Azərbaycanın iqtisadi qüdrəti "Baku Steel Company" MMC-ni regionun ən böyük və müasir poladəritmə müəssisəsinə çevirdi

Ölkəmizdə ağır sənaye sahəsində ilk özəl müəssisə olan "Baku Steel Company" MMC Qafqaz regionunda birinci müasir poladəritmə müəssisəsidir. 2001-ci ilin iyununda keçirilmiş rəsmi açılış mərasimində ümummilli lider Heydər Əliyev iştirak etmiş, buradakı iş və istehsalat şəraiti haqqında yüksək fikir söyləmişdir. "Azərbaycanda özəl sektor sahəsində xarici sərmayə ilə belə bir metallurgiya zavodunun yaranması Azərbaycan dövlətinin iqtisadi sahədə apardığı ardıcıl siyasətin bariz nümunəsidir" - deyən müdrik rəhbərin sözləri "Baku Steel Company" MMC-nin fəaliyyətinə verilən yüksək qiymətdir.

Şirkətdə yüksək məhsuldarlığa və əritdiyi metalın keyfiyyət göstəricilərinə görə Almaniya, ABŞ və s. qabaqcıl ölkələrdə istifadə olunan, alternativ enerji təhcizatı ilə təmin olunmuş qövslü elektrik sobası, metallurji proseslərin dərinliyini təmin edən soba çalov, müasir fasiləsiz tökmə maşını quraşdırılmışdır və uğurla istismar edilməkdədir. Poladərimə prosesində əsas güc aqreqatlarının işi kompyuterlə idarə olunmaqla enerji sərfinin optimallığını təmin edir. Metallurji prosesin əvvəlindən axırına kimi metalın kimyəvi tərkibinə ən müasir spektral təhlil cihazları vasitəsi ilə nəzarət olunur. Şirkətin poladəritmə sahəsinin en kəsiyi olçüləri 120x120 və 150x150mm, uzunluğu 12000mm olan müxtəlif markalı polad pəstahlar istehsal etmək imkanı vardır. Bu məhsullar təkcə şirkətin daxili istehsalında deyil, eyni zamanda, respublikanin və digər ölkələrin zavodlarında polad yayma məhsullarına çevrilir.

Yayma sahəsində də polad tikinti armaturlarının istehsalında bu gün dünyanın aparıcı ölkələrində geniş tətbiq olunan termomexaniki möhkəmləndirmə texnologiyası tətbiq olunur. Termomexaniki möhkəmləndirmə texnologiyası poladın kompleks mexaniki xassələrini struktur komponentləri hesabına təmin etməklə onun kimyəvi tərkibini nizamlamağa və daha etibarlı qaynaq oluna bilən tikinti armaturları istehsal etməyə təminat verir. Mexaniki xassələrin yüksək qiymətlərində, əsasən, axma həddinin 500, 600MPa qiymətlərində qaynaq oluna bilən polad armaturları ənənəvi isti yayma texnologiyası ilə istehsal etmək mümkün deyildir. Belə yüksək kompleks mexaniki xassələrə malik armaturların sənaye və mülki tikintilərdə istifadəsi isə binaların uzunömürlü və etibarlı olması ilə yanaşı, həm də vahid tikinti həcmində istifadə olunan armaturların miqdarına qənaət etməklə, tikintilərin maya dəyərini aşağı salmağa imkan verir.

Şirkət müasir metallurgiya sənayesində baş verən elmi yenilikləri diqqətlə izləyir və bu elmi-texniki inkişafdan geri qalmamağa çalışır. Son vaxtlar daha müasir və etibarlı odadavamlı məhsullar istehsalında qabaqcıl yerlərdən birini tutan Almaniyanın RHI firması ilə yeni materialların tətbiqi sahəsində əməkdaşlığa başlamışdır. Bu əməkdaşlıqdan şirkətimiz həm istehsal xərclərinin azalmasını, həm də müasir odadavamlı materiallarla işləmək təcrübəsinin artmasını gözləyir.

