Suraxanı rayonunda Dövlət Qulluqçuları Günü qeyd olunmuşdur

Suraxanı rayonundakı Heydər Əliyev Mərkəzində Dövlət Qulluqçuları Günü qeyd edilmişdir. Tədbir iştirakçıları əvvəlcə Heydər Əliyev parkında ümummilli liderin abidəsini ziyarət etmiş, önünə tər güllər qoymuşlar. Sonra Heydər Əliyev Mərkəzi ilə tanış olan rayonun dövlət qulluqçuları elektron lektoriya zalında "Millət atası" filminə baxmışlar.

Tədbirdə çıxış edən rayon icra hakimiyyətinin başçısı İlqar Abbasov bildirmişdir ki, ölkəmizin dövlət qulluqçuları artıq 6-cı ildir ki, özlərinin peşə bayramını qeyd edirlər. 2000-ci ildə ümummilli lider Heydər Əliyevin imzaladığı "Dövlət qulluğu haqqında" Qanun əsasında Azərbaycan Prezidenti İlham Əliyevin 2006-cı il 25 may tarixli sərəncamı ilə təsis edilmiş həmin peşə bayramı bu mühüm sahədə çalışan şəxslərə hər il böyük sevinc bəxş etməklə yanaşı, həm də dövlət qulluqçularının bütün xalq qarşısında mənəvi hesabatına çevrilmişdir.

Rayon icra hakimiyyətinin başçısı vurğulamışdır ki, müstəqillik yolunda uğurla irəliləyən Azərbaycanın bugünkü qələbələrinin siyasi və iqtisadi əsaslarını yaratmış ulu öndər Heydər Əliyevin həyat yolu, dövlətçilik fəaliyyəti xalqa fədakarcasına xidmət nümunəsi olmuşdur. Heydər Əliyevin bütün insani keyfiyyətləri etalon sayıldığı kimi, idarəçilik sahəsində fəaliyyəti də dövlət qulluqçusunu səciyyələndirən ən yüksək meyardır.

Rayon rəhbəri çıxışında eyni zamanda bildirmişdir ki, ulu öndərin dövlətçilik ənənələri və dövlət qulluqçusu üçün olduqca zəruri olan keyfiyyətləri ölkə Prezidenti İlham Əliyev tərəfindən bu gün yaşadılır və böyük bacarıqla davam etdirilir. Uğurlu dövlət quruculuğu siyasətinin ardıcıl həyata keçirilməsi nəticəsində respublikamızda dövlət idarəetmə sisteminin, o cümlədən dövlət qulluğunun təkmilləşdirilməsi üçün mühüm işlər görülür.

Azərbaycan Respublikasının Prezidenti İlham Əliyev vətəndaşların müraciətlərinə daim böyük diqqət və qayğı ilə yanaşır və bunu hər bir dövlət orqanından, məmurundan qətiyyətlə tələb edir.

Natiq həmçinin qeyd etmişdir ki, dövlət qulluqçularının fəaliyyəti həmişə cəmiyyətin diqqət mərkəzində olur, onların hər bir addımı, hərəkəti sıravi vətəndaşlar tərəfindən diqqətlə izlənilir, bütövlükdə hər bir vətəndaş öz gündəlik həyatında rastlaşdığı problemlərin həllində onlara böyük ümidlər bəsləyir. Dövlət qulluqçularının yerinə yetirdikləri əsas funksiyalardan biri də vətəndaşların müraciətlərinə baxılması, onların qəbulu, vətəndaşların qaldırdıqları problemlərin ümumiləşdirilməsi və həlli yollarının tapılmasıdır.Məlumdur ki, vətəndaşlar dövlətin idarə olunmasında məhz öz müraciətləri vasitəsi ilə iştirak edirlər.Onların müraciətləri cəmiyyətdəki problemlərin üzə çıxarılmasında mühüm vasitədir.

İlqar Abbasov çıxışının sonunda rayonda çalışan dövlət qulluqçularını peşə bayramı münasibətilə təbrik etməklə yanaşı, bir daha vurğulamışdır ki, onlar təmsil etdikləri dövlət orqanının etimadını, ən başlıcası, hər bir vətəndaşın onlara bəslədiyi ümidləri tam doğruldacaqlar.

Tədbirdə bir qrup dövlət qulluqçusuna rayon icra hakimiyyəti başçısının fəxri fərmanları verilmişdir.

Vaqif BAYRAMOV

Xalq qəzeti.- 2011.- 26 iyun.- S. 5.