İsmayıllı: sabaha boylanan diyar

İsmayıllı başdan - başa gözəllikdir desək, yanılmarıq. Başı qarlı dağlara baxanda gözlərin dincəlir, elə bil sən də saflaşırsan, büllurlaşırsan. Adam bu yerlərdən, onun mehriban adamlarından ayrılmaq istəmir. İsmayıllılar həmişə belə olublar. Kimin istəsən ürəklə qapısını döyə bilərsən. Səni ən əziz adam kimi qarşılayar, süfrə açar.

Deyirlər dağ adamları belə olurlar. Təmizdən təmiz, müqəddəsdən müqəddəs. Xidməti işimlə əlaqədar demək olar ki, bu yerlərdə tez-tez oluram. Hər dəfə burada olan yenilikləri görəndə mən də sevinirəm, mən də qürur hissi keçirirəm. Ona görə ki, bu yerlər mənə də doğmadır, əzizdir. Odur ki, 2010-cu ildə rayonun sosial-iqtisadi inkişafının yekunları və qarşıda duran vəzifələrə həsr olunmuş hesabat yığıncağında icra hakimiyyətinin başçısı Nizami Ələkbərovun çıxışını dinləyərkən hamı kimi mən də sevinirdim. Sevinirdim ki, bu yeniliklər uzaq tarixdə yox, cəmi bir il bundan əvvəl baş verib.

Nizami Ələkbərov əldə olunmuş uğurlardan həvəslə danışdı. Bildirdi ki, Azərbaycan Respublikasının Prezidenti cənab İlham Əliyevin 2009-cu il oktyabr ayının 29-da İsmayıllıya etdiyi səfər zamanı verdiyi tapşırıq, tövsiyə və məsləhətlər 2010-cu il üçün rayon rəhbərliyinin fəaliyyət proqramı olub. Məhz onun nəticəsidir ki, əsas diqqət nəzərdə tutulan tədbirlərin icrasına yönəlib, yüksək nəticələr əldə edilib. Ölkə başçısının sərəncamı ilə İvanovka zonasına içməli su çəkmək üçün ayrılan 3,5 milyon manat vəsaitə uyğun layihə hazırlanıb və işə başlanılıb. Yaxın zamanda İvanovka, Uştal, Soltankənd, Qalagah, Hacıhətəmli, Mollaisaqlı, Vəng və Ruşan kəndlərinin sakinləri içməli sudan fasiləsiz istifadə edə biləcəklər. Keçən il Qarabağ müharibəsi əlilləri və şəhid ailələri üçün 36 mənzilli evin tikilib istifadəyə verilməsi böyük razılıq və minnətdarlıq hissləri ilə qarşılanıb. İkinci Dünya Müharibəsində həlak olanların xatirəsini əbədiləşdirən abidə və şəhidlər xiyabanı yeni üslubda, memarlığın son nailiyyətləri əsasında yenidən qurulüb və təmir edilib, vahid "Xatirə kompleksi" yaradılıb. Bu gün "Xatirə kompleksi" şəhidlərimizin ruhuna ehtiramın təzahürü olan bir abad məkana çevrilib. Qaraqaya kəndində məktəb tikintisi illərlə söz olaraq qalırdı. 2010-cu ilin sonunda dövlət hesabına burada 180 yerlik yeni, müasir tələblərə cavab verən məktəb binası istifadəyə verilib. Qubaxəlilli, Maçaxı və Aşıqbayram məktəblərinin, İsmayıllı kənd və şəhər 3 saylı uşaq bağçalarının binası əsaslı təmir olunub. Şəhərə tarixilik görünüşü verən, Heydər Əliyev Prospektinə xüsusi yaraşıq gətirən qala divarının tikintisi davam etdirilib. Səməd Vurğun, Sabir, Zərdabi, Füzuli, Təbriz, Bahəddin Mirzəyev, Nəriman Nərimanov, Qəşəm Aslanov küçələrinə asfalt döşənməsi, İsmayıllı-Qəbələ yoluna beton örtük salınması, Tingçilik təsərrüfatında yaşayanların istəyinə görə Qəzli çayı üzərindən yeni körpünün tikilməsi 2010-cu ilin nailiyyətlərinin bir hissəsidir.

