Azərbaycanda siyasi və iqtisadi inkişaf sahəsində uğurlar ildən-ilə artır

Prezident İlham Əliyevin "Mir" Dövlətlərarası Teleradio Şirkətinə verdiyi müsahibədə bu məqam diqqəti daha çox cəlb edir

Biz kosmik sənaye yaradırıq. Gələn il Azərbaycanın ilk süni peyki orbitə çıxarılacaqdır. Yəni, biz daim irəliyə baxırıq, ola bilsin ki, bir neçə addım irəliyə baxırıq. Bizim külli miqdarda neft və qaz ehtiyatlarımızın olmasına baxmayaraq, çoxlu gəlirimizin olmasına baxmayaraq istəyirik ki, Azərbaycanın davamlı inkişafı neftin qiymətindən və yaxud hasilatımızın həcmindən asılı olmasın. "Qara qızıl"ın insan kapitalına çevrilməsi bizim təcrübəmizdə, sadəcə, şüar deyil, real vəziyyətdir.

İlham ƏLİYEV,

Azərbaycan Respublikasının Prezidenti

Prezident İlham Əliyevin "Mir" Dövlətlərarası Teleradio Şirkətinə verdiyi müsahibədə bu məqam diqqəti daha çox cəlb edir

Azərbaycanın siyasi, iqtisadi və mədəni sahələrdəki inkişafı getdikcə sürətlənir. Ötən illərlə müqayisədə bir daha aydın olur ki, ölkəmizin beynəlxalq aləmdəki mövqeləri ildən-ilə möhkəmlənir, əlaqələri genişlənir. Artıq Azərbaycanla əməkdaşlıq etmək istəyən dövlətlərin və iri şirkətlərin sayı getdikcə artmaqdadır. Son illər bir sıra iri infrastruktur layihələrin reallaşdırılması ölkəmizin iqtisadi qüdrətini daha da artırmış, beynəlxalq aləmdəki nüfuzunu xeyli yüksəltmişdir. Azərbaycanın daha da modernləşdirilməsi, siyasi islahatların aparılması və iqtisadiyyatın inkişaf etdirilməsi prioritet vəzifə kimi qarşıya qoyulmuşdur. Bu vəzifələrin layiqincə yerinə yetirilməsinin nəticəsidir ki, 2009-2010-cu illərdə qlobal maliyyə və iqtisadi böhran dünyanı ağuşuna aldığı bir vaxtda Azərbaycanda iqtisadi artım müşahidə olunmuş, yeni iş yerləri yaradılmış, əhalinin həyat səviyyəsinin yaxşılaşdırılması istiqamətində qətiyyətli addımlar atılmışdır.

Prezident İlham Əliyev bu günlərdə "Mir" Dövlətlərarası Teleradio Şirkətinə verdiyi müsahibədə də bu məsələləri, xüsusi olaraq diqqətə çatdırmış, qlobal maliyyə və iqtisadi böhranın Azərbaycana ciddi ziyan vurmadığını qeyd etmişdir. Dövlət başçısı bunu iqtisadi və siyasi strategiyanın düzgün müəyyənləşdirilməsi ilə əlaqələndirmişdir. Teleradio Şirkətinin əməkdaşı da Azərbaycanın neçə illərdir ki, inamlı iqtisadi artım nümayiş etdirdiyini diqqətə çatdırmış, müstəqil dövlətimizin MDB ölkələri arasında şəksiz lider olduğunu etiraf etmişdir. O demişdir ki, dünya iqtisadi böhranına baxmayaraq, Azərbaycanda artım nümayişi davam etdirilmişdir. Hətta böhran dövründə neftin ucuzlaşmasına baxmayaraq, ölkə iqtisadiyyatında 9,3 faizlik artım olmuşdur. Bu uğurların sirri ilə bağlı müxbirin verdiyi sualın cavabında Prezident İlham Əliyev demişdir: "...Sizin dediyiniz 2009-cu ildəki 9,3 faizlik iqtisadi artım mənim üçün əvvəlki illərdəki 25-30 faizdən qat-qat əhəmiyyətlidir, çünki bu artım böhranın ən şiddətli ilində, neftin qiymətinin 4 dəfə aşağı düşdüyü vaxt olmuşdur, bizim iqtisadiyyatımız isə, hər halda, daha çox məhz enerji sektoruna istiqamətlənmişdir. Bu nəticə onu göstərdi ki, bizim apardığımız islahatlar sayəsində iqtisadiyyatın digər sektorlarında inkişaf başlanmışdır".

