Oğuz: qloballaşma dövrünün əsas hədəfi-inkişaf və modernləşmə

... Yenə Oğuzun çal-çağırlı vaxtları başlayıb. Dağlara qar düşüb. Xüsusi həvəskarlar var. Onlar bu qədim yurda yalnız belə vaxtlarda gəlirlər. Elələri də var ki, ancaq yay aylarına üstünlük verir. Şəhərin istisindən baş götürüb bu əsrarəngiz yerdə istirahət edir.

Rasim Amanovla bu barədə çox söhbətlərimiz olub. O isə tamam başqa fikirdədir. "Belə düşünənlərlə razılaşmıram, - deyir, - Oğuzun qışı da gözəldir, yayı da. "Bəs başqa fəsillər? Sonuncu söhbətimizdə deyəsən Rasim müəllim bu sualı heç gözləmirdi də... Ona görə bir qədər duruxdu. "Oğuz ilin bütün fəsillərində gözəl olur demək istəyirdim, sən də məni əməlli-başlı çaşdırdın".

Deyəsən söhbətə başım qarışdığından Rasim müəllimi sizə təqdim etmədim. Deyim, siz də tanış olun. Peşiman olmazsınız.

Rasim Amanov həmkarımızdır. Oğuzda yaşayır. Bu yurda o qədər bağlı adamdır ki, danışdıqca ona qulaq asmaqdan doymursan ki, doymursan. Oğuzun tarixi, bu günü ilə bağlı nə məlumat istədin, zəng vur, ya get görüş, sənə elə dəqiq informasiya versin ki, onda olan fenomen yaddaşa heyran qalırsan. Bu da ilk növbədə insanın doğulduğu yurda, müqəddəs bildiyi torpağa bağlılığından irəli gəlir.

Xidməti işimlə əlaqədar hər ay Oğuzda oluram. Sadə vətəndaşlarla, insanlarla görüşürəm, onlarla söhbət edirəm. Hər mövzuda danışırıq. Mənim üçün bir də o maraqlıdır ki, buradakı insanların hamısı Rasim müəllim kimi, öz doğulduqları yer, ocaq haqqında elə səmimi, isti sözlər danışırlar ki, sözün həqiqi mənasında, qəlbin qürur hissi ilə döyünür.

Bir dəfə bu barədə rayon icra hakimiyyətinin başçısı Aydın Əlihüseynovla söhbət edəndə onun dediyi söz indi də qulaqlarımdan getmir: "Çünki bu, təpərdən, qeyrətdən irəli gəlir, oğuzlular bax belə insanlardırlar". Nə qədər sərrast deyilmiş bir ifadədir.

Aydın Əlihüseynov özü çox maraqlı müsahibdir. Uzun, kəşməkeşli həyat yolu keçib. Bir neçə xarici dil bilir. Dünya ədəbiyyatından, klassiklərindən elə maraqlı fikirlər söyləyir ki... elə bilirsən ki, sırf ədəbiyyatla məşğuldur. Bu gün Azərbaycanın dünya ölkələri sırasında tutduğu yer, artan nüfuzu, iqtisadi sahədə qazanılan uğurlar barədə elə təhlillər aparır, elə faktlar gətirir ki, heyran qalmaya bilmirsən.

Bu dəfəki görüşümüzdə isə onunla tamam başqa mövzuda söhbət etdik. Oğuzda görülən möhtəşəm işlərdən, rayonun bu günündən danışdıq. Əslində bu da elə həmin mövzunun tərkib hissəsidir. Başçı 2010-cu ildə əldə etdikləri uğurları sadaladı, gündən-günə simasını dəyişən, adı kimi özü də qədim olan bir diyarın gözəlliyindən söhbət açdı. Bildirdi ki, "Azərbaycan Respublikası regionlarının sosial-iqtisadi inkişafı Dövlət Proqramı"nda (2009 - 2013-cü illər) nəzərdə tutulan tədbirlərin vaxtında yerinə yetirilməsi üçün Oğuzda xeyli iş görülüb. Tikinti və abadlıq işləri geniş vüsət alıb. Əvvəlki illərdə başlamış tikintilərin inşası uğurla davam etdirilib, bir sıra yeni obyektlərin təməli qoyulub. Əsaslı tikinli obyekti olan "Qlükoza" zavovdunda tikinti işləri isə başa çatdırılıb.Yaxın vaxtlarda zavodun açılış mərasimi keçiriləcək. Yaxından, uzaqdan qonaqlar dəvət edəcəyik. Siz də gələrsiniz. Özünüz görərsiniz ki, necə uğurlu layihədir.

