Ölkəmizdə həyata keçirilən sosial-iqtisadi siyasət xalqın maddi rifahının yüksəldilməsinə xidmət edir

Möhtərəm Prezidentimiz cənab İlham Əliyevin sədrliyi ilə Nazirlər Kabinetinin 2010-cu ilin sosial-iqtisadi inkişafının yekunları və 2011-ci ildə qarşıda duran vəzifələrə həsr olunmuş iclasında ölkəmizin son illərdə uğurlu inkişafı, davamlı iqtisadi artım, makroiqtisadi sabitlik, əhalinin sosial müdafiəsinə yönələn konkret proqramlar, yoxsulluğun səviyyəsinin daha da aşağı düşməsi, inteqrasiya əlaqələrinin genişlənməsi təqdirəlayiq nailiyyətlər kimi qeyd edilmişdir. Bütün bunlar onu göstərir ki, ölkəmizdə düzgün və düşünülmüş iqtisadi siyasət yeridilir. Son illərdə respublika əhalisinin rifah halının daha da yaxşılaşdırılması, dövlət tərəfindən sosial öhdəliklərin tam yerinə yetirilməsi, sahibkarlıq subyektlərinin sayının artması, infrastrukturun təkmilləşdirilməsi, yeni iş yerlərinin yaradılması sayəsində işsizliyin minimuma endirilməsi və digər amillər onu deməyə əsas verir ki, dünyada baş verən maliyyə-iqtisadi böhrana baxmayaraq ölkəmiz sürətli inkişafını 2010-cu ildə də davam etdirmişdir. Bu isə ölkədə dinamik inkişafa səbəb olmuşdur.

Dünyanı bürüyən qlobal böhran şəraitində Azərbaycanın əldə etdiyi nailiyyətlər nüfuzlu beynəlxalq təşkilatlar tərəfindən təsdiqlənmiş və BMT-nin İnsan İnkişafına dair növbəti hesabatında 169 ölkə arasında Azərbaycanın 67-ci yer tutması və "orta insan inkişafı ölkələri" qrupunu tərk edərək "yüksək insan inkişafı ölkələri" qrupuna daxil olması buna əyani sübutdur.

Azərbaycanda həyata keçirilən siyasətin uğurlu nəticələri nüfuzlu beynəlxalq təşkilatların hesabatlarında öz əksini tapmışdır. Dünya İqtisadi Forumu tərəfindən 2010-2011-ci illər üçün hazırlanmış "Qlobal rəqabətlilik hesabatı"nda Azərbaycan MDB ölkələri arasında yenə də birinci, makroiqtisadi sabitlik alt indeksi üzrə isə 14 pillə irəliləyərək 139 ölkə arasında 13-cü yerdə qərarlaşmışdır. 2010-cu ildə beynəlxalq müstəvidə uğurlu siyasət aparılmasını vurğulayan cənab İlham Əliyev bildirmişdir ki, Azərbaycanın bölgədə gedən proseslərə təsiri artmaqdadır: "Elə eləməliyik ki, bu proses daim davam etsin, ölkəmiz güclənsin və inkişaf etsin".

Aparılmış uğurlu islahatlar nəticəsində əldə edilmiş makroiqtisadi göstəricilər ölkəmizin inkişaf sürətinə görə qabaqcıl ölkələr sırasında olduğunu göstərir. 2010-cu il ölkədə istehsal olunmuş ümumi daxili məhsulun həcmi əvvəlki ilə nisbətən müqayisəli qiymətlərlə 1,8 milyard manat və ya 5 faiz artaraq 41,6 milyard manata çatmışdır. ÜDM-in hər nəfərə düşən həcmi 4653,3 manat, yaxud 5797,8 ABŞ dolları təşkil etmiş və 2009-cu ilə nisbətən 3,7 faiz artmışdır.

Bütün bunlar onu göstərir ki, aparılan uğurlu siyasətin nəticəsi olaraq respublikamızda davamlı və dayanıqlı inkişafın təmin edilməsində mühüm nəticələr əldə edilmişdir. Bu isə son nəticədə insanların maddi rifahının yüksəlməsində əsas rol oynamışdır. İqtisadiyyatın qeyri-neft sektorunda əlavə dəyərin 7,9 faizlik artımı müşahidə olunmuş, onun ÜDM-də xüsusi çəkisi isə 44,4 faiz təşkil etmişdir.

