Zəngilan rayonunda yarım ilin yekunları təhlil olunmuşdur

Son illər respublikamızın sosial-iqtisadi inkişaf sahəsində mühüm uğurlar əldə edilmişdir. Ölkə iqtisadiyyatının sürətlə inkişafı ilə yanaşı, əhalinin rifah halı daha da yaxşılaşmış, dövlət tərəfindən sosial öhdəliklərin tam yerinə yetirilməsi, sahibkarlıq subyektlərinin sayının artması, infrastrukturun təkmilləşdirilməsi, yeni iş yerlərinin yaradılması sayəsində işsizlik minimuma endirilmişdir. Bütün bunlar barədə Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin cari ilin altı ayının sosial-iqtisadi inkişafının yekunlarına həsr olunmuş iclasında ətraflı danışılmış, qazanılmış uğurlar yüksək qiymətləndirilmişdir. Həmin iclasda qarşıda duran vəzifələrə də toxunulmuş, onların həlli yolları müəyyənləşdirilmişdir.

Zəngilan rayonunda da Nazirlər Kabinetinin məlum iclasında irəli sürülmüş vəzifələrlə bağlı rayonun sosial-iqtisadi inkişafının cari ilin ilk yarısının yekunlarına həsr edilmiş yığıncaq keçirilmişdir. Rayonun idarə, müəssisə və təşkilatlarının, hüquq-mühafizə orqanlarının, eləcə də ictimaiyyət nümayəndələrinin iştirakı ilə keçirilən yığıncaqda hesabat məruzəsi ilə çıxış edən Zəngilan Rayon İcra Hakimiyyətinin başçısı Ramiz Həsənov əvvəlcə bu ilin altı ayında ölkəmizin sosial-iqtisadi inkişafı sahəsində əldə olunmuş uğurlardan bəhs etmişdir. Natiq iyul ayının 12-də Nazirlər Kabinetinin cari ilin ilk yarımilliyinin sosial-iqtisadi inkişafının yekunlarına həsr olunmuş iclasında dövlət başçısı İlham Əliyevin proqram xarakterli nitqinin bəzi məqamlarına toxunmuşdur. Başçı həmçinin göstərmişdir ki, sözügedən dövrdə ölkə üzrə yüksək nailiyyətlərin əldə olunmasında Zəngilan rayonu da yaxından iştirak etmişdir.

R.Həsənov bildirmişdir ki, 2011-ci ilin birinci yarımilində ümumi məhsul buraxılışının həcmi ötən ilin eyni dövrü ilə müqayisədə 1,7 faiz artaraq 224 min manat təşkil etmiş, o cümlədən sənayedə 7,3 faiz, kənd təsərrüfatında 25,2 faiz artım olmuşdur. Mal-qaranın və qoyun-keçinin baş sayında müvafiq olaraq 3,5 faiz və 3,3 faiz ,ev quşlarının baş sayında 1,8 faiz, ət istehsalında 9,4 faiz, süd istehsalında 7,1 faiz, yumurta istehsalında 7,3 faiz, yun istehsalında 6,4 faiz artım qeydə alınmışdır.

Rayonun "Oxçuçay" kənd təsərrüfatı müəssisəsi, Abşeron rayonu ərazisində fəaliyyət göstərən fermer təsərrüfatı və yeni qəsəbədə məskunlaşan məcburi köçkünlər tərəfindən əkin aparılmış 227 hektar sahədən 482 ton, başqa sözlə, ötən ilin eyni dövrü ilə müqayisədə 210,2 ton artıq taxıl istehsal edilmişdir.

Rayon büdcəsinin yerli gəlirləri 386,8 min manata qarşı 466,2 min manat və ya 120,5 faiz, büdcənin xərc hissəsi 90,2 faiz icra edilmiş, təhsil xərclərinin icrası 93,8 faiz, səhiyyə xərclərinin icrası 71 faiz, sosial-təminat xərclərinin icrası 90,2 faiz, mədəniyyət xərclərinin icrası 67,3 faiz, kommunal təsərrüfat xərclərinin icrası 88,2 faiz təşkil etmişdir.

"Regionların sosial-iqtisadi inkişafı (2009-2013-cü illər) Dövlət Proqramı"nın icrası istiqamətində də müəyyən işlər aparılmış, sahibkarlığın dəstəklənməsi ilə bağlı cari ilin 6 ayında ötən ilin eyni dövrü ilə müqayisədə 14 iş yeri artıq olmaqla 49 daimi iş yeri açılmışdır. Vəziyyətin təhlili göstərir ki, əhalinin məşğulluğunun artırılması ilə əlaqədar rayonda sahibkarlığın inkişafına ciddi diqqət yetirilməlidir.

