13 yaşlı azərbaycanlı qızı qətlə yetirməklə ermənilər növbəti qəddarlığa imza atdılar

Ermənilərin çayla Azərbaycan ərazisinə axıtdığı partlayıcı qurğu quraşdırılmış oyuncağın partlaması nəticəsində Tovuzda 13 yaşlı azərbaycanlı qızın həlak olması, anasının ağır yaralanması Azərbaycan ictimaiyyətində dərin qəzəb hissi doğurub. Dünən bütün günü redaksiyamıza çoxlu telefon zəngləri olub. Oxucular, qaçqın və məcburi köçkün ailələri, adi vətəndaşlar, tanınmış ziyalılar qəzetimizə ünvanladığı müraciətlərdə bu qəddar hadisəni törədən erməni cəlladlarının vəhşi əməllərinin beynəlxalq qurumlar tərəfindən araşdırılaraq beynəlxalq məhkəməyə verilməsini tələb edirlər.

Hadisənin təfərrüatını bir daha oxuculara çatdırmaq istəyirik. Hadisə iki gün əvvəl Tovuz rayonunun Ermənistanla həmsərhəd olan Əlibəyli kəndində baş verib. Partlayıcı qurğu quraşdırılmış "itəbənzər" uşaq oyuncağı ermənilər tərəfindən Əlibəyli kəndinə daxil olan Tovuz çayına buraxılıb. Həmin ərazidə oynayan Elsəvər Həsən oğlu Cəfərov və Aygün Zirəddin qızı Şahmalıyeva oyuncağı taparaq Həsən Cəfərovun evinə gətiriblər. Evdə oynayan zaman Aygün Şahmalıyeva oyuncağı masanın üstünə vurub və nəticədə partlayış baş verib. Partlayıcı qurğunun işə düşməsi nəticəsində 1998-ci il təvəllüdlü Aygün Zirəddin qızı Şahmalıyeva həlak olub, onun anası, 1979-cu il təvəllüdlü Elnarə Məmmədtağı qızı Şahmalıyeva isə bədəninin bud nahiyəsindən xəsarət alaraq yaralanıb.

Bu məsələ ilə bağlı Trend İnformasiya agentliyinin əməkdaşı Tovuz rayon prokurorluğuna müraciət edib. Prokurorluğun müstəntiqi Asif Allahverdiyev agentliyə bildirib ki, faktla bağlı Azərbaycan Respublikasının Cinayət Məcəlləsinin milli, irqi, dini ədavət və ya düşmənçilik niyyəti ilə adam öldürmə (120.2.12-ci) maddəsi ilə cinayət işi başlanıb, istintaq aparılır. Müstəntiqin sözlərinə görə, Şahmalıyevlər ailəsi Rusiyanın Sankt-Peterburq şəhərində yaşayır. Ailə üzvləri Əlibəyli kəndinə qohumlarının yanına qonaq gəliblər.

Qeyd edək ki, 1994-cü ildə də həmin ərazidə analoji hadisə baş vermişdi. Belə ki, ermənilər tərəfindən çaya buraxılan oyuncağı götürərkən partlayışın baş verməsi nəticəsində iki azyaşlı uşaq həlak olmuş, biri isə yaralanmışdı.

Azərbaycanın Tovuz rayonunda 13 yaşlı uşağın öldürülməsi hadisəsi ilə bağlı Azərbaycan Respublikasının Xarici İşlər Nazirliyi dünən açıqlama verib. Nazirliyin rəsmi nümayəndəsi Elxan Poluxov mətbuat nümayəndələrinə deyib ki, azyaşlı uşaqları hədəfə alan Ermənistan rəsmiləri dünya ictimaiyyəti qarşısında öz xislətlərini yenə də nümayiş etdirərək, günahsız insanların, ələlxüsus uşaqların qanını tökməkdə davam edir.

E.Poluxov daha sonra bildirib ki, partlayıcı qurğunun mənbəyini Ermənistan ərazisində götürən və Əlibəyli kəndindən keçən Tovuz çayında tapılması onu göstərir ki, bu qurğu Ermənistan tərəfindən məhz məqsədyönlü şəkildə və xüsusi təyinatla hazırlanıb. Həmçinin, partlayıcı qurğunun oyuncaq formasında olması əvvəlcədən hədəfin uşaqlar olmasının və erməni tərəfinin əsl niyyətinin göstəricisidir. Azərbaycan Xarici İşlər Nazirliyinin adıçəkilən rəsmisi deyib: Azərbaycan dövləti Ermənistanın bu çirkinliyini və amansızlığını qətiyyətlə pisləyir və bu cür əməllərin bu kimi həssas dövrdə tərəflər arasında qarşılıqlı etimadın yaranmasına birbaşa zərbə endirdiyini vurğulayır. Azyaşlı uşağın partlayıcı qurğu ilə qətlə yetirilməsini terrordan başqa heç cür adlandırmaq mümkün deyil. Erməni tərəfi beynəlxalq qanunvericiliyin bütün tələblərinə zidd olaraq, dinc əhaliyə, xüsusilə də günahsız uşaqlara qarşı dəfələrlə qəddarlıq və amansızlıq nümayiş etdirərək öz həqiqi simalarını bir daha ifşa edib, Xocalı soyqırımının həyata keçirilməsinə göstəriş verən insanlar bu gün də günahsız insanları öldürməyə göstəriş verməkdə davam etdiklərini sübuta yetirib. Azərbaycan dünya ictimaiyyətini minlərlə məsum azərbaycanlı uşaqları qətlə yetirmiş və əlil qoymuş Ermənistanın bu gün də həmin əməllərinin davam etməsini pisləməyə çağırır. Bu kimi əməllər erməni tərəfinə uşaq qatili adından başqa heç bir ad qazandırmır.

