Bizim hamımızın bir Vətəni var - Azərbaycan

Biz istəyirik ki, müxtəlif ölkələrdə yaşayan azərbaycanlılar həmin ölkələrin vətəndaşı kimi, istədikləri kimi yaşasınlar. Ancaq heç vaxt öz milli köklərini, milli mənsubiyyətlərini itirməsinlər. Bizim hamımızı, azərbaycanlıları birləşdirən milli mənsubiyyətimizdir, tarixi köklərimizdir, milli-mənəvi dəyərlərimizdir, milli mədəniyyətimizdir - ədəbiyyatımız, incəsənətimiz, musiqimiz, şeirlərimiz, mahnılarımız, xalqımıza mənsub olan adət-ənənələrdir. Bizim hamımızı birləşdirən, həmrəy edən azərbaycançılıq ideyasıdır, azərbaycançılıqdır.

Heydər ƏLİYEV,

Ümummilli lider

Azərbaycan xalqı böyük xalqdır. Biz 50 milyonuq. Bu, dünya miqyasında böyük xalqdır. Bizim hamımızın bir Vətəni var - Azərbaycan. Çalışmalıyıq ki, doğma Vətənimizi möhkəmləndirək, zənginləşdirək, qüdrətli dövlətə çevirək.

İlham ƏLİYEV,

Azərbaycan Respublikasının Prezidenti

Bu gün Dünya Azərbaycanlılarının III qurultayı öz işinə başlayır

Bu gün Bakıda Dünya Azərbaycanlılarının III qurultayı öz işinə başlayır. Qurultaya 1272 nümayəndə seçilib. Bu mötəbər tədbirdə dünyanın 42 ölkəsindən 579 nümayəndə və 211 qonaq iştirak edir. Ən çox qonaq və nümayəndə Rusiya (155), Türkiyə (101), Ukrayna (49), Almaniya (43), Gürcüstan (41), ABŞ (28), İsveç (23), Niderland (21), İsrail (17), Özbəkistan (13), Fransa (12), Böyük Britaniya və Şimali İrlandiya Krallığı (11) və Kanada (10) ölkələrindəndir.

Üçüncü qurultayda, həmçinin ümumilikdə 13 ölkə parlamentinin 29 deputatı iştirak edir.

Dünya azərbaycanlılarının qurultayı çox böyük tarixi hadisədir. Dünyanın müxtəlif ölkələrindəki azərbaycanlıların bir araya gəlmək təklifi və təşəbbüsü, dünya azərbaycanlılarının təşkilatlanma prosesi ulu öndər Heydər Əliyev tərəfindən irəli sürülmüşdür. Ümummilli lider Heydər Əliyev dünya azərbaycanlılarının vahid məqsəd ətrafında birləşdirilməsi ideyasını reallaşdırmağı zəruri vəzifə kimi qarşıya qoymuşdur. Böyük tarixi şəxsiyyət xaricdə yaşayan azərbaycanlıların təşkilatlanmasını, məskunlaşdıqları ölkələrin ictimai-siyasi həyatında fəal iştirak etməsini, doğma Vətənlə əlaqələrinin genişləndirilməsi məsələlərini prioritet vəzifələrdən hesab edirdi. Tarixi Vətəndən uzaq düşənlərin problemlərinin həllini, onların hüquqlarının müdafiəsini təmin etmək üçün bütün imkanlardan istifadə olunmasını xüsusi vurğulayırdı. Ulu öndər Heydər Əliyev hələ Naxçıvan Muxtar Respublikası Ali Məclisinin sədri olarkən dünya azərbaycanlılarının bir araya gəlməsi barədə qətiyyətli addımlar atırdı. Ümummilli liderin təşəbbüsü ilə Naxçıvan Muxtar Respublikasının Ali Məclisi 1991-ci ilin sonunda 31 dekabrı Dünya Azərbaycanlılarının Həmrəylik və Birlik Günü elan etmiş, onun bütün ölkə miqyasında dövlət bayramı kimi qeyd olunması üçün Azərbaycan Respublikasının Ali Soveti qarşısında vəsatət qaldırmışdır.

