Füzuli: cəbhəyanı bölgənin problemləri sürətlə aradan qaldırılır

Füzuli rayonunda keçirilən ümumrayon müşavirəsində 2011-ci ilin birinci yarısında bölgənin sosial-iqtisadi inkişafı, həllini gözləyən məsələlər diqqət mərkəzində olmuşdur. Hesabat məruzəsində və çıxışlarda uğurlara nəzər salınmış, nöqsanlar kəskin tənqid olunmuşdur.

Füzuli Rayon İcra Hakimiyyətinin başçısı Alı Alıyev Nazirlər Kabinetinin iclasında Prezident İlham Əliyevin nitqindən irəli gələn məsələlər barədə ətraflı məlumat verərək, rayonun yarımillik sosial-iqtisadi durumunu təhlil etmişdir. Natiq bildirmişdir ki, 2009-2013-cü illərdə regionların sosial-iqtisadi inkişafı Dövlət Proqramında rayonumuzla bağlı nəzərdə tutulmuş tədbirlərin icrası müvəffəqiyyətlə davam etdirilir. İndiyədək rayonun 6 yaşayış məntəqəsinə - Horadiz şəhər, Arayatılı, Babı, Mollaməhərrəmli, Şükürbəyli, Kərimbəyli, Böyük Bəhmənli kəndlərinə təbii qaz çəkilmişdir. Bəzi kəndlərdə bu iş davam etdirilir. Əhmədalılar, Qazaxlar, Mirzənağılı kəndlərinə, Zobucuq qəsəbələrinə qaz çəkilişi davam etdiriləcəkdir. Bu işlərin nəticəsində rayonda 100 nəfərə yaxın yeni iş yeri açılmışdır.

Horadiz Aqroservisi üçün filialın tikintisinə başlanmışdır. İlin sonunadək başa çatması nəzərdə tutulan həmin filialda isə 80-100 nəfər işlə təmin olunacaqdır. Babı kəndindəki XIII əsr Şeyx Babı və Əhmədalılar kəndindəki Arqalı türbələrində böyük arxeoloji qazıntı və bərpa işlərinə bu yaxınlarda başlanacaqdır. Məlum olmuşdur ki, Babı türbəsinin altında qədim şəhər olub. Həmin türbələrin bərpası başa çatdıqdan sonra rayonumuz ölkənin turizm ünvanlarından birinə çevriləcəkdir.

Bərpa və arxeoloji işlərdə də xeyli adam işlə təmin olunacaqdır.

İlin sonunadək Yuxarı Qarabağ kanalının Bala Bəhmənli kəndi ərazisindən keçən hissəsində 25 meqavat gücündə su elektrik stansiyası istifadəyə veriləcəkdir. Bu o deməkdir ki, rayonumuzun elektrik enerjisi ilə bağlı problemlərinə son qoyulacaqdır. Dövlət Proqramına uyğun olaraq, Üçbulaq kənd məktəbi və musiqi təmayüllü gimnaziyanın hər biri üçün 3 sinif otağı, 59 nömrəli orta məktəb üçün yeni bina, Mollaməhərrəmli kəndində orta məktəb binası tikiləcəkdir. Bundan başqa, Horadiz şəhərində 100 çarpayılıq çoxprofilli xəstəxana, Yuxarı Alıxanlı, Mirzənağılı, Qarabulaq kəndlərində həkim məntəqələri yaradılır. Horadiz şəhər mədəniyyət evinin bərpası aparılır və burada yüksək zövqlü, müasir tələblərə cavab verən mədəniyyət müəssisəsi yaradılır.

Başçı daha sonra qeyd etdi ki, ümumiyyətlə, Dövlət Proqramında nəzərdə tutulan və həmçinin yerli imkanlar hesabına ərazidə böyük tədbirlər həyata keçiriləcəkdir. Birinci Mahmudlu kəndi ərazisində 5 min ton kənd təsərrüfatı məhsulları saxlayacaq soyuducu anbar binasının tikintisi aparılır. Horadiz şəhərində 180 yerlik orta məktəb binasının bünövrəsi qoyulub. Burada 2 əlavə uşaq bağçası tikiləcəkdir. 2 hektar ərazidə yerləşəcək avtovağzal tikilməsi üçün layihə-smeta sənədləri hazırlanmışdır. Kərimbəyli kəndində "Ailəvi istirahət mərkəzi"nin tikintisi oktyabr ayının sonlarına başa çatacaqdır. Bu obyekt gözəl istirahət mərkəzi olacaqdır.