Son dövrdə həyata keçirilən iqtisadi siyasətin nəticəsi olaraq ölkə sənayesində təsərrüfat subyektləri tərəfindən istehsal olunmuş mal və xidmətlərin həcmi 2009-cu illə müqayisədə 2,6 faiz artaraq 27,4 milyard manat təşkil etmişdir. Belə ki, sənayenin mədənçıxarma və emal sahələrində, o cümlədən onların əsas bölmələrində, qida, neft və kimya sənayesi məhsullarının, metallurgiya, poliqrafiya, avtomobil, elektrik, maşın və avadanlıqların və s. istehsalında artım müşahidə olunmuşdur.

Son illər ölkədə qeyri-neft sektorunun inkişafına xüsusi diqqət yetirilir. Artıq dövlətimiz tərəfindən qeyri-neft sektorunda inkişafın prioritetləri müəyyyən edilmişdir. Bunun nəticəsi olaraq neft-kimya, kimya, metallurgiya,toxuculuq, turizm sahələrinin inkişafında müəyyən uğurlar əldə edilmişdir. 2010-cu ildə neft məhsullarının istehsalında 8,8 faiz artım müşahidə olunmuşdur. Avtomobil benzininin istehsalı 1,2 faiz artaraq 1,3 milyon ton, avtomobillər üçün dizel yanacağının istehsalı 9,1 faiz artaraq 2,4 milyon ton, sürtkü yağlarının istehsalı 1,9 dəfə artaraq 86,7 min ton olmuşdur. İl ərzində 601,1 min ton ağ neft, 241,4 min ton neft bitumu istehsal edilmişdir.

Möhtərəm Prezidentimiz İlham Əliyev Nazirlər Kabinetinin iclasında vurğulamışdır ki, "İqtisadiyyatımızın çoxşaxəli iqtisadiyyat kimi formalaşmasında qeyri-neft sektorunun inkişafı həlledici rol oynayır. Əgər vaxtilə biz bu siyasətə başlamasaydıq indi ölkə iqtisadiyyatı birtərəfli ola bilərdi. Mən yaxşı xatırlayıram, bir neçə il bundan əvvəl bəzi beynəlxalq qurumlarda Azərbaycanda "Hollandiya sindromu" haqqında fikirlər səslənmişdi. Bizim apardığımız siyasət isə onu göstərir ki, artıq Azərbaycan iqtisadiyyatı çoxşaxəli iqtisadiyyat kimi formalaşıb və "Hollandiya sindromu" haqqındakı o fikirlər artıq səslənmir. Biz bu müsbət dinamikanı davam etdirməliyik və 2011-ci ildə sahibkarlığın, özəl sektorun inkişafı üçün, qeyri-neft sektorunun inkişafı üçün əlavə tədbirlər görülməlidir".

Qeyd etmək lazımdır ki, son dövrdə respublikamızda kimya və əczaçılıq məhsulları istehsal edən sahələrə dövlətin qayğısı artmışdır. Ötən il kimya sənayesi, əczaçılıq məhsullarının, rezin və plastmas məmulatlarının istehsalı müəssisələri tərəfindən 240,9 milyon manatlıq məhsul istehsal edilmişdir. 2009-cu illə müqayisədə kimya sənayesində xeyli canlanma müşahidə olunmuş və nəticədə məhsul istehsalı 16,2 faiz artmışdır.

Respublikamızın metallurgiya sənayesinin əvvəlki şöhrəti də özünə qaytarılır. Belə ki, metallurgiya sənayesi və hazır metal məmulatların istehsalı müəssisələrində 2010-cu ildə 171,4 milyon manatlıq məhsul istehsal olunmuş və xidmətlər göstərilmiş, istehsalın həcmi 44,6 faiz artmışdır. İl ərzində bu sahədə 128,6 min ton və ya 1,6 dəfə çox poladtökmə məhsulları, 36,5 min ton və ya 5,3 dəfə çox polad borular, 1,1 min ton və ya 3,4 dəfə çox məftil və kanatlar istehsal edilmişdir. Bu işdə Gəncə və Sumqayıt şəhərlərində yerləşən müəssisələrin işini xüsusi olaraq qeyd etmək lazımdır.

