Sabunçu rayonu: inkişaf dinamikası yüksələn xətlə irəliləyir

Azərbaycan Respublikası sabaha doğru inamla addımlayır. Ölkənin bütün regionlarında quruculuq və abadlıq işləri davam etdirilir. Şəhərlərimiz gözəlləşir, yeni magistral yollar çəkilir, qaçqın və məcburi köçkünlər üçün yeni yaşayış massivləri tikilir, parklar, xiyabanlar salınır. Bir sözlə, həyatımız ildən-ilə gözəlləşir, sabahın xoşbəxt günlərinin əsası qoyulur.

Doğma Bakımız isə öz ətraf qəsəbələri ilə birgə tamamilə yeniləşir. Paytaxtımızın ayrı-ayrı rayonlarında həyat öz axarını dəyişir.

Elə Sabunçu rayonunun ayrı-ayrı qəsəbələrinə ayaq basan hər kəs bu quruculuq işlərinin şahidinə çevrilir. Maştağa, Bakıxanov, Bilgəh, Sabunçu, Ramana, Pirşağı və s. qəsəbələrin əvvəlki görünüşləri tamamilə yeniləşib. Bu gün qəsəbələrdə yaşayan insanların problemləri əsasən həll olunub, sosial-iqtisadi vəziyyət tamamilə yaxşılaşıb. Sabunçu Rayon İcra Hakimiyyətinin ötən ilin sosial-iqtisadi yekunlarına həsr olunmuş iclasında bu barədə ətraflı söhbət açıldı.

İclası açan Sabunçu Rayon İcra Hakimiyyətinin başçısı Əlibaba Əliyev 2010-cu ilin yekunları ilə bağlı hesabat məruzəsi ilə çıxış etdi. O bildirdi ki, intibah yolunda olan hər bir xalq çağdaş dünya reallıqlarına nəzərən gələcək inkişaf prioritetlərini düzgün müəyyənləşdirmək üçün, ilk növbədə, konkret zaman və məkan daxilində keçdiyi yolun uğurlu nəticələrindən bəhrələnməyə çalışır. Bu həqiqət işığında bir daha aydın görünür ki, respublikamız cəmi 20 illik müstəqillik tarixi ərzində çox ağır sınaqlardan üzüağ çıxmış, bir çox inkişaf etmiş dövlətlərin onilliklər boyu qət etdiyi inkişaf mərhələlərini geridə qoymuşdur. 90-cı illərin əvvəllərində xaos, anarxiya, iqtisadi tənəzzül dövrünü yaşayan Azərbaycan bu gün Cənubi Qafqaz regionunun ən sürətlə inkişaf edən, qlobal enerji-kommunikasiya layihələrinin lokomotivinə çevrilən, bütün sahələrdə sürətlə modernləşən dövlət kimi tanınır.

Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş 14 yanvar tarixli iclasında dövlətimizin başçısı geniş nitqlə çıxış edərək ötən il bütün sahələrdə görülmüş işləri təhlil edib, 2011-ci ildə və sonrakı illərdə qarşıda duran vəzifələri müəyyənləşdirmişdir.

Azərbaycan Respublikasının Prezidenti cənab İlham Əliyevin bölgələrə müntəzəm səfərləri dövlət siyasətinin yerlərdə həyata keçirilməsinə effektiv nəzarət mexanizminin tərkib hissəsi, şəxsi idarəçilik nümunəsidir. Cənab Prezident 2010-cu ildə 170-dən çox, o cümlədən 3 dəfə Sabunçu rayonunda yeni müəssisənin açılışı və təməlinin qoyulması mərasimlərində iştirak etmişdir. Təbiidir ki, respublikamızın digər rayonlarında olduğu kimi, Sabunçu rayonunda da 2010-cu il ərzində həm Dövlət Proqramları çərçivəsində, həm də müxtəlif maliyyə mənbələri hesabına rayonun sosial-iqtisadi inkişafı, infrastruktur layihələrin icrası, yolların tikintisi, əhalinin elektrik, qaz, su təchizatının yaxşılaşdırılması, təhsil, səhiyyə ocaqlarının və digər obyektlərin tikintisi, təmiri, onların müasir tələblərə uyğun olaraq yenidənqurulması üzrə xeyli işlər görülmüşdür. Belə ki, 2010-cu il ərzində rayonun sənaye müəssisələri və idarələri tərəfindən 136,5 milyon manatlıq sənaye məhsulları istehsal edilmişdir ki, bu da əvvəlki ilin müvafiq dövründəkinə nisbətən 5,9 faiz çoxdur.

