzvlüyünə namizədlərin yekun sayı 1549 nəfər olmuşdur. Seçkilərdə 9 siyasi partiyanın namizədləri iştirak edirdilər. Bunlar Yeni Azərbaycan, Ana Vətən, Vətəndaş Həmrəyliyi, Ümid, Azərbaycan Sosial Rifah, Bütöv Azərbaycan Xalq Cəbhəsi, Böyük Quruluş, Vətəndaş Birliyi və Demokratik İslahatlar partiyalarıdır. Seçkiyə qatılanlardan 709 nəfər bitərəf idi. Seçkilərin keçiriləcəyi dairələr üzrə seçici siyahılarına daxil edilmiş seçicilərin sayı 1 milyon 155 min 864 nəfər idi. Seçki dairələri üzrə 9 min 883, MSK-da isə 40 nəfər müşahidəçi kimi qeydiyyatdan keçmişdi. Qeydiyyatdan keçən müşahidəçilərin ümumi sayı 9 min 923 nəfər idi. Müşahidəçilərin çoxluğu isə seçkiyə ictimai marağın yüksək səviyyədə olmasından xəbər verirdi.

Bütün seçki dairələrində olduğu kimi, 19 saylı Nərimanov 1-ci seçki dairəsinin məntəqələrində də bəzi bələdiyyələrə təkrar, əlavə və yeni seçkilər səhər saat 8.00-da başladı. Buna baxmayaraq, qanunvericiliyə uyğun olaraq, məntəqələrdə seçkiyə hazırlıq işləri səhər saat 7-dən başlamışdı. Səsvermənin başladığı vaxtadək boş bülletenlər sayıldı, səsvermə qutuları müşahidəçilərin və bələdiyyə üzvlüyünə namizədlərin nümayəndələrinin iştirakı ilə yoxlanıldı, kilidləndi və kilidin nömrəsi aktlaşdırıldı. Qanuna uyğun olaraq digər tədbirlər də görüldükdən və Azərbaycanın Dövlət himni səsləndirildikdən sonra saat 8-də səsvermə prosesi başladı. Nərimanov rayonundakı bütün məntəqələr lazımi texnika və avadanlıqla tam təmin olunmuşdu. Seçki məntəqələrində təhlükəsizlik qaydalarına ciddi riayət edilirdi. 19 saylı Nərimanov 1-ci seçki dairəsi seçki komissiyasının sədri Etibar Abdullayevin bildirdiyinə görə, dairə üzrə 31 məntəqə fəaliyyət göstərir. Ümumiyyətlə Nərimanov rayonu üzrə 76 açıq və 3 qapalı məntəqə fəaliyyət göstərirdi. Bələdiyyə üzvlüyünə namizəd olan 5 nəfər bir yer uğrunda mübarizə aparırdı. Onların sırasında 1 nəfər YAP, 1 nəfər Böyük Quruluş, 1 nəfər Ümid partiyasından, 2 nəfər isə bitərəf idi.

Müşahidə apardığımız 20 saylı Nərimanov 2-ci seçki dairəsinin 7 saylı seçki məntəqəsində səhər saatlarından etibarən seçicilər fəallıq nümayiş etdirməyə başlamışdılar. 1483 seçicinin qeydiyyata alındığı məntəqədə səsvermə zamanı qanun pozuntusuna yol verilməməsi və hər kəsin seçdiyi namizədə sərbəst şəkildə səs verməsi buraya gələn seçicilər tərəfindən yüksək qiymətləndirilirdi. Bizimlə söhbətində seçici Nəzakət Kərimi də seçkilərin demokratik və şəffaf keçirilməsindən razılığını bildirərək dedi:

- Bu gün Azərbaycanın ictimai-siyasi həyatında növbəti mühüm bir hadisə baş verir. Ölkəmizdə bələdiyyələrə təkrar, əlavə və yeni seçkilər keçirilir. Mən də bir Azərbaycan vətəndaşı və seçici kimi seçkilərdə iştirak edərək seçdiyim namizədə səs verməyi özümə borc bilirəm. Bu məqsədlə məntəqəyə gəldim və seçdiyim namizədə sərbəst şəkildə, heç bir kənar müdaxilə olmadan səs verdim.