Qarabağ kəndində uzun illər heyvandarlıq kompleksi kimi istifadə olunan, işğal zamanı yararsız vəziyyətə salınan ərazidə böyük broyler fabrikinin inşası nəzərdə tutulmuşdur. Bu fabrik təkcə rayonumuzu deyil, respublikamızı quş əti ilə təmin edəcəkdir.

Bu il Bala Bəhmənli-Alıxanlı, Bala Bəhmənli-Araz, Dilağarda-Araz, Zərgar kəndlərini birləşdirən yolların əsaslı təmiri nəzərdə tutulmuşdur. Bu yaxınlarda Prezident İlham Əliyevin sərəncamı ilə həmin yolların əsaslı bərpa olunması üçün vəsait ayrılmışdır. Yaxın günlərdə bu işə başlanacaqdır. Ölkə rəhbərliyi rayonda yaranmış işgüzarlığı, yüksək əhval-ruhiyyəni, düzgün müəyyənləşdirilmiş dəst-xətti müdafiə edərək ərazidə bir sıra iri layihələrin həyata keçirilməsini də nəzərdə tutmuşdur. Hazırda bu istiqamətdə tədbirlər həyata keçirilir.

Rayon mərkəzi rolunu oynayan Horadiz şəhəri son aylar həyata keçirilən quruculuq və abadlıq işləri nəticəsində gözlərimiz qarşısında simasını dəyişir, gözəlləşir, təzələnir. Son aylar rayonun yaşayış məntəqələrində 11 min ədəd müxtəlif növ ağaclar - çinar, şam, İtaliya leandrası və neçə-neçə aztapılan ağaclar əkilmişdir. Bunların 5 min ədəddən çoxu Horadiz şəhərində əkilmişdir.

Heydər Əliyev prospekti yenidən tikilir, şəhərin mərkəzi, ayrı-ayrı küçələri görkəmini dəyişir, istirahət guşələri yaradılır. Həyata keçirilən hər bir tədbir xoş rifaha, insan amilinə xidmət göstərəcəkdir. Şəhərdə analoqu olmayan Heydər Əliyev parkı salınır, burada ulu öndərin adını daşıyacaq mərkəz tikiləcək, böyük rəhbərin abidəsi ucaldılacaqdır. Horadizdə təzə ticarət mərkəzi də istifadəyə verilmişdir. Burada satıcı və alıcılara ən müasir tələblər səviyyəsində xidmət şəraiti yaradılmışdır.

Rayonun iqtisadiyyatını aqrar sahə təşkil edir və təbii ki, kənd təsərrüfatının inkişaf etdirilməsi qarşımızda dayanan əsas vəzifədir.

Hazırda taxıl biçini gedir. 30 min hektarın məhsulu toplanır. Hər hektardan orta hesabla 20 sentner məhsul götürülür. Bu məhsulu təbiətin gücü ilə əldə edirik. Rayonda güclü kənd təsərrüfatı mütəxəssisləri vardır. Onların fikrini öyrənmək, işdə tətbiq etmək, iqtisadiyyatı yüksəltmək üçün yollar aramaq, gənc, güclü kadrların ağıllı fikirlərindən istifadə etmək, təbii ki, işlərimizə səmərə verə bilər.

İqtisadiyyatın bütün sahələri - taxılçılıq, heyvandarlıq, pambıqçılıq, üzümçülük, şəkər çuğunduru, yem bitkiləri, bostan-tərəvəz məhsulları və başqa sahələr dinamik inkişaf etdirilməli, məhsul bolluğu yaradılmalıdır.

Məruzəçi daha sonra bildirdi ki, rayon büdcəsinin böyük hissəsi mədəniyyət, səhiyyə və təhsil müəssisələrinin payına düşür. Son vaxtlar əhaliyə göstərilən səhiyyə xidməti, gənc nəslin təlim-tərbiyəsinin əsası olan təhsillə bağlı müəyyən tədbirlər həyata keçirilmişdir. Səhiyyə və təhsil müəssisələrinin rəhbərliyində kadr dəyişiklikləri olmuşdur. Füzulinin həmişə güclü tibb potensialı olmuşdur, yenə də var və səhiyyə xidməti ən yüksək səviyyəyə qaldırılmalıdır. 4 min nəfər kontingenti olan təhsil sistemində də rəhbərlikdə dəyişiklik edilmişdir. 4 ay ərzində Təhsil Şöbəsində müəyyən araşdırmalar aparılmış, ciddi nöqsanların olduğu aydınlaşdırılmışdır. Əsas məsələ gənc nəslin təlim-tərbiyəsi, müstəqil Azərbaycanın sabahının qurucuları olan savadlı, müstəqil qərarlar qəbul etməyi bacaran, texniki tərəqqi əsrindən baş çıxara bilən gənclərin yetişdirilməsindən ibarətdir.