Azərbaycanın BMT-dəki daimi nümayəndəsi səfir Aqşin Mehdiyev də bu məsələyə münasibət bildirib. Səfir deyib ki, ermənilərin 13 yaşlı azərbaycanlı uşağı öldürməsi ilə bağlı insident bir daha onu sübut edir ki, Ermənistan ordusu və tabeçiliyində olan birləşmələrin Azərbaycan dövlətinə və xalqına qarşı vəhşi siyasətinin qarşısı heç nə ilə alınmır.

Səfir Aqşin Mehdiyev daha sonra qeyd edib: "Döyüş zonasında minalanmış oyuncaqların atılması ilə bağlı belə praktika birmənalı şəkildə mülki əhaliyə, ilk növbədə, uşaqlara qarşı yönəlib. Bu növ hərəkətlər döyüş aparan tərəflərin özlərini aparması qaydalarını tənzimləyən bütün beynəlxalq hüquqi sənədlərlə pislənilir. Baş verən insident bir daha ondan xəbər verir ki, ermənilər üçün beynəlxalq normalar anlayışı yoxdur". Aqşin Mehdiyevin sözlərinə görə, Azərbaycanın BMT-dəki daimi nümayəndəliyi dünya ictimaiyyətinə ermənilərin bu növbəti cinayəti ilə bağlı həqiqətin çatdırılması üçün bütün lazımi tədbirləri görəcəkdir.

ABŞ-ın Bakıdakı səfirliyi Azərbaycanın Tovuz rayonunda 13 yaşlı qızın həlak olması ilə bağlı insidentin diqqətlə və şəffaf şəkildə araşdırılmasına çağırır. Bu barədə səfirliyin mətbuat xidmətindən bildiriblər. "Biz bu insidentin diqqətlə, şəffaf şəkildə araşdırılmasına çağırırıq", - deyə səfirliyin mətbuat katbi Kis Bin deyib. ABŞ səfirliyinin nümayəndəsi həlak olanın ailəsinə və yaxınlarına dərin hüznlə başsağlığı verib.

Ekspertlər hesab edirlər ki, Tovuzda baş vermiş bu qanlı cinayət bir daha Ermənistan rəhbərliyinin bölgədə sülh təşəbbüslərinin qarşısını almaq məqsədlərini aşkarlayır. Tanınmış neftçi alim, texnika elmləri namizədi Baba Əhmədli hesab edir ki, ermənilər 13 yaşlı azərbaycanlı qızı öldürərək bu vəhşi əməli törətməklə düşünməsinlər ki, cəzasız qalacaqlar. Bu amansız hadisə ermənilərin ağlasığmaz qəddarlığını ortaya qoyur. Haqq, tarix onları mütləq cəzalandıracaq!

Baba müəllim daha sonra qəzəblə dedi:

- Tale, acı təəssüf ki, bizim xalqa ermənilər kimi kinli və məkrli qonşu bəxş edib. Yüz illərdir ki, xalqımız bu qonşuluqdan əziyyət çəkir, torpaqlarını və övladlarını itirir, hər cür məhrumiyyətlərə düçar olur, sitəmlər yaşayır. Nədənsə dünya sanki bunu görmür, eşitmir. Lakin mən əminəm ki, ermənilər qeyri-insani vəhşilikləri ilə bəşər tarixində vəhşilik və qara ləkə rəmzi kimi qalacaqlar.

Birinci Qarabağ savaşında, 1993-cü ilin 15 avqustunda Cəbrayılın Qaracallı kəndinin müdafiəsində qəhrəmancasına həlak olmuş 14 yaşlı məktəbli Samir Əliyevin atası, məcburi köçkün Qədir Əilyev də Tovuzda 13 yaşlı qızın öldürülməsi xəbərini eşidib erməni vəhşiliyinin heç bir sərhəd tanımadığını dedi və beynəlxaq təşkilatlardan, onun sözləri ilə desək, "erməni quduzluğu"na qarşı təsirli tədbirlər görülməsini tələb etdi.

Məsaim ABDULLAYEV

Xalq qəzeti.- 2011.- 17 iyul.- S. 5.