Goranboy: insan amili və yüksəlişin yeni dalğası

Son vaxtlar Goranboya gedəndə ürəyimiz açılır. Özü də təkcə ona görə yox ki, daha da abadlaşadırılmış, genişləndirilmiş küçələr səni öz qoynuna alır, yüksək zövq və müasiriliklə tikilmiş, təmir edilmiş binalar göz oxşayır, əlvan güllər-çiçəklər adama sakitlik, rahatlıq gətirir. Bir də ona görə ki, yollar boyu uzanan hündür hasarlarda təsvir olunan rayonun tarixindən, bu günündən xəbər verən məlumatlar, füsunkar təbiət gözəlliklərini əks etdirən mənzərələr bu bölgə haqqında ilk bələdçiyə çevrilir, qəlbimizdə qürur və iftixar hissi oyadır.

Goranboya bələd olanlar birmənalı şəkildə təsdiq edirlər: şəhər öz simasını əsaslı şəkildə dəyişmiş, daha abad, müasir və yaraşıqlı olmuşdur. Tikintisi başa çatdırılan, yaxud davam etdirilən müxtəlif təyinatlı binalar, salınan park və xiyabanlar, müasir işıqlandırma sistemi, yaşıllıq zolaqları bir-birini əvəz edir. O da sevindiricidir ki, aparılan genişmiqyaslı tikinti-abadlıq və quruculuq işləri kampaniya xarakteri daşımır, ardıcıl və sistemlidir. Digər tərəfdən, abadlıq və səliqə-səhman işləri təkcə şəhərlə məhdudlaşmır. İndi abadlıq işləri rayonun bütün yaşayış məntəqələrində eyni sürət və keyfiyyətlə davam etdirilir.

Yeri gəlmişkən, son vaxtlar tikilib başa çatdırılmış, hazırda tikintisi davam etdirilən müxtəlif təyinatlı obyektlərin, sosial binaların bəzilərini sadalamaq istəyirik. Bizcə, bununla aparılan işlərin miqyası və sürəti haqqında daha aydın təsəvvür əldə etmək mümkündür. Tatarlı, Rus Borisi, Dəyirmanlar, Qurbanzadə kəndlərində yeni məktəb binaları tikilib istifadəyə verilmişdir. Goranboy səhər 3 saylı, Səmədabad, Şadlı kənd məktəblərində, YAP-ın yeni inzibati binasında, şahmat məktəbində, avtovağzalda, ticarət mərkəzində artıq son tamamlanma işləri aparılır. Bundan başqa, sahəsi 2 hektar olan yeni park salınmış, şəhərə 3 istiqamətdən girişdə müasir qapılar tikilmiş, 34 min ağac əkilmişdir. 635 işıq dirəyi dəyişdirilmiş, yüz kilomterlərlə yollar asfaltlaşdırılmış, körpülər salınmışdır. Onlarla müxtəlif təyinatlı müəssisə işə salınmış, yüzlərlə insan daimi iş yeri ilə təmin olunmuşdur.

Ümumiyyətlə, 2011-ci ilin birinci yarısında respublikamızda olduğu kimi, rayonda da makroiqtisadi göstəricilərdə artım əldə olunmuşdur. Belə ki, ümumi məhsul buraxılışı 92 milyon 75 min manat olmuşdur. Bu da ötən ilin müvafiq dövrü ilə müqayisədə 115,3 faiz çoxdur. O cümlədən sənaye məhsulunun ümumi həcmi artaraq 100,9 faiz, kənd təsərrüfatının ümumi məhsulu 115 faiz, nəqliyyat xidmətinin həcmi 107,1 faiz, pərakəndə əmtəə dövriyyəsi 111,2 faiz, əhaliyə göstərilən pullu xidmətlər 105 faiz təşkil etmişdir. Orta aylıq əmək haqqı 14 faiz artaraq 201,2 manat olmuşdur.

Ölkə Prezidenti İlham Əliyev demişdir: "Kənd təsərrüfatının inkişafı ilə bağlı bütün müvafiq göstərişlər verilmişdir. Bütövlükdə, ərzaq təhlükəsizliyinin təmin edilməsi istiqamətində bizim konkret planımız və proqramımız vardır. Çalışmalıyıq ki, Azərbaycanda istehlak olunan bütün ərzaq məhsulları Azərbaycanda istehsal edilsin". Bu baxımdan son vaxtlar rayonda ciddi uğurlar əldə edilmişdir. 18 min 349 hektar sahədən 51 min 377 ton taxıl (əvvəlki illə müqayisdədə 1559 ton çox) biçilmiş, hər hektardan 28 sentner məhsul əldə edilmişdir. 2010-cu ilin 6 ayı ilə müqayisədə 37 ton çox kartof, 23 ton çox tərəvəz, 62 ton çox meyvə toplanmışdır. Hazırda məhsul yığımı davam edir.