Rayonda ən vacib xidmət sahələrindən biri də mədəniyyətdir. Mədəni-maarif müəssisələrində 1100-1200 nəfər işçi çalışır. 13 mədəniyyət evi, 40 klub-kitabxana, 12 musiqi və incəsənət məktəbi, 1 Dövlət Dram Teatrı, muzeylər, park və sair mədəniyyət müəssisəsi fəaliyyət göstərir. Rayon Əmək və Əhalinin Sosial Müdafiəsi Mərkəzi rəhbərliyində də dəyişiklik edilmişdir. Əhalinin çox müraciət etdiyi bu vacib sahədə həm təmiz iş rejimi yaradılmalı, həm də vətəndaşlara ədalətli münasibət olmalıdır.

Məruzəçi bildirdi ki, birinci rübün yekunlarını müzakirə edərkən razılaşmışdıq ki, bir sıra vacib məsələlərin nəticəsindən asılı olaraq qərar qəbul edəcəyik. Biz addım-addım müəyyənləşdirdiyimiz istiqamətə doğru irəliləyirik. Gördüyümüz işlər şəxsən məndə belə bir inam doğurur ki, tələsik qərarlar qəbul etmək olmaz, götür-qoy etmək, ictimai fikri müəyyənləşdirmək, daha optimal variantlar seçməklə məqsədli addımlar atmalıyıq. Vəzifəmiz intizama riayət etmək, tapşırılmış işə vicdanlı münasibət bəsləmək, sağlam kollektiv yaratmaq, əhalinin içərisində olmaq, hər gün onu dinləmək və əlbəttə, imkan daxilində tələblərini yerinə yetirməkdən, ölkə Prezidentinin dəst-xəttinə sədaqətimizi işimizlə sübut etməkdən ibarətdir.

Ötən müddət ərzində ərazidəki fin şəhərciyini və Beyləqan rayonunu nəzərə almasaq, 38 yaşayış məntəqəsində, Bakı, Sumqayıt, Şirvan şəhərlərində, Sabirabad, Hacıqabul, Saatlı, İmişli, Masallı,Lənkəran, Cəlilabad və başqa rayonlarda yaşayan füzulili məcburi köçkünlərlə səyyar qəbullar keçirmişik, 3770 nəfərlə görüşmüşük. Əksər xidmət təşkilatları rəhbərlərinin iştirak etdiyi bu qəbullarda qaldırılan məsələlərin 80-85 faizi öz həllini tapmışdır.

Qayıdış və Zobucuq qəsəbələrində, Yuxarı və Aşağı Kürdmahmudlu, Alıxanlı və başqa kəndlərdə keçirdiyimiz səyyar qəbullarda vətəndaşlar 50-100-200 hektarlarla sahələrin kimlər tərəfindənsə götürüldüyündən, örüş, əkmək üçün onlara sahə verilmədiyindən şikayətlənmişdilər. Taxıl biçinindən sonra qanunsuz verilmiş, zəbt olunmuş torpaqlar alınıb təyinatı üzrə istifadəyə veriləcəkdir. Rayon icra hakimiyyəti aparatında olan 5-51-74 nömrəli "qaynar xətt" daim açıqdır və hər gün müraciətlər olunur. Rayon icra hakimiyyətində həftənin bütün günləri qəbullar olur. Son 4 ayda 2 min nəfərdən artıq vətəndaş qəbul edilmişdir.

A.Alıyev sonda dedi ki, qarşımızda həm böyük vəzifələr var, həm də vaxtımız çoxdur. Sağlam qüvvələrlə əlbir, əlaqəli iş görməklə respublika Prezidenti İlham Əliyevin qarşımızda qoyduğu vəzifələri yerinə yetirəcəyik. Sizin adınızdan ölkə başçısını əmin etmək istəyirəm ki, füzulililər onun tapşırıqlarına can-başla əməl edəcək, qarşıya qoyduğu vəzifələrin layiqincə yerinə yetirilməsini təmin edəcək, yüksəliş prosesində ön cərgələrdə olmağa çalışacaqlar.

Məruzə ətrafında çıxışlarda uğurlardan geniş söhbət açıldı, qarşıda duran vəzifələrin həlli yolları göstərildi. Yarım ilin yekunlarının təhlili göstərdi ki, ili nailiyyətlərlə başa vurmaq üçün real zəmin vardır.

Ziyəddin SULTANOV

Xalq qəzeti.- 2011.- 23 iyul.- S. 7.