Cənub bölgəsində bayram tədbirləri

Respublikamızın hər yerində olduğu kimi, cənub bölgəsinin rayonlarında da 28 May - Respublika Günü münasibətilə silsilə tədbirlər keçirilmişdir.

Lənkəran

"Cənub mirvarisi" adlandırılan, bu il ölkəmizin folklor paytaxtı elan edilmiş Lənkəranda düzənlənən silsilə tədbirlərdə dövlət müstəqilliyimizin nailiyyətləri bir daha nəzərə çatdırılmış, Azərbaycan xalqının ümummilli lideri Heydər Əliyevin misilsiz xidmətləri qədirbilənliklə yad edilmiş, ulu öndərin siyasi kursunu layiqincə davam etdirən Prezident İlham Əliyevin ölkənin sosial-iqtisadi inkişafı naminə atdığı addımların önəmi açıqlanmışdır. Lənkəranın inkişafına göstərilən dövlət qayğısından razılıq hissləri ifadə edilmişdir. Müxtəlif bayram tədbirləri - yığıncaqlar, müsabiqələr, konsertlər maraqla qarşılanmışdır.

Lənkəran Dövlət Universitetində şəhər icra hakimiyyəti ilə birgə təşkil olunan tədbiri rektor, fizika-riyaziyyat elmləri doktoru, əməkdar elm xadimi, professor Asəf İskəndərov açaraq 93 il öncə yaradılmış AXC-nin dövlətçilik tariximizdə rolundan geniş bəhs etmişdir. O, Azərbaycanda elmin, təhsilin, mədəniyyətin inkişafına göstərilən dövlət qayğısını xüsusi qeyd etmiş, müstəqilliyimizin yaşıdı olan LDU-nun uğurlarını bunun təzahürü kimi dəyərləndirmişdir. Universitetin dosenti, Prezident təqaüdçüsü Mirhaşım Talışlı və valideynlər şurasının sədri Sərhəd Məmmədov iştirakçıları bayram münasibətilə təbrik etmişlər.

Sonra bədii və texniki yaradıcılıq müsabiqəsinin final mərhələsinə start verilmişdir.Uşaq bağçalarının, orta məktəb və liseylərin şagirdləri əlvan musiqi nömrələri, şeirlər, rəsm əsərləri, digər əl işləri və texniki yaradıcılıq nümunələrini təqdim etmişlər. LDU-nun fakültələrarası yarışı xüsusilə maraqlı keçmişdir. Münsiflər heyəti müsabiqənin ən yaxşı iştirakçılarını müəyyənləşdirmişdir.

Masallı

Rayon icra hakimiyyətinin Respublika Gününün qeyd olunması ilə əlaqədar tədbirlər planına uyğun olaraq keçirilən tədbirlər bütün idarə, müəssisə və təşkilatları əhatə etmişdir. Azərbaycan Demokratik Respublikasının tarixinə dair fotostendlər, bədii guşələr hazırlanmışdır. Həmçinin "Tariximizin hər səhifəsi bizim üçün əzizdir", "Bizi çox gözəl gələcək gözləyir", "Dövlət müstəqilliyi bizim ən böyük sərvətimiz, ən böyük nemətimizdir", "Azərbaycan dünyaya günəş kimi doğacaq" mövzusunda söhbətlər aparılmış, mühazirələr oxunmuş, "dəyirmi masa"lar təşkil olunmuşdur. Azərbaycan Demokratik Respublikasının 93-cü ildönümü ilə əlaqədar ümumrayon tədbiri keçirilmişdir. Masallı Rayon İcra Hakimiyyətinin başçısı Qəzənfər Ağayev, hüquq-mühafizə orqanlarının, idarə və müəssisələrin rəhbərləri, ictimaiyyətin nümayəndələri əvvəlcə ulu öndər Heydər Əliyevin abidəsini ziyarət etmiş və önünə təzə-tər gül dəstələri düzmüşlər. Sonra tədbir rayon mərkəzindəki Bayraq meydanında Nizami Gəncəvi adına şəhər mədəniyyət evi kollektivinin hazırladığı geniş bayram konserti ilə davam etdirilmişdir. Tədbirdə maraqlı idman proqramı da təqdim olunmuşdur. Bayram şənliklərində minlərlə rayon sakini iştirak etmişdir.

Yardımlı

Dağlar diyarında Respublika Günü münasibətilə düzənlənən ümumrayon tədbirini icra hakimiyyətinin başçısı Xəzər Aslanov açaraq iştirakçıları təbrik etmişdir.

İcra hakimiyyəti aparatının ictimai təşkilatlarla və siyasi partiyalarla iş şöbəsinin müdiri Şakir Kərimov "Müstəqilliyimiz əbədidir" mövzusunda məruzə etmişdir. Təhsil Şöbəsinin müdiri Manaf Balışov, Urakəran inzibati ərazi dairəsi üzrə icra nümayəndəsi Nazim Əliyev, Heydər Əliyev muzeyinin icraçı direktoru Elvin Eyvazov və başqaları çıxış edərək dövlətçilik tariximizin ən qürurverici günü sayılan 28 May - Respublika Günü ilə bağlı duyğu və düşüncələrini ifadə etmişlər.

Sonra "N" saylı hərbi hissədə Yardımlı Rayon Mədəniyyət Evinin bədii kollektivləri konsert proqramı ilə çıxış etmişlər. Rayon mədəniyyət və istirahət parkında da konsert olmuşdur.