1993-cü ildə xalqın təkidli tələbləri ilə yenidən siyasi hakimiyyətə gələn ulu öndər Heydər Əliyev xaricdə yaşayan azərbaycanlıların bir araya gəlməsi, təşkilatlanması və bu istiqamətdə qarşıya çıxan problemlərin aradan qaldırılması, onların hüquqlarının müdafiəsini təmin etmək üçün dövlətin bütün imkanlarını səfərbər etmişdir. Ölkədə aparılan uğurlu islahatlar, beynəlxalq standartlara tam uyğun yeni qanunların qəbul edilməsi, Avropaya və dünya birliyinə inteqrasiya, iqtisadi sahədə əldə olunan nailiyyətlər müstəqil dövlətimizin mövqelərini tədricən möhkəmləndirir, əlaqələrini genişləndirirdi. Aparılan hüquqi və siyasi islahatlar Azərbaycanın demokratik dövlət, vətəndaş cəmiyyəti quruculuğu yolu ilə inamla addımladığını təsdiqləmiş, onun beynəlxalq nüfuzunu getdikcə yüksəltmişdir.

Qazanılan uğurlar ölkədə milli birliyin təmin olunmasına öz töhfəsini vermiş, dünyanın müxtəlif guşələrində yaşayan azərbaycanlıların daxili inamını və qürur hissini gücləndirmiş, tarixi Vətənin maraqları naminə daha sıx birləşərək fəaliyyət göstərməsi üçün zəmin yaratmışdır. Dünya azərbaycanlılarının ümumi məqsəd, vahid azərbaycançılıq ideyası ətrafında birləşməsi yolunda həyata keçirilən tədbirlər artıq öz bəhrəsini verir.

Heydər Əliyevin təşəbbüsü və sərəncamı ilə 2001-ci ilin noyabrında Bakıda keçirilmiş Dünya Azərbaycanlılarının I Qurultayı qarşıya qoyulmuş vəzifələrin reallaşdırılması istiqamətində son mərhələ oldu. Qurultay xaricdəki soydaşlarımızın birləşməsi yolunda mühüm əhəmiyyət kəsb etmiş, diaspor hərəkatının tarixində keyfiyyətcə yeni mərhələnin başlanğıcını qoymuşdur. Birinci qurultay həm də ona görə yaddaşlara əbədi həkk olundu ki, Xarici Ölkələrdə Yaşayan Azərbaycanlılarla İş üzrə Dövlət Komitəsinin yaradılması ideyası məhz bu qurultayda formalaşdı. Qurultay nümayəndələrinin çoxsaylı təkliflərini nəzərə alan ümummilli lider Heydər Əliyev 2002-ci il iyulun 5-də diasporla iş sahəsində dövlət siyasətinin həyata keçirilməsini, dövlət orqanlarının və qeyri-hökumət təşkilatlarının bu sahə ilə bağlı fəaliyyətinin əlaqələndirilməsini təmin etmək üçün Xarici Ölkələrdə Yaşayan Azərbaycanlılarla İş üzrə Dövlət Komitəsinin yaradılması haqqında fərman imzalamışdır. Həmin ilin dekabrında qəbul edilmiş "Xarici ölkələrdə yaşayan azərbaycanlılarla bağlı dövlət siyasəti haqqında" Qanun isə bu sahədə həyata keçirilən dövlət siyasətinin prioritet istiqamətlərini və hüquqi prinsiplərini müəyyən etmişdir. Bilavasitə diaspor problemləri ilə məşğul olan dövlət orqanının təsis edilməsi və müvafiq qanunun qəbulu dünya azərbaycanlılarının təşkilatlanması prosesini daha da sürətləndirmiş, Azərbaycan həqiqətlərinin dünya ictimaiyyətinə çatdırılması işinin təkmilləşdirilməsinə təkan vermişdir. Xalqımızın bütün tarix boyu milli birlik və həmrəylik arzuları, ideyaları artıq həqiqətə çevrilmişdir.

