Yasamal rayonunda sosial-iqtisadi inkişaf uğurla davam edir

İyulun 12-də Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2011-ci ilin birinci yarısının sosial-iqtisadi inkişafının yekunlarına həsr olunmuş geniş iclasında ötən altı ay ərzində ölkə qarşısında duran bütün iqtisadi və sosial məsələlərin uğurla həll olunması diqqətə çatdırılmışdır. Qeyd olunmuşdur ki, ölkəmizin ümumi inkişafı ötən altı ayda çox uğurlu və dinamik olmuşdur. İlin birinci yarısında büdcəyə düzəlişlər edilmişdir. Bunun nəticəsində ilk dəfə olaraq Azərbaycan büdcəsi 20 milyard dollara çatmışdır. Ölkəmizin strateji valyuta ehtiyatları ilin əvvəlindən 9 milyard dollar artaraq 38 milyard dollar səviyyəsindədir. Həmçinin diqqətə çatdırılmışdır ki, Azərbaycanda qeyri-neft sektorunda olan artım 7,2 faiz təşkil etmişdir. Bu, çox sevindirici haldır. Bu onu göstərir ki, Azərbaycan iqtisadiyyatının enerji amilindən asılılığı azalır.

Kənd təsərrüfatında artım 6,2 faiz təşkil etmişdir. Əhalinin pul gəlirləri 17 faiz artmışdır. İnflyasiya isə cəmi 8,6 faiz artmışdır. Sosial məsələlərin həlli də diqqət mərkəzində olmuşdur. Bəzi kateqoriya üzrə büdcədən maliyyələşən təşkilatlarda çalışan insanların əmək haqları qaldırılmışdır. Ən böyük nailiyyət pensiyaların artımı ilə bağlıdır. Qəbul edilmiş qərarlar nəticəsində iyulun 1-dən 2006-cı ilə qədər pensiyaya çıxmış pensiyaçıların orta aylıq pensiyası təxminən 40 faiz artmışdır. Bu çox böyük artımdır. Bu, Azərbaycanda 900 minə qədər pensiyaçını əhatə edir. Bu bir daha onu göstərir ki, Azərbaycan hökumətinin siyasəti sosial yönümlüdür.

2011-ci ilin birinci yarımilliyinin sosial-iqtisadi yekunları Yasamal rayonu üçün də uğurlu olmuşdur. Rayon icra hakimiyyətində 2011-ci ilin birinci yarımilliyinin sosial-iqtisadi inkişafının yekunlarına həsr olunmuş iclasında bu barədə ətraflı söhbət açıldı.

Rayon icra hakimiyyətinin başçısı İbrahim Mehdiyev yığıncaq iştirakçılarının diqqətinə çatdırdı ki, 2011-ci ilin altı ayı ərzində rayonda sənaye məhsulunun həcmi 87276,6 min manat, nəqliyyat sektorunda xidmətlərin həcmi 880623,2 min manat olmuşdur ki, bu da keçən ilin eyni dövrü ilə müqayisədə müvafiq olaraq 102,8 faiz və 128,1 faiz təşkil etmişdir. Rabitə xidmətlərinin həcmi 57950,7 min manat, əsas kapitala yönəldilən investisiyalar 84739,2 min manat, ümumi investisiyadan tikinti-quraşdırma işləri 62749,6 min manat olmuşdur ki, bu da keçən ilin eyni dövrü ilə müqayisədə müvafiq olaraq 117,8, 47,9 və 40,6 faiz olmuşdur.

Ötən ilin müvafiq dövrü ilə müqayisədə rayonun iqtisadi sosial sahələrində işləyənlərin orta aylıq əmək haqqı 9,4 faiz artaraq 440,7 manat olmuşdur.