Natiq göstərmişdir ki, rayonda təhsil müəssisələrinin yeni dərs ilinə hazırlanması da diqqət mərkəzində saxlanılmışdır. Belə ki, ayrılmış büdcə vəsaiti hesabına 18 nömrəli tam orta məktəbdə təmir işləri aparılmış, 7 nömrəli tam orta məktəbin dam örtüyü dəyişdirilmiş və müəllimlər otağı təmir olunmuşdur. 29 və 33 nömrəli tam orta məktəblər pedaqoji kollektivlərin daxili imkanları hesabına təmir edilmişdir. Hazırda isə 23 nömrəli tam orta məktəbdə Məcburi Köçkünlərin Sosial İnkişafı Fondunun xətti ilə aparılan təmir işləri artıq başa çatmaq üzrədir.

Başçı rayonda yerli və yuxarı orqanlara müraciətlərin artmasına şərait yaradan amillərdən də danışmışdır. Vurğulamışdır ki, həmin səbəblərdən biri də xidmət sahələrində aparılan işin vəziyyətindən asılıdır. Vətəndaşların ən çox müraciət etdiyi Əhalinin Sosial Müdafiəsi Mərkəzində, DSMF rayon şöbəsində, rayon qeydiyyat şöbəsində və digər xidmət sahələrində yarım il ərzində bəzi işlər görülmüş, qanuni tələblərin ödənilməsinə diqqət yetirilmişdir. Lakin bütün bunlarla yanaşı, bu gün rayon icra hakimiyyətinə əhalinin çoxsaylı müraciətlərindən aydın olur ki, xidmət sahələrinin səlahiyyətlərinə aid həlli mümkün bəzi məsələlər həmin sahələrə rəhbərlik edən şəxslər tərəfindən vaxtında həll edilmir. Bu da əsassız müraciətlərin və neqativ məsələlərin çoxalmasına şərait yaradır. Korrupsiya və rüşvətxorluğa qarşı mübarizə tədbirlərinin qətiyyətlə aparıldığı rayonda belə nöqsanlar yolverilməzdir və bu nöqsanların aradan qaldırılması, xidmət sahələrinin işinin yaxşılaşdırılması üçün tədbirlər görülməlidir.

İclasda bildirilmişdir ki, cari ilin 6 ayı ərzində rayon icra hakimiyyətinə vətəndaşlardan 390 ərizə daxil olmuşdur. Onların müraciətlərinə həssaslıqla yanaşılmış, torpaq və mənzil məsələləri istisna olmaqla, digər müraciətlərin 80 faizi müsbət həll edilmişdir. Göstərilmişdir ki, işin yenidən qurulması sayəsində əvvəlki dövrdən fərqli olaraq son aylar daxil olan müraciət və ərizələr diqqətlə araşdırılır, onları doğuran səbəblər təhlil edilir. Əhalinin həssas təbəqəsi olan şəhid ailələrinin, Qarabağ əlillərinin, tənhaların, təqaüdçülərin müraciətlərinə xüsusilə diqqətlə yanaşılır, onların qaldırdıqları hər hansı bir məsələnin həlli üçün lazımi tədbirlər görülür. Bu məsələlərin aktuallığını artırmaq üçün cari ilin 6 ayında rayon icra hakimiyyəti başçısı yanında şurada müraciətlərə baxılması vəziyyəti müzakirə edilmişdir.

Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması məsələlərini tənzimləyən müvafiq Dövlət Proqramında və həmin Proqrama əlavələrdə nəzərdə tutulmuş sahibkarlıq fəaliyyətinin genişləndirilməsi istiqamətində aparılan işlərin nəticəsi olaraq Sabirabad rayonu ərazisindəki yeni qəsəbədə məskunlaşan 150 ailəyə verilmiş 112 hektar əkin sahəsindən 96,5 ton buğda, 51 ton arpa istehsal edilmiş, 250 ton yonca biçilmişdir ki, bu da məşğulluğun artırılması və yoxsulluğun azaldılması istiqamətində aparılan işin məntiqi nəticəsidir.

