Azərbaycan cəmiyyət həyatının bütün sahələrində uğurla inkişaf edir

Eyni zamanda, ölkədə ictimai nəzarət də gücləndirilir

Əgər biz doğrudan da Azərbaycanı müasir ölkə kimi görmək istəyiriksə və bütün sahələrdə inkişafı görmək istəyiriksə, xoşagəlməz hallara qarşı mütləq ciddi mübarizə aparmalıyıq.

İlham ƏLİYEV,

Azərbaycan Respublikasının Prezidenti

Azərbaycanda həyata keçirilən sosial-iqtisadi siyasət mütləq mənada hər bir vətəndaşın həyat şəraitinin yaxşılaşdırılmasına yönəlib. Dövlətin əsas niyyəti ölkəni müasirləşdirmək, yeni infrastruktur layihələrini reallaşdırmaq, bütün regionların bərabər şəkildə inkişaf etdirilməsinə nail olmaq, hər bir insanın hüquq və azadlıqlarının qorunmasının qarantına çevrilmək, demokratik dəyərlərin daha genişmiqyaslı şəkildə tətbiqini təmin etmək, Avropa ailəsinə öz töhfələrimizi verməklə yanaşı, Avropa təcrübəsinin ölkəmiz üçün məqbul olan bütün cəhətlərini qəbul etməkdir. Prezident İlham Əliyev gənc və müstəqil Azərbaycan Respublikasının bütün dünyada demokratik, sivil, dünyəvi dövlət imici qazanmasına nail olmuşdur. Əsası ulu öndər Heydər Əliyev tərəfindən qoyulan dövlətçilik kursunun uğurla davam etdirilməsi nəticəsində "Odlar yurdu" sözün həqiqi mənasında Müstəqil Dövlətlər Birliyi miqyasında öncüllüyünü qoruyub saxlamışdır.

Bu gün dünyanı daha çox maraqlandıran üç əsas məsələ var ki, həmin məsələlərin hamısında Azərbaycan özünəməxsus nümunələr göstərir. Birinci, ölkələrin enerji təhlükəsizliyinin təmin edilməsi. Bu sahədə Azərbaycan dövləti nəinki öz enerji təhlükəsizliyini təmin etmişdir, üstəlik Qafqazın və Avropanın enerji təhlükəsizliyinin təmin edilməsində dünya miqyaslı uğurlara imza atmışdır. Bakı-Tbilisi-Ceyhan neft, Bakı-Tbilisi-Ərzurum qaz ixrac kəmərlərindən sonra Avropanın və Qərbin maraqlarında olan daha bir neçə müqavilə imzalanmışdır ki, bu da ölkəmizin regiondakı nüfuzunun iti sürətlə artmasını təmin etmişdir.

İkinci önəmli məsələ cəmiyyət həyatında demokratik dəyərlərin daha geniş şəkildə tətbiq edilməsi, əsas insan hüquq və azadlıqlarının qorunmasına nail olunmasıdır. Bu bir həqiqətdir ki, Azərbaycanda ölüm hökmünün icrasının ləğv edilməsi, mətbuat üzərindən senzuranın götürülməsi, siyasi plüralizmə geniş şərait yaradılması, kütləvi informasiya vasitələrinə fəaliyyət sərbəstliyi verilməsi, söz, fikir, sərbəst toplaşmaq azadlıqlarının təmin olunması Azərbaycanla eyni vaxtda müstəqillik əldə etmiş ölkələrə görə bizdə daha yüksək səviyyədədir. Üstəlik, Seçki Məcəlləsi birbaşa Avropa və dünya ekspetlərinin iştirakı ilə hazırlanmış, ölkəmizdə keçirilən bütün seçkilər həm yerli, həm də xarici müşahidəçilərə açıq elan edilmişdir. Bu gün dünyanın ən aparıcı kütləvi informasiya vasitələri Azərbaycandakı söz azadlığından, seçkilərin ədalətli, şəffaf və demokratik şəraitdə keçirilməsindən yazırlar.

