"Azərbaycan milli mətbəxinin əziz və ləziz Şəki xörəkləri"

Hacı Cabir Xəlifəzadəni cavan vaxtlarından tanıyıram. Olduqca mehriban, işgüzar, söhbətcil, poeziyanı, ədəbiyyatı sevən, ensiklopedik biliyə və möhkəm yaddaşa malik bir ziyalıdır. 75 illik ömrünü şərəflə yaşayıb. Xalqımıza, dövlətçiliyimizə sədaqətlə xidmət edib. Öz peşəsini ürəkdən sevib, Azərbaycan mətbəxinin sirlərini dərindən öyrənib, 50 illik əmək fəaliyyətində onu inkişaf etdirərək daha da zənginləşdirib, süfrə mədəniyyətinin xüsusiyyətlərini təbliğ edib. Onun hələ Sovet dövründə xarici ölkələrdə Azərbaycan mətbəxinin və süfrə mədəniyyətinin təbliği sahəsindəki xüsust xidmətləri "Xalqlar Dostluğu", "Qırmızı Əmək Bayrağı" ordenlərinə layiq görülmüşdür.

"Gənclərin ən yaxşı hami tərbiyəçisi" Ümumittifaq medalını və bir neçə fəxri diplomunu alan C.Xəlifəzadə əmək veteranı kimi pensiyaya çıxandan sonra həyatını bədii yaradıcılığa həsr etmişdir. Azərbaycan yazıçılar və jurnalistlər birliklərinin üzvü, "Qızıl qələm" mükafatı laureatı olan Cabir müəllim 12 elmi-kütləvi və bədii əsərin müəllifidir. Onun Azərbaycan kulinariyasına dair kitablarının sorağı dünyanın hər yerindən, o cümlədən Amerika Birləşmiş Ştatlarından gəlir.

İstedadlı qələm sahibləri bu yaxınlarda yeni kitabı - "Azərbaycan milli mətbəxinin əziz və ləziz Şəki xörəkləri" işıq üzü görmüşdür. Öz mətbəxi, süfrə mədəniyyəti və qonaqpərvərliyi ilə xüsusi seçilən Şəki haqqında kitabda son dərəcə maraqlı məlumatlar toplanmışdır. Şəki xörəklərinin hazırlanması texnologiyasının reseptlərini verən müəllif ilk dəfə olaraq həmin xörəklərin poeziya dili ilə bir növ deyişməsini, öyünməsini tərənnüm etmişdir. "Xörəklərin söhbəti" adlanan həmin şeirdə oxuyuruq:

Xörəkləri çağırırlar adıyla,

Qiymətini verirlər öz dadıyla.

***

Bütün xörəklər yığışıb mətbəxə,

Başladılar bir-birilə söhbətə.

İstədilər özlərini öyməyə,

Dadlarını söyləyərək deməyə.

Növbə ilə dayandılar seçməyə.

Azərbaycan Ağsaqqallar Şurasının üzvü Hacı Cabir Xəlifəzadə yeni əsərini geniş oxucu kütləsi üçün yazmışdır. Burada qədim Şəkinin mətbəxi ilə yanaşı, onun adət-ənənələri, tarixi yerləri və abidələri, ağsaqqallarının müdrik kəlamları, məşhur Şəki yumorundan nümunələr və başqa dəyərli məlumatlar verilmişdir. İnanırıq ki, dünya görmüş Hacı Cabirin nəfis şəkildə hazırlayıb rəngli şəkillərlə çap etdirdiyi bu kitab Şəkiyə gələn qonaqların, xarici turistlərin buranın milli mətbəxinə olan marağını ödəyəcək və səyyahlar üçün dəyərli yaddaş rolunu oynayacaqdır.

Telman ƏLİYEV

Xalq qəzeti.- 2011.- 17 iyul.- S. 6.