İcra hakimiyyətinin başçısı çox faktlar gətirdi. Sayım, siz də tanış olun. Rayon polis şöbəsinin yeni inzibati binası da keçən il istifadəyə verilib. Uzaqdan diqqəti cəlb edir. Çox yaraşıqlıqdır.

Şəhərin bir neçə küçəsində təmir işləri aparılıb. Xasməmmədov, Saleh Nazıyev, Cavanşir, Gənclik və N.Nərimanov küçəsi ilə Saleh Qazıyev küçələrinin kəsişməsində asfalt örtüyü əsaslı təmir edilib. H.Əliyev, Mehdi Hüseyn küçələrinə asfalt örtüyü salınıb. Neçə-neçə binanın dam örtüyü əsaslı təmir edilib.

Şəhərimizin mərkəzində yerləşən parkdakı ulu öndərin adını daşıyan muzeydə əsaslı bərpa işləri aparılıb, parkda ümummilli liderin əzəmətli heykəli qoyulub. Abidənin və muzeyin ətrafındakı ərazidə abadlıq tədbirləri həyata keçirilib.

Oğuz şəhərinin cənub hissəsi ildən-ilə daha da abadlaşdırılır. Hazırda burada Avropa standartlarına uyğun səviyyədə inşa edilən parkda tikinti işləri davam etdirilir. Rayon Məhkəməsinin inzibati binasının və olimpiya kompleksinin önündə smeta dəyəri 10 milyon manat olan sağlamlıq mərəkəzinin də tikintisinə başlanılıb. Bir faktı deyim ki, təkcə Sağlamlıq Mərkəzi istifadəyə verildikdən sonra burda 40 nəfər yeni işlə təmin olunacaqdır. Qeyd edək ki, Oğuz şəhərinin 2010 - 2035-ci illər üzrə nəzərdə tutulan baş planı hazırlanıb.

Göründüyü kimi, regionların sosial-iqtisadi inkişafı Dövlət Proqramında və Azərbaycan Respublikasının Prezidenti cənab İlham Əliyevin Oğuza səfərləri zamanı qarşıya qoyulan vəzifələrin yerinə yetirilməsi sahəsində əvvəllər olduğu kimi keçən il də mühüm işlər görülüb.

Rayonda açılan 189 yeni iş yerinin 167-si daimidir. Təkcə keçən ilin avqustunda keçirilmiş "əmək yarmarkası"nda 58 nəfər işlə təmin olunub. Yeni iş yerlərinin açılması üçün bundan sonra da imkanlardan səmərəli şəkildə istifadə olunmasına səy göstəriləcəkdir. İqtisadiyyatın əsas sahələrində istehsal olunan məhsul və xidmətlərin ümumi həcmi 36 milyon 838 min manat təşkil edib.

Oğuz kənd təsərrüfatı rayonudur. Rayonun iqtisadiyyatında taxılçılıq, meyvəçilik və heyvandarlıq aparıcı rol oynayır. Bununla yanaşı, təsərrüfatlarda kartof və tərəvəz məhsulları da istehsal olunur. Keçən il rayonda 11 min 999 ton buğda, 5 min 517 ton arpa olmaqla cəmi 17 min 516 ton payızlıq taxıl istehsal olunub. Hər hektardan məhsuldarlıq 13,3 sentner təşkil edib. Rayonda 2 min 181 ton kartof istehsal edilib. Tərəvəz istehsalı 2 min 765 ton olmuşdur.

