Ümumrespublika "Vətəni tanı" kampaniyasının növbəti turu Balakən və Zaqatalada keçirilib

"Vətəni tanı" ümumrespublika kampaniyası bu dəfə Balakən gənclərinin bilik və bacarıqlarını sınağa çəkib. Azərbaycan Respublikası Gənclər Təşkilatları Milli Şurasının təşkilatçılığı ilə keçirilən treninq Balakəndə də böyük maraqla qarşılanıb.

Tədbir Balakən şəhəri, Zərifə Əliyeva adına 3 saylı şəhər orta məktəbində baş tutub. Rayonun 14-18 yaşlı 150 gəncinin bir qismi keçməcələrdən (puzzle) ibarət olan Azərbaycan xəritəsini, digərləri isə kampaniyanın miras.az saytında yerləşdirilən elektron formadakı xəritəni toplayıb. ARGTMŞ-ın idarə heyətinin üzvü və həmçinin kampaniyanı Balakən rayonunda həyata keçirən işçi qrupunun rəhbəri Heydər Atayev gənclər qarşısında çıxış edərək bildirib ki, bu gün ölkəmizin bölgələrini tanımaq hər bir gəncin mənəvi vətəndaşlıq borcudur. Gənclər arasında sorğu keçirən işçi qrupunun üzvlərinə bildirilib ki, bu cür tədbirlərin keçirilməsi vətənpərvərlik ruhunun aşılanması ilə yanaşı, gənclərdə coğrafi biliklərin inkişafına güclü təsir edir.

"Vətəni tanı" ümumrespublika kampaniyasının digər turu zaqatalalı gəncləri bir araya gətirib. Əsas məqsədlərindən biri cəmiyyətin aktiv təbəqəsi hesab edilən gənclərdə ölkəmizin ərazi bütövlüyü məsələsinə aşkar dəstəyin bir daha nümayiş etdirilməsi olan kampaniyada zaqatalalı gənclər də aktiv iştirak ediblər. Milli Şuranın idarə heyətinin üzvü Heydər Atayevin sözlərinə görə Zaqatala rayonunda da 150-dən çox gənc treninqdə iştirak edib. "Seçim turu uğurla yekunlaşıb. İki nəfər qalib müəyyən edilib. Onlar respublika turunda rayonu təmsil edəcəklər."

Xatırladaq ki, "Vətəni tanı" ümumrespublika kampaniyası 12000 gənci bu layihəyə cəlb etməyi qarşısına məqsəd qoyub və artıq onun yarıdan çoxu yerinə yetirilib.

Qeyd edək ki, rəsmi olaraq Gənclər və İdman, Təhsil, Rabitə və İnformasiya Texnologiyaları nazirlikləri, Torpaq Xəritəçəkmə Komitəsi layihəni dəstəkləyir. Həmçinin "AVA" Skandinaviya klinikası və FİXED Börders kampaniyaya dəstək verir.

Elçin ABBASOV

Xalq qəzeti.- 2011.- 8 iyun.- S. 8.