Məruzəçi bildirdi ki, rayon icra hakimiyyəti yeni infrastruktur layihələrinin icrasında yalnız büdcədə nəzərdə tutulan vəsaitlə kifayətlənmir, qeyri-hökumət təşkilatları, beynəlxalq maliyyə qurumları, iş adamları ilə işgüzar əlaqələr yaradır. Bunun nəticəsidir ki, Mican, İsmayıllı, Mollaisaqlı, Qalagah, Hacıhətəmli, Qalınçaq kəndlərində kənd investisiya layihəsi əsasında kənd və məhəllədaxili yollara çınqıl döşənib. Yaponiya səfirliyinin maliyyə dəstəyi ilə Lahıcda 400 tonluq su anbarı tikilib, Lahıc bələdiyyəsinin fəal iştirakı ilə 315 evə su xətti çəkilib. Quşencə kəndində Yaponiyanın Azərbaycan Respublikasındakı səfirliyinin maliyyə dəstəyi ilə uşaq bağçası üçün yeni binanın tikintisinə başlanılıb. Bildiyimiz kimi Azərbaycan Respublikasının Prezidenti cənab İlham Əliyev Nazirlər Kabinetinin 2010-cu ilin yekunlarına həsr olunmuş iclasında 2011-ci ili "Turizm ili" elan etmişdir. Bununla əlaqədar Nizami Ələkbərov qeyd etdi ki, rayonda genişmiqyaslı işlər görüləcək. 202 yerlik otel kompleksi bu il istifadəyə veriləcəkdir. Bu gün İsmayıllıda belə istirahət mərkəzləri çoxdur. Gəlin, siz də dincəlin.

Sahibkarlığın inkişafı üçün münbit şərait yaradılıb. Turizm və istirahət mərkəzlərinin tikintisində və onların fəaliyyətinin təşkilində bu hal özünü daha qabarıq göstərir.

Vaxtilə mövcud olan quşçuluq fabriki öz fəaliyyətini damazlıq istiqamətində formalaşdıraraq "İsmayıllı damazlıq quşçuluq təsərrüfatı" kimi davam etdirir. Çörəkbişirmə, üzümçülük, şərabçılıq, arıçılıq, meyvəçilik, taxılçılıq yönümlü sahibkarlıq fəaliyyəti daha sürətlə inkişaf edir.

İsmayıllı kənd təsərrüfatı rayonudur. Aqrar sahəyə diqqət artdıqca əldə olunan nəticələr də yüksəlir.

Keçən il istehsalın ümumi həcmi 49 milyon 108 min manat təşkil edib ki, bu da 2009-cu ildəkindən 872 min manat çoxdur. Ötən il 4 min 972 ton diri çəkidə ət, 384 ton yun, 33 min 687 ton süd, 7 min 703 ton meyvə, 3394 ton üzüm, 6182 ton kartof istehsal olunub. Qeyd olunan göstəricilər 2009-cu ilin nəticələri ilə müqayisədə 20-25 faiz çoxdur. Kənd təsərrüfatı istehsalına dövlət qayğısı, bu sahəyə rəhbərliyin təkmilləşdirilməsi məhsuldarlığın yüksəlməsi üçün möhkəm zəmin yaradıb.

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda rayonun elektrik şəbəkəsinin yenidən qurulması, İsmayıllı şəhəri və rayonun yaşayış məntəqələrinin qaz təchizatının yaxşılaşdırılması, bir sıra ictimai binaların istilik təchizatı sisteminin bərpası və yenidən qurulması, şəhərin su təchizatı və kanalizasiya sisteminin yenidən qurulması nəzərdə tutulub. İsmayıllılar fəaliyyətlərini Dövlət Proqramında nəzərdə tutulan məsələlərin həllinə yönəldib və bu istiqamətdə işlərini davam etdirirlər.

