Tarix unutmasın qaniçənləri...

200 illik bir dövrdə Azərbaycan xalqı davamlı olaraq erməni separatçılarının etnik təmizləmə və soyqırım siyasətinə məruz qalmış, tarixi yurd yerlərindən qovulmuş, qaçqın və məcburi köçkünə çevrilmişdir. Bir çox dövlətlərin dəstəyinə arxalanan erməni millətçilərinin xalqımıza qarşı düşmənçilik siyasətinin yeni dalğası 1988-ci ildə başlandı. Şahidi olduğumuz bu yaxın tarixin qanlı olayları ermənilərin qaniçən və yırtıcı simasını bütün cizgiləri ilə üzə çıxardı...

Bu sözləri Xocalı faciəsi qurbanlarının acısını dadmış insanlarla görüşdə Xətai Rayon İcra Hakimiyyətinin başçısı Razim Məmmədov söylədi. Natiq qeyd etdi ki, Dağlıq Qarabağ münaqişəsi və Ermənistan silahlı birləşmələrinin təcavüzü nəticəsində torpaqlarının 20 faizini itirən Azərbaycanın 30 mindən artıq vətəndaşı ermənilərin qanlı qəsdinin qurbanına çevrilmişdir. Bu qəsbkarlığın və işğalın ən dəhşətli və qanlı olayı isə 19 il əvvəl - 1992-ci il fevralın 25-dən 26-na keçən gecə Xocalıda baş vermişdir. Həmin gün qabaqcadan planlaşdırılmış təcavüz aktı zamanı birləşmiş erməni silahlı dəstələri SSRİ-yə məxsus olan 366-cı motoatıcı alayının zirehli texnikası və canlı qüvvəsinin dəstəyi ilə Azərbaycanın bu şəhərdəki dinc sakinlərinə qarşı bəşər tarixində analoqu olmayan əsl qətliam törətmişlər. Erməni xislətinin, vandalizminin həqiqi yırtıcı simasını göstərən bu qətliamda 7 minlik dinc sakinin 613 nəfəri qəddarcasına öldürülmüş, 487 nəfər şikəst olmuş, 1275 dinc azərbaycanlı - qoca, uşaq, qadın əsir götürülərək ağlasığmaz erməni işgəncələrinə, təhqir və həqarətə məruz qalmışdır. 155 nəfər soydaşımızın taleyi hələ də bəlli deyil.

Dəhşətlisi odur ki, vəhşicəsinə öldürülənlərin 106-sı qadın, 63-ü uşaq, 70 nəfəri qoca insanlar olmuşdur.

Faciə haqqında ətraflı danışan R.Məmmədov onu da əlavə etdi ki, Xocalıda baş vermiş soyqırımın bütün bəşəriyyətə çatdırılması və erməni vandallarının öz layiqli cəzalarını almaları üçün ulu öndər Heydər Əliyev, daha sonra Prezident cənab İlham Əliyev istər ölkə daxilində, istərsə də beynəlxalq müstəvidə çox böyük səy göstərmişlər. Bu iş bu gün də davam edir.

Sonra görüşdə iştirak edən millət vəkili, YAP Xətai rayon təşkilatının sədri, yazıçı-dramaturq Hüseynbala Mirələmov çıxış edərək bildirdi ki, həqiqətən də Azərbaycanın dövlət başçısı, hökuməti və ictimaiyyəti erməni faşizminin bu qanlı cinayətinin bütün dünyada etiraf olunması və pislənməsi, canilərin cəzalanması istiqamətində son dərəcə böyük işlər görür. Heydər Əliyev Fondunun və onun prezidenti, millət vəkili Mehriban xanımın səyləri xüsusilə böyük miqyas alıb. İrəliləyişlər var və bu günlər biz görürük ki, dünyanın əksər ölkələrində rəsmi şəkildə olmasa da, bu fakta insani münasibət bildirilir. Bu da faciənin bəşəri cinayət olduğunu təsdiqləyən fakta çevrilir. Lakin unutmaq olmaz ki, dünya dövlətləri, xüsusilə söz sahibi olan ölkələrin hökumətləri hələ də ikili standartdan çıxış edir və bu yanaşmadan qurtara bilmirlər. Münaqişənin uzanmasının, torpaqlarımızın işğal altında qalmasının da əsas səbəblərindən biri məhz budur.

Bütün bunlara baxmayaraq, Azərbaycan Prezidentinin yürütdüyü siyasət öz nəticəsini verməkdədir. Biz əminik ki, Xocalı faciəsinin və onun kimi digər faciələrimizin hesabı soruşulacaq və haqq qalib gələcək. Başlıcası odur ki, xalqımız, tarix qaniçənləri unutmasın.

Tədbirdə Xocalı faciəsi qurbanlarının ailələri onlara göstərilən diqqət və qayğıdan razılıq etdilər. Sonda icra hakimiyyəti tərəfindən anım gününü keçirmək üçün faciə qurbanlarının ailələrinə maddi yardım göstərildi və ərzaq paylandı.

Tədbir Xocalı faciəsi qurbanlarının abidəsinin ziyarəti ilə başa çatdı.

İlqar RÜSTƏMOV

Xalq qəzeti.- 2011.- 25 fevral.- S. 4.