2010-cu ildə ölkə iqtisadiyyatına 15,5 milyard dollar, iqtisadi və sosial sahələrin inkişafına isə 9,7 milyard manat vəsait yönəldilmiş, onun üçdə iki hissəsi və ya 6,4 milyard manatı tikinti-quraşdırma işlərinə sərf edilmişdir. Əvvəlki illə müqayisədə əsas kapitala yönəldilmiş vəsaitin həcmi 21,2 faiz çox olmuşdur. Bu vəsaitin dörddə üç hissəsindən çoxunu daxili, 24,8 faizini isə xarici mənbələrdən yönəldilmiş vəsaitlər təşkil etmiş, daxili mənbələrdən yönəldilən vəsaitlərin 73,9 faizi dövlət mülkiyyətinə məxsus müəssisə və təşkilatların, 26,1 faizi qeyri-dövlət müəssisələrinin payına düşmüşdür.

Hazırda Azərbaycanın malik olduğu iqtisadi potensial bu sahədə imkanları təkcə ölkə daxilində deyil, həm də xaricdə uğurla reallaşdırmaq istiqamətində müvafiq işlər görülməsinə şərait yaradır. Bütün bunların nəticəsidir ki, Azərbaycan dövləti və iş adamları xarici ölkələrdə yatırdığı investisiyaların həcmini ilbəil artırır. Bu gün Azərbaycan sərmayəsini gözləyən müxtəlif xarici dövlətlərin sayı durmadan artır, ölkəmizə investisiya ilə bağlı ünvanlanan əməkdaşlıq təklifləri çoxalır. Böyük maliyyə imkanlarına malik olan Azərbaycan son bir neçə ildə ayrı-ayrı xarici ölkələrə milyardlarla dollar həcmində investisiyalar yatırıb.

2010-cu ildə Azərbaycan xalqının həyatında mühüm bir hadisə baş verdi. Paytaxt əhalisini saf və ekoloji cəhətdən təmiz su ilə təmin edən Bakı-Oğuz-Qəbələ su kəməri istifadəyə verildi. Bundan başqa, ötən il Bakı şəhərində qranit-mərmər zavodu, Səngəçalda 100 min tonluq taxıl elevatoru, Naxçıvan şəhərində ildə 5 min ədəd minik avtomobili istehsal etmək gücünə malik avtomobil və Ordubad rayonunda beton zavodları, Ordubad Biləv Su Elektrik Stansiyası, Naxçıvan "Gəmiqaya Daş Məhsulları Sənaye Kompleksi", Lənkəran rayonunda konserv zavodu, çay və dondurma fabrikləri, Zaqatala rayonunda süd və tütün emalı zavodları, Abşeron rayonunda duz zavodu, Cəlilabad rayonunda şərab istehsalı sexi və Göytəpə su anbarı, Biləsuvar rayonunda konserv zavodu, Ağstafa rayonunda mineral su istehsalı sexi, Salyan rayonunda soyuducu anbar kompleksi, Qəbələ rayonunda meyvə-tərəvəz saxlamaq üçün 5 min tonluq soyuducu anbar, ölkənin müxtəlif bölgələrində 262,2 min nömrəlik avtomat telefon stansiyaları, 252,5 kilometr uzunluğunda fiber-optik magistral kabel xətti, bütün maliyyə mənbələri hesabına ümumi sahəsi 1803,2 min kvadratmetr olan yeni yaşayış evləri, 886 çarpayılıq xəstəxana, 17273 şagird yerlik ümumtəhsil məktəbləri, növbədə 685 nəfəri qəbul edən ambulatoriya-poliklinika müəssisəsi, 1270 yerlik məktəbəqədər uşaq müəssisələri, Ağdaş, Balakən və Göyçay rayonlarında Olimpiya İdman Kompleksləri, Mingəçevir şəhərində "Kür" Olimpiya Tədris-İdman Mərkəzi və şahmat məktəbi, Cəlilabad rayonunda Müalicə-Diaqnostika Mərkəzi və Şahmat Məktəbi, Müşfiqabad İdman Mərkəzi, "Dalğa Plaza" İş, "Park Bulvar" ticarət və istirahət, mərkəzi, Gəncə şəhərində "Ramada Plaza", Balakən rayonunda "Qafqaz Resort" və "Qafqaz Riverside" mehmanxanaları, "Fitnes" Sağlamlıq Mərkəzi istifadəyə verilmişdir.

