Xalqımızın Mübariz oğlu

Təki Vətən sağ olsun!

Milli qəhrəman, şəhidlik zirvəsində əbədiyyətə qovuşmuş Mübariz Ağakərim oğlu İbrahimov 1988-ci il fevralın 8-də Biləsuvar rayonunun Əliabad kəndində doğulmuşdu. 22 illik ömründə onun bir dəfə də ad günü keçirilməmişdi. 23 il əvvəl sadə bir kəndli ailəsində dünyaya göz açan Mübariz 2010-cu ilin iyunun 19-da Tərtər bölgəsində atəşkəsi pozmuş erməni işğalçılarına ağır zərbə vuraraq, qəhrəmancasına şəhid olması ilə yenidən bütün xalqımız üçün doğuldu. Ötən 7 ayda hər bir ürəkdə doğmalaşmış, heykəlləşmiş şəhid qəhrəmanımızın ad gününü ilk dəfə olaraq bütün xalqımız hüzn və qədirbilənliklə yad edir.

Gəncliyin öyüncünə, örnəyinə çevrilmiş Milli qəhrəman Mübariz İbrahimovun anadan olmasının 23 illiyi münasibətilə anım mərasiminin məhz Gənc Tamaşaçılar Teatrında keçirilməsi onun ölməz xatirəsinə ümümxalq ehtiramının xüsusi bir əlaməti idi. Salona müxtəlif yaşlı adamlar toplaşsa da, təntənə libası geymiş əsgərlərin sıraları və səhnənin sol küncündə üçrəngli bayrağımızı vüqarla saxlayan əsgərlərin fəxri növbəsi diqqəti cəlb edirdi. Mübarizin səhnənin ən görkəmli yerindən asılmış iri portreti bir stolu da boş olmayan salonun diqqət mərkəzində idi. Anım mərasiminin aparıcısı və onun gedişinə düzən verən yazarlar, aktyorlar, musiqiçilər səhnədə bu axşamın hüzn və təntənəsinə uyğun qərarlaşmışdılar. İştirakçılara Mübariz İbrahimovun hünərini açıqlayan "Turanın Mübarizi" kitabı və müxtəlif qəzetlər paylanmışdı.

Aparıcı ədəbiyyatşünas Asif Rüstəmli bu axşam, sağ olsaydı, 23 yaşı tamam olacaq Mübariz İbrahimovdan xalqımızın mübariz ruhunu düşmənlərimizə və dostlarımıza misilsiz bir cəsarət, əfsanəvi bir igidliklə göstərmiş qəhrəman kimi söz açdı. O bildirdi ki, Prezident İlham Əliyevin ölümündən sonra Mübariz İbrahimova "Milli qəhrəman" adı verməsi, Fərid Əhmədovu "İgidliyə görə" medalı ilə təltif etməsi, hər iki şəhidin meyidini düşmən girovluğundan gətirməyə nail olması xalqımızın vətənpərvərlik ruhunu, döyüş əzmini yüksəltmişdir. Mübariz İbrahimovun düşmənə verdiyi dərs və ümumxalq coşğusuna səbəb olmuş qəhrəmanlığı bir daha göstərdi ki, Azərbaycan fitnə və xəyanətlərlə yağı tapdağına düşmüş torpaqlarını silahla geri qaytarmağa qadirdir. Mübariz hamıya göstərdi ki, Azərbaycanın bir döyüşçüsü erməninin ən azı 100 quldurunu əzməyə qadirdir. Bütün bunlara görə xalqımız bu həqiqəti dünyaya sərgiləmiş şəhid qəhrəmanın doğulduğu gündə onun xatirəsini sonsuz ehtiramla yad edir.

Qarabağ savaşının iştirakçısı, istefada olan polis zabiti Yəhya Yusif Canıyar bildirdi ki, bizim günlərin real qəhrəmanı Mübariz İbrahimovun erməni basqınçılarına tutduğu divan əfsanəviləşərək bütün türkdilli ölkələrə yayılmış, şəhid soydaşımıza şöhrət, xalqımıza başucalığı gətirmişdir. Qəhrəmanın ad günündə hədiyyə olaraq oxuculara təqdim etdiyi kitabı "Turanın Mübarizi" adlandırması elə bu səbəbdəndir. Bu gün bütün dil və din qardaşlarımız Mübarizi haqq aşiqi, Vətən fədaisi, gerçək qəhrəman kimi sevirlər.

