Ermənistan-Azərbaycan, Dağlıq Qarabağ münaqişəsinin nizamlanmaması dünyada hamını narahat edir

Minsk qrupuna üzv olan ölkələrin dövlət başçılarının son bəyanatı da bu narahatlığın ifadəsidir

Azərbaycanın ərazi bütövlüyü bərpa olunmalıdır, işğala son qoyulmalıdır və bu məsələ tezliklə öz həllini tapmalıdır. Çünki Azərbaycan xalqının səbri tükənməz deyil.

İlham ƏLİYEV,

Azərbaycan Respublikasının Prezidenti

Beynəlxalq ictimaiyyətin ikili standartlardan əl çəkə bilməməsinə, hətta, bir çox siyasi qüvvələrin qərəzli mövqe nümayiş etdirməsinə baxmayaraq Azərbaycan Respublikası öz ərazi bütövlüyünün bərpa edilməsi üçün səylərini gündən-günə artırır.

Çünki işğal olunmuş torpaqların ermənilərdən azad edilməsi bizim üçün təkcə siyasi və iqtisadi əhəmiyyət kəsb etmir. Burada daha çox mənəvi-psixoloji amillər vardır. Belə ki, Azərbaycan torpaqlarının əvvəlki əsrlərdə parçalanması, zəbt olunması prosesi gedəndə dünya xəritəsində müstəqil Azərbaycan dövləti yox idi. İndi isə nəinki regionda, hətta, bütün dünyada sözü kəsərli olan, güclü iqtisadiyyata, müasir hərbi texnika ilə təchiz olunmuş Silahlı Qüvvələrə, böyük elmi-texniki potensiala, qətiyyətli Ali Baş Komandana və ən başlıcası möhtəşəm ümumxalq dəstəyi qazanmış iqtidara malik olan Azərbaycan dövləti mövcuddur. Bütün bu məqamlar isə bizə imkan verir ki, işğal altında olan torpaqlarımızı istənilən yolla düşmən tapdağından azad edək. Ulu öndər Heydər Əliyevin dediyi kimi, bu məsələni həll edə bilməsək bizi əcdadlarımızın ruhu da bağışlamaz, gələcək nəsillər də. Odur ki, Azərbaycan dövləti regionun ən ağrılı problemi olan Dağlıq Qarabağ münaqişəsinin ədalətli şəkildə həllini tezləşdirmək üçün bütün vasitələrdən istifadə edir.

Azərbaycan rəhbərliyinin son zamanlar bu istiqamətdə siyasi-diplomatik fəallığını artırması dünya ictimaiyyətini daha konkret addımlar atmağa məcbur edir. "Böyük səkkizlik" ölkələrinin Fransada keçirilən sammiti çərçivəsində görüşmüş ABŞ, Fransa və Rusiya prezidentləri toplantı çərçivəsində Dağlıq Qarabağ münaqişəsinin nizamlanması barədə də müzakirələr aparmış, birgə bəyanat vermişlər. Barak Obama, Nikola Sarkozi və Dmitri Medvedevin imzaladığı bəyanatda Azərbaycan və Ermənistan prezidentləri gələn ay keçiriləcək növbəti görüşdə münaqişənin tənzimlənməsinin əsas prinsipləri üzərində işi tamamlamağa çağırılır. Vasitəçi ölkələrin dövlət başçılarının qənaəti belədir ki, münaqişənin dinc tənzimlənməsi istiqamətində addım atılmasının vaxtı çatmışdır: "Əsas prinsiplərin bu il martın 5-də Soçidə müzakirə edilmiş sonuncu versiyası geniş əhatəli dinc tənzimlənmənin hazırlanması üçün ədalətli və tarazlaşdırılmış təməl yaradır". Yeri gəlmişkən, Birləşmiş Ştatların Azərbaycandakı səfiri Mətyu Brayza kütləvi informasiya vasitələrinə verdiyi müsahibədə məxsusi olaraq qeyd edib ki, prezidentlərin Kazan görüşünün ümidverici nəticələri gözlənilir.