Şirkət istehsala başladığı gündən öz gələcəyini yerli kadrlarla bağlayaraq təcrübəli metallurq mühəndisləri işə dəvət etməklə yanaşı, həm də gənc mütəxəssislərin yetişdirilməsində iştirak edir. Bu məqsədlə hər il Texniki Universitetin metallurgiya fakültəsinin əlaçı tələbələri şirkətə dəvət edilir, zavodun problemlərinə uyğun kurs və diplom işləri verməklə onları gələcək istehsalata hazırlayır və sonra da işlə təmin edir. Hazırda şirkətin aparıcı mütəxəssislərinin içərisində belələri az deyildir.

"Baku Steel Company" MMC-nin nominal istehsal gücü ildə 350 min tondur. Bu yeni, daha güclü elektrik transformatorun alınıb quraşdırılması və onunla əlaqədar digər texnoloji avadanlıqların daha yüksək istehsal gücü ilə işlənməsini təmin edən rekonstruksiyaların aparılması hesabına həyata keçirilmişdir.

Bu gün müəssisə daxili bazarı keyfiyyətli armatur yaymaları və pəstahlar ilə təchiz edir. Müəssisədə 1800 nəfərə qədər işçi çalışır. On il əvvəl daxili bazarın tikinti armaturlarına tələbatı yalnız kənardan gətirilən məhsullar hesabına ödənilirdi. Amma bu gün Azərbaycanda azad bazar münasibətləri formalaşıb, rəqabət var və təbii ki, bazara kənardan da məhsullar gətirilir. Amma "Baku Steel Company" MMC yaranan gündən bir devizlə işləyir: keyfiyyətsiz məhsul bazara yol tapmamalıdır! Hazırda daxili bazarda "Baku Steel Company" MMC-nin məhsullarına tələbat çoxdur. Məhsulun standartlara uyğunluğunu təmin etmək üçün şirkətdaxili texniki imkanlar və təcrübəli kadrlar var. Bu imkanlar hesabına keyfiyyətli məhsul istehsalına ciddi nəzarət funksiyası həyata keçirilir. Məhsulun keyfiyyətini müəyyənləşdirmək üçün respublikamızda fəaliyyət göstərən institut və laboratoriyalar da bu işə cəlb olunmuşlar.

Polad məhsullarına daxili və xarici bazarın tələbatını nəzərə alaraq şirkət 2011-ci ildə məhsulun çeşidini genişləndirmək qərarındadır. Yaxın gələcəkdə künclük, şveller, iki-tavr, katanka, məftil, metal məmulatlar istehsalına da başlanacaqdır. Yeni çeşidli məhsulların istehsalı üçün avadanlıqlar və yeni yayma xətti quraşdırılır, yayma vallarının istehsalı təşkil edilir.

Müəssisə istehsala başladığı ilk gündən dünyanın 114 ölkəsində ofisi olan İsveçrənin SGS və BSİ (Britaniya Standartları İnstitutu) şirkəti ilə əməkdaşlıq edib. İndi isə məhsulların satışı "İntertek Azəri LTD" şirkətinin keyfiyyət üzrə zəmanəti ilə həyata keçirilir. "İntertek Azəri LTD" öz növbəsində, bu zəmanəti vermək üçün tam müstəqil olaraq sınaqlar və ölçmələr aparır, zavodun keyfiyyət sertifikatını təsdiqləyir. Bu günə qədər xaricdə və respublika daxilində satılan məhsulların keyfiyyətinə irad tutulmayıb.

Zavodun məhsulları Moskva, Astana, Təbriz və Bakı şəhərlərində keçirilmiş beynəlxalq miqyaslı sərgilərdə nümayiş etdirilmiş və hər dəfə də keyfiyyətə görə diplom almışdır. 2002-ci ildə respublika hökumətinin təşəbbüsü ilə Azərbaycan Respublikası Standartlaşdırma, Metrologiya və Patent üzrə Dövlət Komitəsi müəssisənin istehsal avadanlıqlarının vəziyyətini öyrənmiş, istehsal olunan məhsulların keyfiyyətini Azərbaycandan kənarda - Rusiya və Belarusda fəaliyyət göstərən institutların laboratoriyalarında nəzarət qaydasında yoxlamışlar. Alınan nəticələr müsbət olmuşdur.