Ölkə Prezidenti cənab İlham Əliyevin rəhbərliyi altında həyata keçirilən sosial-iqtisadi inkişaf strategiyası Azərbaycanın qazandığı nailiyyətlərin miqyasını durmadan artırır. Regionların sosial-iqtisadi inkişafına və əhalinin ərzaq malları ilə etibarlı təminatına dair dövlət proqramlarında nəzərdə tutulmuş tədbirlər uğurla həyata keçirilir, "Kənd təsərrüfatı məhsulları istehsalçılarına dövlət dəstəyi haqqında" Azərbaycan Respublikası Prezidentinin 2007-ci il 23 yanvar tarixli sərəncamına uyğun olaraq kənd təsərrüfatı məhsullarının istehsalçılarına hər hektar əkin sahəsinin becərilməsində istifadə etdikləri yanacağa və motor yağlarına görə dövlət tərəfindən 40 manat yardım verilməsi, habelə istehsalçılara satılan mineral gübrələrin dəyərinin orta hesabla 50 faizinin ödənilməsi, eləcə də buğda istehsalçılarının maddi marağının artırılması və buğda istehsalının stimullaşdırılması məqsədi ilə dövlət büdcəsinin vəsaiti hesabına əkilən hər hektar üçün 40 manat yardımın edilməsi kənd təsərrüfatı məhsulları istehsalında artıma şərait yaratmışdır.

Ölkə iqtisadiyyatının prioritet sahələrdən birinə çevrilmiş nəqliyyat sektoru əsas infrastrukturlardan biri olaraq dayanıqlı inkişaf edir. Belə ki, son illərdə olduğu kimi, ötən ildə də nəqliyyat sektoruna investisiyaların yönəldilməsi, nəqliyyatın hərəkət heyətinin yeniləşməsi, körpülərin tikilməsi, yeni avtomobil yollarının çəkilməsi, yenidən qurulması işləri davam etdirilmişdir. Ölkənin nəqliyyat sistemində boru nəqliyyatı mühüm rol oynayır. Ötən il magistral neft kəmərləri ilə 50 milyon ton neft nəql edilmişdir. Nəqletmənin 76,6 faizi ölkənin əsas nəqliyyat infrastrukturlarından olan Heydər Əliyev adına BTC neft ixrac kəməri ilə həyata keçirilmiş və bu kəmər vasitəsilə 38,3 milyon ton neft ötürülmüşdür. 2010-cu ilin iyul ayından başlayaraq gəmilər vasitəsilə ölkəyə gətirilərək Səngəçal terminalından BTC kəməri ilə 1,3 milyon ton Türkmənistan nefti nəql edilmişdir.

Magistral qaz kəmərləri ilə 17,3 milyard kubmetr və ya 7,1 faiz çox qaz nəql edilmişdir. Nəql edilmiş qazın 28,2 faizi Bakı-Tbilisi-Ərzurum Cənubi Qafqaz boru kəməri vasitəsilə həyata keçirilmiş və 4,9 milyard kubmetr qaz ötürülmüşdür. Hazırda ölkəmizin Avropanın enerji təhlükəsizliyində rolu getdikcə artır. Respublikamızın zəngin enerji resursları həm öz iqtisadi potensialımızı gücləndirir, həm də regional əməkdaşlıqda çox mühüm rol oynayır. İndi Azərbaycan dünya miqyasında qaz ixrac edən ölkəyə çevrilib. Enerji strategiyamızın uğurla həyata keçirilməsi yeni-yeni layihələrin üzərində işlənilməsini vacib edir.

Qeyd etmək lazımdır ki, informasiya və rabitə bölməsi respublikamızda iqtisadiyyatın ən sürətlə inkişaf edən sahəsinə çevrilməkdədir. Ötən ildə informasiya və rabitə müəssisələri tərəfindən təsərrüfat subyektlərinə və əhaliyə 1,2 milyard manatlıq və ya əvvəlki ilə nisbətən müqayisəli qiymətlərlə 29,7 faiz çox xidmət göstərilmişdir. Əhaliyə göstərilmiş informasiya və rabitə xidmətlərinin payı 74,3 faiz təşkil etmişdir.