Bu, danılmaz faktdır ki, indi dünyanın bütün qütblərində mövcud olan beynəlxalq təşkilatlar və aparıcı dövlətlər Azərbaycanın ərazi bütövlüyünü tanıyır, Dağlıq Qarabağ münaqişəsinin Azərbaycanın ərazi bütövlüyünün bərpası şərtiylə həll edilməsi zərurətini açıq mətnlə, birmənalı şəkildə bəyan edirlər. Ancaq o da faktdır ki, münaqişənin bu şəkildə həllinə əngəl törədən qüvvələr də az deyil və torpaqlarımızın hələ də işğal altında qalmasının əsas səbəbi məhz həmin qüvvələrdir. Rəsmi Bakının yeritdiyi xarici siyasət, xüsusən, neft diplomatiyası Azərbaycanın dostlarını gündən-günə çoxaltsa da, qara qüvvələr, ermənipərəst siyasətçilər, xüsusən, çörəyi konfliktlərdən çıxan təşkilatlar hələ çoxdur və Azərbaycan indi məhz həmin qüvvələrə qarşı mübarizə aparır.

Nazirlər Kabinetinin 2011-ci ilin birinci rübünün sosial-iqtisadi inkişafının yekunlarına həsr olunmuş iclasında giriş nitqi ilə çıxış edən Prezident İlham Əliyev respublikamızın sosial-iqtisadi inkişafı ilə yanaşı ölkəmizin hərbi potensialının artırılması zərurətini, bu istiqamətdə kifayət qədər işlərin görüldüyünü vurğuladı. Qeyd edildi ki, ölkəmizdə hərbi sənaye potensialı sürətlə inkişaf edir. Bu sahənin genişləndirilməsi həm sənayenin inkişafına xidmət edir, həm də ölkənin hərbi qüdrətinin artmasına. Ancaq dövlət ilk növbədə Azərbaycanın hərbi potensialının bilavasitə daxili imkanlar hesabına gücləndirilməsinə çalışır. Elə Müdafiə Sənayesi Nazirliyi də bu məqsədlə yaradılıb. Təsadüfi deyil ki, bu gün Azərbaycan Müdafiə Sənayesi Nazirliyinin müəssisələrində 430 adda hərbi təyinatlı məhsullar istehsal olunur və bu sahədəki işlərin ən müasir texnologiyalar əsasında qurulması üçün konkret layihələr reallaşdırılır.

Ancaq Prezident İlham Əliyevin əsas məqsədlərindən biri bütövlükdə bölgədə təhlükəsizlik tədbirlərinin gücləndirilməsi işində Azərbaycanın müsbət rolunun genişləndirilməsidir. Çünki ölkəmiz bölgədə sabitləşdiricilik missiyasını öz üzərinə götürmüşdür. Dövlətimiz bütün sahələrdə olduğu kimi bu sahədə də öz uğurlu siyasətini aydan-aya, gündən-günə genişləndirir. Ona görə də biz beynəlxalq ictimaiyyətdən haqq, ədalət, obyektivlik, prinsipiallıq, tərəfsizlik tələb edəndə səsimizin bütün tribunalardan eşidilməsinə nail oluruq. Prezident İlham Əliyev Azərbaycanın səsini bütün dünyanın qulağına çatacaq şəkildə qətiyyətlə söyləyir:

"Ermənistan-Azərbaycan, Dağlıq Qarabağ münaqişəsinin həlli işində mövqeyimiz birmənalıdır. Beynəlxalq hüquq normaları tam şəkildə təmin edilməlidir. BMT Təhlükəsizlik Şurasının 4 qətnaməsi qeyd-şərtsiz icra edilməlidir. Necə ki, Liviya ilə bağlı BMT Təhlükəsizlik Şurasının qətnamələri bir neçə saatdan sonra icra edilməyə başlanmışdır. Yəni, mən bu barədə artıq fikrimi bildirmişəm. Bir daha demək istəyirəm ki, bu, ədalətsizlikdir, bu, ikili standartlardır və bu ayrı-seçkiliyi heç bir səbəblə izah etmək mümkün deyildir. Çünki ermənilər tərəfindən azərbaycanlılara qarşı soyqırımı - genosid törədilmişdir. Xocalı soyqırımı törədilmişdir. Ermənilər tərəfindən günahsız insanlar vəhşicəsinə qətlə yetirilmişdir. Nədənsə o zaman dünya birliyi bizim dərdimizə biganə qalmışdır. Azərbaycanın beynəlxalq birlik tərəfindən tanınmış əraziləri uzun illərdir işğal altındadır. Təhlükəsizlik Şurasının 4 qətnaməsi qəbul edilib, ATƏT-in qərarları, Avropa Parlamenti, Avropa Şurası, İslam Konfransı Təşkilatı, NATO-nun qərarları - bütün bu qərarlar işğal olunmuş torpaqlardan erməni qoşunlarının çıxarılmasını tələb edir. Ancaq məsələ öz həllini tapmır. Belə olan halda Azərbaycan vətəndaşları haqlı olaraq sual verirlər ki, nə üçün bizə qarşı münasibət fərqlidir?"