Əhaliyə göstərilən kommunal xidmətlərinin keyfiyyətinin yaxşılaşdırılması şəhərin və digər yaşayış məntəqələrinin təmiz saxlanması, yaşıllıqların qorunması, antisanitariyaya qarşı mübarizə tədbirlərinin gücləndirilməsi üçün rayon kommunal müəssisələri kombinatı və mənzil istismar sahəsi əsaslı işlər görüb. Artıq ikinci dəfədir ki, dövlət büdcəsinin vəsaiti hesabına texnika alınaraq kommunal təsərrüfatına verilib. 2010-cu ildə isə 4 ədəd kommunal təyinatlı yeni texnika alınıb. Son illər İsmayıllıda istilik təchizatı sisteminin bərpası, yenidən qurulması işi davam etdirilib. Yeni tikilən, əsaslı təmir aparılan məktəblərdə, təhsil və mədəniyyət şöbələrinin, mərkəzi xəstəxananın yerləşdiyi binalarda, əlillər və şəhid ailələri üçün tikilən yaşayış evlərində və digər binalarda modul tipli qazanxanalar quraşdırılıb.

Yola salınan 2010-cu ildə əhalinin içməli su təchizatını yaxşılaşdırmaq məqsədilə bir sıra tədbirlər həyata keçirilib. Kənd bələdiyyələrinin vəsaiti hesabına bir neçə kəndə içməli su xətləri çəkilib, mövcud xətlərdə təmir işləri aparılıb. "Milli Su Təchizatı və Kanalizasiya Xidmətləri üzrə II layihə" çərçivəsində Dünya Bankının vəsaiti hesabına İsmayıllı şəhərinin, Mican və İsmayıllı kəndlərinin su və kanalizasiya sisteminin yenidən qurulması üçün layihələşdirmə işi başa çatdırılıb. Yaponiyanın Azərbaycandakı Səfirliyinin maliyyə dəstəyi ilə şəhərin yeni yaşayış massivində 1, İsmayıllı kəndində 1 ədəd subartezian quyusu qazılaraq istifadəyə verilib, 250-dən çox fərdi evə su çəkilib. Daha sonra natiq təhsil sahəsində qazanılan uğurlardan danışdı. Bildirdi ki, maarifçilik ənənələrinə malik olan təhsilimiz aparılan islahatlar nəticəsində bu gün beynəlxalq standartlara cavab verən bir səviyyəyə yüksəlib.

Hazırda İsmayıllıda 20 şagirdə 1 kompyuter düşür. Rayonda "Xüsusi istedada malik uşaqların (gənclərin) yaradıcılıq potensialının inkişafı üzrə Dövlət Proqramı"nın (2006-2010-cu illər) yerinə yetirilməsi istiqamətində məqsədyönlü iş aparılıb, xeyli uğurlu nəticələr əldə edilib. Mərkəzləşdirilmiş şəkildə Təhsil Nazirliyi tərəfindən aparılan buraxılış imtahanlarında XI sinif şagirdlərinin 83 faizi bütün fənlərdən müsbət qiymət alaraq orta məktəbi bitirmək haqqında attestat alıb. 264 nəfər məzun tələbə adını qazanıb. Bunlardan 17 nəfəri 600-dən yuxarı, 50 nəfər isə 500-600 arasında bal toplayıb. 3 nəfər məzun qəbul imtahanlarındakı yüksək nəticələrinə görə Prezident təqaüdünə layiq görülüb. "Ən yaxşı ümumtəhsil məktəbi" və "Ən yaxşı müəllim" müsabiqəsində də məktəb və müəllimlərimiz uğurla iştirak ediblər. 2010-cu ildə şəhər 5 saylı, Mican, Cülyan və Təzəkənd tam orta məktəbləri "İlin ən yaxşı məktəbi", Lahıc qəsəbə, Cülyan və Qubaxəlilli kənd orta məktəblərinin 3 müəllimi isə "Ən yaxşı müəllim" müsabiqəsinin qalibi olub. Rayonda gənclərin peşə təhsilinə də xüsusi əhəmiyyət verilir. Belə ki, 2010-cu ildə otelçilik və turizm istiqamətli 480 yerlik Peşə Tədris Mərkəzi tikilib başa çatdırılıb. Səhiyyə barədə danışan natiq göstərdi ki, islahatların aparılması ilə əlaqədar 2010-cu ildə rayonda səhiyyənin maddi-texniki bazasının möhkəmləndirilməsi, kadr təminatı, xəstələrə yüksək səviyyəli xidmət göstərilməsi üçün əlavə tədbirlər həyata keçirilib.

