Azərbaycan gəncliyi öz uğurlarına görə Prezident İlham Əliyevə borcludur

Mən əminəm ki, Azərbaycanın gələcəyi etibarlı əllərdədir. Çünki bizim bugünkü gəncliyimiz sağlam düşüncəli gənclərdir, vətənpərvər gənclərdir, xalqını, millətini sevən gənclərdir.

Heydər ƏLİYEV,

Ümummilli lider

Azərbaycan gəncləri hər il fevralın 2-də özlərinin əziz bayramını - Gənclər Gününü qeyd edirlər. Müstəqillik dövrümüzün gəncliyi əslində bu dəyərli və müqəddəs günün təsis edilməsinə görə xalqımızın ümummilli lideri, dünya şöhrətli siyasi xadim, müasir və çiçəklənən Azərbaycanın banisi Heydər Əliyevə borcludur. Bu günü qədirbilən Azərbaycan gənclərinə ulu öndər 1997-ci il fevralın 1-də imzaladığı xüsusi fərman əsasında bəxş etmişdir. Həmin fərmana əsasən, 1996-cı il fevralın 2-si - Azərbaycan gənclərinin birinci forumunun keçirildiyi gün ölkəmizdə Gənclər Günü kimi təsbit edilmişdir. Biz gənclər bu diqqət və qayğıya görə ulu öndər Heydər Əliyevi həmişə minnətdarlıq hissi ilə yada salır, xatirəsini əziz tuturuq.

Hər yeni Gənclər Günündə ulu öndərimizin qarşımıza qoyduğu min dəfə ölçülüb-biçilmiş, tarixin və zamanın süzgəcindən keçirilmiş mühüm vəzifələri xatırlayır, dövlət müstəqilliyimizin, suverenliyimizin möhkəmləndirilməsi üçün nə kimi işlər görə biləcəyimizi müəyyənləşdiririk. Əslində, gənclərimizin qarşısında duran vəzifələri də ümummilli liderimiz 1996-cı il fevralın 2-də keçirilmiş Azərbaycan gənclərinin birinci və 1999-cu il mart ayının 2-3-də keçirilmiş ikinci forumlarındakı proqram xarakterli çıxışlarında əks etdirmişdir. Ümummilli liderimiz bu vəzifələr sırasında mənəvi tərbiyə, milli ruhda tərbiyə, milli vətənpərvərlik məsələsi, mükəmməl təhsil və sair kimi məsələlərə böyük önəm verirdi. "Azərbaycanın gənc istedadlarına dövlət qayğısı haqqında" 22 iyun 1996-cı il tarixli fərmanı, "Gənc İstedadlar Fondu"nun yaradılması ilə bağlı 13 sentyabr 1996-cı il tarixli sərəncamı və digər sənədlər gənclərin böyük dostu və himayədarı olan Heydər Əliyevin Azərbaycan gəncliyinə qayğı və diqqətini, məhəbbətini əks etdirirdi.

Biz tələbə gənclər ulu öndərin qayğısını həmişə öz üzərimizdə hiss etmişik. Azərbaycan dövlətinin Heydər Əliyev tərəfindən müəyyənləşdirilmiş gənclər siyasəti bu gün onun siyasi varisi, Azərbaycan Prezidenti İlham Əliyev tərəfindən ardıcıllıqla davam etdirilir.