Yeri gəlmişkən, həmin narahatlıq artıq dünya ictimaiyyəti tərəfindən də açıq şəkildə ifadə edilir. Məsələn, ABŞ Dövlət katibinin müavini Filip Qordon Senatda çıxışı zamanı erməni lobbisinin və erməni diasporunun gözü qabağında söyləyib ki, Dağlıq Qarabağ münaqişəsi ilə bağlı sülh sazişinin layihəsini hazırlamağın vaxtıdır. Ermənistan isə bu layihənin ərsəyə gəlməsini hər vasitə ilə əngəlləməyə çalışırdı. Rəsmi İrəvanın münaqişənin həllinə mane olmaq cəhdlərinə baxmayaraq Avropa parlamentinin sədri Yeji Buzek bilavasitə Ermənistanda olarkən bəyan edib ki, bu münaqişə tezliklə, özü də ölkələrin ərazi bütövlüyünün bərpası şərtiylə həll edilməlidir. Ermənistan rəsmiləri isə beynəlxalq ictimaiyyətin indiki iradəsini yenə də şantajla qarşılamağa çalışırlar. Guya Azərbaycan neft sektorundan əldə etdiyi kapital vasitəsiylə ermənilərin hüquqlarının pozulmasına nail olur. Bu arqumentin cəfəngiyyat olduğunu artıq dünyada hamı bilir.

Azərbaycan xalqının arzu-istəklərini və haqlı tələblərini ifadə edən Prezident növbəti dəfə qətiyyətlə bildirir ki, münaqişənin həllində ölkəmizin, xalqımızın və dövlətimizin mövqeyi birmənalıdır. Bu mövqe nəinki bizim arzularımıza, eləcə də beynəlxalq hüquqa əsaslanır və beynəlxalq hüquq hələ ki, dünyada aparıcı rola malikdir. Bütün bunları əsas götürən Azərbaycan rəhbərliyi Dağlıq Qarabağ münaqişəsinin ədalətli şəkildə, üstəlik tezliklə həll olunması üçün öz səylərini artırır və bu səylərin nəticəsi ümidvericidir. Prezident İlham Əliyev yuxarıda qeyd etdiyimiz nitqində həmin ümidləri bu şəkildə ifadə edir: "Hazırda danışıqlar masasında olan təkliflər Azərbaycanın ərazi bütövlüyünün bərpasını təmin edəcəkdir. Eyni zamanda, məsələ öz həllini Dağlıq Qarabağda yaşayan insanların və oraya mütləq qayıdacaq Azərbaycan vətəndaşlarının muxtariyyət,özünüidarəetmə statusunda yaşamasını təmin edə biləcək prinsiplər əsasında tapa bilər. Bir daha demək istəyirəm ki, Dağlıq Qarabağa müstəqilliyin verilməsi, yaxud da nə vaxtsa müstəqilliyin verilməsi mümkünsüzdür. Bu, danışıqlar mövzusu deyildir və olmayacaqdır".

Qeyd edək ki, 2011-ci ilin birinci rübündə Azərbaycan tərəfinin təşəbbüsü ilə ATƏT-in qiymətləndirmə missiyası işğal olunmuş torpaqlarımıza səfər etmişdir. Ermənilərin bütün cəhdlərinə baxmayaraq missiyanın Dağlıq Qarabağdan kənardakı bütün rayonlara səfəri baş tutmuş və münaqişənin həllinə müsbət təsir edəcək hesabat hazırlanmışdır. Ən başlıcası hesabatda açıq-aydın göstərilir ki, işğal olunmuş ərazilərdəki bütün infrastruktur ermənilər tərəfindən başdan-başa dağıdılıbdır. Bu isə ermənilərin kimliyinin dünya ictimaiyyətinə çatdırılması baxımından növbəti imkandır.

Əminik ki, Azərbaycan tərəfinin göstərdiyi qətiyyət və dünya ictimaiyyətinin iradəsi nəticəsində Ermənistan ən azı öz xalqının mənafeləri baxımından destruktiv mövqelərdən əl çəkəcək, münaqişənin ədalətli şəkildə həlli üçün irəli sürülən təkliflərlə razılaşacaqdır.

İttifaq MİRZƏBƏYLİ

Xalq qəzeti.- 2011.- 5 iyun.- S. 4.