İ.Mehdiyev bildirdi ki, hesabat dövründə rayon ərazisində abadlıq işləri böyük vüsətlə davam etdirilmişdir. İlin əvvəlindən 4 böyük yaşayış məhəlləsində - Yeni Yasamal-1, ev 5 və 6-nın, Yeni Yasamal-1, ev 7 və 8-in, Talıblı küçəsi 3/8 və Xiyabani küçəsi 6 və 8-in həyətlərində nümunəvi məhəllələr yaradılmışdır. Qeyd olunan bu yaşayış məhəllələrinə asfalt örtüyü salınmış, mini futbol-basketbol meydançası yaradılmış, binaların fasad hissələri rənglənmiş, binaların giriş qapıları dəyişdirilmiş, oturacaq, uşaq-əyləncə, idman qurğusu quraşdırılmışdır. Əksər küçə və məhəllələrə asfalt örtüyü salınmış, əsaslı təmir işləri aparılmışdır.

Hesabat dövründə tikintisinə 2009-cu ildə başlanılmış Xüsusi Dövlət Mühafizə Xidmətinin Müalicə-Diaqnostika Mərkəzinin açılışı olmuş və açılışda möhtərəm Prezidentimiz İlham Əliyev və xanımı Mehriban Əliyeva iştirak etmişdir.

Cari ilin altı ayı ərzində mənzil fondunun qorunub-saxlanılması məqsədilə xeyli iş görülmüşdür. Belə ki, 35 yaşayış binasında 4200 kvadratmetr müxtəlif örtüklü dam örtüyü təmir edilmişdir.

İ.Mehdiyev qanunsuz tikililərə qarşı mübarizə ilə əlaqədar görülən işlər barəsində də məlumat verdi. O dedi ki, bu sahədə işlər təxirə salınmadan davam etdirilmiş, ötən altı ay ərzində 16 ədəd müxtəlif təyinatlı qeyri-qanuni tikili, 4 ünvanda zəbt olunmuş torpaq sahəsi ətrafına çəkilmiş hasarlar sökülmüşdür.

Rayon sakinləri üçün hər həftənin şənbə və bazar günləri kənd təsərrüfatı mallarının satışı yarmarkaları təşkil edilmişdir. Kənd Təsərrüfatı Nazirliyi tərəfindən rayonumuza təhkim olunmuş 5 kənd rayonundan hər həftə yarmarkaya müxtəlif çeşiddə 60-70 ton kənd təsərrüfatı məhsulları çıxarılır.

Qeyd olundu ki, hesabat dövründə rayonun mühəndis-texniki xidmət sahələrinin işi, əhalinin və iqtisadiyyatın elektrik enerjisi, təbii qaz və su ilə təchizatında yaranan problemlərin qısa müddətdə aradan qaldırılması icra hakimiyyətinin daim diqqət mərkəzində olmuşdur. Bu sahələrdə də xeyli iş görülmüşdür. Belə ki, rayonun elektrik şəbəkəsində hesabat dövründə 1 ədəd kompleks transformator məntəqəsi, 6 ədəd iri tutumlu, 30 ədəd fərdi cərəyan transformatoru quraşdırılmış, ümumilikdə 11980 metr kabel dəyişdirilərək yenisi ilə əvəz olunmuşdur. Sayğaclaşma ilə əlaqədar isə yaşayış binalarında 30500 metr elektrik xətti, 24 ədəd paylayıcı şit, 374 ədəd panel, 7 ədəd polad dirək, 21 ədəd ayırıcı quraşdırılmışdır.

Eləcə də rayonun qaz təchizatını yaxşılaşdırmaq məqsədilə "Qanlı Göl"ün cənub qərbində 111 ədəd, I Alatava yaşayış ərazisində 452 ədəd, II Alatava ərazisində 376 ədəd, xarici dairəvi yolun alt hissəsində, "Qanlı Göl"ün şərq sahilində 186 ədəd, cəmi 1132 ədəd qaz sayğacı quraşdırılmış, Z.Xəlilov 568-ci məhəllədə qaz tənzimləyici şkaf yeni müasir tipli şkafla əvəz edilmişdir. 2-ci Alatava yaşayış massivində isə 965 metr qaz xətti çəkilərək qaz sayğacları həyətlərdən küçəyə çıxarılmış və bu işlər davam etdirilir.

