Balanslaşdırıcı xarici siyasət yeridən Azərbaycan həm Qərblə, həm də Şərqlə uğurlu əməkdaşlıq edir

Azərbaycan bütün beynəlxalq təşkilatlarda Fələstini dəstəkləyir. İslam Konfransı Təşkilatında, Birləşmiş Millətlər Təşkilatı çərçivəsində aparılan bütün müzakirələr zamanı Azərbaycan Fələstinin yanındadır və bundan sonra da belə olacaqdır.

İlham ƏLİYEV,

Azərbaycan Respublikasının Prezidenti

Bakı, 28 iyun 2011-ci il

Arzu edirik ki, Dağlıq Qarabağ problemi, qaçqınlar problemi həll olunsun. Biz beynəlxalq qanunlardan artıq heç nə tələb etmirik. Bizim mövqelərimiz müştərəkdir. Arzu edirik ki, onlar həll olunsun. Arzu edirik ki, sülh bu torpaqlarda bərqərar olsun.

Mahmud ABBAS,

Fələstin Prezidenti

Bakı, 28 iyun 2011-ci il

Təkcə iyun ayında Azərbaycanın qəbul etdiyi rəsmi qonaqların təmsil olunduğu ölkələrin siyahısına və dövlət rəsmilərimizin səfər etdiyi ölkələrin xəritəsinə nəzər salanda bu yazının sərlövhəsinə çıxartdığımız ifadənin təsdiqini görürük. Azərbaycan bu gün həqiqi mənada həm Avropa ilə, həm də Asiya ilə, həm Şərqlə, həm də Qərblə mehribancasına, sədaqətlə, qarşılıqlı, səmərəli şəkildə əməkdaşlıq edir.

Rəsmi Bakının dostluq və tərəfdaşlıq etdiyi ölkələr arasında dünyanın bütün qütblərinin təmsilçiləri vardır. Təsadüfi deyil ki, dünyanın bütün beynəlxalq təşkilatlarında Azərbaycanın bu mövqeyi təqdir olunur və dəstəklənir. Hətta, ulu öndər Heydər Əliyev bir zaman söyləmişdi ki, Azərbaycanın Ermənistan tərəfindən işğal olunmuş əraziləri işğaldan azad edildikdən sonra bizim dünyada əməkdaşlıq və dostluq etmədiyimiz ölkə qalmayacaq. Yəni, müsəlman Şərqinin ilk demokratik respublikasının ənənələrini yaşadan, həmin prinsipləri davam etdirən Azərbaycanın ən böyük uğurlarından biri də sülhsevərlik və tolerantlıqdır.

Diqqət yetirin, Azərbaycan Respublikasının Prezidenti İlham Əliyev bir həftənin içərisində bütün Avropanı idarə edən siyasi və iqtisadi təşkilatların hamısının rəhbərləri ilə görüşür, qarşılıqlı maraq doğuran məsələlər müzakirə edilir və ertəsi günü dünyanın ən qüdrətli dövlətlərindən birinin - Rusiya Federasiyasının Prezidenti Dmitri Medvedevin dəvəti ilə Kazan şəhərində ölkəmizin ən ağrılı problemi olan Dağlıq Qarabağ münaqişəsinin həlli üçün danışıqlar aparılır. Yəni dövlət başçımız özünün qitə və dünya miqyaslı təmaslarından dərhal sonra Bakıda Fələstin dövlətinin başçısını qəbul edir. Ekspertlərin fikrincə, bu adi təsadüf deyil. Bu, Azərbaycan dövlətinin müstəqil siyasət yeritmək ənənəsinin təzahürüdür. Rəsmi Bakı bu addımla sübut edir ki, biz öz dövlət maraqlarımız baxımından dünyanın bütün ölkələri ilə ikitərəfli və çoxtərəfli əməkdaşlığın konturlarını məhz özümüz müəyyən edir və reallaşdırırıq.

Cənab Mahmud Abbasın Azərbaycan səfəri bir neçə cəhətdən əlamətdar idi. O, Bakıya səfər edən ilk Fələstin Prezidenti idi. Dünya ictimaiyyəti Fələstin probleminin həllində Mahmud Abbasın siyasi qətiyyətinə böyük ümidlər bəsləyir və Fələstin xalqı onun rəhbərliyi dövründə müəyyən uğurların əldə ediləcəyinə inanır. Mahmud Abbas eyni zamanda Vaşinqtonda, Moskvada, eləcə də bütövlükdə Avropada qəbul edilən siyasətçidir. Bu gün regionda söz sahibinə çevrilən Azərbaycan Respublikası Mahmud Abbası ən ali səviyyədə qəbul etməklə on illərdən bəri uzanan Fələstin probleminin həllinə öz töhfəsini vermiş olur. Rəsmi Bakı bu addımlarla dünyanın diqqətini bir daha həll edilməmiş qalan münaqişələrin taleyinə yönəltmiş olur. Prezident İlham Əliyevlə Prezident Mahmud Abbasın görüşlərində, müzakirələrdə və mətbuata bəyanatla çıxışlarında bu məqamlar bir daha öz əksini tapdı.