Söhbətə qoşulan seçici Zərəngiz Abbasova da seçkilərin demokratik şəraitdə keçməsindən razılığını bildirdi. O, əminliklə dedi ki, barmaqların gözlə görünməyən mürəkkəb ilə işarələnməsi seçki saxtakarlığının qarşısını alacaqdır. Müşahidəçi Samirə Mehdiyeva isə seçicilərdə artıq seçki mədəniyyətinin formalaşdığını xüsusi qeyd etdi. Onun fikrincə, ölkəmizdə dövlətimiz tərəfindən yaradılmış müsbət demokratik mühit, ümumilikdə cəmiyyətin müasir demokratik dəyərləri mənimsəməsi ilə nəticələnmişdir. Samirə xanım məntəqədə səsvermə prosesini diqqətlə izlədiyini və buna əsasən bələdiyyəyə keçirilən təkrar, əlavə və yeni seçkilərin demokratik standartlara uyğun baş tutacağından əmin olduğunu vurğuladı.

Suraxanı rayonu

Bildiyiniz kimi, dünən Azərbaycanda bəzi bələdiyyələrə təkrar, əlavə və yeni seçkilər keçirilib. 30 noyabrda Suraxanı rayonunun Əmircan qəsəbəsində də bir vakant yer uğrunda təkrar seçkilər təşkil olunmuşdur.

Qeyd edək ki, Əmircan qəsəbəsində yerləşən 32 saylı Suraxanı III seçki dairəsinin seçiciləri artıq seçkilər başlanan ilk dəqiqələrdən fəallıq nümayiş etdirirdilər. Biz əvvəlcə dairə seçki komissiyasında olduq. Komissiyanın sədri Qasım Rzayev söhbətinə bu sözlərlə başladı.

- Seçkilərin böyüyü, kiçiyi olmur. Biz Əmircan qəsəbə bələdiyyəsinə keçirilən bu seçkilərə də çox ciddi və məsuliyyətlə hazırlaşmışıq. Ümid edirik ki, seçkilər bu dəfə də uğurla başa çatacaq, seçicilər ən layiqli namizədə səs verəcəklər.

Dairə komissiyasının sədri Qasım Rzayev daha sonra məlumat verdi ki, dairə üzrə bütün məntəqələrdə seçki qanunvericiliyində nəzərdə tutulan bütün tədbirlər həyata keçirilib. Seçici siyahıları dəqiqləşdirilib. Məntəqələr bütün lazımi texniki avadanlıqlarla təmin olunub. Seçkilərin gedişi barədə Mərkəzi Seçki Komissiyasına, mətbuata mütəmadi məlumatlar veriləcək.

Yeri gəlmişkən, Əmircan qəsəbə bələdiyyəsində bir vakant yer uğrunda dörd namizəd iştirak edirdi. Qasım Rzayevin sözlərinə görə, onların hər biri layiqli namizədlərdir. Dedi ki, seçki rəqabətinin yüksək olması seçici fəallığına da müsbət təsir göstərəcək.

Biz seçki dairəsinin katibi Bilman Qüdrət ilə birlikdə seçki prosesini müşahidə etmək üçün bir neçə seçki məntəqəsinə yollandıq. Məqamı düşmüşkən, Bilman müəllim dövri mətbuatla yaxın əlaqəsi olan ziyalılardandır, onun şeirləri, publisistik yazıları qəzet və jurnal səhifələrində tez-tez yer alır. O, bizimlə söhbətində dedi ki, seçki prosesi də onun üçün yeni sahədir, amma bu mühüm işlə böyük həvəslə məşğul olur. Bilman müəllimin sözlərinə görə, insanların azad, sərbəst seçim etmələrinə yardım etmək müstəqil Azərbaycanın vətəndaşı olaraq onun üçün çox xoşdur.

