Bakı şəhərinin ətraf kənd və qəsəbələrinin inkişafı daim diqqət mərkəzində saxlanılır

Azərbaycanda aparılan quruculuq işləri gündən-günə vüsət alır. Ölkəmiz getdikcə inkişaf edir, güclənir. Bu tərəqqi respublikamızın bütün şəhər və qəsəbələrində olduğu kimi, paytaxtımızda da özünü qabarıq büruzə verir. Son illər Bakı şəhərində çox böyük tikinti - abadlıq işləri aparılmışdır.Prezident İlham Əliyevin paytaxtımızın müasir meqapolisə, böyük şəhərə çevrilməsi səyi öz nəticəsini verməkdədir.

Azərbaycan Prezidenti İlham Əliyevin sədrliyi ilə Bakı şəhərinin və paytaxtətrafı qəsəbələrin sosial-iqtisadi inkişafına dair müşavirədə bu barədə ətraflı söhbət getmişdir. Dövlət başçımız demişdir: "Son bir neçə il ərzində şəhərimizdə 23 yol ötürücüsü, körpülər, tunellər istifadəyə verilmişdir, yolların genişləndirilməsi layihələri icra edilmişdir. Harada ki, yollar yox idi bir çox hallarda orada yeni yollar salınmışdır. Elə bil yeni damarlar açılmışdır ki, yol hərəkəti daha da rahat olsun.

Bununla bərabər, şəhərimizdə 32 piyada keçidi tikilmişdir. Əvvəlki illərdə tikilmiş bütün keçidlər bərpa olunmuşdur və bu keçidlər bu gün memarlıq əsərləridir. Bəzilərində eskalatorlar quraşdırılıb ki, insanların rahatlığı üçün şərait yaradaq. Bütün piyada keçidlərimiz ən yüksək standartlara cavab verir. Piyada keçidlərinin inşası davam etdirilir. Həm şəhərin mərkəzində, həm də yeni yolların salınması ilə əlaqədar bu piyada keçidlərinin tikintisinə daha da böyük ehtiyac yarandı. Çünki yollar genişləndikcə, əlbəttə ki, insanların o yollardan rahat keçməsi üçün əlavə şərait yaradılmalı idi.

Bakıda bu il Nəqliyyatın İntellektual İdarə Edilməsi Mərkəzi istifadəyə veriləcəkdir. Bu mərkəz də dünya standartları səviyyəsində qurulur və bizə imkan verəcək ki, yol hərəkətini tənzimləmək üçün ən qabaqcıl texnologiyalardan istifadə edək. Beləliklə, şəhərdə tıxac problemlərinin həlli üçün əlavə imkanlar yaranacaqdır.

Bakı şəhərinin, ətraf kənd və qəsəbələrin inkişafı ilə bağlı sərəncamın imzalandığı gündən bir sıra sistemli, kompleks xarakterli layihələr işlənib hazırlanmış və uğurla həyata keçirilmişdir. Daha dəqiq desək, adıçəkilən bölgənin qaza, suya, elektrik enerjisinə olan tələbatının ödənilməsi, küçə və məhəllədaxili işıqlandırma sistemlərinin qurulması, ictimai nəqliyyatın fasiləsiz işləməsi, sosial təyinatlı obyektlərin - məktəblərin, uşaq bağçalarının, xəstəxanaların, mədəniyyət evlərinin tikintisi və bərpası, müasir avadanlıqla təchiz edilməsi ilə bağlı xeyli işlər görülmüşdür.

Şübhəsiz ki, enerji təminatının tam həlli, kanalizasiya sistemlərində yeni təmizləyici qurğuların qurulması, qəsəbədaxili xidmət obyektlərinin mədəni-məişət, texniki, tibbi avadanlıqla təmin edilməsi, həmçinin, idman qurğularının istifadəyə verilməsi gələcəkdə bu bölgədə turizmin inkişafı üçün münbit şərait yaradır. .."