Ümummilli lider Heydər Əliyev dünyada yaşayan azərbaycanlıların milli birlik və həmrəylik hisslərinin, duyğularının güclənməsi, onların ümummilli ideyalar, Azərbaycan dövlətçiliyi ətrafında sıx birləşməsi üçün daim yorulmaz fəaliyyət göstərmişdir. Qüdrətli şəxsiyyət dünya azərbaycanlılarının birliyinə, sıx əməkdaşlığına böyük əhəmiyyət verərək demişdir: "Azərbaycan xalqı böyük, qədim tarixə malikdir. Çoxəsrlik tariximizdə xalqımız bir çox sınaqlardan çıxmış, yaşamış, öz mənliyini itirməmiş, öz milliliyini itirməmiş, dünya sivilizasiyasına dəyərli töhfələr vermiş, dünya sivilizasiyasını zənginləşdirmişdir. Ancaq tarixin müxtəlif mərhələlərində azərbaycanlılar bəzi məhrumiyyətlərə düçar olmuşlar. Ona görə də bütün dünyaya səpələnmiş azərbaycanlıların birliyi, həmrəyliyi indi həm bizim üçün, həm də dünyanın müxtəlif ölkələrində yaşayan azərbaycanlılar üçün xüsusi əhəmiyyət kəsb edir".

Ulu öndər siyasi uzaqgörənliyi sayəsində dünya azərbaycanlılarının milli birliyini təmin etmiş, dünyanın müxtəlif yerlərində yaşayan soydaşlarımızın qarşısında duran vəzifələri aydın və dəqiq müəyyənləşdirmişdir: dünyanın müxtəlif ölkələrində yaşayan azərbaycanlılar ilk növbədə öz milli kimliklərini dərk və hifz etməli, Azərbaycanın dilini, mədəniyyətini, mütərəqqi adət-ənənələrini, tarixini yaşatmalı, inkişaf etdirməlidirlər. Bu, bütün dünyada yaşayan soydaşlarımızın mədəni-mənəvi birliyinin mühüm şərtidir.

Ulu öndərin siyasi kursunu layiqincə davam etdirən möhtərəm Prezidentimiz İlham Əliyev dünya azərbaycanlılarının həmrəyliyinin və mütəşəkkilliyinin güclənməsi, onların ümummilli ideyalar ətrafında sıx birləşməsini prioritet vəzifə kimi qarşıya qoydu. Dövlət başçımızın bu istiqamətdə həyata keçirdiyi uğurlu islahatlar, qəbul etdiyi qərarlar daha geniş imkanlar yaratdı. Xaricdə yaşayan azərbaycanlılarla bağlı dövlət siyasətinin həyata keçirilməsində, soydaşlarımızın birlik və həmrəyliyinin möhkəmləndirilməsində yeni mərhələ başlandı. Bu, bir tərəfdən Azərbaycanın iqtisadi və siyasi cəhətdən getdikcə güclənməsi, regionda lider dövlətə çevrilməsi, beynəlxalq aləmdə mövqelərinin güclənməsi, müstəqil dövlət kimi nüfuzunun artması, digər tərəfdən isə xaricdə yaşayan azərbaycanlılarla işin keyfiyyətcə yeni məzmun kəsb etməsi, bu sahədə qarşıya yeni vəzifələr qoyulması ilə əlaqədardır. Möhtərəm Prezidentimizin həyata keçirdiyi daxili və xarici siyasətin prioritet sahələrindən biri də soydaşlarımızın beynəlxalq konvensiyalarda təsbit olunmuş insan və vətəndaş hüquq və azadlıqlarının müdafiəsi, yaşadıqları ölkələrdə mütəşəkkil təsirli qüvvəyə çevrilməsi, dünya azərbaycanlılarının taleyi üçün məsuliyyət daşıması kimi vəzifələr qoyur.

