Azərbaycan dövləti qüdrətləndikcə bizim də gücümüz artır

Bu günlərdə istər ölkə mediasında, istərsə də geniş ictimaiyyət arasında ən çox müzakirə olunan mövzu Dünya Azərbaycanlılarının III Qurultayının uğurla başa çatmasıdır. Bu mötəbər tədbirdə Azərbaycan diasporunun inkişafı ilə bağlı çox mühüm müzakirələr aparılıb. Qurultay birmənalı olaraq bəyan etdi ki, dünyanın harasında yaşamalarından asılı olmayaraq soydaşlarımız müstəqil Azərbaycanın parlaq gələcəyi naminə bundan sonra da böyük inamla çalışmağa hazırdır.

Yusif Cəfərov, Ümumrusiya Azərbaycan Konqresinin vitse-prezidenti:

- Dünya Azərbaycanlılarının III Qurultayının iştirakçısı olduğum üçün, təbii ki, hədsiz dərəcədə sevinirəm. Artıq qurultaydan bir neçə gün keçib. Qəlbimdə tez-tez bütün dünya azərbaycanlılarının bu ali məclisinin təşkili, qarşıya qoyduğu hədəflərlə bağlı duyğularımı, fikirlərimi götür-qoy edirəm. Özümdən soruşuram ki, bu qurultayın əvvəlki iki qurultaydan fərqi nə olub? Gəldiyim əsas nəticə budur ki, əvvəlki qurultaylar daha çox Azərbaycan diaporunun təşkilatlanması məsələlərini müzakirə edib, sonuncu qurultay isə diasporun keyfiyyətcə yeni mərhələyə qədəm qoyduğunu sübut etdi. Deməli, uğurlara görə sevinməyə haqqımız var, amma qarşıda daha böyük vəzifələr durur.

Elə ölkələr var ki, öz milli diasporlarını qurmaq üçün 40-50 il vaxt sərf edirlər. Azərbaycan bu taleyüklü missiyanın öhdəsindən cəmi 10-12 ilə gəldi. Heç kəs üçün sirr deyil ki, bu vəzifənin uğurla yerinə yetirilməsində xalqımızın ümummilli lideri Heydər Əliyevin əvəzsiz xidmətləri olub. Məhz bu dahi siyasətçinin təşəbbüsü və titanik təşkilatçılıq fəaliyyəti nəticəsində Azərbaycan diasporu çox qısa zaman kəsiyində həqiqətən inanılmaz inkişaf yolu keçdi. Ulu öndərin ən layiqli davamçısı Prezident İlham Əliyev hakimiyyət sükanı arxasına keçəndən sonra müstəqil dövlətimiz diaspor quruculuğuna diqqəti azaltmadı, dövlət quruculuğunun prioritet məsələlərindən olan bu sahəyə qayğını daha da artırdı.

Dünya Azərbaycanlılarının III Qurultayının keçirildiyi gün - 2011-ci ilin 5 iyulu həyatımda ikiqat bayram oldu. Belə ki, qurultayın təntənəli açılışı günündə Bakıda nəşr olunan rəsmi qəzetlərdə müstəqil Azərbaycanın milli diasporunun quruculuğundakı səmərəli fəaliyyətinə görə Azərbaycan Respublikasının Prezidentinin sərəncamı ilə "Tərəqqi" medalı ilə təltif olunanlar arasında mən də vardım. Dünyalar qədər sevindim. Qurultayın səhərisi günü Azərbaycan Respublikası Prezidenti Administrasiyasının rəhbəri, çox hörmətli Ramiz Mehdiyev bu medalı mənə təqdim etdi. Xüsusi vurğulamağı özümə borc bilirəm ki, bu təltif təkcə mənim deyil, Rusiya Federasiyasındakı Ümumrusiya Azərbaycan Konqresinin Buryatiya əyalətinin paytaxtı Ulan-Ude təşkilatının mənimlə birlikdə çalışan bütün fəallarının əməyinə verilən yüksək qiymətdir.

Ulan-Ude şəhərində 1981-ci ildən yaşayıram. Təkcə bizim şəhərdə 7 mindən çox azərbaycanlı məskunlaşıb. Son illər Azərbaycan dövlətinin nüfuzu beynəlxalq aləmdə çox yüksəlib. Azərbaycan dövləti qüdrətləndikcə, bütün dünyada, eləcə də Rusiyada milli diasporumuzun fəallarının yerli hökumət qurumları ilə əlaqələri genişlənir. Fəxrlə deyə bilərəm ki, bu gün həmyerlilərimiz Buryatiyanın ictimai-siyasi həyatında əvvəlki illərdə olduğundan daha fəal iştirak edirlər. Həm də indi bizi daha yaxından tanıyırlar, Nə gizlədim, əvvəllər Ulan-Udedə hamını qafqaz əsilli hesab edirdilər, indi şəhər ictimaiyyəti arasında azərbaycanlıların böyük hörməti var.