Ötən il əhalinin elektrik təchizatını yaxşılaşdırmaq məqsədilə 30 yeni transformator məntəqələri quraşdırılmış, rayon üzrə 263 KTM cari təmir edilmiş, 555 KTM-də isə profilaktik yoxlama işləri aparılmışdır. Rayonda əhalinin qaz təchizatını daha da yaxşılaşdırmaq üçün bir sıra işlər görülmüşdür. İl ərzində rayonun qəsəbələrində yerləşən EATS-lərin nömrə tutumu 582 nömrə artırılmış və hal-hazırda rayon üzrə ATS-lərin ümumi tutumu 65856 nömrəyə çatdırılmışdır. Su təchizatını yaxşılaşdırmaq məqsədilə 2930 metr müxtəlif diametrli su boruları dəyişdirilmiş, 20 ədəd su nasosu, 5 ədəd elektrik mühərriki təmir edilmiş, 5 nasos və 5 elektrik mühərriki yenisi ilə əvəz edilmiş, 25 siyirtmə dəyişdirilmiş, 840 ünvanda su xətləri bərpa edilmiş, 30 suvurma məntəqəsi təmir edilmişdir.

Rayon mənzil fondu üzrə 2010-cu il ərzində 30 min kvadratmetr məhəllədaxili yola və həyətlərə yeni asfalt örtüyü vurulmuş, 10 min kvadratmetrə yaxın dam örtüyündə cari, 6270 kvadratmetr dam örtüyündə isə əsaslı təmir işləri aparılmışdır.

Əlibaba müəllim qeyd etdi ki, il ərzində Bakı-Aeroport yolunun rayon ərazisinə düşən hissəsində yolun yenidənqurulması və genişləndirilməsi davam etdirilmişdir ki, burada da icra hakimiyyəti tikinti təşkilatlarına üzərinə düşən bütün zəruri köməklikləri göstərmişdir. Həmin yolun kənarında əsrin əvvəlində tikilmiş binalar bərpa edilərək nəfis tərtibat işləri aparılmışdır.

Respublika Prezidenti cənab İlham Əliyev tərəfindən 2010-cu ilin "Ekologiya ili" elan olunması ilə əlaqədar Ekologiya və Təbii Sərvətlər Nazirliyində birgə komissiya yaradılaraq, həmin komissiya tərəfindən rayon ərazisində 10 yerdə salınacaq yeni yaşıllıq sahələri müəyyənləşdirmiş və işlərin icrası təmin edilmişdir.

Rayon ərazisində il ərzində müxtəlif mənbələr hesabına təqribən 10 km yola və məhəllədaxili sahələrə 62 min kvadratmetrə yaxın asfalt örtüyü salınmışdır. Maştağa qəsəbəsində 14 nömrəli Polis Bölməsi üçün 2 mərtəbəli yeni inzibati binanın tikintisi başa çatdırılaraq, lazımi avadanlıqlarla təchiz olunaraq may ayının 9-da istifadəyə verilmiş və orada Milli Təhlükəsizlik Nazirliyi rayon idarəsinin Maştağa bölməsi üçün yeni iki mərtəbəli inzibati binanın da tikinti işləri başa çatdırılmaq üzrədir.

Eyni zamanda, Bakıxanov qəsəbəsində Sabunçu Rayon Polis İdarəsinin yeni 4 mərtəbəli inzibati binasının, Əmək və Əhalinin Sosial Müdafiəsi Nazirliyi Sabunçu Rayon Mərkəzinin 3 mərtəbəli inzibati binasının tikintisi başa çatdırılmış, Dövlət Sosial Müdafiə Fondunun rayon şöbəsi üçün yeni inzibati binanın inşasına və qəsəbənin dəmiryol stansiyasının qarşısındakı Abbasqulu ağa Bakıxanovun heykəli qoyulacaq parkda yenidənqurma, abadlıq işlərinə başlanmışdır və hal-hazırda davam etdirilir.

Natiq bildirdi ki, əvvəlki illərdə olduğu kimi, Heydər Əliyev Fondu öz ənənələrini davam etdirərək Pirşağı qəsəbəsindəki 34 saylı poliklinikanın və təcili yardım stansiyasının yenidənqurulması işlərini başa çatdırmaqla müasir avadanlıqlarla təchiz etmişdir. Bildiyiniz kimi Maştağa qəsəbəsindəki 21 saylı "Təbəssüm" uşaq sanatoriyası da həmin fondun vəsaiti hesabına yenidən qurulmuş və müasir avadanlıqlarla təchiz olunaraq 21 yanvar 2010-cu il tarixdə Mehriban xanım Əliyevanın iştirakı ilə istifadəyə verilmişdir.