Rayonun təsərrüfatlarında 21,5 ton üzüm, 1 min 416 ton meyvə istehsal edilib, ət, süd, yumurta və yun istehsalı da xeyli artıb. 2 min 575 ton ət, 15 min 896 ton süd, 3 milyon 973 min ədəd yumurta, 110 ton yun istehsal edilib.

Azərbaycan Respublikasının Prezidenti cənab İlham Əliyevin uğurlu və uzaqgörən siyasəti sayəsində ölkəmizin sürətli iqtisadi tərəqqisinin nəticəsi olaraq ümumi təhsil müəssisələrində əlverişli təlim-tərbiyə şəraitinin yaradılmasına xidmət edən maddi-texniki bazanın yenidən qurulması, müasir tədris avadanlığı və informasiya-kommunikasiya texnologiyaları ilə təminat sahəsində geniş miqyaslı işlərin görülməsi bu günümüzün danılmaz həqiqətidir. Kənd əsas məktəblərində, yerli büdcə vəsaiti hesabına təmir işləri görülüb. Qumlaq, Padar kənd orta və Xaçmaz, Yemşənli kənd əsas məktəblərində, Astraxanovka, Baş Daşağıl, Qarabulaq, Xalxal və Xaçmaz kənd 1 saylı orta məktəblərində təmir işləri aparılıb. Rayonun Calut kəndində 220 yerlik yeni məktəb binasının tikintisinə başanılıb.

Rayonda müasir tələblərə cavab verən, müasir avadanlıqlarla təchiz olunan xəstəxana kompleksinin istifadəyə verilməsi rayon əhalisinə göstərilən səhiyyə xidmətinin səviyyəsinin yüksəldilməsinə, əhalinin müalicə üçün başqa yerlərə getməsinin aradan qaldırılmasına böyük imkanlar yaradıb.

Keçən il 14 nəfər əlil və şəhid ailəsi putyovka ilə təmin edilib. 2 nəfərə əlil arabası verilib. Bir nəfər Böyük Vətən müharibəsi əlilinə və bir nəfər Qarabağ əlilinə pulsuz minik avtomobili verilib. Əhalinin Sosial Müdafiə Mərkəzi tərəfindən müraciət edənlərin əksəriyyətinə ünvanlı sosial yardım təyin olunub.

Rayon üzrə əmtəə dövriyyəsinin həcmi 37 milyon 674 min manat, əhaliyə göstərilən pullu xidmətlərin həcmi 8 milyon 140 min manat olmuş və keçən ilin müvafiq dövrünə nisbətən pərakəndə əmtəə dövriyyəsinin həcmi 3 milyon 149 min manat və ya 91 faiz, əhaliyə göstərilən pullu xidmətlərin həcmi 1421,8 min manat və ya 21,2 faiz artmışdır.

Əhalinin elektrik enerjisi, qaz, istilik, içməli su ilə təminatının yaxşılaşdırılıması sahəsində də müəyyən işlər görülüb desək yanılmarıq. Şəhərdaxili su və kanalizasiya sisteminin yenidən qurulmasına başlanılıb.

Oğuz şəhərinin Gənclik yaşayış massivinin qazlaşdırılması işləri tamamilə başa çatdırılıb. Bucaq kəndinin qazlaşdırılması başa çatmaq üzrədir. Oğuz Qaz İstismar sahəsi üçün yeni inzibati binanın tikintisi də davam etdirlir.

"Azərsu" SC tərəfindən rayonun Böyük Söyüdlü və Qarabulaq kəndlərinə su çəkilməsinə yaxın vaxtlarda başlanılacaqdır.

