Fərhad BƏDƏLBƏYLİ: "Dünya şöhrətli musiqiçilər ölkəmizin sürətli inkişafı, gözəlliyi və insanların qonaqpərvərliyi ilə bağlı təəccüblərini gizlədə bilmirlər"

Bakı Musiqi Akademiyasının rektoru, professor Fərhad Bədəlbəyli müsahibəsində bildirmişdir ki, iyulun 23-dən avqustun 5-dək keçiriləcək Qəbələ III Beynəlxalq musiqi festivalı Azərbaycan mədəniyyətini dünyaya təqdim etmək üçün ən yaxşı fürsətdir. Qəbələ festivalı xarici qonaqlara Azərbaycan bəstəkarlarının əsərlərini təqdim etməklə yanaşı, yerli musiqisevərlərə dünyanın klassik sənət inciləri ilə yaxından tanış olmağa imkan yaradır. Burada əsas məqsəd maarifçilik, musiqimizin təbliğidir.

Ona görə də builki festivalın proqramını daha da zənginləşdirərək ora Azərbaycanla bağlı bir neçə konsert də əlavə edilmişdir. Konsertə gələn musiqisevərlər 14 gün ərzində Azərbaycan bəstəkarlarının simfonik əsərlərini, dünya musiqi incilərini dinləyəcəklər. Bizim məqsədimiz həm də xariciləri Azərbaycanın turizm potensialı ilə yaxından tanış etməkdir. Piano müsabiqəsinin münsiflər heyətinin tanınmış üzvləri Bakıya, Qəbələyə gələndə ölkəmizin gözəlliyi, qonaqpərvərliyi ilə bağlı təəccüblərini gizlədə bilmədilər. Biz süfrə arxasında ümumi söhbətlər apararkən onlara ölkəmizin həqiqətləri, Dağlıq Qarabağ problemi haqqında məlumatlar veririk.

Fərhad Bədəlbəylinin sözlərinə görə buradakı dünya şöhrətli musiqiçilər Azərbaycana gəlməzdən əvvəl ölkəmizdə müharibə olması barədə düşündüklərini bildirmişlər. Amma sabitlik hökm sürən ölkəmizin sürətli inkişafını görən qonaqlar sanki cənnətə düşdüklərini və bura ilə müqayisədə yaşadıqları ölkələrdə vəziyyətin pis olduğunu etiraf etmişlər. F.Bədəlbəyli: "Mən fəxr edirəm ki, ölkəmdə belə möhtəşəm müsabiqə və festival keçirilir. İki il öncə keçirilmiş I beynəlxalq piano müsabiqəsinin qalibi bütün dünyada tanındı və bu gün müxtəlif ölkələrdə uğurlu konsertlər verir. Mən deyərdim ki, son illər Azərbaycanda mədəniyyətin inkişafına, çiçəklənməsinə dövlətimizin başçısı İlham Əliyev və Heydər Əliyev Fondunun prezidenti Mehriban xanım Əliyeva tərəfindən çox böyük dəstək verilir, ölkədə musiqi ilə bağlı beynəlxalq tədbirlər keçirilir. Artıq Qəbələ musiqi şəhərinə çevrilmişdir".

Xalq qəzeti.- 2011.- 19 iyul.- S. 3.