Müşavirədə milli mədəni irsimizin mühüm tərkib hissəsi sayılan abidələr, məbədlər və bu qəbildən olan digər zəngin memarlıq nümunəsi sayıla bilən tikililərin bərpa edilərək öz əvvəlki görünüşünə qaytarılması barədə də danışılmışdır.Göstərilmişdir ki, görülən bu işlərdə Heydər Əliyev Fondunun prezidenti, Milli Məclisin deputatı Mehriban xanım Əliyevanın böyük əməyi vardır.Mehriban xanım Əliyeva milli və vətəndaş təəssübkeşliyi, mədəni irsimizə göstərdiyi qayğı nəticəsində respublikamızın digər bölgələrində olduğu kimi, Bakıda, şəhərətrafı qəsəbə və kəndlərdə də insanların dərin rəğbətini qazanmışdır.

Müşavirədə səslənən və diqqəti çəkən bir neçə məqama da münasibət bildirmək istərdim. Əvvəla onu deyim ki,paytaxtətrafı qəsəbələrin hər birinin oxşar cəhətləri ilə yanaşı, həm də özünəməxsusluğu və bənzərsizliyi hamımıza məlumdur.Başqa sözlə, hər bir kəndin və onun sakinlərinin uzun illər formalaşmış spesifik xüsusiyyətləri, etik davranış qaydaları, ənənəvi peşə, sənət və məşğulluq sahələri vardır.Belə halda ,təbii ki, həmin yaşayış sahələrində müvafiq layihələr reallaşdırılarkən bu cəhət xüsusilə nəzərə alınmalıdır. Bu isə müşavirədə deyildiyi kimi, ümumi işimizin xeyrinə olardı.

Diqqəti bir məsələyə də yönəltmək istərdim. Hamımız bilirik ki, Bakı şəhəri qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair tədbirlər proqramının həyata keçirilməsində işsizlik problemi və onun həlli yolları strateji, prioritet xarakter daşıyırdı. Bu gün artıq məlumdur ki, həmin tədbirlər proqramının icrası ilə bağlı çoxsaylı tədbirlər həyata keçirilmiş,müsbət nəticələr əldə edilmişdir.Ümumiyyətlə, bu sahədə kifayət qədər müsbət dəyişikliklər baş vermişdir. Yerli əhali üçün əvvəllər də, hazırda da ənənəvi sayılan məşğulluq sahələrinin - heyvandarlığın və balıqçılığın inkişafı, müxtəlif çeşidli kənd təsərrüfatı məhsullarının yetişdirilməsi, tətbiqi sənət növlərindən sayılan zərgərliyin və xalçaçılığın inkişafı danılmazdır.

Müşavirədə həmçinin bildirilmişdir ki, sözügedən istiqamətdə hələ görüləcək işlər az deyildir. Məsələn, zəfəran yetişdirilməsi ilə bağlı məsələyə nəzər salaq.Halbuki tarixi təcrübə məhz bu problemin həllində bizə çıxış yolunu göstərir. Həqiqəti özündə tam əks etdirən tarixi mənbələrə istinadən deyə bilərik ki, təkcə Abşeronun Bilgəh qəsəbəsində vaxtilə becərilən nadir və sağlamlıq üçün olduqca əhəmiyyətli sayılan zəfəran bitkisi, tərkibində olduğumuz çar Rusiyasının, sonralar isə Sovetlər Birliyinin tələbatını nəinki ödəyir, hətta xaricə qızıl pula satılırdı.

Müşavirədə digər məqamlara da diqqət yetirilmişdir.Göstərilmişdir ki, bir vaxtlar Bakının kənd və qəsəbələri paytaxtın ağartı, meyvə-tərəvəz və bostan məhsullarına olan tələbatını tam və dolğun şəkildə ödəyirdi. Bu ənənə yenidən bərpa olunmalıdır.