İcra başçısı qeyd etdi ki, ötən yığıncaqlardakı bir sıra iradlar tədricən aradan qaldırılsa da, hələ də rayonda, xüsusilə kommunal xidmət sahələrində sakinlərin haqlı narazılıqlarına səbəb olan bir çox çatışmazlıqlar da mövcuddur. Bunlar əsasən özünü yerlərdə məişət tullantılarının vaxtında daşınmamasında, sanitar-təmizlik işlərinin zəif aparılmasında, su və kanalizasiya xətlərində baş verən qəzaların vaxtında aradan qaldırılmamasında, elektrik, qaz və su haqlarının ödənişi üzrə bir sıra anlaşılmaz hallarda göstərir. Bu və digər çatışmazlıqlar, o cümlədən də pensiya və sosial yardımların ödənişi sahəsindəki neqativ hallar barədə son aylar ərzində yerlərdə keçirilmiş görüşlərdə sakinlər öz narazılıqlarını bildirmişlər. Yerlərdə keçirilən görüşlər zamanı sakinlər tərəfindən irəli sürülmüş bütün rəy və təkliflər, tənqidi qeydlər ümumiləşdirilərək onların həyata keçirilməsi üzrə əlavə tədbirlər görüləcək.

Son vaxtlar icra hakimiyyəti və rayon Polis İdarəsi tərəfindən rayon ərazisində qeyri-qanuni küçə ticarəti və ət kəsilib-satılmasına qarşı mübarizə tədbirləri xeyli gücləndirilmişdir.

Əhalinin su, qaz, elektrik enerjisi və istiliklə təchizatının yaxşılaşdırılması üzrə xeyli işlər görülmüş, yeni qaz və su xətləri çəkilmiş, qəzalı vəziyyətdə olan sahələrdə vaxtında təmir işləri aparılmışdır ki, bunun da nəticəsində rayonun qəsəbə və yeni yaşayış massivlərində minlərlə ailə içməli su, qaz, elektrik enerjisi və istiliklə müntəzəm olaraq təmin edilir. Lakin onu da qeyd etmək lazımdır ki, bir sıra hallarda, xüsusilə də yeraltı qaz, su, elektrik, istilik xətləri çəkildikdən sonra qazılmış küçə və yollar vaxtında bərpa edilmir və ya bu işlər keyfiyyətsiz aparılır ki, bu da yolların yararsız vəziyyətə düşməsinə, keçidlərin çətinləşməsinə, sakinlərin çoxsaylı şikayət və narazılıqlarına səbəb olur.

Bundan əlavə, o da qeyd edilməlidir ki, 2007-ci ildə rayonun bütün mərkəzi və daxili yolları akt əsasında "Azəryolservis" ASC-nin balansına verilmişdir ki, bununla bağlı həmin yollarda təmir-bərpa işləri də uyğun olaraq bu təşkilat tərəfindən həyata keçirilməlidir. Lakin təəssüflər olsun ki, bir çox hallarda bu sahədə də anlaşılmazlıqlar olur, zəruri yerlərdə vaxtında təmir-bərpa işləri aparılmır. Güman edirəm ki, bununla bağlı müvafiq tədbirlər görülməlidir və biz bir daha öz tərəfimizdən konkret tələb və təkliflərimizi aidiyyatı qurumlara göndərəcəyik.

Əlibaba müəllim bildirdi ki, yuxarıda adı çəkilən xidmət sahələrinin rəhbərləri bugünkü tənqiddən düzgün nəticə çıxaracaq, bu nöqsanların tez bir zamanda aradan qaldırılması üçün zəruri tədbirlər görəcəklər.

Bundan başqa, mərkəzi istilik sistemlərində aparılmış bir çox yenidənqurma, təmir işlərinə baxmayaraq, qış mövsümündə 201 yaşayış binasından yalnız 139-na, 15 uşaq bağçasından 8-nə istilik verilməsi mümkün olmuşdur ki, bunları da qənaətbəxş hesab etmək olmaz.