Bilman müəllim daha sonra bələdiyyələrin ölkəmizin ictimai-siyasi həyatında rolunun getdikcə artdığını xüsusilə vurğulayaraq dedi:

- Azərbaycanda ulu öndər Heydər Əliyevin müəyyən etdiyi siyasi xətt - hüquqi dövlət quruculuğu prosesi hazırda ölkəmizdə uğurla davam etdirilir. Bu istiqamətdə yerli özünü idarəetmə orqanları olan bələdiyyələrin Azərbaycanda vətəndaş cəmiyyəti quruculuğunda rolu xüsusilə böyükdür. Deməliyəm ki, 2009-cu ilin 23 dekabrında Əmircan bələdiyyəsinə keçirilən seçkilərdə bələdiyyələrə layiqli namizədlər seçilib. Bu dəfəki təkrar seçkilərdə dünyasını dəyişmiş bir bələdiyyə üzvünün yerinə yeni üzv seçiləcək. İnanıram ki, yeni seçiləcək bələdiyyə üzvü də o biri bələdiyyə üzvləri kimi qəsəbənin sosial inkişafına, burada təmizlik-abadlıq işlərinin yeni vüsət almasına öz töhfəsini verəcək.

Bilman Qüdrətin sözlərini dinləyə-dinləyə biz birlikdə Əmircan qəsəbəsindəki 48 saylı Tərbiyə İşi Müəssisəsinin binasında yerləşən 8 saylı seçki məntəqəsinə gəlib çatdıq.

Burada artıq xeyli seçici vardı. Məntəqə sədri Yasəmən İbrahimova dedi ki, artıq səhər saat 8.00-dan fəaliyyətə başlayan seçki məntəqəsinə gələn onlarla seçici heç bir təzyiq olmadan şəffaf şəkildə istədiyi namizədə səs verməyə başlamışdır. Onun sözlərinə görə, məntəqə üzrə 385 nəfər seçici səs verməlidir. Onlardan 6 nəfəri ilk dəfədir ki, səs verir.

Qəsəbə sakini Fərəməz Abbasovdan səsvermənin gedişi barədə rəyini öyrəndik. Bildirdi ki, məntəqədə seçkilər azad, demokratik, beynəlxalq standartlara uyğun şəkildə keçirilir.

Fərəməz Abbasov dedi ki, bu gün layiq bildiyi namizədə səs verib.

Fərəməz Abbasov Əmircan qəsəbəsindəki Səttar Bəglulzadə adına Mədəniyyət sarayının direktorudur. O, bizimlə söhbətində son illər Suraxanı rayonunda aparılan geniş abadlıq, quruculuq işlərindən də həvəslə söz açdı, bu işdə bələdiyyə üzvlərinin də böyük zəhməti olduğunu diqqətə çatdırdı.

8 saylı seçki məntəqəsində səsvermədə ilk dəfə iştirak edən qəsəbə sakini Arzu Cəlilovadan da səsvermə barədə rəyini soruşduq. O, həyatında birinci dəfə seçkilərə qatıldığı üçün bu prosesin onun üçün çox maraqlı olduğunu bildirdi və ilk səsvermənin gedişindən çox razı qaldığını vurğuladı.

Məntəqədə tanış olduğumuz, demək olar ki, bütün seçicilər səsvermənin azad və demokratik şəkildə keçirildiyini vurğuladılar. Seçki prosesini diqqətlə izləyən müşahidəçilər də razılıq edirdilər. Müşahidəçi Gülarə Qasımova seçkilərin qanunvericiliyə tam uyğun olaraq keçdiyini və seçicilər üçün yaradılan şəraitə görə dövlətimizin başçısına minnətdarlığını bildirdi.

Bir sıra siyasi partiyaların nümayəndələri, eləcə də öz təşəbbüsü ilə qeydiyyatdan keçən başqa müşahidəçilər də seçkinin mütəşəkkil keçdiyini, heç bir qanun pozuntusunun olmadığını söyləyirdilər.

Əmircan qəsəbəsindəki 114 saylı məktəbin geniş foyesində yerləşən 11 saylı seçki məntəqəsində də xeyli seçici vardı. Məntəqə sədri Ceyran Novruzova dedi ki, məntəqə bütün lazımi texnika və avadanlıqla təmin olunmuşdur. İlk dəqiqələrdən başlayaraq seçicilər fəallıq göstəriblər. Seçki məntəqələrində təhlükəsizlik qaydalarına ciddi riayət olunur.

Ceyran Novruzova daha sonra məlumat verdi ki, bu il məntəqə üzrə 1344 seçici səs verəcək. 23 nəfər seçici ilk dəfə olaraq səs verməlidir. Ceyran xanımın sözlərinə görə, onların hər biri seçkilərdən qabaq məntəqəyə dəvət olunaraq seçki proseduru ilə tanış ediliblər.

