Ordumuz etimadı doğruldacaq

Azərbaycanda Silahlı Qüvvələr quruculuğunun dövlət rəhbəri tərəfindən prioritet elan olunması ölkənin milli maraqlarına xidmət edir. Ermənistanla müharibə şəraitində yaşayan Azərbaycan üçün müvafiq sahəyə strateji əhəmiyyət daşıyan bir məsələ kimi yanaşılması tamamilə təbii xarakter daşıyır. Bu, beynəlxalq hüququn norma və prinsiplərini kobud şəkildə pozan təcavüzkar dövləti geri oturtmağın, haqqı tapdalanmış bir milyondan çox azərbaycanlının hüquqlarını müdafiə etməyin ən optimal həll variantlarındandır. Çünki Azərbaycan tərəfinin sülhü dəstəkləməklə bağlı dəfələrlə səsləndirdiyi bəyanatlara Ermənistanın qeyri-konstruktiv mövqe sərgiləməklə verdiyi cavab problemin həlli istiqamətində hərb yolunun aktuallığını daha da artırmışdır.

Fevralın 10-da Goranboy rayonuna səfəri çərçivəsində məcburi köçkün ailələri üçün inşa olunan yeni yaşayış məhəlləsinin istifadəyə verilməsi münasibətilə keçirilən mərasimdə Azərbaycan Prezidenti, Silahlı Qüvvələrin Ali Baş Komandanı İlham Əliyev bu mühüm məsələyə toxunaraq Azərbaycanın uzun illər işğaldan əziyyət çəkdiyini dilə gətirdi. Erməni işğalçı qüvvələrinin torpaqlarımızı zəbt etməsini və bu işğala son qoymaq istəməməsini bildirdi. Azərbaycanın bu problemi sülh yolu ilə həll etmək niyyətində olduğunu qeyd etdi. Ancaq bununla bərabər, bütün başqa variantları da istisna etmirik, - deyən ölkə başçısı Azərbaycanın son illər ərzində həm iqtisadi inkişaf, həm də hərbi potensial baxımından çox böyük və şərəfli yol keçdiyini vurğuladı. Ali Baş Komandan xüsusilə Azərbaycan Silahlı Qüvvələrinin hazırki durumu ilə bağlı yüksək fikirlər səsləndirərək dedi: "İndi bizim güclü ordumuz var, o, istənilən anda hərbi yolla doğma torpaqlarımızı işğalçılardan azad edə bilər". Dövlət başçısının ölkəmizin ərazi bütövlüyü ilə bağlı nümayiş etdirdiyi prinsipial mövqe Goranboy səfəri zamanı da daha aydın və konkret konturlarla özünü göstərdi. Azərbaycan bayrağının Şuşada, Xanqkəndində dalğalanmasını Azərbaycan dövlətinin əsas məqsədi kimi dəyərləndirən dövlət rəhbəri Azərbaycanın öz ərazi bütövlüyünü və suverenliyini gələcəkdə tam bərpa edəcəyinə, Dağlıq Qarabağda Dövlət bayrağımızın dalğalanacağına inandığını dilə gətirdi.

Yeri gəlmişkən, fevralın 11-də Azərbaycan Respublikasının müdafiə naziri, general-polkovnik Səfər Əbiyev ATƏT-in Minsk qrupunun həmsədrləri və ATƏT-in fəaliyyətdə olan sədrinin şəxsi nümayəndəsini qəbul edərkən xüsusi vurğulamışdır ki, Minsk qrupunun fəaliyyəti konkret nəticə verməsə də, biz bu missiyaya ümidlərimizi hələ itirməmişik. Münaqişənin həllində səylərin birləşdirilməsinə üstünlük verilməsinin zəruriliyini dilə gətirən müdafiə naziri Ermənistanın işğalçılıq siyasətindən əl çəkməsini və sülh variantının yalnız bu kontekstdə baş tuta biləcəyini birmənalı şəkildə bildirmiş, torpaqlarımızın işğaldan azad olunması üçün Azərbaycanın ciddi hazırlıqlar gördüyünü xüsusi qeyd etmişdir. Onu da diqqətə çatdırmışdır ki, belə situasiyalarda bütün dövlətlər eyni cür hərəkət edərdilər. Azərbaycanı heç kim bu məsələdə günahlandıra bilməz.

