Can PULAK: Bakı modern görüntüsüylə çaşqınlıq yaradan şəhər səviyyəsindədir

Azərbaycan Turizm İnstitutu bir çox ölkələrlə qarşılıqlı əməkdaşlıq əlaqələri qurub. Həmin ölkələrlə bağlanan müqavilələr əsasında davamlı olaraq müxtəlif konfrans və toplantılar keçirilir. Növbəti belə toplantıdan ölkəsinə dönən türk jurnalisti Can Pulak Azərbaycan haqqında təəssüratlarını ATİ-nin rektoru Cəfər Cəfərova "Bodrumdan-Bakıya" adandırdığı məktubla bildirmişdir. Məktubdakı səmimiyyət, insanlarımıza verilən qiymət, dərdimizi özününkü bilmək istəyi, ölkəmizin inkişafını görüb bu uğurlara ürəkdən sevinməsi və onu etirafı, buraxılan səhvi dərk edərək çox mədənicəsinə üzrxahlıq bacarığı, Azərbaycanın dünya dövlətləri arasında artan rolu ilə fəxr etməsi Can Pulakın məktubunda açıq-aydın hiss olunur. Oxucularımız üçün də maraqlı olacağını nəzərə alıb həmin məktubu dərc etməyi lazım bildik.

..."Azərbaycana çoxdan getməmişdim. Xatırladığım qədər Bakı və ətrafı baxımsız görüntüsüylə, köhnə və xoşagəlməyən bir şəhərdi. Qarabağ çarpışmalarında əzilmiş, çox şəhid vermişdi bu şəhər. Ermənilərin alçaqcasına törətdikləri vəhşiliklərə və cinayətlərə, olmazın zülmlərinə qarşı dirənərkən yorğun ve yoxsul düşmüşdü...

Yenə yolum qardaş ölkəyə-Azərbaycana idi. Beynimdə ancaq bu fikir dolaşırdı: Görəsən, Bakıda yenə həmin mənzərə qalırmı?

...Aradan keçən illər Azərbaycanı təpədən dırnağa fərqli etmiş, Bakıya və ölkənin digər şəhərlərinə edilən inanılmaz "makiyaj" və qoyulan yatırımlar ölkəni son dərəcə yaxşılığa doğru dəyişdirmiş, və şəhər modern görüntüsüylə çaşqınlıq yaradacaq səviyyəyə çatmışdır.

Bir ölkə qısa zamanda belə necə dəyişər? Doğrudur, neft və qazdan ölkəyə xeyli pul gəlir, amma qazancı lazımınca dəyərləndirmək də mühüm bir keyfiyyətdir. Azərbaycan bunu bacarıqla gerçəkləşdirə bilmişdir.

Ölkə bir tikinti meydançasını xatırladır... Köhnə binaları əslinə uyğun şəkildə yerli daşlarla əvəzləyib üzləyirlər. Özəlliyin gözəlliyinə diqqət edirlər. Elektrik dirəkləri, küçələrdəki gecə lampaları belə xüsusi zövqlə seçilmişdir. Hər yerdə və hər şeydə mükəmməl bir uyğunluq göz oxşayır.

Alış-veriş yerlərində, küçə və prospektlərdə müxtəlif markalı maşın bolluğu diqqət çəkir. Günün istənilən zamanında hər yerdə sıxlıqdır. Amma bu sıxlığın içində də bir sahman var. Dövlət nəzarəti güclü olduğundan qəzalara az rast gəlinir. Belə olan halda istədiyin yerə rahat gedib-gələ bilirsən.

Dünyanın ən zəngin mağaza və markalarına Bakıda yer vermişlər. "Avropaya daş çıxaran Parisi" belə "sol"da saxlayan bir tabloya imza atmışlar.

Görmədən inanmaq mümkün deyil. O, lüks maşın bolluğu, ətrafın təmizliyi, sürətli yaşıllaşdırma ilk baxışda hiss olunur və diqqət çəkir. Dünyanın bir çox yerlərindən Azərbaycana gətirilərək əkilən növbənöv çiçək, kol və ağaclar şəhərə xüsusi gözəllik verir.

Azərbaycanda 2011-ci il "Turizm ili'' elan edilmişdir. Bu səbəblə bizi də qardaş ölkəyə dəvət etdilər, yaratdıqlarını, tikib qurduqlarını göstərmək istədilər. Həmçinin yeni proyektlər haqqında da məlumat verdilər. Doğrudur, onların qış turizmi ilə əlaqəli önəmli qərar və çalışmaları var. Amma Türkiyənin təcrübələrindən də yararlanmaq istəyirlər.