Terrorçuluq, zorakılıq və separatçılığa qarşı aparıcı dövlətlərlə birgə mübarizə aparılması da bu gün dünyanın əsas gündəm maddələrindən birini təşkil edir. Azərbaycan dünyanın müxtəlif qaynar nöqtələrinə öz sülhməramlı qüvvələrini göndərməklə, 2001-ci ildə ABŞ-da törədilmiş qanlı terror hadisəsindən sonra yaradılmış antiterror koalisiyasında fəal iştirak etməklə, eyni zamanda beynəlxalq təşkilatların bu istiqamətdə həyata keçirdiyi çoxsaylı layihələrə qoşulmaqla şər qüvvələrə qarşı ümumdünya miqyaslı mübarizəyə öz töhfələrini vermişdir. Yəni, sivil, dünyəvi və demokratik dövlət quruculuğu kursu götürmüş Azərbaycanın daxili və xarici siyasəti dünya ictimaiyyətinin arzu etdiyi səviyyədədir.

Ölkə daxilində həyata keçirilən çoxsaylı dövlət proqramları, irimiqyaslı layihələr və sayı yüzlərlə hesablanan sosial-iqtisadi tədbirlər bilavasitə əhalinin həyat səviyyəsinin yaxşılaşdırılmasına xidmət edir. Son yeddi ildə ölkədə 9 milyondan çox yeni iş yerinin yaradılması, yoxsulluq həddinin 49 faizdən 9 faizədək azaldılması, 2 mindən çox yeni iş yerinin açılması, ölkə ərazisində bütün bölgələrin elektrik enerjisi, təbii qaz, içməli su ilə dayanıqlı şəkildə təmin olunması bilavasitə dövlətin öz vətəndaşına göstərdiyi diqqət və qayğının nəticəsidir. Azərbaycan Prezidenti İlham Əliyev təkcə 2010-cu ildə bölgədə yaşayan ölkə vətəndaşları ilə görüşmək üçün 27 dəfə əyalət şəhərlərinə və rayonlara səfər etmişdir. Ötən il ölkəmiz üçün yeni əsrin ən böyük iqtisadi layihələrindən olan Oğuz-Qəbələ-Bakı su kəməri layihəsi reallaşdırılmışdır ki, bu da heç bir kommersiya məqsədi güdməyən, sırf dövlət vəsaiti ilə ərsəyə gələn layihə kimi regionun bütün ölkələrində böyük maraqla qarşılanmışdır. Bu layihə paytaxt əhalisinin içməli suya olan tələbatını ödəyəcək. Bununla yanaşı, ökədə hər bir kəsin Prezidenti olacağına söz vermiş İlham Əliyev respublikanın 18 aran rayonunun 156 yaşayış məntəqəsində sutəmizləyici qurğuların quraşdırılmasına nail olmaqla paytaxt sakini ilə ucqar kənd sakini arasında heç bir fərqin qoyulmayacağını sübut etmişdir.

Bununla yanaşı, Prezident İlham Əliyev bütün dünyada dərin kök salmış rüşvətxorluq, korrupsiya və digər halların Azərbaycanda geniş qol-qanad açmasına imkan verilməyəcəyini bəyan etmişdir. "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrasının ikinci ilinin yekunlarına həsr olunmuş konfransdakı yekun nitqində həmin məsələyə toxunan Prezident İlham Əliyev bu neqativ hallara qarşı mübarizədə xalqın dövlətə kömək etməsini vacib saymışdır: "Ölkəmiz üçün, o cümlədən sahibkarlığın inkişafı üçün vacib olan məsələlərdən biri də Azərbaycanda korrupsiya və rüşvətxorluğa qarşı mübarizəni gücləndirməkdir... Korrupsiya və rüşvətxorluq böyük bəladır, böyük yaradır və bizim üçün böyük ləkədir. Elə etməliyik ki, bütün sahələrdə şəffaflıq təmin edilsin. Burada, əlbəttə ki, həm inzibati tədbirlər görülür və görüləcəkdir. Eyni zamanda biz struktur islahatlarını elə aparmalıyıq ki, rüşvətxorluq tamamilə aradan götürülsün".

Son günlər kütləvi informasiya vasitələrinin yaydığı çoxsaylı xəbərlər bir daha təsdiq edir ki, Azərbaycan dövləti korrupsiya və rüşvətxorluq kimi ağır bəlaya qarşı mübarizədə öz qətiyyətini və iradəsini tamamilə ortaya qoymuşdur. Ölkə əhalisi iqtisadiyyatın inkişafına mane olan bu bəlaların kökünü tamamilə kəsmək istiqamətində dövlətin həyata keçirdiyi məqsədyönlü tədbirləri rəğbətlə qarşılayır və dəstəkləyir.

İttifaq MİRZƏBƏYLİ

Xalq qəzeti.- 2011.- 5 mart.- S. 4.