Mərasimdə səslənən Mübarizə həsr olunmuş şeirlər onun qəhrəman obrazını yaratdığı kimi, Mübarizinin özünün yazmış olduğu misralar da onun kövrək qəlbli şair, duyğulu bir igid olduğundan xəbər verdi. Tanınmış bədii qiraət ustaları Ağalar Bayramın, Zülfiyyə Eldarqızının, şair-hərbçi Abdulla Qurbaninin söylədikləri poetik nümunələr, Şəmistan Əlizamanlının, Firüz Səxavətin, Aşıq Əhlimanın, Əlirza Amanbəylinin ifa etdikləri nəğmələr Mübarizin xatirəsinin ölməzliyini ehtişamla səsləndirdi.

Natiqlərin söylədikləri dəyərli sözləri tamamlayan respublika Ağsaqqallar Şurasının sədri, akademik Budaq Budaqov bildirdi ki, ata-babalarımızın torpağı Vətənə çevirmiş qəhrəmanlığını davam etdirmiş Mübarizin döyüş və şəhidlik yolu çağdaş gənclik üçün ən yaxşı nümunədir. Belə oğulu böyüdüb-tərbiyələndirmiş ata-ananın qarşısında baş əyir, onun müəllimlərinə və komandirlərinə təşəkkürlərimizi söyləyirik.

Sonda Milli qəhrəmanın əmisi Rasim İbrahimov, onun doğulduğu Biləsuvar rayonunun İcra Hakimiyyəti başçısının müavini Mirnəsib Kazımov Mübariz İbrahimovun hünərinə verilən yüksək dövlət qiymətinə, xatirəsinə göstərilən ümumxalq ehtiramına görə onun ailəsi və həmyerliləri adından minnətdarlıqlarını bildirdilər.

Mərasimdə səslənmiş dəyərli fikir və mülahizələri oxucuların diqqətinə çatdırırıq:

Akif Rəfiyev, istefada olan ədliyyə generalı:

- Mübariz İbrahimov Qarabağ münaqişəsi başlanmazdan 1 həftə əvvəl doğulmuşdu. Tanrı onu, sanki, xalqımızın bu bəlalı günlərində hünər üçün yaratmışdı. O, özü ilə yaşıd olan Qarabağ savaşında igidiyi ilə məşələ çevrildi.

Aydın Mirzəzadə, Milli Məclisin deputatı:

- Mübariz İbrahimovun qəhrəmanlığı Azərbaycan gəncliyinin məfkurəvi yetkinliyi, yüksək döyüş hazırlığı ilə ərsəyə gəlmişdir. Bu qarşısıalınmaz bir hünər nümunəsidir. Mübarizin atdığı güllə düşməni diksindirdi, qorxuya saldı, Azərbaycan əsgərinin qeyrət damarlarındakı qanı coşdurdu.

Şahid Həbibullayev, Qarabağ savaşının qəhrəmanı:

- Mübariz düşmənin atəşkəsi ən çox pozduğu Tərtər bölgəsində onların bu saymazlığına, qudurğanlığına dözmədi. Günlərin birində onları qabağına qatıb səngərlərinədək qovdu, rastına çıxanı əzdi. Onun bu zərbəsi Ermənistan ordusuna vəlvələ saldı. Bütün bunlar o deməkdir ki, Prezident, Ali Baş Komandan İlham Əliyev döyüş əmri versə, bizim ordumuz düşməni bircə günə torpaqlarımızdan qovub çıxara bilər.

Vaqif Bəhmənli, Mədəniyyət və Turizm Nazirliyinin idarə rəisi:

- Xalqımızın qəhrəmanlıq tarixində çox nümunələr var. Mübariz bütün mənəvi-fiziki imkanlarını səfərbər edərək Azərbaycan döyüşçüsünün çağdaş qəhrəmanlığının timsalı oldu. O, düşmənə göstərdi ki, nə qədər gec deyil torpaqlarımızdan çəkilməlidir, yoxsa, onu buna məcbur edəcək oğullarımız var.

Məhərrəm Qasımov, AMEA Ədəbiyyat İnstitutunun direktor müavini:

- Mübariz yağmaçı düşmənə vurduğu zərbəsi ilə Koroğlunun əfsanəvi qəhrəmanlığını gerçəkləşdirdi, həqiqi bir qəhrəman kimi əfsanəviləşdi. O, ulu bir keçmişin, saf bir keçmişin, saf bir mənəviyyatın enerjisini çağdaş gəncliyə ötürdü.

