Masallı: görülən işlər fərəhli nəticələr verir

Masallı yaşının üstünə yaş gəldikcə cavanlaşan bir diyardır. Sakinlər bunu inkişaf proqramlarının ardıcıl yerinə yetirilməsi ilə əlaqələndirirlər. Cənub bölgəsinin ən böyük və gözəl guşələrindən olan bu rayon, həqiqətən də, son illərdə xeyli tərəqqi etmiş, sosial infrastrukturu genişlənmişdir. Ötən hər il, ay burada hansısa yeniliklə yadda qalır. Elə təzəcə tarixə qovuşmuş 2010-cu ildə də Masallının inkişafı naminə xeyli iş görülüb. İllik hesabat yığıncağında bu barədə ətraflı danışıldı.

İştirakçılar əvvəlcə ulu öndər Heydər Əliyevin abidəsini ziyarət edərək önünə gül dəstələri qoydular, unudulmaz dahi şəxsiyyətin xatirəsinə dərin ehtiramlarını bildirdilər.

Rayon icra hakimiyyətinin başçısı Qəzənfər Ağayevin hesabat məruzəsi maraqla dinlənildi. Nikbin notlar üzərində qurulmuş məruzədən aydın oldu ki, sosial-iqtisadi nəticələrinə görə ötən il Masallı üçün xüsusilə uğurla başa çatıb. Ümumi məhsul istehsalı və xidmətlərin həcmi 12,8 faiz artıb. Bu nailiyyətin 70 faizə qədəri pərakəndə əmtəə dövriyyəsi və pullu xidmətlərin payına düşür. Adambaşına pul gəlirləri 1931 manata, hər bir işçinin orta aylıq əmək haqqı isə 212 manata çatıb.

Məruzəçi dedi ki, rayonda tikinti-quruculuq və abadlıq işləri genişlənib. Tikinti üçün bütün maliyyə mənbələrindən əsas kapitala 17 milyon 400 min manat investisiya yönəldilib. İstehsal təyinatlı obyektlərin inşasına 3 milyon 242 min manat investisiya qoyulub.

Noyabrın 8-də rayon mərkəzində "Dövlət bayrağı meydanı"nın təntənəli açılışını sakinlər yaxşı xatırlayır. Bu kompleksdə Azərbaycan dövlətinin bütün atributları- Dövlət Himni, Dövlət Gerbi, eləcə də ölkəmizin xəritəsi təsvir olunub, 34 metr hündürlükdə Azərbaycan Bayrağı ucaldılıb. İcra başçısı Masallı əhalisinin yüksək vətənpərvərlik hissini təcəssüm etdirən və şəhərə xüsusi gözəllik verən bu meydanın daimi ziyarətgaha, gənclərin and yerinə çevriləcəyinə inamını ifadə etdi.

İlin əvvəlindən rayonda ümumi sahəsi 119 min kvadratmetrə çatan yaşayış evləri istifadəyə verilib. Masallı şəhərinin daxili yollarına 2,3 kilometr asfalt döşənib, küçələrin işıqlandırılması, səkilərin qurulması işləri həyata keçirilib. Bundan başqa, şəhərin mərkəzinə qaz xəttinin çəkilməsi ilə əlaqədar asfalt örtüyü dağılmış 11 kilometr yol cari təmir edilib, 30-a yaxın kommunal evin dam örtüklərində təmir işləri aparılıb. DSMF rayon şöbəsinin inzibati binası istifadəyə verilib, Nizami parkında geniş yenidənqurma işlərinə başlanıb. Rayondan keçən Ələt-Astara magistralında və Masallı-Yardımlı yolunda təmir işləri aparılıb.

Əhalinin pensiya və müavinətlərinin tam ödənilməsi təmin edilib. Rayon mərkəzində və əhalinin sıx yaşadığı ərazilərdə "Kapitalbank"a məxsus 8 bankomat quraşdırılıb. 3625 ailəyə ünvanlı dövlət sosial yardımı təyinatı aparılmaqla hər ay 387 min manat vəsait ödənilib.