Seçki məntəqəsində 12 daimi müşahidəçi vardı. Onlardan hər biri sesvermənin gedişi prosesində heç bir qanun pozuntusunun qeydə alınmadığını vurğuladı.

Axşam saat 17-də 32 saylı Suraxanı III seçki dairəsinə telefon açaraq sesvermənin gedişi barədə operativ məlumat aldıq. Bildirildi ki, son məlumata görə dairə üzrə ümumi sesicilərin 62 faizi səsvermədə iştirak edib.

Xurşud Mehdiyevanın son sözü bu oldu ki, Əmircan qəsəbəsində 30 noyabr seçkilərində səsvermə zamanı heç bir ciddi qanun pozuntusu qeydə alınmayıb və seçkilər baş tutmuş hesab olunur.

Sabunçu rayonu

Dünən Azərbaycan Respublikasında bəzi bələdiyyələrə təkrar, əlavə və yeni seçkilər keçirilmişdir. Seçkilər 86 seçki dairəsini, 1169 seçki məntəqəsini əhatə etmiş və 330 bələdiyyə üzrə boş qalmış 464 yeri tutmaq üçün keçirilmişdir. Bütövlükdə boş qalan yerləri tutmaq üçün Mərkəzi Seçki Komissiyası tərəfindən 1567 nəfərin namizədliyi qeydə alınmışdır. Dünən keçirilmiş seçkilərdə səsvermə bülletenlərinə 1549 namizədin adı daxil edilmişdir. Səsvermədə əhalinin fəallığını təmin etmək üçün MSK bütün lazımi tədbirləri görmüş, bildirişlər çap etdirmiş, əhali arasında maarifləndirmə işləri aparmışdır.

Dünən seçkinin gedişini izləmək üçün biz də Bakı şəhərindəki bəzi seçki dairə və məntəqələrində olduq. 28 saylı Sabunçu üçüncü seçki dairəsinin sədri Hacıbala Babayev bildirdi ki, seçki gününədək dairə seçki komissiyası tərəfindən seçkilərin normal, demokratik, qanun və müvafiq normativlər əsasında keçirilməsi üçün hər cür şərait yaratmış, məntəqələr lazımi ləvazimatlarla, təlimatlarla təmin edilmiş, lazımi avadanlıqlar yerləşdirilmişdir. Seçki bülletenləri qabaqcadan məntəqələrə paylanılmışdır.

- Bu gün əvvəlcədən də elan edildiyi kimi, Azərbaycan Respublikasında təkrar, əlavə və yeni seçkilər keçirilir. Bununla əlaqədar olaraq 28 saylı Sabunçu üçüncü seçki dairəsinin ərazisində yerləşən Bilgəh bələdiyyəsinə də seçkilər keçirilir. Seçkilərdə 2 yerə 6 namizəd qeydə alınmışdır. Ümumilikdə Bilgəh bələdiyyəsinin ərazisində 4 seçki məntəqəsi yerləşir və seçicilərin sayı 5370 nəfərdən ibarətdir. Səhər saat 8-dən etibarən məntəqələr açılmışdır, hazırda bütün məntəqələrdə seçki komissiyaları fəaliyyətdədir və səsvermə prosesi tam qanunauyğun şəkildə davam edir. Hazırda əlimizdə səhər saat 10-a olan məlumat var. Həmin vaxta qədər 177 nəfər seçici qeydiyyatdan keçərək səsvermə hüququndan istifadə etmişdir.

Dairə seçki komissiyasının sədrindən lazımi məlumatları aldıqdan sonra ərazidə yaşayan əhalinin səs verdiyi seçki məntəqələrindən birində də olduq. 18 saylı seçki məntəqəsi Bilgəh qəsəbəsində yerləşir. Saat təxminən 11-30 radələri idi. Məntəqədə seçici fəallığı hiss edilirdi. Məntəqə komissiyasının üzvləri yaxınlaşan sakinlərin adlarını seçici siyahılarında tapır, seçicilər müvafiq qeydiyyat prosedurundan keçdikdən və bülletenləri əldə etdikdən sonra seçki qutularına yaxınlaşaraq istədikləri namizədə səs verir, şəffaf və demokratik qaydada öz seçki hüquqlarını reallaşdırırdılar. Səsvermənin gedişini izləmək üçün məntəqələrə gəlmiş müşahidəçilər isə prosesə müdaxilə etmədən öz müşahidələrini aparırdılar.