Son dövrdə Azərbaycan Respublikasında Rabitə və İnformasiya Texnologiyaları Nazirliyinin həyata keçirdiyi işlər diqqəti cəlb edir. Belə ki, Azərbaycan Respublikasında informasiya-kommunikasiya texnologiyalarının tətbiqi sahəsində mühüm dövlət tədbirləri uğurla həyata keçirilir. BMT-nin İnkişaf Proqramı ilə birlikdə "Azərbaycan Respublikasının inkişafı naminə İnformasiya və Kommunikasiya Texnologiyaları (İKT) üzrə milli strategiya (2003-2012-ci illər)" hazırlanmaqla 17 fevral 2003-cü ildə təsdiq edilmişdir. Bu strategiyada İKT sahəsində elmdən daha geniş istifadə olunması, rəqabətə davamlı məhsullar və xidmətlər göstərən müəssisələrin təşkili, təhsil sistemi üzrə informasiya infrastrukturunun, internet və informasiya xidmətlərinin genişləndirilməsi, yerli və regional informasiya mərkəzlərinin yaradılması nəzərdə tutulur. Bundan başqa, elektron imza, elektron-biznes-kommersiya və elektron sənəd hazırlanması, icra olunması əsas prioritet hesab edilir. Artıq bu istiqamətdə respublikamızda uğurlu işlər həyata keçirilir.

Əhalinin həyat səviyyəsini yüksəltmək üçün 2010-cu ildə istehlak bazarında əhaliyə 18,4 milyard manatlıq və ya 2009-cu ilə nisbətən 9,4 faiz çox istehlak malları satılmış və pullu xidmətlər göstərilmişdir. Belə ki, istehlak bazarında özəl sektorun dinamik inkişafı davam etmiş, əhaliyə 17 milyard manatlıq istehlak malları satılmış və pullu xidmətlər göstərilmiş, ticarət və xidmət fəaliyyəti üzrə ümumi artımın 95,6 faizi özəl müəssisələrdə yaranmışdır.

Son illər ölkədə işsizlik probleminin həlli istiqamətində qazanılmış nailiyyətlərin miqyası nəzərəçarpacaq dərəcədə genişlənmiş, ümumi iqtisadi inkişaf bu məsələnin həllinə töhfələr vermişdir.Təkcə bir faktı göstərmək lazımdır ki, 2004-cü ilin fevralından 2010-cu ilin sonuna qədər 900 mindən çox yeni iş yerləri açılmışdır. Bu iş yerlərinin çoxu ölkənin regionlarının payına düşür.

2009-2013-cü illəri əhatə edən regionların sosial-iqtisadi inkişafının ikinci Dövlət Proqramının icrası ilə əlaqədar 2009-2010-cu illər ərzində ölkədə 146,6 min yeni, o cümlədən 107,2 min daimi iş yeri açılmışdır. Təkcə 2010-cu ildə 73 min, o cümlədən 54,7 min daimi iş yerləri yaradılmış, bu da işsizliyin aşağı düşməsinə, ölkədə yoxsulluq səviyyəsinin 9,1 faizə enməsinə səbəb olmuşdur.

Dövlətimizin başçısı cənab İlham Əliyev görülmüş işləri ətraflı təhlil edərək, uğurlarımızın səbəbini belə açıqlayır: "Bizim seçdiyimiz yol düzgün yoldur. Biz öz resurslarımıza arxalanırıq və bütün işləri Azərbaycanın milli maraqlarının qorunması istiqamətində aparırıq. Bu bizim üçün başlıca amildir. Ölkəni daha da gücləndirmək, müasirləşdirmək, ölkə qarşısında duran bütün problemləri həll etmək üçün bizim bütün imkanlarımız vardır. Bir daha demək istəyirəm ki, həm düşünülmüş siyasət, həm də möhkəm iradə vardır".