Paşa Qəlbinur, Dünya Azərbaycanlıları Konqresinin sədr müavini:

- Mən Mübarizin qəhrəmanlığını daim zirvədən aşağı atılan şəlaləyə bənzədərdim. Onun adı, hünəri zaman-zaman şəlalə kimi çağlayacaq, yeni nəsillərin ən yaxşı keyfiyyətləri ilə yaşacayaq.

Nizaməddin Şəmsizadə, ədəbiyyatşünas:

- Mübariz dünyaya göz açandan Qarabağın harayını eşitmişdi. Bu haray onun qəlbində bir yanğı qopartmışdı. O, torpaqlarımızda ağalıq edən yağının haqsızlığını və gücsüzlüyünü göstərmək üçün Azərbaycan oğullarının içərisindəki nifrət, intiqam alovunu onların üstünə püskürdü. Mübariz Azərbaycanın oyanmış vulkana çevrilməkdə olduğunu göstərdi. Düşmənlər bu vulkanın qarşısında məhvə məhkumdur.

Elçin İsgəndərzadə, "Vektor" beynəlxalq elm mərkəzinin rəhbəri:

- Mən Mübarizi görməmişəm. Amma hər dəfə şəklinə baxanda mənə elə gəlir ki, onu çoxdan tanıyırmışam. Ondan yadigar qalan şəkillər nümunəvi bir gəncin üstün keyfiyyətlərini əks etdirir. Onun çöhrəsində zəngin bir mənəviyyatın nişanələri var. Göstərdiyi qəhrəmanlıq bütün bunları tamamlayır.

Xatirə mərasimində söylənilənlər belə bir məcrada ortaqlaşdı ki, Azərbayanın dövlət müstəqilliyi yeni məfkurəli, yeni biçimli gənclik yetişdirmişdir. Bu gənclik artıq yeni tipli qəhərəmanlarını meydana çıxarır. Bu qəhrəmanlar şair Qabilin poetik hayqırışında əksini tapmış "Ümid sənədir ancaq, Azərbaycan əsgəri" həqiqətini gerçəkləşdirirlər. Ramil Səfərovun dövlət bayrağımızı təhqir etmiş azğın erməniyə layiq olduğu cəzanı verməsi, Mübariz İbrahimovun atəşkəsi pozmuş erməni quldurlarını həşarat kimi əzməsi, cəsur kəşfiyyatçılar Fərid Əhmədovun və Əhməd Abdullayevin göstərdikləri qeyrət və şücaət min illiklərin təkindən gələn qəhrəmanlığın sönməz odu, susmaz səsi kimi tarixin mesajını günümüzə çatdırdı. O mesaj Mübariz İbrahimovun son məktubunda necə aydın, necə parlaq əks olunub:

"... Vətənin dar günündə artıq ürəyim dözmür. Allaha xatir bunu etməliyəm. Ən azı ürəyim sərinlik tapar. Şəhid olanadək bu şərəfsizlərin üzərinə gedəcəyəm... Vətən sağ olsun!.."

Mübariz İbrahimov barədə ilk kitabı ərsəyə gətirmiş yazıçı-publisist Mustafa Çəmənli yazır ki, oğlunun şəhidlik zirvəsinə ucaldığını eşidən Ağakərim kişi qəhrəman balasına layiq dəyanət və nəcabətlə üçrəngli bayrağımızı onun oxuduğu məktəbdən götürərək, əllərində Əliabad kəndinin küçələrindən keçirərək Mübarizin doğulduğu ocaqda ən uca yerə taxaraq deyib: "Mübariz qaldırıb bu bayrağı!" Sonra oğlunun məktubundakı son sözləri söyləyib: "Vətən sağ olsun!"

Azərbaycanın müstəqillik estafetini qəbul edən Mübarizlər bu nidaları ilə yaralanmış, paralanmış Vətənə sağlıq, bütövlük gətirəcəklər. O günə çox qalmayıb. Mübariz İbrahimov və onun yaşıdları artıq bu mübarizənin startını veriblər.

Mübarizin doğulduğu gündə Azərbaycan qəhrəman oğlunun ruhuna rəhmət diləyir. Xalqımız onun bayraqlaşmış, torpaqlaşmış, vətənləşmiş adını ucalara qaldırır və eynən qəhrəmanının və əyilməz atanın dediyi kimi, ucadan söyləyir: "Təki Vətən sağ olsun!"

Tahir AYDINOĞLU

Xalq qəzeti.- 2011.- 9 fevral.- S. 7.