Oğuz rayonunun turizm mərkəzinə çevrilməsi ilə bağlı möhtərəm Prezidentimizin qarşıya qoyduğu vəzifələrin layiqincə yerinə yetirilməsi üçün də müəyyən işlər görülüb. Belə ki, lazımi infrastrukturun yaradılması, dövlət, iş adamları və özəl qurumlar tərəfindən investisiyaların cəlb edilməsi istiqamətində işlər davam etdirilib. Bununla əlaqədar rayon rəhbərliyi bu sahənin inkişafına köməkliyin gücləndirilməsi, iş adamlarının regiona marağının artırılması, onlara müvafiq şəraitin yaradılması üçün bütün imkanlardan istifadə edir. Oğuz şəhəri, Calut, Bucaq və Xalxal kəndləri ərazisində yeni turizm obyektlərinin tikintisinə başlanılıb. Həmin obyektlərə böyük sərmayə qoyluması nəzərdə tutulmuşdur.

2007-ci ildə təməli qoyulan və obyektlərdən "Qoşabulaq" deyilən ərazidə müasir memarlıq üslubunda inşası davam etdirilən turizm obyektinin restoran hissəsi artıq istifadəyə verilib, otel hissəsində isə işlər davam etdirilir. Bu obyektin smeta dəyəri 2 milyon manat təşkil edir.

Oğuzdan söhbət açıb onu ağuşuna alan meşələrdən danışmamaq, ən azı, insafsızlıq olardı. Buraya insanları həm qışda, həm yayda, ümumiyyətlə, ilin bütün fəsillərində çəkib gətirən onun yaraşıqlı meşələridir, desək yanılmarıq.

Amma təəssüflə deməliyəm ki, əvvəllər bu qiymətli sərvətin qorunması, az qala, başlı-başına buraxılmışdı. İndi isə mənzərə tamam başqadır. Oğuz meşələrinin qorunması üçün demək olar ki, kompleks tədbirlər görülür. Təkcə son üç ayda rayon icra hakimiyyəti yanında keçirilən şura yığıncağında bu məsələ iki dəfə müzakirə olunub. Konkret tapşırıqlar verilib. Rayon icra hakimiyyətinin şöbə müdiri Səyyaf Abbasovla çox söhbət etdik. Bildirdi ki, bu gün də bəzi ağzıgöyçəklər danışırlar ki, guya neqativ hallar var. Tam səmimi deyirəm. Bu, belə deyil. Düzdür, əvvəllər belə hallara rast gəlinib. Buna müəssisəyə rəhbərlərin müvəqqəti təyin edilməsinin də az təsiri olmayıb. Bu gün isə Ekologiya və Təbii Sərvətlər Nazirliyi tərəfindən yeni rəhbər təyin edilib. Bacarıqlı kadrdır. Odur ki, indi Oğuz meşələrində hər hansı ağac kəsilmə hallarından söhbət gedə bilməz. Hamı əl-ələ verib. Rayon rəhbərliyindən, hüquq-mühafizə orqanlarından tutmuş ta sadə insanlara qədər hamı həmrəydir.

Oğuzdan yazıb yaddaşlara köçmüş, bu gün də hamının sevinclə xatırladığı bir məsələnin üstündən sükutla keçmək olmaz. 2007-ci ilin mart ayında Azərbaycan Respublikasının Prezidenti cənab İlham Əliyevin rayonun Sincan kəndində Oğuz - Qəbələ - Bakı su kəmərinin təməlini qoymasını oğuzlular həmişə minnətdarlıqla yada salırlar. Ötən il dekabr ayının 28-də bu mühüm infrastruktur layihəsinin reallaşması, sözün həqiqi mənasında, böyük, özü də çox böyük bir uğura imza atmaq deməkdir.

Odur ki, indi hansı oğuzlunu dindirsən yarızarafat, yarıgerçək deyir: "Bakıya aydınlıq Oğuzdan gedir".

Görürsünüzmü, Oğuzda görülmüş işləri saymaqla qurtaran deyil. Hələ bu harasıdır?! 2011-ci ildə oğuzlular daha böyük layihələrə və uğurlara imza atacaqlar. Bunu bizim hamımız həm görəcək, həm də biləcəyik...

Yazmağı bizdən, görmək istəyənlər isə gəlib özləri baxsınlar...

İlqar HƏSƏNOV

Xalq qəzeti.-2011.- 3 fevral.- S. 6.