Cari ilin birinci yarımilində səyyar görüş-qəbulların keçirilməsinə diqqət artırılmış, müxtəlif kütləvi məskunlaşma yerlərində 23 səyyar görüş təşkil edilmişdir. Səyyar qəbullarda 1280 nəfər məcburi köçkün iştirak etmişdir. Ötən ilin müvafiq dövründən fərqli olaraq, 2011-ci ilin 6 ayında səyyar görüşlərdə iştirak edənlərin sayı 340 nəfər artmışdır. Məcburi köçkünlər tərəfindən qaldırılan məsələlərdən 13-ü mərkəzi, 12-si yerli icra orqanlarına aid olmuş, 10-u haqqında rayon təşkilatlarına tapşırıqlar verilmiş, 39 məsələyə yerində aydınlıq gətirilmişdir. Aidiyyatı üzrə qaldırılmış məsələlərdən 4-ü mərkəzi icra orqanları, 9-u icra orqanları, 8-i rayon təşkilatları tərəfindən icra edilmişdir.

Məruzəçi xatırlatmışdır ki, son aylarda keçirilən səyyar qəbulun coğrafiyası genişlənmişdir. Görüşlərdə məcburi köçkünlərin fəallığı şübhəsiz ki, onların müraciətlərinə həssaslıqla yanaşılması, qaldırılan məsələlərin əsasən müsbət həll edilməsi və rayonda yaranan sağlam mühitlə əlaqədardır.

Səyyar qəbullarda səslənən təkliflər əsasında yaşayış məntəqələri üzrə 6 aylıq və 1 illik tədbirlər planı işlənib hazırlanmışdır. Həmin plana əsasən Dövlət Neft Akademiyasının tələbə şəhərciyində yas mərasimlərinin keçirildiyi yerin dam örtüyü və daxili cari təmir edilmiş, Binəqədi rayonu, Azadlıq prospekti 161 ünvanında məskunlaşan məcburi köçkünlərin xahişi ilə onların yas mərasimlərinin keçirildiyi yerə kondisioner qoyulmuş, həmin əraziyə ikinci su xətti çəkilmiş, Sabunçu rayonu Bakıxanov qəsəbəsində 110 ailənin məskunlaşdığı yataqxanaya xeyir-şərdə istifadə üçün çadır dəsti verilmiş, maşınqayırma zavodunun yataqxanasında məskunlaşmış köçkünlər üçün su nasosu quraşdırılmış, Sumqayıt şəhərində köçkün ailələrin məskunlaşdıqları 2 evin dam örtüyü təmir edilmişdir. Sabunçu rayonu Zabrat I qəsəbəsində 39 nömrəli MİS-in 2 nömrəli yataqxanasında, Bakı maşınqayırma zavodunun 2 saylı yataqxanasında məcburi köçkünlər üçün xeyir-şər yerinin təmiri və beş yerlik təndirin tikintisi, habelə Pirşağı qəsəbəsində fəaliyyət göstərən rayonun 32 saylı tam orta məktəbinin, Tibb Universitetinin 4 saylı yataqxanasının təmir olunması üçün müvafiq tədbirlər görülür.

Uzun illər Biləcəri qəsəbəsindəki xəstəxananın zirzəmisində ağır şəraitdə yaşayan məcburi köçkün ailələri münasib şərait olan "Xəzri" mehmanxanasına köçürülmüş, I qrup əlil İslam Əsədova əlil arabasının verilməsi təmin edilmiş, 218 şəhid ailəsinə, 142 qarabağ əlilinə, 81 tənha və kimsəsiz sakinə, ümumilikdə 692 məcburi köçkün ailəsinə son 2 ayda ərzaq və müxtəlif adda humanitar yardım göstərilmişdir.

Göründüyü kimi, son aylar keçirilən səyyar qəbullar mütəşəkkilliyi və icra intizami ilə diqqəti cəlb etmiş, insan amili, əhalini düşündürən və narahat edən məsələlərin həlli, verilən vədin əməli işə söykənməsi dövrü kimi yadda qalmışdır.

Məruzə ətrafında müzakirələrdə çıxış edənlər ilin birinci yarısında rayonun sosial-iqtisadi sahələrində əldə olunmuş nailiyyətlərdən söz açdılar, rəhbərlik etdikləri təşkilatlar üzrə görülmüş işlərdən danışdılar.

Sonda iclas iştirakçıları adından Azərbaycan Respublikasının Prezidenti İlham Əliyevə müraciət qəbul edilmişdir.

Vaqif BAYRAMOV

Xalq qəzeti.- 2011.- 21 iyul.- S. 6.