Şəhərdəki "Sahil" stadionunda Respublika İxtisaslaşdırılmış Olimpiya Ehtiyatları Uşaq-Gənclər Futbol Məktəbinin və Yardımlının "Dinamo" komandasının 15-16 yaşlı futbolçuları arasında bayram münasibətilə keçirilən yoldaşlıq görüşü də maraqla izlənilmişdir. Bu oyunda Yardımlı futbolçuları qələbə qazanmışlar.

Lerik

Ümumrayon tədbirini icra hakimiyyətinin başçısı Rövşən Bağırov açmış və "Azərbaycan Xalq Cümhuriyyəti - müsəlman şərqində ilk parlament respublikası" mövzusunda məruzə ilə çıxış etmişdir. O bildirmişdir ki, cəmi 23 ay yaşamasına baxmayaraq, AXC milli-azadlıq tariximizdə əbədi iz qoymuşdur. Müstəqilliyin bərpasından sonra ulu öndər Heydər Əliyev varislik ənənələrinə sadiqlik göstərmiş, möhtərəm Prezidentimiz İlham Əliyev tariximizin şanlı səhifələrinə dərin ehtiramını dəfələrlə konkret əməli tədbirlərdə nümayiş etdirmişdir. Məsələn, 4 il öncə dövlət başçısının təşəbbüsü ilə Bakıda AXC-nin şərəfinə abidə ucaldılmış, 2009-cu ildə isə Azərbaycanda Dövlət Bayrağı Günü təsis edilmişdir.

Məruzə ətrafında müzakirələrdə gənclər və idman idarəsinin rəisi Rövşən Rüstəmov, texniki fənlər liseyinin direktoru, əməkdar müəllim Gültəkin Şıxəliyeva, 3 saylı məktəbin müəllimi Araz Qurbanov çıxış edərək 93 il öncə Azərbaycan Xalq Cümhuriyyətinin elan olunmasının dövlətçilik tarixində müstəsna yer tutduğunu əsaslandırmışlar.

Rayonun bütün idarə və təşkilatlarında, təhsil ocaqlarında da bayram münasibətilə şənliklər keçirilmişdir.

Cəlilabad

Son illərdə Cəlilabad sürətlə inkişaf edərək abad və gözəl bir diyara çevrilmişdir. Bayram tədbirlərində bu barədə ətraflı danışılmış, əldə olunanlar məhz müstəqilliyimizin nailiyyətləri kimi dəyərləndirilmişdir.

28 May - Respublika Günü ərəfəsində rayon icra hakimiyyətinin başçısı Əziz Əzizov, hüquq-mühafizə orqanlarının rəhbərləri, geniş ictimaiyyətin nümayəndələri ulu öndər Heydər Əliyevin möhtəşəm abidəsini ziyarət etmiş, önünə gül dəstələri qoymuşlar.

Bayram təntənələri rayon mərkəzindəki "Gənclər istirahət mərkəzi"ndə davam etdirilmişdir. Bədii özfəaliyyət kollektivləri, rəqs qrupları al-əlvan bəzədilmiş mərkəzdə rayonun çoxsaylı sakinləri qarşısında maraqlı proqramla çıxış etmişlər.

Qeyd edək ki, şənliklərin keçirildiyi ərazidə - Cəlilabad şəhərinin ən hündür yerində Dövlət Bayrağı meydanı inşa edilməkdədir. Tezliklə burada üçrəngli, ay-ulduzlu bayrağımız əzəmətlə dalğalanacaq və hər bir sakinin qəlbini hədsiz qürur və iftixar duyğuları ilə döyündürəcəkdir.

Astara

Azərbaycan Xalq Cümhuriyyətinin 93-cü ildönümünün qeyd edildiyi günlərdə Astaranın rayon mərkəzindəki Dövlət Bayrağı meydanında hər an böyük qələbəlik olmuş, sakinlər 20 il öncə müstəqilliyinə yenidən qovuşmuş və sürətlə inkişaf edən bir dövlətin vətəndaşları olmalarından qürur duymuş, şənlənmişlər.

Rayon icra hakimiyyətində ümumrayon tədbiri yaddaqalan olmuşdur. İcra hakimiyyəti başçısının birinci müavini Məzahim Hüseynov məruzə ilə çıxış etmişdir. O, müstəqillik tariximizin ilk dövrlərini ətraflı təhlil etmiş, 23 ay ərzində müsəlman şərqində ilk demokratik dövlətin yaradılması, rəmz və atributların qəbulu, beynəlxalq əlaqələrin qurulması, milli ordunun təşəkkülü və digər sahələr üzrə tədbirlər barədə geniş məlumat vermişdir. Natiq qeyd etmişdir ki, 1993-cü ildə ulu öndər Heydər Əliyev hakimiyyətə qayıtdıqdan sonra Azərbaycanın dövlət müstəqilliyi daha da möhkəmlənmiş, əbədi və sarsılmaz olmuşdur.

Astara Pedaqoji Kollecinin direktoru Ə.Həmzəyev, təhsil şöbəsi müdirinin müavini F.Həsənov, mərkəzi kitabxananın direktoru N.Fərəməzov ürək sözlərini söyləmiş, bayram sevinclərini bölüşmüşlər.

Əli NƏCƏFXANLI

Xalq qəzeti.- 2011.- 2 iyun.- S. 6.