Mən Füzuli rayonunun Horadiz qəsəbəsindənəm. Bildiyiniz kimi, ermənilər 1993-cü ilin avqustunda bizim rayonu işğal etdilər. 1994-cü ilin yanvarında Azərbaycan ordusu uğurlu hücum əməliyyatı keçirərək Horadizi və Füzuli rayonunun daha 21 yaşayış məntəqəsini düşməndən azad etdi. Qəlbən inanıram ki, sülh danışıqları konkret bir nəticə verməzsə, Azərbaycan əsgərləri yenə də hücuma keçərək, doğma torpaqlarımızı son qarışınadək düşməndən azad edəcəklər.

Şükrü Karabalıq, Türkiyənin Xocaeli əyalətinin bələdiyyə başqanı:

- Fikrimcə, Dünya Azərbaycanlılarının III Qurultayı, ilk növbədə, Azərbaycan-Türkiyə dostluğunun sarsılmazlığını, bütün türk dünyasının birliyini nümayiş etdirdi. Mən bundan bir türk olaraq çox məmnun oldum.

Bir şeyi gərək heç vaxt unutmayaq. Dünyada ikili standartlar hələ də güclüdür. Türkiyə heç vaxt ermənilərə qarşı soyqırımı həyata keçirməyib, amma ermənilər bütün dünyaya car çəkirlər ki, guya türklər onları tarix səhnəsindən silib atmaq istəyiblər. Dünyanın bəzi ölkələri isə ermənilərin bu fitnə-fəsadlarına, hiylələrinə "inanır". Amma 1992-ci ilin fevralın 26-da erməni quldurları Xocalı şəhərinin bütün əhalisini, uşaq, ahıl, qadın demədən vəhşicəsinə qətlə yetirdilər, acı təəssüf ki,Avropada özlərinin sivil adlandıranlar bunun hesabını ermənilərdən soruşmaq istəmir.

Böyük siyasət adamı Heydər Əliyev bir vaxtlar haqlı olaraq demişdir ki, Azərbaycan və Türkiyə dövlətlərinin diaspor quruculuğunda fərqli vəzifələr ola bilməz. Bəli, biz iki qardaşıq. Bu gün Azərbaycan dövlətinin və Türkiyə Cümhuriyyətinin rəhbərləri beynəlxalq aləmdə vahid mövqedən çıxış edirlər. Türkiyənin Baş naziri, sayın Rəcəb Tayyib Ərdoğan dəfələrlə deyib ki, nə qədər ki, Dağlıq Qarabağ problemi ədalətli həllini tapmayıb, nə qədər ki, qardaş Azərbaycanın bölgələri işğal altındadır, Türkiyə Cümhuriyyəti Ermənistanla sərhədlərini heç vaxt açmayacaq. Deyib, sözünün üstündə də durub!

Azərbaycan mənim üçün çox doğma bir məmləkətdir, ikinci ana Vətəndir. İkinci dəfədir ki, mən Bakıya gəlirəm. 5 il öncə, şəxsi təşəbbüsümlə Azərbaycana gəlmişdim. Gəldim, çox şeyləri öz gözlərimlə gördüm. O vaxt Tiflisdən gələrək dahi Nizami yurdu Gəncəni gəzdim, oradan Ağdaşa keçdik, sonra da Bakıya çatdıq. O vaxt yollar pis idi. İndi eşitmişəm ki, oralarda çox gözəl yollar salınıb. Bakı Hava Limanına aparan yol bir möcüzədir. Xəzər boyunca salınmış "Sahil bağı" da çox gözəldir. Bəlkə bütün dünyada belə gözəl sahil bağı yoxdur.

Azərbaycan paytaxtı Bakı çox sürətlə böyüyür, bərpa olunur, gözəlləşir. Amma bir dost olaraq bir iradım da var. Bakıda yaşıllıqları artırmaq lazımdır. Məsələn, bizim Xocaelidə yaşıllıq daha çoxdur. Hətta şəhərimizin ümumi ərazisinin 40 faizini yaşıllıqlar, ormanlar tutur. Bütövlükdə, Bakıdan xoş duyğularla ayrılıram. Azərbaycanın daha parlaq gələcəyinə inanıram.

Məsaim ABDULLAYEV

Xalq qəzeti.- 2011.- 12 iyul.- S. 3.