Səbaildə anım mərasimi

Xocalı faciəsinin 19-cu ildönümü Bakı şəhərinin Səbail rayonunda da geniş şəkildə qeyd olunur. Rayon icra hakimiyyətinin tədbirlər planına uyğun olaraq idarə və təşkilatlarda, orta və ali məktəblərdə faciə qurbanlarının xatirəsi dərin hüzn və ehtiramla yad edilir.

Faciənin ildönümü ərəfəsində Səbail Rayon İcra Hakimiyyətində Xocalı şəhərindən köçkün düşərək rayonda məskunlaşmış 23 ailənin nümayəndələri ilə görüş keçirilmişdir. Mərasimdə çıxış edən Səbail Rayon İcra Hakimiyyətinin başçısı Asif Əsgərov Azərbaycan xalqının qan yaddaşı olan Xocalı faciəsi, ermənilərin zaman-zaman soydaşlarımıza qarşı törətdikləri vəhşiliklər və Xocalı soyqırımının dünyada tanıdılması üçün görülən və zəruri olan işlər barədə ətraflı məlumat vermişdir.

Bildirilmişdir ki, ümummilli lider Heydər Əliyevin təşəbbüsü ilə Milli Məclisdə ilk dəfə bu məsələyə siyasi qiymət verilmiş, faciənin dünya ictimaiyyətinin nəzərinə çatdırılması məqsədi ilə ciddi işlərə başlanmışdır. Hər il faciənin ildönümü respublikamızda və onun hüdudlarından kənarda geniş qeyd olunur, soyqırım qurbanlarının xatirəsi yad edilir, misilsiz erməni vəhşiliyinin mahiyyəti dünya ictimaiyyətinə göstərilir.

Bu gün xalqımızda Prezident İlham Əliyevin apardığı məqsədyönlü siyasət nəticəsində Xocalının, həmçinin işğal altında olan bütün Azərbaycan torpaqlarının düşməndən azad ediləcəyinə, ölkəmizin ərazi bütövlüyünün bərpa ediləcəyinə dərin əminlik var. Lazım gələrsə ölkə başçısı, Ali Baş Komandanın əmri ilə oğullarımız silaha sarılaraq müharibə yolu ilə torpaqlarımızı azad edəcəklər.

Qeyd olunmuşdur ki, fevral ayının 26-da rayondakı bütün təhsil müəssisələrində ilk dərslər Xocalı faciəsinə həsr olunacaq, kollektivlər "Xocalı harayı" abidəsini ziyarət edəcəklər. Rayondakı məscidlərdə Xocalı faciəsi zamanı şəhid olmuş soydaşlarımızın ruhuna dualar oxunacaq, "Bibiheybət" və İçərişəhər "Cümə" məscidlərində ehsanlar veriləcək.

Tədbirdə çıxış edən Xocalı şəhər icra nümayəndəsi Yavər Əzimov və başqaları ölkə rəhbərliyinin səyləri ilə Xocalının azad olunacağı günü səbirsizliklə gözlədiklərini və bu günün tezliklə gələcəyinə əmin olduqlarını bildirmişlər.

Sonda Səbail rayonunda məskunlaşmış Xocalı köçkunlərinə rayon icra hakimiyyətinin yardımları çatdırılmışdır.

R.TAHİR

Xalq qəzeti.- 2011.- 25 fevral.- S. 4.