Heyvandarlıq məhsulları istehsalında da xeyli artım əldə edilmişdir. 2011-ci ilin 6 ayında ötən ilin müvafiq dövrü ilə müqayisədə 139 ton çox ət, 1180 ton çox süd, 1 milyon 334 min ədəd çox yumurta, 2 ton çox yun istehsal olunmuşdur. İri malın baş sayı 41 min 262-yə, xırdabuynuzların baş sayı 233 min 619-a çatmışdır ki, bu da müqayisə olunan dövrə nisbətən xeyli çoxdur.

İstehsal və emal müəssisələrinin yaradılması istiqamətlərində səylər davam etdirilir. Nəhəng yağ emalı zavodunun tikinitisi üçün təşkilatı işlər başa çatmaq üzrədir. Sahəsi 1 hektardan çox olan bu zavodun tikintisi işsizlik probleminin həllinə kömək edəcək, istehsal edilən qarğıdalı və günəbaxan məhsulu öldkəmiz üçün etibarlı bazar yaradacaqdır. Ümumiyyətlə, burada sahibkarlığın inkişafı üçün hərtərəfli şərait yaradılmışdır. Müraciət edən hər bir iş adamına dəstək verilməsinin nəticəsidir ki, təkcə 2011-ci ilin 6 ayında 187 sahibkarlıq obyekti tikilmiş, 10 müəssisə açılmışdır. Bütövlükdə isə ötən dövr ərzində 481 iş yeri açılmışdır. Bunun 218-i daimidir.

Rayonda tikinti, abadlıq və quruculuq işlərinin həcmi daha da genişləndirilmişdir, ardıcıl və sistemli xarakter almışdır. İlin əvvəlindən Goranboy şəhərinin Ə.Gorani, E.Namazoğlu, S.Civəzadə, B.Bağırova küçələrinə 21 min 750 kvadratmetr asfalt örtük salınmışdır. Bütövlükdə şəhər üzrə 45 kilometr uzunluğunda küçələrin 25 kilometri asfaltlaşdırılmışdır. Yaxın vaxtlarda qalan küçələrə də asfalt örtük salınacaqdır. Ə.Gorani, S.Vurğun, Vidadi, M.Məhərrəmov küçələrində, Goranboy-Səfikürd avtomobil yolunun kənarında 58 ədəd müasir işıqlandırma dirəyi quraşdırılmışdır. S.Vurğun küçəsində 15 və 23 saylı ikimərtəbəli yaşayış binalarının dam örtükləri və fasad hissələri təmir edilmişdir.

Şəhərin V.Bayramov küçəsində sahəsi 2 hektar olan yeni istirahət parkı salınmışdır. Hazırda Goranboy şəhərinin Gəncə istiqamətindən girişində ikitərəfli yolun tikinitisi aparılır. Yol genişləndirilir, yeni səki tikilir. Yolun mərkəzinə işıqlandırma dayaqları qoyulmuşdur. Səfikürd kəndi istiqamətindəki çıxışda yeni mini parkın tikintisinə başlanmışdır.

Abadlıq-quruculuq işləri rayon mərkəzi ilə yanaşı, bütün yaşayış məntəqələrində də davam etdirilir.Veyisli kəndində süd qəbulu məntəqəsi istifadəyə verilmiş, Borsunlu kəndində içməli su xəttinin çəkilişi davam etdirilir. Xınalı kənd icra nümayəndəliyi üçün yeni inzibati bina, habelə kənd uşaq bağçası üçün bina tikilir.

Dəliməmmədli şəhərinin C.Cabbarlı, B.Bağırova və S.Vurğun küçələrinə 12 min 600 kvadratmetr asfalt örtük salınmışdır. Yaşar Rəhimov və Tofiq Əkbəri küçələrində işıqlandırma sistemi təmir edilmişdir. Hazırda ərazidə abadlıq işləri aparılır. Dəmiryol xətti boyu 280 metr hasarın tikintisinə başlanmışdır. Burada yeni park salınacaqdır. Şəhərdə yol dairəsi yenidən qurulmuş, 450 metr səki salınmış, əhalinin su təminatının yaxşılaşdırılması üçün 12 tonluq çən qoyulmuşdur. Bütövlükdə, yarım ildə rayonda 977 min manatlıq tikinti-quruculuq işləri aparılmışdır.

Düşmənlə təmas xəttində yerləşən yaşayış məntəqələrinin problemləri daha dərindən araşdırılmış və onların həllinə başlanılmışdır. Tap Qaraqoyunlu kəndində sosial obyektlərin əsaslı şəkildə yenidən qurulması, 400-dək fərdi yaşayış evinin təmiri, 5 ədəd subartezian quyusunun qazılmasının layihə sənədləri hazırlanmışdır. Bundan başqa, Goranboy - Murovdağ su kəmərindən kəndə içməli su xətti çəkiləcək, 2,5 kilometr uzunluğunda, 4 metr hündürlüyündə mühafizə hasarı tikiləcəkdir.