Əslində Azərbaycan-Fələstin münasibətlərinin hansı səviyyədə olduğunu ən dəqiq şəkildə ifadə edən fikirlər də məhz dövlət başçılarının bəyanatlarında səsləndirildi. Prezident İlham Əliyev öz bəyanatında söylədi: "Bizim siyasi əlaqələrimiz çox yüksək səviyyədədir. Sizin Azərbaycana səfəriniz bunun bariz nümunəsidir. Bir neçə ay bundan əvvəl Fələstin dövlətinin Azərbaycandakı səfirliyi öz işinə başlamışdır. Bu da çox mühüm hadisədir. Əminəm ki, səfirliyin fəaliyyəti nəticəsində ikitərəfli əlaqələrimizin inkişafı üçün yeni imkanlar müəyyən ediləcəkdir. Biz çox istəyirik ki, iqtisadi sahədə də yaxşı əməkdaşlıq edək və əminəm ki, səfər zamanı bu məsələlər də nəzərdən keçiriləcəkdir". Cənab Mahmud Abbas Azərbaycan xalqının və dövlətinin siyasi idarəçilik baxımından böyük təcrübəyə malik olduğunu böyük səmimiyyətlə, dostcasına etiraf etdi: "Biz Azərbaycan Respublikasına fəxrlə baxırıq. Bilirik ki, 1918-ci ildə ilk demokratik respublika burada qurulmuşdur. Bu, o deməkdir ki, siz demokratiya yolunda yaşlılardan hesab olunursunuz, siz başqalarına demokratiya öyrədirsiniz. Bu, böyük işdir. Eyni zamanda bilirik ki, 1918-ci ildən etibarən Azərbaycan qadını səsvermə hüququna malikdir. Siz demokratiya yolu ilə irəliləyirsiniz".

Dövlət başçıları öz bəyanatlarında bir məqamı da yada saldılar ki, həm Fələstinin, həm də Azərbayanın on illərdən bəri həllini gözləyən problemləri vardır. Çox təəssüf ki, dünya ictimaiyyəti həmin problemlərin həlli yollarını tapa bilmir. Münaqişələr məsələsinə toxunan Prezident İlham Əliyev dövlətimizin siyasi mövqeyini ortaya qoyaraq dedi: "Biz hesab edirik ki, tezliklə müstəqil, suveren Fələstin Dövləti yaradılmalıdır və onun paytaxtı Şərqi Qüds şəhəri olmalıdır. Bu, bizim mövqeyimizdir və bütün beynəlxalq təşkilatlarda biz bu mövqeyi müdafiə edirik, müdafiə edəcəyik. Bu, bir tərəfdən bizim qardaşlıq borcumuzdur, digər tərəfdən, bu mövqe beynəlxalq hüquq normaları əsasında formalaşır". Fələstin Dövlətinin Prezidenti Mahmud Abbas isə Azərbaycanın cəlb edildiyi münaqişəyə münasibət bildirərək öz dövlətinin mövqeyini dilə gətirdi: "Burada müştərək problemlər vardır. Sizdə də, bizdə də. Sizin də torpaqlarınız işğal altındadır. Sizdə də, bizdə də qaçqınlar vardır. Sizin haqqınızda BMT-nin məlum dörd qətnaməsi vardır... Bizim haqqımızda isə BMT-nin 15 və daha artıq qərarı vardır. Bu qətnamələr də sülhə çağırır. Amma biz səbir edirik ki, bu problemlərə sülh vasitəsiylə son qoyulsun".

Bir sözlə, Fələstin dövlətinin başçısı Mahmud Abbasın Azərbaycana ilk rəsmi səfəri rəsmi Bakının Avrasiyada geniş əməkdaşlıq etdiyi ünvanların sırasını artırmış oldu. Azərbaycan öz dövlət müstəqilliyinin 20 illiyi ərəfəsində beynəlxalq aləmlə əməkdaşlığını daha səmərəli və daha perspektivli məcralarda genişləndirmək ənənəsini davam etdirir.

İttifaq MİRZƏBƏYLİ

Xalq qəzeti.- 2011.- 1 iyul.- S. 1.