AMEA Mərkəzi Elmi Kitabxanasında professor Abuzər Xələfovun 80 illik yubileyinə həsr olunmuş konfrans keçirilmişdir

Dekabrın 13-də Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) Əməkdar Elm Xadimi, Azərbaycan kitabxanaşünaslıq elminin banisi, BMT yanında Beynəlxalq İnformasiyalaşdırma Akademiyasının həqiqi üzvü, professor Abuzər Xələfovun 80 illik yubileyinə həsr olunmuş konfrans keçirilmişdir.

AMEA-nın müxbir üzvü Teymur Kərimli professor A.Xələfovun şərəfli ömür yolundan, çoxşaxəli fəaliyyətindən, elm sahəsində qazandığı uğurlardan, kitabxanaçılığın inkişafındakı rolundan danışmış, yubilyarı təbrik etmişdir.

MEK-in direktoru, filologiya elmləri doktoru Aybəniz Əliyeva-Kəngərlinin "Milli ziyalılıq meyarı" mövzusunda məruzəsində görkəmli alim Abuzər Xələfovun həyatı və fəaliyyəti barədə geniş məlumat verilmişdir. Bildirilmişdir ki, A.Xələfov 1931-ci ildə Göyçə mahalının Cil kəndində dünyaya gəlmişdir. 1950-ci ildə orta məktəbi bitirdikdən sonra indiki Bakı Dövlət Universitetinin filologiya fakültəsinin kitabxanaşünaslıq və biblioqrafiya şöbəsinə daxil olmuş, ali təhsilini başa vurduqdan sonra universitetdə müəllim kimi fəaliyyətə başlamışdır. 1962-ci ildə BDU-nun kitabxanaçılıq şöbəsi müstəqil kitabxanaçılıq fakültəsinə çevrilmiş, A.Xələfov bu fakültənin ilk dekanı olmuş və 25 il bu vəzifədə səmərəli fəaliyyət göstərmişdir.

A.Xələfov keçmiş SSRİ məkanında kitabxana işinin tarixi sahəsində ilk elmlər doktoru kimi şöhrət qazanmış və Azərbaycan kitabxanaşünaslıq elmi məktəbinin əsasını qoymuşdur.

Alimin elmi araşdırmalarında Azərbaycanda ali kitabxanaçılıq-biblioqrafiya təhsilinin tarixi və nəzəri problemləri mühüm yer tutur. Onun "Azərbaycanda kitabxanaçılıq təhsilinin inkişafı", "Azərbaycanda ali kitabxanaçılıq təhsili" kitabları, çoxsaylı məqalələri, tədris-metodik materialları respublikada kitabxanaçılıq-biblioqrafiya təhsilinin, yüksəkixtisaslı mütəxəssislər hazırlanmasının nəzəri cəhətdən həllinə ciddi təsir göstərmişdir. Professor A.Xələfov kitabxanaşünaslıq-biblioqrafiya elmi sahəsində mütəxəssis, elmi-pedaqoji kadrların hazırlığında da əvəzsiz rol oynamış, bir elmlər doktoru və 13 elmlər namizədi yetirmişdir.

Azərbaycanın müstəqilliyi dövründə iki hissədən ibarət "Kitabxanaşünaslığa giriş" dərsliyinin çapdan çıxması A.Xələfovun elmi fəaliyyətinin zirvəsi sayıla bilər. Bu nəşr Azərbaycanda kitabxanaçılıq təhsili tarixində kitabxanaşünaslığa dair ilk dərslikdir.

Professor A.Xələfovun üçcildlik "Azərbaycanda kitabxana işinin tarixi", "Heydər Əliyev və Azərbaycanda kitabxana işi" kimi monoqrafiyaları xalqımızın elm və mədəniyyət tarixinə qiymətli töhfələr kimi dəyərləndirilmişdir.

Akademik Budaq Budaqov, AMEA İnformasiya Texnologiyaları İnstitutunun əməkdaşı Səyyar Abdullayev, Bakı Dövlət Universitetinin (BDU) professorları Xəlil İsmayılov, Bayram Allahverdiyev, BDU-nun dosentləri Knyaz Aslan, Nadir İsmayılov və başqaları görkəmli alimin Azərbaycanda kitabxanaşünaslıq və biblioqrafiya elminə verdiyi sanballı töhfələrdən, elmi-pedaqoji və ictimai-siyasi fəaliyyətindən söhbət açmış, yubilyarı təbrik etmişlər.

Sonda A.Xələfov kitabxanaçılıq peşəsinin müqəddəsliyindən bəhs etmiş, tədbirin təşkilatçılarına və iştirakçılarına minnətdarlığını bildirmişdir.

Tədbir çərçivəsində təşkil olunmuş sərgidə alimin elmi əsərləri, həyat və yaradıcılığını əks etdirən fotoşəkillər nümayiş olunmuşdur.

Xalq qəzeti.- 2011.- 14 dekabr.- S. 6.