Bu inkişafı faktlarla əsalandıran dövlət başçımız Teleradio Şirkətinin əməkdaşının diqqətinə çatdırmışdır ki, son 7 ildə ölkəmizdə 900 mindən çox yeni iş yeri yaradılmış, yoxsulluğun səviyyəsi demək olar ki, 50 faizdən 9 faizə endirilmişdir. Nəzərdə tutulan bütün sosial proqramlar uğurla yerinə yetirilmişdir. Azərbaycanda aztəminatlı ailələrin həyat səviyyəsinin daim dövlətin diqqət mərkəzində saxlanıldığı faktı da maraq doğurmuşdur. Çünki yarım milyondan artıq vətəndaşın hər ay dövlətdən sosial yardım alması hər ölkəyə nəsib olmur. Bu xeyirxah missiya iqtisadi cəhətdən inkişaf etmiş dövlətlərdə həyata keçirilə bilər. Bu da Azərbaycanda yaşayan aztəminatlı ailələrə nəsib olub. Ölkəmizdə qarşıya qoyulan vəzifələrin, xüsusilə regionların sosial-iqtisadi inkişafı Dövlət Proqramının uğurlu icrası əhalinin həyat səviyyəsinin daha da yaxşılaşacağından xəbər verir.

Dövlətimizin başçısı müsahibəsində bir faktı da xüsusi olaraq vurğulayaraq demişdir ki, artıq Azərbaycanda kosmik sənaye yaradılır. Ölkəmizin modernləşdirilməsi, iqtisadiyyatın daha böyük artım verəcəyi sektorlara, xüsusilə informasiya-kommunikasiya texnologiyaları sahələrinə sərmayələr qoyulması üçün çox iş görülmüşdür. Məhz bunun nəticəsidir ki, artıq kosmik sənaye yaradılması reallaşmaq üzrədir. Gələn il Azərbaycanın ilk süni peykinin orbitə çıxarılması möcüzə kimi qarşılansa da, bu, artıq faktdır. Süni peykin orbitə çıxarılması hər ölkəyə nəsib olmur. Bu tarixi hadisə yalnız iqtisadi qüdrətə, gücə malik olan, elmin, texnikanın, informasiya-kommunikasiya sahələrinin sürətlə inkişaf etdiyi ölkələrdə qeydə alına bilər. Azərbaycan belə bir inkişaf yoluna qədəm qoymuş dövlətdir. Bütün bu işləri həyata keçirə və gələcəkdə də davam etdirə biləcək mütəxəssislərin yetişdirilməsi qarşıya qoyulan prioritet vəzifələrdəndir. Möhtərəm Prezidentimiz bu faktı da diqqətə çatdıraraq bildirdi: "Biz gənclərimizin xaricdə təhsil alması proqramını həyata keçiririk. Artıq bir neçə ildir ki, dövlət bu proqramı tam maliyyələşdirir, minlərlə gəncimiz təhsil almışdır və artıq Azərbaycana qayıdır, burada işləyir, öz təcrübəsini tətbiq edir".

Hazırda ölkəmizdə elə bir şərait yaradılıb ki, hətta xarici dövlətlərdə yaşayanlar da Azərbaycana işləməyə gəlirlər. Çünki son illər ölkəmizdə yaradılmış yeni iş yerləri beynəlxalq standartlara tam uyğunlaşdırılmış, əmək haqları artırılmışdır. İndi Azərbaycanda orta aylıq əməkhaqqı 400 dollardan çoxdur. Təbii ki, bu son hədd olmayacaq. Bunu ölkəmizin sürətli inkişaf yoluna qədəm qoyması da təsdiqləyir.

Azərbaycan Prezidentinin xarici siyasətinin prioritetini təşkil edən Dağlıq Qarabağ münaqişəsinin nizamlanması məsələsi "Mir" Dövlətlərarası Teleradio Şirkətinə verdiyi müsahibəsində də diqqətçəkən məqamlardan oldu.

Dövlətimizin başçısı həmişə olduğu kimi, bu dəfə də öz qətiyyətli mövqeyini bəyan edərək dedi ki, "biz BMT-yə üzv qəbul ediləndə sərhədlərimiz məhz mövcud çərçivədə tanınmışdır. Dağlıq Qarabağ praktik olaraq bizim ölkənin ortasında yerləşir və təbii ki, Azərbaycanın ərazi bütövlüyü bərpa edilməlidir. Artıq Dövlətlərarası Teleradionun çoxmilyonlu dinləyicilərinə və tamaşaçılarına da Dağlıq Qarabağ münaqişəsinin nizamlanmasında dünyanın nüfuzlu beynəlxalq qurumlarının mövqeyi bəlli oldu. Prezident İlham Əliyev dedi: "BMT Təhlükəsizlik Şurasının 4 qətnaməsi də bu tezisi təsdiq edir. Eləcə də digər beynəlxalq təşkilatların qətnamə və qərarları. Ona görə də erməni tərəfi məsələyə konstruktiv yanaşarsa və Dağlıq Qarabağın müstəqilliyinin mümkünsüzlüyü barədə tezisi tamamilə başa düşər və qəbul edərsə, biz irəliləyişə nail olacağıq. Lakin əgər bizim qarşımıza məqbul olmayan şərtlər qoyularsa, sesessiya haqqında, separatizm haqqında, Dağlıq Qarabağın müstəqilliyinin hüquqi cəhətdən rəsmiləşdirilməsinə Azərbaycanın razılaşması haqqında məsələlər qoyularsa, onda təbii ki, danışıqların perspektivləri olmayacaqdır".