"Baku Steel Company" MMC şirkəti ekologiyanın qorunmasına da xüsusi diqqət yetirir. Hər şeydən əvvəl respublika ərazisində qara metal tullantılarının toplanıb şirkətə təhvil verilməsi ərazilərin, dəniz kənarının, müxtəlif yaşayış massivlərinin, bir sıra fiziki köhnəlmiş sənaye obyektlərin sökülməsi ilə ekoloji təmizliyinə imkan yaratmışdır. Şirkətin ərazisində ekoloji təmizliyə nail olmaq üçün dəyəri milyon dollarlarla ölçülən xaricdə istehsal olunmuş təmizləyici qurğular alınıb, quraşdırılmışdır. Bu iş bu gün də davam etdirilməkdədir.

Ölkəmizin iqtisadi cəhətdən gücləndirilməsi, onun müdafiə qüdrətinin artırılması, xalqımızın sosial vəziyyətinin yaxşılaşdırılması dövlət büdcəsinə vəsaitlərin qanunla müəyyən olunmuş məbləğdə, özü də vaxtında daxil olmasından bilavasitə asılıdır. "Baku Steel Company" MMC qeyri-neft sektorunda böyük vergi ödəyicilərindəndir.

Azərbaycanın iqtisadi qüdrətinin ildən-ilə artdıqca, yeni iş yerləri açılmış, əmək haqqlarının və pensiyaların yüksəldilməsi əhalinin sosial rifahını xeyli yaxşılaşdırmışdır. İşçilərin sosial-məişət və iş şəraitinin yaxşılaşdırılması məqsədi ilə şirkətdə soyunub-geyinmə otağı, hamamxana və 400 yerlik yeməkxanadan ibarət məişət korpusu istifadəyə verilmişdir. Işçilərə hər gün pulsuz olaraq yüksək keyfiyyətli profilaktik yemək verilir. Eyni zamanda, 2005-ci ildə müəssisədə həmkarlar təşkilatı yaradılmışdır. Bu təşkilat bu gün ölkə həmkarları konfederasiyasının ən sanballı təşkilatlarından sayılır. Öz növbəsində onlar da işçilərin sosial rifahının yüksəldilməsi yolunda əməli fəaliyyətlərini əsirgəmirlər.

Metal qırıntısının çatışmazlığı səbəbindən zavod fəaliyyətini bir neçə dəfə dayandırmağa məcbur olsa da, əmək haqları saxlanılmış, bütün sosial problemlərin həllinə diqqətlə yanaşılmışdır. Maddi çətinliklərə baxmayaraq, 2007-ci ilin noyabrında şirkət rəhbərliyi maaşları 25 faizə qədər yüksəltdi və bu tendensiya bu gün də uğurla davam etdirilməkdədir.

Şirkət iqtisadi fəaliyyəti ilə yanaşı, xeyriyyəçilik fəaliyyətini də davam etdirir. Artıq 5-ci ildir ki, Mərdəkan qəsəbəsində yerləşən 5 saylı Uşaq Vərəm Sanatoriyası şirkət tərəfindən himayəyə götürülüb. Sanatoriyanın əsas binasının və köməkçi binaların yenidən qurulması və əsaslı təmiri aparılmışdır. Eyni zamanda burada istifadə olunan bütün avadanlıqlar - soyuducular, televizorlar, mebellər yeniləri ilə əvəzləşdirilmişdir.

Respublika ərazisində məskunlaşmış qaçqın və məcburi köçkünlərə kömək də daim diqqət mərkəzində olmuşdur. Onlara mütəmadi olaraq çadır, ərzaq, odeyal, istilik sobaları verilmiş və digər əməli köməkliklər göstərilmişdir.

Xalq qəzeti.- 2011.- 24 fevral.- S. 7.