Bakıdan 200 kilometr aralı Qəbələ bölgəsində turizm mərkəzi hazırlanır. Qəbələ yüksək dağlarla əhatə olunub və İsveçrədən də gözəl ormanlıq bir yerdir. 2 dənə beş ulduzlu çox modern otel və istirahət mərkəzinə, Avropada belə rahatlıq və asanlıqla rastlaşa bilməyəcəyin gözəl SPA və idman mərkəzinə sahibdir. Qəbələnin Yengicə bölgəsində isti su və palçıq vannaları da var. Şəxsən mən düşünürəm ki, Qəbələ, turizm məkanı kimi adını bu yaxınlarda bütün dünyaya tanıdacaq. Həmçinin dövlət dəstəyi ilə Qusarda 5000 nəfərlik "Şahdağ" qış-yay turizm məkanı, təyyarə limanı tikilir.

Azərbaycan təxminən 15-20 çox yüksək xidmətə malik otelə sahibdir. Bakı, Lənkəran, Nabran ve Qəbələdə yerləşən bu otellərdəki cəmi yataq sayı 11 mindir. Amma yeni oteller tikməyə davam edirlər. Nə qədər çox çalışsalar da, indiki vaxtda mövcud olan otellərlə turizmi çox yüksək səviyyəyə qaldıra bilməzlər. Amma əminik ki, yeni yatırımlarla Azərbaycan tezliklə adını ən böyük turizm ölkəsi kimi tanıdacaq. Qafqaz otelleri, yeni açılan "Kempinski", "Mariott", "Park İNN", "Hyatt Regency", tikintisi bitmək üzrə olan "Hilton-Bakı" və digərləri ölkənin turizm sənayesində mühüm rol oynayır. Mədəniyyət və turizm naziri Əbülfəs Qarayev də turizm sektorunun inkişafı və Azərbaycanın dünya turizm sənayesindəki payının artması üçün bütün kollektiviylə birgə gərgin əmək sərf edir. Dövlətlərarası yarışmaları, vacib və mühüm konfrans və seminarları, sənət və idman təşkilatlarının diqqətini ölkəsinə çəkmək üçün çox çalışır. Bu arada bizim TÜRSAB-a bənzər, Oteller Birliyinin(AZTA) başında gənc, bilikli, bacarıqlı bir rəhbəri var. Nahid Bağırov adlı daim çalışan bu insan orkestr şefi kimi bütün təşkilatçıları ilə birgə dünyadakı turizmlə bağlı dəyişiklikləri öz ölkəsinə bacarıqla tətbiq etməyə böyük əmək sərf edir.

Bizim nümayəndə heyətində Türkiyə Turizm Yatırımçıları Dərnəyi Başqanı (TYD) Turgut Gür, Türkiye Otelçilər Birliyi Başqanı Timur Bayındır, TÜRSAB Genəl Sekreteri kimi turizm sektorunda tanınan qabaqcıl insanlar vardı. Göstərilən qarşılıqlı münasibət, ziyarət və toplantılarda Azərbaycanın Türkiyənin təcrübəsindən yararlanmaq arzusu diqqət çəkirdi. Belə önəmli bir toplantıda, Türkiyə ilə Azərbaycan arasında təcrübə mübadiləsi imkanı yaradan bir müqaviləyə də imza atıldı.

Azərbaycandakı səfirimiz Hulusi Kılıç, Türk-Azəri əməkdaşlığının inkişafına, Türk yatırımlarının artmasına çox önəm verir. Bunu gerçəkləşdirəcək bir iş yaratdığını məmnuniyyətlə görmək istərdik... Amma iş adamlarımızın proyektlərinə əlavə olaraq, İbrahim Çeçen qrupunun Bakıda çox görkəmli, modern və möhtəşəm binalar tikdiyinin şahidi olduq və iftixar etdik.

Bir neçə günlük ziyarətimizin sonunda əmin olduq ki, bizim azərilərə etdiyimiz (erməni politikası və bayraqların Bursa stadionuna gətirilməsi) səhvlərimizə rəğmən, onlar bizə hələ "bir millət, iki dövlət" sevgisiylə qucaq açırlar. Onlara toxunan, yaralayan bəzi qərarlarımızı isə, anlayış və səbrlə qarşılamağa çalışırlar. "Qardaş da yanlış yapa bilər" məntiqi var adil qardaşlarımızda. O qədər mükəmməl insanlar ki, üzüntülərini belə bildirməmək üçün orda olan müddətdə bizə bir şey hiss etdirmədilər.

Türk iş adamlarına Azərbaycanda böyük imkanlar, üfüqlər var. Sadəcə turizm sektorunda deyil, hər sahədə qoyduğumuz yatırımlardan geniş ölçüdə yararlana bilirik. Özəlliklə inşaat sektorumuz çox əlverişli bir sahə olaraq irəli gedibdir. Yaxşı ki, bunu görənlər qollarını çoxdan çirməyib işə girişiblər..."

Zərifə BƏŞİRQIZI

Xalq qəzeti.- 2011.- 24 iyul.- S. 2.