Koroğlunun Çənlibelə qayıdışı

15 iyun - Qurtuluş Günü respublikamızın teatr kollektivlərində yeni tamaşalarla qeyd olundu. Bu günlərdə Naxçıvan Dövlət Musiqili Dram Teatrının kollektivi Azərbaycan Dövlət Gənc Tamaşaçılar Teatrının səhnəsində Adil Babayevin ümummilli liderimiz Heydər Əliyevin əziz xatirəsinə həsr olunmuş "Koroğlunun Çənlibelə qayıdışı" əsərinin tamaşasını göstərdi. "O qızı hər gün görürsən", "Sarı gəlin" kimi televiziya tamaşalarından yaxşı tanınan Adil Babayevin bu əsəri Bakıda oynanılan ilk tamaşadır.

1882-ci ildən fəaliyyət göstərən Naxçıvan teatrı Dövlət başçımızın sərəncamı ilə 2008-ci ildə özünün 125 illik yubileyini böyük təntənə ilə qeyd etmişdi. Tarixi mövzulara geniş yer verən teatr kollektivi öz repertuarında müasir mövzulara da yer ayırıb. Belə ki, N.Həsənzadənin "Atabəylər", N.Nərimanovun "Nadir şah", H.Cavidin "Səyavuş", "Topal Teymur", "İblis", C.Məmmədquluzadənin "Dəli yığıncağı" və digər tamaşalar Azərbaycanın əksər bölgələrində nümayiş etdirilib. Naxçıvan teatrı musiqili teatr olduğu üçün öz repertuarında musiqili komediya və operettalara da geniş yer ayırdığını deyən teatrın direktoru və baş rejissoru, respublikanın xalq artisti Kamran Quliyev Üzeyir Hacıbəylinin "O olmasın, bu olsun", "Arşın mal alan", "Ər və arvad" komediyalarının qardaş Türkiyədə, N.Nərimanovun "Nadir Şah" tarixi dramının İran İslam Respublikasında, İ.Əfəndiyevin "Hökmdar və qızı", Hidayətin "Bu dünyanın adamları", H.Cavidin "İblis" tamaşalarının Bakı, Gəncə və Sumqayıt şəhərlərində uğurla göstərildiyini qeyd etdi.

6 illik fasilədən sonra teatr kollektivinin yenidən Bakıya qastrol səfərinə gəlməsinin başlıca səbəbi Adil Babayevin ulu öndərin xatirəsinə həsr etdiyi "Koroğlunun Çənlibelə qayıdışı" əsəridir. Bunun üçün teatrın rəhbəri ilk növbədə dövlət başçımıza, möhtərəm İlham Əliyevə və tamaşanın ərsəyə gəlməsində böyük xidmətləri olmuş Bakı Metropolitetinin rəisi Tağı Əhmədova minnətdarlığını bildirmişdir.

Tamaşadan əvvəl çıxış edən müəllif Adil Babayev bildirmişdir ki, ümummilli lider Heydər Əliyevin əziz xatirəsinə həsr etdiyi eyniadlı poemanı qəlbinin arzusu ilə yazmışdır. Natiq ulu öndərin xalqın təkidi və tələbi ilə ikinci dəfə hakimiyyətə qayıdışından sonra ölkənin xaos və anarxiyadan xilas olduğunu bildirdi. Tamaşanın quruluşçu rejissoru xalq artisti Kamran Quliyev, xalq rəssamı Hüseynqulu Əliyev, musiqi tərtibatçısı Naxçıvan Muxtar Respublikasının əməkdar incəsənət xadimi Şəmsəddin Qasımovdur. Koroğlu rolunda xalq artisti Rza Xudiyev çıxış edir. Telli xanımı əməkdar artist Elmira Kərimova, Aşıq Cününü əməkdar artist Xəlil Hüseynov, Dəmirçioğlunu Teyyub Zeynalzadə, Dədə Qorqudu əməkdar artist Yusif Allahverdiyev ifa etmişlər. Xalq artisti Kamran Quliyev, şair Ramiq Muxtar və başqaları tamaşanı ulu öndərə həsr olunmuş layiqli əsər kimi qiymətləndirmişlər.

Rafiq SALMANOV

Xalq qəzeti.- 2011.- 19 iyun.- S. 7.