Rayon əhalisinin və digər istehlakçıların suya olan tələbatının ödənilməsi prioritet vəzifələrdən olmuşdur. İ.Mehdiyev qeyd etdi ki, bu məqsədlə su-kanal sahəsi tərəfindən 600 metr müxtəlif diametrli su borusu dəyişdirilmiş, 60 nasos stansiyasında nasos və mühərriklər təmir edilmişdir.

"Oğuz-Qəbələ-Bakı" su kəmərinin tikilib istifadəyə verilməsi ilə əlaqədar Bakı şəhərinin su təchizatı xeyli yaxşılaşdırılmışdır. Rayon ərazisində "Azərsu" ASC tərəfindən 3630 metr müxtəlif diametrli su xətti çəkilmişdir. Bir məsələni nəzərə almaq lazımdır ki, Yasamal rayonu adıçəkilən kəmərlə nəql olunan suyu qəbul edir. Sonradan onu şəhərin bütün rayonlarına ötürür. Lakin rayonun məhəllədaxili su şəbəkəsinin bu həcmdə suyu qəbul etməsinə imkanı olmadığından rayonun bir çox yerlərində su kəmərlərində tez-tez qəzalar baş verir. Bəzən bu qəzaların aradan qaldırılması zamanı "Azərsu" ASC ilə "Azəryolservis" ASC arasında qəza-bərpa işlərinin aradan qaldırılması sahəsində anlaşılmazlıqlar baş verir ki, bu da qəzaların operativ aradan qaldırılmasına maneçiliklər törədir. Hazırda "Azərsu" ASC ilə "Azəryolservis" ASC arasında aparılmış danışıqlar nəticəsində artıq bu problem öz həllini tapmaqdadır.

Yığıncaq iştirakçılarının diqqətinə çatdırıldı ki, Azərbaycan Respublikasının Prezidenti möhtərəm İlham Əliyev Sumqayıt şəhərində olarkən burada yaşayış məhəllələrini gəzərək sakinlərlə görüşmüşdür. Görüş zamanı şəhərin məhəllələrində yaradılmış "İctimai xeyir-şər" evləri haqqında məlumat alan ölkə başçısı bunun əhali üçün önəmli olduğunu bildirərək, başqa yerlərdə də təşkil olunmasının vacibliyini vurğulamışdır. Hazırda Yasamal rayonu ərazisində 14 ünvanda "İctimai xeyir-şər" evləri mövcuddur.

Ölkə başçısının tapşırığının icrası məqsədilə rayon icra hakimiyyəti daha 8 ünvanda xeyir-şər evinin tikilməsi üçün təkliflər hazırlamışdır. Bu xeyir-şər evləri rayon icra hakimiyyəti, Yasamal bələdiyyəsi, Xüsusi Dövlət Mühafizə Xidməti, Bakı Dövlət Universiteti xeyriyyəçilər və məhəllə sakinləri tərəfindən inşa ediləcəkdir ki, bunların bir hissəsi cari ilin axırında, digər hissəsi isə 2012-ci ilin mart-aprel aylarında tikilib başa çatdırılaraq sakinlərin istifadəsinə veriləcəkdir.

Başçı bildirdi ki, cari ilin iyul ayının 2-də ölkə başçısı cənab İlham Əliyev rayon ərazisindəki "Keppinski Badamdar" otel kompleksinin açılışında iştirak etmişdir. Hotel kompleksi 2,5 hektar ərazini əhatə etməklə, ümumi sahəsi 84 min kvadratmetrdir. Mükəmməl infrastruktura malik kompleksin avadanlıqla təchizatı ən müasir standartlara cavab verir.

