"Hər gününüz bayram olsun, uşaqlar"

Dünən Bakının Xətai rayonundakı Heydər Parkı yenə bayram libası geymişdi. Dünyaya, insanlara sevinc bəxş edən Uşaqların Beynəlxalq Müdafiəsi Gününün qeyd olunacağı bu məkana Xətai rayonundakı uşaq evlərinin və uşaq bağçalarının 500-dən artıq sakini toplaşmışdı. Onların sevincinə sevinc qatmaq üçün rayon icra hakimiyyətinin nümayəndələri əllərindən gələni əsirgəməmiş, müxtəlif şirniyyat, meyvə və şirələrlə bəzədilmiş bayram süfrəsi belə açmışdılar.

Parkdakı səsgücləndiricilərdənsə ümummilli lider Heydər Əliyevin uşaqlar, onların milli varlığımız və müstəqil dövlətimizin həyatındakı yeri və gələcək rolu haqqında müdrik və fəlsəfi fikirlərinin lent yazıları səsləndirilirdi.

Uşaqlara həsr olunmuş bayram təntənəsi də uşaqları sonsuz məhəbbət hissi ilə sevən ulu öndər Heydər Əliyevin abidəsi önünə tər çiçək dəstələrinin qoyulması ilə başladı. Uşaqların sevinc dolu gülüş sədaları ilə əlamətdar olan bayram izdihamını rəsmi hissənin başlanıldığını bildirən Azərbaycan himninin əzəmətli melodiyası bir andaca kəsdi.

Təbrik üçün ilk söz Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanovaya verildi. Azərbaycan dövlətinin uşaqların müdafiəsi, onların rifah içində böyüməsi üçün gördüyü işlərdən ətraflı məlumat verən S.Qəhrəmanova bu siyasətin təməlində ümummilli lder Heydər Əliyev siyasətinin durduğunu bildirdi:

- Müstəqil Azərbaycanın qurucusu ulu öndər Heydər Əliyev uşaqlara son dərəcə böyük sevgi və qayğı ilə yanaşır və bütün dövlət məmurlarından da bunu tələb edirdi. Çünki o, milli varlığımızın məhz bu fidan balalardan, onların sağlam böyüməsindən, yaxşı tərbiyə və təhsil almalarından asılı olduğunu çox gözəl bilirdi.

Çıxışının sonunda natiq bir daha uşaqları təbrik edərək bildirdi ki, biz anaların ən böyük arzusu sizin hər gününüzün beləcə bayram olmasıdır.

Uşaqların bu möhtəşəm bayramında Xətai Rayon İcra Hakimiyyətinin başçısı Razim Məmmədov da ürək sözlərini söylədi:

- Biz böyüklər o zaman rahat nəfəs alırıq ki, sizin həyatınıza sevinc qatır və bizi duyğulandıran gülüşünüzü görürük. Ulu öndərimiz Heydər Əliyevin sizlərə sonsuz diqqət və qayğısı bu gün onun varisi, Azərbaycan Respublikasının Prezidenti cənab İlham Əliyev tərəfindən əməli işlərlə davam etdirilir.

Rayonumuzda 38 uşaq bağçası və 2 uşaq evi var. Dövlətimizin başçısının qəbul etdiyi müvafiq qərar və sərəncamlar bu müəssisələrdə uşaqlara daha rahat şərait yaratmağa yönəlib. Lakin valideynlər də unutmamalıdırlar ki, müstəqil Azərbaycan üçün layiqli övlad yetişdirmək ilk növbədə onların vəzifəsi və borcudur.

R.Məmmədov rayonda uşaqların istirahəti, asudə vaxtlarının səmərəli təşkili və sağlam böyümələri üçün görülən işlərdən də ətraflı danışdı və qeyd etdi ki, bu işlər bundan sonra da davam etdiriləcək.

Milli Məclisin deputatı Gülər Əhmədova isə çıxışında Azərbaycanda uşaqlara qayğı və diqqətin dövlət siyasətinin prioritet istiqamətlərindən biri olduğunu qeyd edərək dedi:

- Bu gün ulu öndərin adını daşıyan bu gözəl parkda Xətai Rayon İcra Hakimiyyətinin təşkil etdiyi bu möhtəşəm uşaq bayramının özü də bu siyasətin necə həyata keçirildiyini göstərən bir tədbirdir.

Sonra natiq İSESKO və YUNESKO-nun xoşməramlı səfiri, ölkənin birinci xanımı Mehriban Əliyeva başda olmaqla Heydər Əliyev Fondunun uşaqlarla bağlı həyata keçirdiyi proqramlardan və layihələr barədə ətraflı məlumat verdi və qeyd etdi ki, dövlət başçısının, bütün istiqamətlərdə olduğu kimi, bu sahədə də həyata keçirdiyi siyasət müstəqil dövlətçiliyimizin inkişafına və gələcəyinə xidmət edir.

Tədbir rayonun mədəniyyət və incəsənət ustalarının, gənc istedadların hazırladıqları bayram konserti ilə üç saata yaxın davam etdi.

İlqar RÜSTƏMOV

Xalq qəzeti.- 2011.- 2 iyun.- S. 7.