Lerik ildən-ilə gözəlləşir

Rayon icra hakimiyyəti başçısının Lerik şəhər inzibati ərazi dairəsi üzrə nümayəndəliyinin 2010-cu ildə görülən işlərə və qarşıda duran vəzifələrə həsr olunmuş hesabat yığıncağında idarə, təşkilat və müəssisələrin rəhbərləri, ictimaiyyət nümayəndələri iştirak edirdi.

Hesabat məruzəsi ilə şəhər ərazi icra nümayəndəsi Atamalı Nəcəfov çıxış etdi. O, bildirdi ki, ölkə Prezidentinin diqqət və qayğısı ilə tikinti-quruculuq işləri dağlıq bölgədə də davam etdirilmişdir. Bunun nəticəsində Lerik şəhəri simasını tamamilə dəyişmişdir. Möhtərəm Prezidentimiz İlham Əliyevin rayona üçüncü səfəri bütün leriklilərin qəlbində sonsuz sevinc və qürur hissləri yaratmışdır. Burada görülən işlər fərəh doğurur. Dövlət Neft Şirkətinin vəsaiti hesabına rayon mərkəzi xəstəxanası əsaslı təmir edilib istifadəyə verilmiş, müasir tibb avadanlığı ilə təmin edilmişdir. Qarabağ müharibəsi əlilləri və şəhid ailələri üçün Əmək və Əhalinin Sosial Müdafiəsi Nazirliyinin dəstəyi ilə inşa edilən 16 mənzilli yaşayış evi istifadəyə verilmişdir. Şəhərin baş meydanında Heydər Əliyev Mərkəzi, rayon icra hakimiyyəti, baytarlıq idarəsi, habelə "Uzunömürlülər" muzeyi üçün bina tikilib və istifadəyə verilmişdir.

Şəhərdə küçə və meydanların təmiri, bərpası və yenidən qurulması davam etdirilmişdir. N.Nərimanov küçəsində şəhərin giriş qapısı, Şəhidlər Xiyabanı, yolun alt hissəsində dağılmış istinad divarları bərpa edilmişdir. C.Cabbarlı küçəsində bulağın və pilləkənlərin tikintisi başa çatdırılmışdır. Hacı Heydər küçəsində yol genişləndirilmiş, küçədəki bulağın və ona bitişik sahədə pilləkənlərin, istinad divarlarının yenidən tikilməsi başa çatdırılmışdır. A.Nuriyev, E.Qarayev, A.Əsədullayev, N.Nərimanov, Ş.Qurbanov küçələrində işıqlandırma sistemi təmir və bərpa edilmişdir. Hesabat yığıncağında rayon icra hakimiyyətinin başçısı Rövşən Bağırov çıxış edərək bildirdi ki, 2010-cu ildə dünyada iqtisadi və maliyyə böhranının davam etməsinə baxmayaraq, Azərbaycan böyük uğurlara nail olmuşdur. Prezident İlham Əliyevin Nazirlər Kabinetinin 2010-cu ilin yekunlarına həsr edilmiş yığıncağında qeyd etdiyi kimi, ölkə qarşısında duran bütün vəzifələr şərəflə yerinə yetirilmişdir. İqtisadiyyatımız təxminən 5 faiz, əhalinin pul gəlirləri 12 faiz artmış, inflyasiya cəmi 5,7 faiz təşkil etmişdir. Ölkəmizə 15 milyard dollar sərmayə qoyulmuş, valyuta ehtiyatlarımız 20 milyard dollardan 29 milyard dollara qalxmışdır.

Dövlətimizin başçısı İlham Əliyevin rəhbərliyi altında həyata keçirilən mühüm dövlət proqramları, məqsədyönlü islahatlar nəticəsində respublikanın sosial-iqtisadi tərəqqisi getdikcə güclənir, ölkənin davamlı inkişafı üçün yeni-yeni imkanlar yaranır. Bu gün fəxrlə qeyd edə bilərik ki, Azərbaycan artıq digər ölkələrə investisiya qoyaraq mühüm layihələrin icrasını həyata keçirir.

Dövlətimiz tərəfindən sosialyönümlü siyasət davam etdirilmiş, minimum əməkhaqqı və pensiyaların baza hissəsi qaldırılmış, ünvanlı sosial yardım proqramı uğurla icra edilmişdir.

Respublikamızdakı uğurlu iqtisadi islahatlar Lerikin də sosial-iqtisadi inkişafına ciddi təsir göstərmişdir. Rayonun siması tanınmaz dərəcədə dəyişmiş, bütün ərazilərdə quruculuq-abadlıq işləri böyük vüsət almışdır. İqtisadiyyatın bütün sahələrində uğurlara imza atılmışdır.

İyunun 25-də rayona səfər edən Prezident İlham Əliyevin Lerik şəhərində inşa edilmiş sosial obyektlərin açılışında iştirakı, ictimaiyyət nümayəndələri ilə görüşü hər kəsə unudulmaz təsir bağışladı. Prezidentin görüşdə söylədiyi fikirlər rayonda görülmüş işlərə verdiyi ən böyük qiymətdir.

Ulu öndər Heydər Əliyevin adını daşıyan mərkəzi meydan yenidən qurulmuş, bəzək ağacları və gül kolları əkilmiş, fəvvarə tikilmiş və müasir işıqlandırma sistemi yaradılmışdır. Ümummilli liderin möhtəşəm abidəsi ucaldılmış, Heydər Əliyev Mərkəzi üçün əzəmətli bina inşa edilmişdir. Azərbaycan Respublikası Dövlət Bayrağının asılması üçün meydanda 35 metrlik qüllə qaldırılmışdır. Lerik şəhərinin küçələrində istinad divarları milli ornamentlərə uyğun inşa edilmiş, küçə və xiyabanlara üzlük daş döşənmiş, müasir işıqlandırma sistemi yaradılmışdır. İctimai xadim N.Nərimanovun abidəsi və onun yerləşdiyi park əsaslı təmir edilmiş, rayon tarix-diyarşünaslıq muzeyinin qarşısında fəvvarə kompleksi tikilmişdir. Lerik şəhər 2 nömrəli orta məktəbin binası isə Dövlət Neft Şirkətinin maliyyə dəstəyi ilə əsaslı təmir edilərək istifadəyə verilmişdir.

Dövlət Proqramı üzrə Lerikdə 2010-cu ildə bütün sahələrdə uğurlara nail olunmuşdur. Ümumiyyətlə, son illərdə dağların qoynunda hər cür sosial infrastrukturu olan bir şəhər salınmışdır. Rayonda 22 yeni məktəb binası tikilmiş, 30-dan çox məktəb binası əsaslı təmir edilmiş, müasir avadanlıq və kompyuterlərlə təmin edilərək məktəblilərin istifadəsinə verilmişdir.

Yığıncaqda çıxış edən sakinlər göstərilən qayğı və diqqətə görə ölkəmizin rəhbərliyinə minnətdarlıqlarını bildirdilər.

Əli NƏCƏFXANLI

Xalq qəzeti.- 2011.- 1 fevral.- S. 4.