2006-cı ilin martında Bakıda keçirilmiş Dünya Azərbaycanlılarının II Qurultayında dövlət başçısı İlham Əliyevin geniş və əhatəli nitqindən və Xarici Ölkələrdə Yaşayan Azərbaycanlılarla İş üzrə Dövlət Komitəsinin hesabatından sonra məlum oldu ki, ötən dövrdə xaricdəki soydaşlarımızın təşkilatlanması və öz tarixi vətənləri olan Azərbaycanla əlaqələrinin genişləndirilməsi sahəsində məqsədyönlü tədbirlər həyata keçirilmişdir. Aparılan hüquqi və siyasi islahatlar Azərbaycanın demokratik dövlət, vətəndaş cəmiyyəti quruculuğu yolu ilə inamla addımladığını təsdiqləmiş, dünya birliyinə inteqrasiyasını sürətləndirmişdir. Azərbaycan dövlətinin diaspor quruculuğu sahəsində həyata keçirdiyi ardıcıl və məqsədyönlü iş öz bəhrəsini vermişdir. Ötən müddət ərzində Amerika, Avropa, Asiya və Şimali Afrikanın ayrı-ayrı ölkələrində yüzə yaxın yeni azərbaycanlı icması yaradılmış, bununla da xaricdəki soydaşlarımızı birləşdirən qurumların sayı 300-ü ötmüşdür. Təşkilatlanmış azərbaycanlı cəmiyyətlərinin fəaliyyət göstərdikləri ölkələrin ictimai-siyasi və mədəni həyatında fəal iştirak etmələri diaspor quruculuğu işinin ən mühüm istiqamətlərindən biri hesab edilmişdir. Azərbaycan Prezidenti İlham Əliyev qurultaydakı çıxışında xaricdə yaşayan soydaşlarımızı Azərbaycan həqiqətlərini beynəlxalq aləmə olduğu kimi çatdırmaqda fəallıqlarını artırmağa çağırdı. Dövlətimizin başçısı demişdir: "Biz öz tədbirlərimizi görməliyik, biz möhkəmlənməliyik. Azərbaycan öz iqtisadi potensialını, hərbi potensialını, siyasi imkanlarını tam şəkildə işə salır. Biz hər istiqamətdə çox sürətlə, düşünülmüş proqram və konsepsiya əsasında irəliləyirik. Yenə də qeyd etmək istəyirəm ki, bu istiqamətdə Azərbaycan diasporunun çox böyük rolu var. Mən istəyirəm ki, həm Azərbaycanın dünyada təbliğ edilməsində, Azərbaycan həqiqətlərinin dünya birliyinə çatdırılmasında, azərbaycanlıların yaşadıqları ölkələrin ictimai-siyasi həyatında fəal iştirakında bu rol daha güclü olsun. Məsələn, mən istəyirəm ki, azərbaycanlılar yaşadıqları bütün ölkələrin siyasi həyatında daha fəal rol oynasınlar. Siyasi partiyalara üzv olsunlar. Çalışsınlar ki, o ölkələrin qanunvericilik orqanlarına seçilsinlər. Bu, bizim mövqelərimizi möhkəmləndirər".

Azərbaycan Respublikası bütün dünya azərbaycanlılarının doğma ata-baba yurdudur. Odur ki, dünyanın bütün ölkələrində məskən salmış soydaşlarımız doğma Vətəndə baş verən ictimai-siyasi prosesləri diqqətdə saxlamalı, ölkəmizin ərazi bütövlüyünün təmin olunmasında bütün qüvvələrindən səmərəli istifadə etməlidirlər. Azərbaycan dilinin qorunması, inkişafı, azərbaycançılıq ideyasının təbliği harada yaşamasından asılı olmayaraq hər bir azərbaycanlının ən ümdə vəzifəsi olmalıdır.

Bu gün doğma Azərbaycanımız dünyanın iqtisadi cəhətdən ən dinamik inkişaf edən ölkələri sırasındadır. Xarici ölkələrdə yaşayan soydaşlarımız və həmvətənlərimiz Azərbaycanın dünyaya daha yaxından tanıdılması, xalqımızın zəngin mədəniyyətinin təbliğ edilməsi sahəsində bütün qüvvələrini birləşdirməlidirlər. Çünki bizim bir Vətənimiz var - Azərbaycan.

Əliqismət BƏDƏLOV

Xalq qəzeti.- 2011.- 5 iyul.- S. 5.