Buradaca məntəqə seçki komissiyasının sədri Mahir Qocayevlə tanış olub seçkinin gedişi, əhalinin fəallığı ilə maraqlandıq. Komissiya sədri bildirdi ki, müvafiq təlimata uyğun olaraq məntəqə komissiyasının üzvləri səhər saat 7-də məntəqədə olublar, onlar arasında vəzifə bölgüsü aparılıb, seçki qutuları saat 7:50-də müşahidəçilərin gözləri qarşısında möhürlənib və saat 8.00-da məntəqənin açılışı elan edilərək seçkilər başlanıb. Komissiya sədrinin sözlərinə görə, səhər saatlarında, həmişə olduğu kimi, seçicilərin ciddi fəallığı müşahidə olunub. Sonradan fəallıq bir qədər azalsa da, hər halda seçicilər öz hüquqlarını reallaşdırmaqda davam edirlər. Məntəqə komissiyası seçicilərin iştirakı ilə bağlı müvafiq saatlarda dairə seçki komissiyasına məlumat çatdırır. Məntəqənin ərazisində 1288 seçici yaşayır. Saat 12-yə olan məlumata görə, 83 seçici artıq səs verib.

Məntəqə seçki komissiyasının sədri onu da əlavə etdi ki, daşınan seçki qutusu ilə səsvermə qaydasına uyğun olaraq şifahi və yazılı müraciətlər olmadığına görə indiyədək belə qutulardan istifadə olunmayıb.

Məntəqədə seçkilərin gedişini izləyən müşahidəçilərlə də görüşüb onların fikrini öyrəndik. Müşahidəçi Şura Quliyeva bildirdi ki, səhər seçki məntəqəsi açılandan prosesi izləyir. Seçicilər sərbəst qaydada gələrək istədikləri namizədə səs verirlər. Müşahidəçilər seçkinin gedişini normal hesab edirlər. Doğrudur, səhər saatlarında fəallıq bir qədər yüksək olub, ancaq sonradan da seçicilər vaxt taparaq məntəqəyə gəlməkdə və səs verməkdə davam edirlər.

- İndiyədək heç bir qanun pozuntusu qeydə alınmayıb, yaxud seçici tərəfindən şikayət edilməyib. Səsvermə prosesi normal qaydada davam edir, - deyə müşahidəçi əlavə etdi.

Saat 17-də dairə seçki komissiyasından aldığımız məlumata görə, həmin vaxta dairədə 716 seçici səsvermədə iştirak edib və seçki baş tutmuş hesab edilib.

Sumqayıt

Bələdiyyələrə təkrar, əlavə və yeni seçkilər gənclik şəhərindəki bütün dairələr üzrə məntəqələrdə mütəşəkkil qaydada keçmişdir. Sübh tezdən məntəqələrə səsverməyə gələnlərin sayı daha çox idi. Elə seçkilərin baş tutması və müvəffəqiyyətlə sona çatması da bunun sayəsində mümkün olmuşdur.

Sumqayıt 41 saylı birinci seçki dairəsi şəhərin mərkəzində - H.Ərəblinski adına Musiqili Dram Teatrının binasında yerləşir. Burada dairənin iki seçki məntəqəsi də fəaliyyət göstərir. Dairə seçki komissiyasının sədri Məzahir Süleymanovun bu sahədə zəngin təcrübəsi var. O, bizə seçkilərin gedişi barədə ətraflı məlumat verdi:

- Yerli özünüidarənin demokratik forması olan bələdiyyələr artıq xeyli təkmilləşərək ictimai sistemin mütəhərrik orqanına çevrildiyi üçün onlarda təmsil olunmaq istəyənlər də çoxalmışdır. Təkcə Sumqayıtda bu seçkilərdə 1 yer uğrunda 14 namizəd mübarizəyə qoşulmuşdur. Göründüyü kimi, rəqabət böyükdür. Dairəmizin əhatə etdiyi 39 məntəqənin 42898 seçicisi var. Səsvermənin ilk hesabat saatları ərzində artıq 6914 nəfər, başqa sözlə desəm, seçicilərin 16 faizi məntəqələrimizə gələrək öz iradəsini ifadə etmişdir. Dairəmiz üzrə 291 müşahidəçi qeydə alınmışdır, hamısı da öz təşəbbüsü ilə. İndiyədək heç bir müşahidəçinin səsvermənin gedişatı barədə iradı, narazılığı olmayıb. İnanıram ki, sonadək belə davam edəcək.

