Azərbaycan bəstəkarı ABŞ-da xüsusi təqaüdə layiq görülmüşdür

Respublikanın xalq artisti, Bakı Musiqi Akademiyasının professoru, "Şöhrət" ordenli bəstəkar Tofiq Bakıxanov Amerika Birləşmiş Ştatlarının Azərbaycandakı səfirliyindən xoş xəbərli məktub almışdır. Səfirin təhsil və mədəniyyət işləri üzrə müşaviri Brent Mayerin imzaladığı məktubda bildirilir ki, bəstəkar Tofiq Bakıxanov ABŞ-ın Azərbaycandakı səfirliyinin İctimai Əlaqələr Şöbəsi tərəfindən qarşılıqlı Təhsil və Mədəniyyət Mübadiləsi Aktı üzrə "Fulbrayt Heys" təqaüdü laureatı olmuşdur. Bu təqaüd çərçivəsində professor Bakıxanovun skripka ilə simfonik orkestr üçün "Cazsayağı 6 saylı konsert"inin partiturası nəşr olunacaq.

Qeyd edək ki, Tofiq Bakıxanov bu əsəri cəmi 39 il ömür sürmüş (1898 - 1937-ci illər) görkəmli Amerika pianoçusu və bəstəkarı Corc Gerşvinin xatirəsinə həsr etmişdir. Adı çəkilən bəstəkar öz yaradıcılığında simfonizm və caz elementlərinin prinsiplərini növbələşdirmiş sənətkar idi. Onun zənci həyatından bəhs edən "Porgi və Bess" operası və "Blüz tonlarında Rapsodiya"sı bütün dünyada maraqla izlənilən musiqi əsərləri idi. Tofiq Bakıxanovun Corc Gerşvinə həsr etdiyi əsər də həm Azərbaycanda, həm də ABŞ-da maraqla qarşılanmış, peşəkarlıqla ifa edilmişdir.

Yeri gəlmişkən, 2010-cu il Tofiq Bakıxanov üçün təkcə bu təqaüdə görə deyil, bir neçə cəhətdən əlamətdar olmuşdur. Belə ki, o, ötən il 80 illik yubileyi münasibətilə Prezidentin "Fəxri diplomu"na layiq görülmüş, Naxçıvan Muxtar Respublikasının 85 illiyi münasibətilə təsis edilmiş yubiley qızıl medalı ilə təltif olunmuş və Tehrandakı Surə Universitetinin Fəxri Diplomunu alan ilk azərbaycanlı sənətkar olmuşdur. Elə ABŞ-da təsis edilən "Fulbrayt Heys" təqaüdünə də soydaşlarımız arasında ilk olaraq məhz Tofiq Bakıxanov layiq görülmüşdür. Ustad sənətkara yeni-yeni yaradıcılıq uğurları arzulayırıq.

İ.MİRZƏBƏYLİ

Xalq qəzeti.- 2011.- 9 fevral.- S. 7.