2011-ci ilin altı ayı ərzində yoxsulluğun azaldılmasına xidmət edən ünvanlı dövlət sosial yardımı proqramının tətbiqi nəticəsində Yasamal rayonunda 1602 ailəyə, ümumilikdə 5801 nəfərə ünvanlı sosial yardım təyin edilmişdir.

Hesabat dövründə Heydər Əliyevin tükənməz irsinin öyrənilməsi məqsədilə Heydər Əliyev muzeyində silsilə tədbirlər həyata keçirilmiş, 6500 nəfərdən çox tələbə və şagird muzeylə tanış olmuşlar. Muzey rayonun ideoloji mərkəzi kimi fəaliyyət göstərməklə bir sıra tədbirlərin keçirilməsinin məkanına çevrilmişdir. Ümummilli liderimizin fəaliyyəti ilə bağlı çoxlu foto, video və digər materiallar toplanmışdır.

Muzeyə Maliyyə Nazirliyi tərəfindən 18 ştat vahidi ayrılmış, direktor təyin edilmiş, sərbəst fəaliyyət göstərməsi üçün maliyyə vəsaiti ayrılmışdır. Muzey bundan sonra daha geniş və səmərəli fəaliyyət göstərəcəkdir.

İ.Mehdiyev vurğuladı ki, rayon icra hakimiyyətinin fəaliyyətinin əsas istiqamətlərindən biri də vətəndaşların müraciətlərinə baxılması, onların qəbul edilməsi və hər bir müraciətin ətraflı araşdırılması və lazımi tədbirlərin görülməsidir. 2011-ci ilin birinci yarım ilində rayon icra hakimiyyəti başçısının aparatına vətəndaşlardan 1846 müraciət daxil olmuşdur. 2010-cu ilin müvafiq dövründə müraciətlərin sayı 1281 olmuşdur.

Hesabat dövründə vətəndaşlardan daxil olmuş 1846 müraciətdən 1760-na baxılmış, 86-nın isə baxılma müddəti vardır. Müraciətlər əsasən mənzil, fərdi ev tikintisi üçün, torpaq sahəsinin ayrılması, qəyyumluq və himayədarlıq məsələləri, maddi yardım edilməsi, tikinti məsələləri və sair ilə bağlıdır.

Ötən illərdə olduğu kimi, icra hakimiyyəti başçısı aparatında vətəndaşların fərdi qəbulu təsdiq edilmiş cədvələ müvafiq qaydada aparılmışdır. 2011-ci ilin birinci yarısında icra hakimiyyəti başçısının qəbulunda 257 nəfər iştirak etmişdir. (2010-cu ildə bu rəqəm 160 nəfər) 81 nəfərə qəbulda izahat verilmiş, 162 nəfərin müraciətinə baxılmış, 14 müraciətin isə baxılma müddəti vardır.

Cari ilin birinci yarımilliyində rayon icra hakimiyyəti başçısının sakinlərlə 8 səyyar görüş-qəbulu keçirilmişdir ki, onlarda 1200 nəfərdən çox rayon sakini iştirak etmişdir. Bu görüş-qəbullarda 84 nəfər rayon sakini onları narahat edən 94 məsələ ilə əlaqədar icra hakimiyyəti başçısına müraciət etmişdir. Sakinlər tərəfindən qaldırılmış 84 məsələ öz müsbət həllini tapmışdır. Sonuncu qəbulda qaldırılmış 10 məsələnin isə icra müddəti daha yaxşı səmərə verdiyindən gələcəkdə də davam etdiriləcəkdir. Dövlət qulluğunda çalışan hər bir məmur vətəndaşların müraciətlərinə diqqətlə yanaşmalı və onları operativ qaydada həll etməyə çalışmalıdır.

Məruzə ətrafında çıxış edənlər Yasamal rayonunda birinci yarımilliyin sosial-iqtisadi inkişafının yekunlarını müsbət dəyərləndirdilər.

Əliqismət BƏDƏLOV

Xalq qəzeti.- 2011.- 21 iyul.- S. 4.