Dairənin 23 və 24 saylı məntəqələri də eyni binada yerləşir. Günorta saatlarında orada olduq. Məntəqə sədrləri Qasım Qasımov və Dilşad Hüseynova yaradılan şəraitdən razılıqlarını bildirdilər. Öyrəndik ki, bu məntəqələrin hər birində 1000-dən artıq seçici qeydiyyata alınmışdır. Əvvəlcədən seçicilər arasında aparılan maarifləndirmə işi nəticəsində səsvermədə heç bir problem yaranmamışdır. Hər kəsin sənədləri yubadılmadan yoxlanılır, barmağı boyanır, səsvermə bülletenləri verilir və seçicilər pərdə arxasına keçərək istədikləri namizədə səs verirlər. Rabitə, enerji, tibb xidməti və sair də qaydasındadır. Seçicilərin tam rahatlığı üçün hər cür şərait təmin edilmişdir.

İxtisasca həkim olan müstəqil müşahidəçi Rafiq Əsgərov müsahibəsində bildirdi ki, məntəqədə olduğu vaxt ərzində heç bir qanun pozuntusu ilə rastlaşmayıb. Səsvermə sakit, problemsiz davam edib.

Dairənin 25 saylı məktəbdə yerləşən 5-ci seçki məntəqəsində də səsvermənin qaydalara müvafiq, insidentsiz keçirildiyinin şahidi olduq. Məntəqə seçki komissiyasının sədri Asif Hüseynov üçün bu, artıq dördüncü seçkilərdir. Özünə və komissiya üzvlərinin peşəkarlığına yetərincə inamlıdır. Onun dediyinə görə, bugünkü seçicilər də daha 10-15 il əvvəlki seçicilər deyil. Hamı öz hüquq və vəzifələrini yaxşı bilir. Heç kəs seçicilərə təzyiq edə, istiqamət verə bilməz. Buna görə də səsvermə normal və qanunauyğun şəraitdə gedir.

"Azərikimya" İstehsalat Birliyinin təmsilçisi, müşahidəçi Dəyanət Məmmədov da bələdiyyələrə təkrar, əlavə və yeni seçkilərin bu məntəqədə gedişindən heç bir narazılığı olmadığını söylədi. Dedi ki, seçici aktivliyi hələlik yüksək olmasa da, onlar arası kəsilmədən məntəqəyə gəlir və maneəsiz olaraq səsvermə hüquqlarından istifadə edirlər.

Seçicilərdən biri, 72 yaşlı şəhər sakini Məqsəd Quliyevin ürək sözləri:

- İndiyə qədər iştirak etdiyim seçkilərin dəqiq sayını-hesabını itirmişəm. Bircə onu deyə bilərəm ki, müstəqillik illərində Azərbaycanda seçkilər get-gedə daha demokratik və şəffaf keçir, səviyyə durmadan yüksəlir. Elə bu seçkiləri götürək. Məntəqələr geniş, işıqlı, komissiya üzvləri gülərüz, mehribandırlar. Heç bir gərginlik, təşviş hiss olunmur. Seçicilər üçün çox sivil bir şərait yaradılıb. İnanmaq istəyirəm ki, bu səsvermədən sonra qalib gələn namizəd də etimadı doğrultmağa, doğma şəhərimizin abadlıq və quruculuq işlərində daha yüksək fəallıq göstərməyə çalışacaq...

Son hesabat saatının məlumatından öyrəndik ki, 41 saylı Sumqayıt birinci seçki dairəsi üzrə səsvermədə seçicilərin 9714 nəfəri, yəni 22,64 faizi səsvermədə iştirak etmişdir.

Rauf ƏLİYEV, M. HACIXANLI, A. ABBASOV, Paşa ƏMİRCANOV, Əli NƏCƏFXANLI

Xalq qəzeti.- 2011.-1 dekabr.- S. 4.