Azərbaycanın işğal olunmuş ərazilərindən Sabunçu rayonunun müxtəlif sosial obyektlərində, şəxsi və qohum evlərində 4500-dən çox ailə və ya 20 mindən artıq məcburi köçkün məskunlaşmışdır ki, onların və eləcə də şəhid, Qarabağ əlilləri və digər bu qəbildən olan ailələrin sosial müdafiəsinin gücləndirilməsi, mənzil-kommunal şəraitinin yaxşılaşdırılması rayon icra hakimiyyətinin daim diqqət mərkəzində olmuşdur. Azərbaycan Respublikasının Prezidenti İlham Əliyevin məqsədyönlü siyasəti nəticəsində Ermənistan-Azərbaycan, Dağlıq Qarabağ münaqişəsinin sülh yolu ilə həll edilməsi, torpaqlarımızın düşmən tapdağından azad olunması, ərazi bütövlüyümüzün bərpası, köçkün soydaşlarımızın doğma yurdlarına dönəcəyi gün uzaq deyil.

Rayonun təhsil və səhiyyə sahələrində də müəyyən nailiyyətlər əldə olunmuşdur. Hazırda Sabunçu rayonunda 46 ümumtəhsil orta məktəbində 4 mindən çox pedaqoji və min nəfərə yaxın texniki işçi çalışır. Bu təhsil ocaqlarında 45351 şagird təhsil alır. Təhsil sistemində müasir metod və texnologiyaların, mütərəqqi iş təcrübəsinin öyrənilməsi və tətbiqi sahəsində başlanmış işlər davam etdirilmiş, yeni yanaşmalar, yeni düşüncə tərzinin təşəkkülü genişlənmişdir.

2009-2010-cu tədris ilində rayonda 2494 nəfər orta məktəbi bitirmiş və ali məktəblərə sənəd verən 2073 nəfərdən 831 nəfəri və ya 40 faizi ali və orta ixtisas məktəblərinə daxil olmuşdur ki, bu da əvvəlki ildəkindən 1,5 faiz çoxdur. Rayonun abituriyentlərindən 20 nəfəri 600-dən yuxarı bal toplayaraq ali təhsil müəssisələrinin tələbəsi olmuş, onlardan 3 nəfəri isə Prezident təqaüdünə layiq görülmüşdür.

Rayon üzrə 4 mindən çox səhiyyə işçisinin çalışdığı 25 müalicə-profilaktika müəssisəsi tərəfindən 10 qəsəbənin ərazisində 200 min nəfərdən artıq əhaliyə, 20-yə yaxın idarə, müəssisə və təşkilatların fəhlə və qulluqçularına, həmçinin rayonda müvəqqəti məskunlaşmış 25 minə yaxın məcburi köçkün soydaşlarımıza 12 profil üzrə tibb xidməti göstərilir.

Ötən il ərzində rayonun hüquq-mühafizə orqanları rayonda ictimai asayişin qorunması, vətəndaşların təhlükəsizliyinin təmin olunması sahəsində qarşıya qoyulmuş vəzifələrin öhdəsindən layiqincə gəlmişlər.

İcra başçısı son olaraq bildirdi ki, rayona göstərilən xüsusi diqqət və qayğıya görə möhtərəm Prezidentimizə rayon ictimaiyyəti adından öz dərin minnətdarlığımızı bildiririk. Cənab Prezidentimizi əmin edirik ki, ulu öndərimiz Heydər Əliyevin Azərbaycanın inkişafı ilə bağlı ideyalarının reallaşması üçün bundan sonra da bütün qüvvələrimizi səfərbər edəcək və ölkə başçısının siyasətini dəstəkləyəcək, Azərbaycanımızın daha da qüdrətlənməsinə öz töhfəmizi verəcəyik.

Sonra rayon prokuroru Ceyhun Şirinov, icra hakimiyyəti başçısının müavini Cəmilə Ramazanova, YAP Sabunçu Rayon Təşkilatının sədri Mehriban Abdullayeva, "Şirin" MMC-nin sədri Tahir Əliyev, Mənzil- Kommunal Təsərrüfatı Birliyinin rəisi Oruc Əhmədov, Sabunçu bələdiyyəsinin sədri Eyvaz İbrahimov çıxış edərək rayonda ötən il görülmüş işlərdən və qarşıda duran vəzifələrdən danışdılar.

İclasın işində Prezident Administrasiyasının məsul işçisi Tağı Tağıyev, Milli Məclisin deputatları Eldar Quliyev, Fazil Mustafa, Qabil Salahzadə də iştirak edirdilər.

M.MÜKƏRRƏMOĞLU

Xalq qəzeti.- 2011.- 25 fevral.- S. 6.