Doğrudan da, son 7 il ərzində dövlət büdcəsindən hərbiyə ayrılan xərclərin 14 dəfəyədək artırılması ölkə rəhbərliyinin Qarabağ probleminin həllində tutduğu prinsipial mövqedən xəbər verir. Ötən il iyunun 18-də Milli Məclisin növbədənkənar sessiyasında müdafiə və təhlükəsizlik xərclərinin daha 400 milyon manat artırılması görülən işin sistemli və ardıcıl xarakterindən xəbər verir. Ordu quruculuğu sahəsində planlı şəkildə həyata keçirilən kompleks tədbirlər Silahlı Qüvvələrimizin döyüş hazırlığında yeni keyfiyyət göstəriciləri ilə nəticələnmişdir. Əməliyyat işləri üzrə hazırlıq gücləndirilmiş, idarəetmə sistemi təkmilləşdirilmişdir. Ötən tədris ilində birlik və birləşmələrin 70-dək komanda-qərargah təlimlərində müxtəlif qoşun birləşmələrinin iştirakı və ən müasir tələblərə cavab verən simulyator və kompyuter şəbəkələrinin tətbiqi əldə olan uğurların miqyasını iki dəfə artırmışdır. Təsadüfi deyil ki, hələ ötən il iyunun 24-də Müdafiə Nazirliyinin, Dövlət Sərhəd Xidmətinin və Daxili İşlər Nazirliyi Daxili Qoşunlarının birləşmə və hissələrinin irimiqyaslı birgə əməliyyat-taktiki təlimini izləyən Ali Baş Komandan cənab İlham Əliyev təlim zamanı qarşıya qoyulan bütün vəzifələrin icra edildiyini, Silahlı Qüvvələrimizin yüksək peşəkarlıq nümayiş etdirdiyini bildirdi. Ölkə başçısının qarşıya qoyduğu bütün vəzifələrin Müdafiə Nazirliyi rəhbərliyi tərəfindən layiqincə yerinə yetirilməsi yerlərdə ayrı-ayrı hərbi hissələrin döyüş hazırlığı sahəsində ciddi irəliləyişlərlə müşaiyət olunur. Bu il hərbi xərclərin 2 milyard 500 milyon manat təşkil etməsi, yəni müvafiq sahəyə 3 milyard dollardan çox vəsaitin ayrılması ordumuzun manevr imkanlarını da dəfələrlə artırmış, birləşmə və hissələrin birgə fəaliyyətində əsaslı dönüş yaratmışdır. İstismarda olan silahlar müasir tipli optik gündüz və gecəgörmə nişangahları, müşahidə cihazları ilə komplektləşdirilmişdir. Birləşmələrin zirehli texnikaları üzərində modernləşdirmə işləri uğurla həyata keçirilmiş, atəşin və döyüşün müasir tipli idarəetmə sistemlərinin quraşdırılması tam başa çatdırılmışdır. Nəticədə, Silahlı Qüvvələrimiz maksimal uzaqlıqda yerləşən düşmən hədəflərini hava şəraitindən asılı olmayaraq, gecə və gündüz məhv etmək imkanı qazanmışdır. Ümumiyyətlə, Silahlı Qüvvələrimizin bütün qoşun növlərində kütləvi şəkildə modernləşdirmə işləri və islahatlar aparılmışdır. Müvafiq yöndə ən böyük üstünlüyün insan faktoruna verilməsi şəxsi heyətin mənəvi-psixoloji durumunda da kifayət qədər böyük irəliləyişlərə səbəb olmuşdur. Bu gün ordumuzun hər bir üzvü dövlətin və xalqın etimadını doğruldacağına, düşmən üzərində qəti qələbə çalacağına və nəhayət, Azərbaycan Bayrağının Şuşada, Xankəndində dalğalanacağına inanır.

İbrahim RÜSTƏMOV,

əməkdar jurnalist

Xalq qəzeti.- 2011.- 15 fevral.- S. 4.