2010-cu ildə İsmayıllıda 1218 uşaq doğulub.Rayonda səhiyyə xidmətini daha da yaxşılaşdırmaq üçün il ərzində respublika və beynəlxalq səviyyəli tədbirlər keçirilib, monitorinqlər aparılıb. Ötən il respublika Səhiyyə Nazirliyi tərəfindən Mərkəzi Xəstəxanaya "Medison" firmasının ultrasəs müayinə aparatı və göz xəstəliklərini müayinə etmək üçün aparat verilib. Doğum, cərrahiyyə, yoluxucu xəstəliklər və poliklinika şöbələrində geniş təmir və yenidənqurma işləri aparılıb. Mərkəzi xəstəxananın istilik sistemi yenidən qurulub. Lahıc qəsəbə, İvanovka kənd xəstəxanaları, Tircan və Topçu kənd həkim məntəqələri üçün yeni binaların tikilməsi planlaşdırılıb.

Mərkəzi Xəstəxanaya verilən müasir reanimasiya və təcili yardım maşınları İsmayıllı sakinlərinin sosial həyatına, sağlamlığının qorunmasına etibarlı təminat yaradıb. Məruzəçi sevinc hissi ilə vurğuladı ki, 2011-ci ildə Azərbaycan Respublikası Mədəniyyət və Turizm Nazirliyi tərəfindən İsmayıllı "Sənətkarlar paytaxtı" elan olunub. Bu o deməkdir ki, rayonda çoxsaylı respublika və rayon səviyyəli tədbirlər keçiriləcəkdir. Yenə İsmayıllıya uzaqdan, yaxından qonaqlar gələcəklər.

İcra hakimiyyətinin başçısı çıxışında rayon gənclərinin uğurlarını sadalamağı da unutmadı. Xüsusi qeyd etdi ki, gənclər siyasəti sahəsində keçirilmiş tədbirlərdə rayon gənclərinin böyük əksəriyyətinin iştirakı təmin edilib. İsmayıllı Olimpiya-İdman Kompleksi gənclərin idmana olan marağını, rayonun bu sahə üzrə nailiyyətlərini son bir ildə xeyli artırıb. İdman Kompleksi bir il müddətində özünün ayrı-ayrı idman bölmələrini yaradıb. Hazırda kompleksdə üzgüçülük, futbol, voleybol, basketbol, böyük tennis, yüngül atletika, ağır atletika, cüdo, sərbəst güləş, sambo, karate və futzal idman növləri üzrə 500-dən yuxarı gənc idmançı məşğul olur.

Burada bir sıra respublika əhəmiyyətli yarışlar, təlim-məşq toplantıları keçirilib.

Fəxr olunmalı nəticələrdir, deyilmi. Bu hələ harasıdır. İsmayıllıda belə uğurlar bir deyil, beş deyil. Mən isə bu yazıda onların kiçik bir hissəsini diqqətə çatdırıram. Hesabat məruzəsi ətrafında çıxış edənlər də ayrı-ayrı sahələrdə olan nəticələri sadaladılar. İsmayıllının xoşbəxt bir sabaha boylandığından ürəkdolusu söhbət açdılar.

Yığıncağın işində Prezident Administrasiyasının məsul işçisi Niyaz Əliyev və Milli Məclisin deputatları Ərəstun Cavadov və Novruzəli Aslanov iştirak və çıxış etdilər.

İlqar HƏSƏNOV

Xalq qəzeti.- 2011.- 26 fevral.- S. 6.