Bildirilmişdir ki, indi Bakıya gələn hər bir qonaq gözəlliyinə görə paytaxtımızı dünyanın ən böyük şəhərləri ilə müqayisə edir. Ancaq paytaxtda aparılan abadlıq-quruculuq işləri, eləcə də şəhərin sürətli inkişaf tempi fonunda paytaxtətrafı kənd və qəsəbələrin sosial-iqtisadi və mədəni inkişafı sahəsində əldə edilmiş uğurlar o qədər də ciddi nəzərə çarpmır. Bununla belə, dövlətimizin başçısının Bakı şəhərinin kənd və qəsəbələrinin sosial-iqtisadi inkişafının sürətləndirilməsinə dair imzaladığı sərəncam əsasında qəbul edilən konkret proqram və gündəlik diqqəti bu problemin tezliklə həllinə əsaslı zəmin yaradır.

Azərbaycan Prezidenti İlham Əliyev müşavirədə Bakı şəhərinin və paytaxtətrafı qəsəbələrin sosial-iqtisadi inkişaf məsələlərinin bundan sonra da diqqət mərkəzində saxlanılacağını bildirmişdir. Dövlət başçısı demişdir ki, Bakı qəsəbələrinin inkişafına tam şəkildə nail olunmalıdır...Burada həm infrastruktur, həm sənayeləşmə, iş yerləri, yollar,kommunal sahə-bütün bu məsələlərə kompleks şəkildə yanaşılmalıdır.

Ölkə Prezidenti yekun nitqində paytaxt sakinlərinin hər biri üçün maraqlı olan bir məqama da toxunmuşdur.Dövlət başçısı demişdir:" Bakımızın inkişafı davam edir, şəhərimiz gözəlləşir, abadlaşır. Hazırda yeni böyük layihə icra edilməyə başlamışdır - "Ağşəhər" layihəsi. Bu layihənin də çox böyük rəmzi mənası vardır. Çünki tarixi "qaraşəhər" adlandırılan ərazidə yeni inkişaf layihəsi təqdim edilibdir. Beynəlxalq sərgilərdə "Ağşəhər" layihəsi təqdim olunur. Böyük bir yaşayış mərkəzi olacaqdır. Kiçik bir şəhərə bərabər inkişaf layihəsi olacaqdır. Yəni, əslində Bakının içində ekoloji cəhətdən ən yararsız yerlərdə, neftlə, neft tullantıları ilə çirklənmiş torpaqlarda müasir, ekoloji təmiz, gözəl yeni bir tikinti layihəsi icra ediləcəkdir. Orada yaşayış, ofis binaları, ticarət mərkəzləri, istirahət parkları tikiləcək, dənizə çıxışı olacaq yeni bulvar salınacaqdır. Yəni, çox böyük vəsait tələb edən layihədir və bu layihəni biz həm dövlət tərəfindən maliyyələşdirəcəyik, həm də ki, əsas yükü özəl sektor öz üzərinə götürəcəkdir. Azərbaycanda özəl sektorun inkişafı, xarici sərmayələrin qorunması üçün bütün lazımi tədbirlər görülüb. "Ağşəhər" layihəsinin icrası, mən hesab edirəm ki, şəhərimizin, ölkəmizin, yeni inkişaf strategiyamızın təzahürü kimi də dünya şəhərlər xəritəsində öz yerini tutacaqdır. Bu layihə, yenə deyirəm ki, daha çox özəl vəsait hesabına icra olunmalıdır. Ona görə biz investorları, o cümlədən xarici investorları cəlb etməliyik və ümid edirəm ki, buna nail olacağıq...".

Göründüyü kimi, bu gün Azərbaycanın regionları ilə yanaşı, paytaxtımız da inkişaf edir, gözəlləşir,insanların rifah halı yaxşılaşır. Bu isə Prezident İlham Əliyevin yeritdiyi sosial-iqtisadi siyasətin real nəticəsidir.

Musa HACIYEV,

kənd təsərrüfatı elmləri namizədi

Xalq qəzeti.- 2011.- 11 mart.- S. 4.