"Vətəni tanı" kampaniyasının şimal bölgəsində seçim turları yekunlaşıb

Azərbaycan Respublikası Gənclər Təşkilatları Milli Şurasının təşkilatçılığı ilə keçirilən "Vətəni tanı" ümumrespublika kampaniyası davam edir. Kampaniyanın növbəti seçim turu Siyəzən, Şabran, Quba, Qusar, Xaçmaz və Xızı rayonlarında baş tutub.

Çıxış edən rayon icra hakimiyyətlərinin və təhsil şöbələrinin nümayəndələri bildiriblər ki, ölkə gənclərinin təhsil səviyyəsinin yüksəldilməsində, milli-mənəvi dəyərlərimizin, Azərbaycanın ərazi bütövlüyünün tanıdılması istiqamətində bu çox uğurlu bir layihədir.

İşçi qrupu Siyəzəndən sonra Şabran rayonunda tədbir təşkil edib. Şəhər 5 saylı orta məktəbdə baş tutan yarışmada gənclər Azərbaycan xəritəsini toplayıblar.

"Vətəni tanı" ümumrespublika kampaniyasının həyata keçirilməsi zamanı interaktivlik, innovativlik, gənclər və cəmiyyət üçün yararlılıq əmsalı kimi göstəricilər önə çəkilmişdir.

Quba və Qusar rayonlarında olan işçi qrupunun rəhbəri Orxan Əli bildirib ki, ekspertlər tərəfindən hazırlanmış Azərbaycan Respublikasının xəritəsinin (inzibati ərazi vahidlərinə bölünməklə) xüsusi elektron proqram və material keçməcə variantları istehsal edilib və bunun üzərində yarışma həyata keçiriləcəkdir. Hər bir rayondan 2 nəfər təmsilçi seçiləcəkdir. Təmsilçilərin biri elektron, digəri isə material keçməcə variantları üzrə Bakıda keçiriləcək final mərhələsində iştirak edəcəkdir.

Yarışmada iştirak edən Quba və qusarlı gənclərdən hər rayon üzrə iki gənc respublika turuna vəsiqə qazanıb. İşçi qrupu Qusar rayonunda yerləşən və Azərbaycanda hündürlüyünə görə ikinci yerdə olan Bayraq meydanında olmuş, buradan Qusar şəhərini seyr etmişdir.

İşçi qrupu daha sonra Xaçmaz rayonunda seçim turunu həyata keçirib. Burada da gənclər kampaniyada həvəslə iştirak ediblər.

Sonra Xızı şəhər orta məktəbində keçirilən tədbirin açılış mərasimində çıxış edən Milli Şuranın mətbuat katibi bildirib ki, hazırda ölkəmizdə gənclər siyasəti çox uğurla həyata keçirilir. Gənclərimizin hərtərəfli inkişafı üçün istər paytaxtda, istərsə də regionlarda əlverişli şərait yaradılıb.

Rayon təhsil şöbəsinin müdiri Oqtay müəllim çıxışında Azərbaycanın torpaqlarının işğal altında olmasını bildirərək belə layihələrin keçirilməsinin çox əhəmiyyətli olduğunu diqqətə çatdırıb.

Xatırladaq ki, "Vətəni tanı" ümumrespublika kampaniyası 14-18 yaşlı gənclər arasında keçirilir və ölkə üzrə 12.000 gənci əhatə edir.

Qeyd edək ki, kampaniyaya rəsmi olaraq Gənclər və İdman, Təhsil, Rabitə və İnformasiya Texnologiyaları nazirlikləri, Dövlət Torpaq və Xəritəçəkmə Komitəsi, həmçinin "AVA" Skandinaviya klinikası, FİXED Borders dəstək verir.

Elçin ABBASOV

Xalq qəzeti.- 2011.- 23 iyul.- S. 7.