Prezidentimiz ölkənin ictimai-iqtisadi-siyasi həyatında gənclərin böyük rol oynamasına xüsusi önəm verir. Məhz dövlət başçısının qayğı və diqqətinin nəticəsidir ki, bu gün Azərbaycan gəncləri həm dövlət strukturlarında, həm ictimai sektorda, həm də elmi-pedaqoji sahələrdə fəal iştirak edirlər. Son illərdə dövlətin gənclərlə bağlı məqsədli dövlət proqramlarının həyata keçirilməsi bu sahədə müsbət dəyişikliklərə təkan vermişdir. Bu baxımdan Prezident İlham Əliyevin sərəncamı ilə təsdiq edilmiş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" böyük əhəmiyyət daşıyır. Bu proqramın həyata keçirilməsi gənclərimizin dünyanın nüfuzlu ali təhsil müəssisələrində təhsil alaraq respublikamızın inkişafına xidmət etmələrinə geniş imkanlar yaradır. Son illərdə aparılan kadr islahatları zamanı müxtəlif sahələrdə, xüsusən gənclərlə iş sahəsində kifayət qədər təcrübəyə malik olan bacarıqlı gənc kadrların dövlət idarəetmə orqanlarında, icra hakimiyyəti strukturlarında rəhbər vəzifələrə təyin edilməsi dövlət başçısının gənclərə böyük etimadından xəbər verir.

Prezident İlham Əliyev gənclərin yaxşı təhsil alıb cəmiyyətə faydalı insanlar kimi yetişməsi məsələsinə həmişə böyük diqqət yetirir. Bu məqsədlə əla qiymətlərlə oxuyan tələbələrə Prezident təqaüdünün verilməsi bu qayğının bariz nümunəsidir. Bu, biz gəncləri biliklərə daha səylə yiyələnməyə həvəsləndirir. Eyni zamanda, Gənclər və İdman Nazirliyi, gənclər təşkilatları tərəfindən mütəmadi olaraq olimpiadaların, müsabiqələrin, bilik yarışlarının, elmi əyləncəli oyunların, elmi-texniki yaradıcılıq müsabiqələrinin keçirilməsi gənclərin intellektual səviyyəsinin yüksəlməsinə kömək edir.

Bu tipli tədbirlər təhsil aldığım qocaman ali məktəblərimizdən olan Bakı Dövlət Universitetində də keçirilir. Universitetin rektoru, Milli Məclisin deputatı Abel Məhərrəmov gənclərimizin təkcə bilikli deyil, həm də yüksək intellektual səviyyəli, siyasi cəhətdən yetkin kadrlar kimi formalaşması üçün geniş şəraitin yaradılmasına çalışır. Gənclərimiz azad şəkildə seçim edərək ictimai-siyasi təşkilatlara üzv olur, ictimai tədbirlərdə fəallıq göstərirlər. Mən də öz azad seçimimi edərək Yeni Azərbaycan Partiyasına üzv olmuşam. Sevindirici haldır ki, partiyanın 500 mininci üzvü mən olmuşam. Bu münasibətlə Yeni Azərbaycan Partiyasında xüsusi toplantı keçirildi və mənə YAP-ın üzvlük bileti təqdim olundu. Həmin tədbirdə çıxış edən partiyanın sədr müavini-icra katibi Əli Əhmədov bildirdi ki, YAP üzvlərinin təxminən 40 faizini gənclər təşkil edir. Hazırda təhsilimi lazımınca davam etdirməklə yanaşı, siyasi səriştəmin artırılması qayğısına da qalmağa çalışır, eyni zamanda, universitet gənclər təşkilatının işində fəal iştirak edirəm.

Prezident İlham Əliyev Azərbaycan gəncləri ilə hər dəfə görüşəndə onların vətənpərvərlik hisslərini yüksək qiymətləndirir. Bu məsələnin torpaqlarımızın Ermənistanın işğalından azad olunmasında böyük rol oynayacağını qeyd edir. Cənab Prezident son vaxtlar Azərbaycanın ərazi bütövlüyü uğrunda şəhid olmuş Mübariz İbrahimov kimi vətənpərvər oğulların gənclərimiz üçün örnək olduğunu da qürur hissi ilə bildirmişdir.