Rayonda sahibkarlığın inkişafına daim qayğı göstərilir. Lüzumsuz müdaxilələrin qarşısı alınır və biznes layihələrinin həyata keçirilməsində iş adamlarına köməklik göstərilir. Hesabat ilində Sahibkarlığa Kömək Milli Fondu və "Aqrolizinq" tərəfindən sahibkarlara 4 milyon 440 min manat güzəştli kredit verilib. Bu kreditlər hesabına 1250 ton tutumu olan soyuducu anbar və istixana yaradılıb. Q.Ağayev dedi ki, sahibkarlığın inkişafı məqsədi ilə bundan sonra da lazımi tədbirlər həyata keçiriləcək.

Məlum olduğu kimi, 2011-ci il Azərbaycan Prezidenti tərəfindən "Turizm ili" elan olunub. Coğrafi mövqeyinə görə Masallıda turizmin inkişafı üçün münbit şərait var. Bundan səmərəli istifadə edən iş adamları İstisu zonası və digər mənzərəli yerlərdə müxtəlif turizm obyektləri açıblar. Lakin məruzəçi bunun yetərli olmadığını nəzərə çatdıraraq bildirdi ki, rayona daha çox turist cəlb etmək məqsədilə istirahət mərkəzlərində yüksək səviyyədə yenidənqurma aparılmalı və xidmət səviyyəsi yüksəldilməlidir. Peşəkar kadrlar işə cəlb olunmalı, turistlərə maraqlı proqramlar və marşrutlar təklif olunmalıdır.

"Dünyanın ərzaq qıtlığı təhlükəsi ilə üzləşdiyi bir vaxtda torpağa münasibət tamamilə dəyişməli, əkinə yararlı bütün sahələr istifadə edilməlidir". Payız əkinləri ərəfəsində bu məsələ ilə bağlı Masallı Rayon İcra Hakimiyyətində çox işgüzar bir şəraitdə müşavirə keçirildiyini və tədbirlər planı qəbul olunduğunu xatırlayıram. Müşavirədə qeyd olunmuşdu ki, rayondakı 25 min hektarlıq əkin sahəsinin 7 min hektarı əvvəlki il istifadəsiz qalıb. Bir sıra maraqlı təkliflər səslənmişdi. Həmin müşavirənin nəticəsi olaraq rayonda əlavə 2 min hektardan artıq şum vuruldu, daha çox taxıl və kartof əkini aparıldı. Eyni zamanda rayon rəhbərliyinin Nazirlər Kabineti qarşısında çayçılığın inkişafı ilə bağlı qaldırdığı məsələ ilə əlaqədar Masallıya mütəxəssislər gəlib və layihənin həyata keçirilməsinə hazırlıq işləri başlanıb.

Elektrik təsərrüfatının işində müəyyən dönüş yaradılıb. Amma görüləsi işlər də az deyil.

Rayonda təbii qazdan istifadə edənlərin sayı 1680 abonent artaraq 16 min 627-yə çatıb. Dörd kənddə xətlərin təmir-bərpa işləri yekunlaşaraq təbii qazın verilişi təmin olunub. Şəhərin mərkəzinə daşıyıcı qaz kəməri çəkilib. Artıq beş küçədə 595 abonentin mənzilinə qazın verilməsi bərpa olunub. Paralel olaraq cənub istiqamətində daşıyıcı kəmərlər çəkilib. Prosesin davamı kimi Muğan zonasındakı kəndlərin qazlaşdırılmasına başlanacaq.

Masallı Su-Kanal İdarəsi şəhər mərkəzindəki 38 kommunal binada kanalizasiya xətlərini yenidən çəkib. Binaların zirzəmiləri çirkab sulardan təmizlənib, iki yeni çirkab su anbarı inşa edilib, iki anbar isə əsaslı təmir olunub.

Təzə Alvadı su mənbəyindən Həsənli kəndinədək olan içməli su xəttinin yarısı təzələnib, Qarğalıq kəndinə 7 km uzunluğunda plastik boru xətti çəkilib. Amma müəyyən işlər görülsə də, bu kəndlərə suyun davamlı verilməməsi narahatlıq doğurur.

Dünya bankı ilə imzalanan kredit sazişinə əsasən "Azərsu" və "Meliorasiya və Su Təsərrüfatı" ASC-lər tərəfindən Masallı şəhərinin su və kanalizasiya sisteminin yenidən qurulması işləri başlanılıb. Almaniya və Türkiyə şirkətləri layihələndirmə işləri aparıblar. Hazırda layihənin ətraf mühitə təsiri qiymətləndirilir.