Artıq dünyanın tanınmış kütləvi informasiya vasitələri də Ermənistan-Azərbaycan, Dağlıq Qarabağ münaqişəsinin nizamlanmasında vasitəçilik missiyasını üzərinə götürmüş ATƏT-in Minsk qrupunun fəaliyyətinin heç bir nəticə vermədiyi qənaətinə gəlib. Çünki təqribən 19 ildir ki, danışıqlar prosesinə vasitəçilik edən Minsk qrupu qarşıya qoyduğu vəzifəni icra edə bilmir. Söz yox ki, vasitəçilər vəziyyətdən çıxış yolu tapmaq üçün müxtəlif tədbirlər həyata keçirir, Azərbaycan-Ermənistan prezidentlərinin təkbətək görüşlərini təşkil edir, müxtəlif təkliflər modeli hazırlayırlar. Lakin hər dəfə Ermənistan tərəfi heç bir əsası olmayan bəhanələr gətirir, qeyri-konstruktiv mövqe nümayiş etdirərək öz işğalçılıq missiyasından əl çəkmək istəmir, beynəlxalq hüququn norma və prinsiplərinə hörmətsiz münasibət bəsləyir. Teleradio Şirkətinin çoxmilyonlu tamaşaçılarına bəlli oldu ki, son 19 ildə ATƏT-in Minsk qrupunun fəaliyyətində heç bir uğurlu nəticə olmamışdır. Məlumdur ki, nəticə olmadan vasitəçilərin rolunu müsbət qiymətləndirmək olmaz. Dövlətimizin başçısı demişdir ki, BMT Təhlükəsizlik Şurasının daimi üzvü olan həmsədr ölkələr işğalçı ölkəni zəbt olunmuş əraziləri azad etməyin zəruriliyinə inandırmaq üçün özlərinin nüfuzundan və siyasi resurslarından daha çox istifadə etməlidir.

Münaqişənin nizamlanmasında son vəziyyət barədə məlumat verən Prezident İlham Əliyev dedi: "Danışıqlar prosesinin indiki raundu və ya indiki mərhələsi Madrid prinsipləri deyilən prinsiplər, onların yeniləşmiş variantı əsasında aparılır. Bu varianta görə, hazırda Dağlıq Qarabağda yaşayan və oraya qayıdacaq insanların özünüidarə hüquqları təmin edilir, Azərbaycanın işğal altındakı bütün ərazilərinin azad olunması, azərbaycanlı məcburi köçkünlərin bu ərazilərə, o cümlədən Dağlıq Qarabağa qayıtması, Ermənsitan ilə Azərbaycan arasında münasibətlərin qaydaya salınması, eləcə də təhlükəsizliyə zəmanət təmin edilir".

Azərbaycan Prezidenti ölkəmizdə, xüsusilə Bakıda aparılan tikinti-abadlıq, yenidənqurma işləri, həmçinin idmanın inkişafı ilə əlaqədar verilmiş sualları da cavablandırdı. Məlum oldu ki, son illər ölkəmizdə idmanın inkişafına dövlət qayğısı xeyli artırılmışdır. Bunun nəticəsidir ki, Azərbaycan idmançıları müxtəlif növlər üzrə keçirilən beynəlxalq turnirlərdə uğurla iştirak etmiş, Avropa, dünya və Olimpiya birinciliklərində inamla mübarizə apararaq fəxri kürsünün ən yüksək pilləsinə qalxmış, dəfələrlə Azərbaycanın dövlət himni səsləndirilmiş, üçrəngli bayrağımız digər dövlətlərin bayraqları arasında birinci olmuşdur. Hazırda Azərbaycan idman sahəsində dünyanın aparıcı ölkələrinin çoxunu geridə qoyub. Dövlətimizin başçısı 1997-ci ildən həm də Azərbaycan Milli Olimpiya Komitəsinin prezidenti olduğunu diqqətə çatdıraraq demişdir ki, gərgin iş qrafikinə baxmayaraq, bu vəzifəni özümdə saxlayıram. Möhtərəm Prezidentimiz qeyd etmişdir ki, idman gənclər arasında vətənpərvərlik ruhunu gücləndirir - xüsusən də idmançı qalib gələndə, ölkənin bayrağı qaldırılanda, onun himni səsləndiriləndə. Bunlar çox təsirləndirici anlardır.

Əliqismət BƏDƏLOV

Xalq qəzeti.- 2011.- 19 fevral.- S. 1.