Prezidentin həyata keçirdiyi uğurlu dövlət gənclər siyasətinin prioritetlərindən biri də fiziki cəhətdən sağlam olan gənc nəsil yetişdirməkdir. Azərbaycan gəncliyinin təxminən son10-12 il ərzində bir çox sahələrdə, o cümlədən, idman sahəsində əldə etdiyi uğurların bazasında məhz Prezident İlham Əliyevin yüksək qayğısı dayanır. Hələ Neft Şirkətinin birinci vitse-prezidenti və Milli Olimpiya Komitəsinin prezidenti vəzifələrində çalışarkən hörmətli İlham Əliyev respublikada olimpiya hərəkatının hərtərəfli inkişafına böyük təkan vermişdi. Məhz bunun nəticəsi idi ki, dünya Olimpiya yarışlarında idmançılarımız bir-birinin ardınca misilsiz qələbələr qazanmışdılar. Milli Olimpiya Komitəsi İlham Əliyevin rəhbərliyi ilə bu gün də gənclərimizi dünyanın ən mürəkkəb və çətin idman yarışlarında qələbəyə həvəsləndirir.

Prezident gənclərimizin sağlamlığına qayğı məsələsini daim diqqət mərkəzində saxlayır. Məhz onun təşəbbüsü ilə respublikanın, demək olar ki, bütün rayonlarında olimpiya-idman mərkəzlərinin yaradılması bu fikrin əyani təsdiqidir.

Azərbaycan gəncliyi bu gün dövlət başçısından əlavə, Heydər Əliyev Fondu kimi nüfuzlu bir təşkilatın, eyni zamanda, həmin fondun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın da hərtərəfli qayğısı ilə əhatə olunub. Hörmətli Mehriban xanımın təşəbbüsü ilə ölkəmizdə təhsil sahəsində böyük işlər görülüb, minlərlə yeni məktəb binası inşa edilib, köhnə və yararsız binalar isə əsaslı şəkildə təmir olunaraq məktəblilərin istifadəsinə verilib. Bu istiqamətdə yeni işlər görülməkdədir. Bu, Heydər Əliyev Fondunun və şəxsən onun prezidentinin Azərbaycan məktəblilərinin problemlərinə daim diqqət yetirdiyini göstərir. Keçmiş sovet dönəmində qayğıdan kənar qalmış Azərbaycan təhsili müstəqillik dövründə dövlətimizin və Heydər Əliyev Fondunun səyi ilə böyük dirçəlişə nail olmuşdur.

Mehriban xanımın mütəmadi olaraq uşaq bağçalarında olması, burada təlim-tərbiyə alan körpələrimizlə görüşlər keçirməsi də biz gənclərin dövlətçilik ruhunda tərbiyələnməsində mühüm rol oynayır. Heydər Əliyev Fondunun prezidenti uşaq evlərində böyüyən yeniyetmələrimizi də unutmur, daim onların da problemlərinin həllinə yardım göstərir.

Heydər Əliyev Fondu Rusiya nümayəndəliyinin rəhbəri Leyla xanım Əliyeva isə Azərbaycan gəncliyinin parlaq bir nümunəsi kimi yetişməkdə olan yeni nəsil üçün əsl örnəkdir. O, Rusiyadakı Azərbaycan gənclər təşkilatının xətti ilə böyük işlər həyata keçirir, SSRİ-nin dağılmasından sonra ağır fəlakətlər yaşamış, Ermənistanın işğalına məruz qalmış, torpaqlarının 20 faizini itirmiş, 1 milyon nəfərdən çox qaçqın və məcburi köçkünü olan Azərbaycanın haqq səsinin təkcə Rusiyaya deyil, bütün dünyaya yayılmasında mühüm xidmətlər göstərir. Biz gənclər Leyla xanımın təşəbbüsü ilə həyata keçirilən "Xocalıya ədalət" kampaniyasının da öz bəhrəsini verəcəyinə və Xocalı soyqırımının dünya ictimaiyyəti tərəfindən tanınacağına inanırıq.

Son olaraq ölkəmizin bütün gənclərini Gənclər Günü münasibətilə təbrik edir, onlara təhsillərində və əmək fəaliyyətlərində böyük uğurlar arzulayıram.

Ləman FƏRZƏLİYEVA,

Bakı Dövlət Universiteti hüquq

fakültəsinin III kurs tələbəsi

Xalq qəzeti.- 2011.- 2 fevral.- S. 4.