Rayonda ötən il 25 hidrotexniki qurğu təmir olunub, suvarma kanalları təmizlənib. Qumbaşı çayında sahilbərkitmə işləri aparılıb, hazırda isə Alvadıçay və Göytəpəçayda lildən təmizləmə və sahilbərkitmə işləri aparılır.

İnişil sentyabr ayında yağan güclü yağışlar ayrı-ayrı yaşayış məntəqələrində yaşayış evlərinə ciddi ziyan vurmuşdu. Prezident İlham Əliyevin tapşırığı ilə FHN tərəfindən evləri qəzalı vəziyyətdə olan 57 ailə üçün yeni evlər tikilərək 2010-cu ildə təhvil verilib. Gələcəkdə bu tip fəlakətlərin qarşısının alınması məqsədilə suaparıcı kanalların təmizlənməsi, çay məcralarının dərinləşdirilməsi daim diqqətdə saxlanılır.

Son illər rayonun məktəblərində tədrisin yaxşılaşdırılması və yeni təhsil ocaqlarının tikilməsi sahəsində xeyli iş görülüb. Keçən il ərzində 640 yerlik Digah orta məktəbi və 480 yerlik Ərkivan qəsəbə 2 saylı orta məktəbin binası tikilib istifadəyə verilib. Habelə Mollaoba orta məktəbində yeni idman zalı inşa edilib, Ərkivan və Qızılağac orta məktəblərində isə xeyriyyəçilərin köməyi ilə təmir işləri aparılıb. Hazırda Yelağac və Hüseynhacılı kəndlərində hər biri 180 şagird yerlik iki məktəb binasının tikintisi davam etdirilir. Yaxın günlərdə qəzalı vəziyyətdə olan Qodman və Xıl kəndlərinin yeni məktəb binalarının tikintisinə başlanacaq.

Hesabat ilində ali məktəblərə imtahan verən rayonun məzunlarından 35 nəfəri 500-dən çox, o cümlədən 8 nəfəri 600-dən yuxarı bal toplayıb. Ən yüksək bal toplayan 3 tələbəyə rayon icra hakimiyyəti tərəfindən hər ay ödənilməklə 100 manat təqaüd təyin olunub. Bu il daha çox tələbəyə təqaüd verilməsi planlaşdırılır. Nəcib təşəbbüsə xeyriyyəçi iş adamlarının da qoşulacağı gözlənilir.

Masallıda əhaliyə göstərilən tibbi xidmətin keyfiyyətini yaxşılaşdırmaq məqsədilə müəyyən tədbirlər görülür. Doğum şöbəsində mərkəzləşdirilmiş oksigen sistemi yaradılıb. Şöbə müasir tibbi və digər avadanlıqla təmin edilib, perinatal xidmət tamamilə yenidən yaradılıb. Poliklinika şöbəsində və bəzi kabinetlərdə təmir işləri aparılıb. Təzəkənd kəndində feldşer-mama məntəqəsi istifadəyə verilib. Bununla bərabər, imtiyazlı xəstələrin dərmanla təminatında nöqsanlar aradan qaldırılmalı və onlara tibbi xidmətin keyfiyyəti yüksəldilməlidir.

Mədəniyyət və Turizm şöbəsi rayon tədbirlərində fəal iştirak etməklə bərabər, respublika səviyyəli tədbirlərdə Masallını uğurla təmsil edir. 2010-cu ildə şöbənin müəssisələri üçün 20 min manatlıq inventar və texniki avadanlıq alınıb. Bundan başqa, Rayon Mədəniyyət Evi və Mərkəzi kitabxana kompyuter dəstləri ilə təmin edilib.

Sonra millət vəkilləri Elmira Axundova, Fəzail İbrahimli, Sabir Rüstəmxanlı və Nəriman Əliyev, həmçinin Prezident Administrasiyasının məsul işçisi Mikayıl Hüseynov çıxış edərək Masallıda görülmüş işləri yüksək qiymətləndirdilər.

Tədbirin sonunda ölkə başçısı cənab İlham Əliyevə müraciət qəbul olundu.

Əli NƏCƏFXANLI

Xalq qəzeti.- 2011.- 13 fevral.- S. 6.