Ötən müddət ərzində təhsil müəssisələrinin maddi-texniki bazasının yaxşılaşdırılması istiqamətində də mühüm işlər görülmüşdür. Hazırəhmədli, Nizami, Həmənli kənd və Goran qəsəbə məktəblərində təmir işləri aparılır. Qızılhacılı qəsəbə 2 saylı və Nərimanlı kənd tam orta məktəbin tikintisinə başlanılmışdır.

Səhiyyə və mədəniyyət müəssisələrinin də fəaliyyəti gücləndirilmiş, maddi-texniki baza möhkəmləndirilmiş, intizam və məsuliyyət yüksəldilmişdir. Prezident İlhşam Əliyevin tapşırığına əsasən, əhalinin enerji daşıyıcıları ilə təminatının daha da yaxşılaşdırılması istiqamətində tədbirlər davam etdirilmişdir. Xocalı rayonundan olan məcburi köçkünlər üçün Goranboy şəhərində inşa edilmiş 3 yaşayış binasında 162 abonentə təbii qaz verilmişdir.

Əlirzalı, Veysli, Meşəli kəndləri, Meşəli kəndi yaxınlığındakı qəsəbə qazlaşdırılmış, bu yaşayış məntəqələrində 857 abonent təbii qazla təmin olunmuşdur. Goranboy şəhərində Qızılhacılı, Ağamalıoğlu, Fəxralı, Xoylu, Qurbanzadə kəndlərində yararsız qaz xətti dəyişdirilmişdir. Yaxın günlərdə Zeyvə və Şəfəq kəndlərinə təbii qaz veriləcəkdir. Daha sonra Qaraqucaq, Şəfibəyli, Hacallı, Fəxralı, Dəyirmanlar və Baxçakürd kəndləri qazlaşdırılacaq. Qaradağlı və Xoyluda genişləndirmə işləri aparılacaqdır.

Ümumiyyətlə, hazırda rayon üzrə təbii qazdan istifadə edən abonentlərin sayı 80 faizə çatmışdır. Təbii qaza görə ödəniş isə 100 faizdir. Əhalinin elektrtik enerjisi ilə davamlı təminatı üçün də müəyyən işlər görülmüşdür. Ayrı-ayrı yaşayış məntəqələrində transformatorlar və yüksək gərginlikli elektrik xətləri əsaslı və cari təmir edilmiş, 1310 ədəd yeni sayğac quraşdırılmışdır.

Hazırda Murovdağdan Goranboy şəhərinə yeni su xətti çəkilir. Bütövlükdə, 73 kilometr su, 27,5 kilometr kanalizasiya xətti çəkiləcəkdir. Bununla da şəhərdə hər iki problem öz həllini tapacaqdır. Su kəməri boyunca yerləşən Cinli, Borsunlu, Qızılhacılı, Balakürd, Nərimanlı və digər yaşayış məntəqələri də içməli su ilə təmin ediləcəkdir. Növbəti illərdə Dəliməmmədli ərazisində yerləşən 23 yaşayış məntəqəsinin içməli su problemi də öz həllini tapacaqdır.

Əldə edilmiş nəticələrin, görülmüş işlərin təhlili, fakt və rəqəmlərin müqayisəsi belə deməyə əsas verir ki, həqiqətən, son vaxtlar Goranboyda həyatın bütün sahələrində əsaslı inkişaf və irəliləyiş əldə edilmiş, ciddi uğurlar qazanılmışdır. Başlıca cəhət odur ki, intizam və məsuliyyət hissi gücləndirilmiş, müşahidə olunan nöqsan və çatışmazlıqlara qarşı barışmaz mübarizə tədbirləri görülmüş, ardıcıl, sistemli və çevik iş qurulmuşdur. Goranboy Rayon İcra Hakimiyyətində, onun yerli strukturlarında iş üslubu və metodları, təşkitlat-idarəetmə məsələləri daha da təkmilləşdirilmiş, möhkəm icra intizamı yaradılmış, insan amili ön plana çəkilmişdir.

Rayon icra hakimiyyətinin başçısı Nizaməddin Quliyev ciddi həyat yolu keçmiş, zəngin təcrübəyə, geniş dünyagörüşünə malik insandır. Adamlarla işləməyi, onları inandırmağı və öz ardınca aparmağı bacarır. İcra başçısı ilə qısa söhbətdən məlum oldu ki, son vaxtlar Goranboyda həyata keçirilən tədbirlər, aparılan genişmiqyaslı tikinti-abadlıq və quruculuq işləri hələ başlanğıcdır. Deməli, Goranboy sabah daha abad, gözəl və müasir olacaqdır.

Ziyəddin SULTANOV

Xalq qəzeti.- 2011.- 31 iyul.- S. 5.