2010-cu ildə səhiyyə sahəsinin maddi-texniki bazasının yeniləşdirilməsi və müasirləşdirilməsi istiqamətində də böyük işlər həyata keçirilmişdir. Ölkənin regionlarında yüksək standartlara cavab verən müasir tibbi diaqnostika və müalicə mərkəzləri, rayon xəstəxanaları və poliklinikalar tikilmiş və təmir edilmişdir. 2011-ci ilin əvvəlinə ölkədə 760 xəstəxana və 1694 ambulatoriya-poliklinika müəssisəsi fəaliyyət göstərmiş və əhalinin hər 10 min nəfərinə 37 həkim və 71 orta tibb işçisi düşmüşdür. Qeyd etmək lazımdır ki, "Ekologiya ili" olan 2010-cu ildə ölkədə böyük işlər görülmüş, ekoloji tarazlığın təmin edilməsi və təbiəti mühafizə obyektlərinin inşasına 176,1 milyon manat məbləğində vəsait yönəldilmişdir.

Hazırda Azərbaycan Respublikasında təhsil sistemi milli, mənəvi və ümumbəşəri dəyərlərə əsaslanır və dünya təhsil sisteminə inteqrasiya yolu ilə inkişaf edir. Təhsil sistemində aparılan uğurlu islahatlar nəticəsində əhalinin təhsil səviyyəsi ilbəil artır və bu gün 15 və yuxarı yaşda olan əhalinin hər 1000 nəfərindən 792-si ali və tam orta təhsilə malikdir.

Son dövrdə respublikamızda təhsil alanlar arasında qızların xüsusi çəkisinin sürətlə artması insan inkişafının gender bərabərliyinin təmin edilməsindən xəbər verir. Azərbaycanın dövlət idarəetmə, hüquq mühafizə orqanlarında, təhsil və səhiyyədə, mədəniyyət və incəsənət sahəsində qadınların rəhbər vəzifələrdə, eləcə də parlametdə təmsil olunmaları ölkəmizin dünyanın ən tolerant dövlətlərdən biri olmasını sübut edir. Qeyd etmək lazımdır ki, ali məktəblərə qəbul Azərbaycan Respublikasının Nazirlər Kabinetinin qərarı ilə təsdiq olunmuş yeni - geniş profilli ixtisas siyahısına uyğun olaraq həyata keçirilir. Bolonya Deklarasiyasının tələblərinə tam cavab verən bu yeni siyahının tətbiq olunması Azərbaycan ali təhsil sisteminin Avropa təhsil sisteminə inteqrasiyası yolunda atılan mühüm addımlardan biridir.

Ölkənin ali təhsil müəssisələrində Azərbaycan vətəndaşları ilə birgə 50 xarici ölkənin 4723 nəfər vətəndaşı da təhsil alır. Xarici tələbələrin sırasında Türkiyə, İran, Rusiya, Çin Xalq Respublikası, Türkmənistan, Gürcüstan və İraq vətəndaşları üstünlük təşkil edir. Azərbaycandan isə hazırda xarici ölkələrdə dövlət xətti ilə 2055 nəfər təhsil alır. Xaricdə təhsil alan tələbələr yetkin mütəxəssis kimi formalaşdıqdan sonra ölkəmizə gəlir və iqtisadiyyatın müxtəlif sahələrində çalışırlar.

Ölkə Prezidenti möhtərəm İlham Əliyev təhsilin inkişafı ilə yanaşı, elmin inkişafına da daim diqqət yetirir. Belə ki, ölkədə elmin inkişafına dövlət tərəfindən xüsusi qayğı göstərilir. Azərbaycan Respublikasının Prezidenti tərəfindən təsdiq edilmiş "Azərbaycanda 2009-2015-ci illərdə elmin inkişafı üzrə Milli Strategiya" uğurla həyata keçirilir. Hazırda ölkədə müxtəlif elmi-texniki xidmətləri həyata keçirən 148 elmi təşkilat və müəssisə fəaliyyət göstərir. Bu elm ocaqlarında 18 minə yaxın mütəxəssis məşğul olur və onların 63 faizi tədqiqatçılardır. Mütəxəssislərin hər dörd nəfərindən birinin elmlər doktoru və fəlsəfə doktoru alimlik dərəcəsi vardır. Bu da respublikamızda elmə göstərilən dövlət qayğısına əyani sübutdur.

Respublikamızda təhsilin, səhiyyənin, mədəniyyət və incəsənətin inkişafında Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın böyük əməyi vardır. Belə ki, Mehriban xanım milli-mənəvi dəyərlərimizin, mədəniyyət və incəsənətimizin hamisi kimi böyük layihələrin reallaşdırılmasında fəal iştirak edir. Təsadüfi deyil ki, Heydər Əliyev Fondunun fəaliyyət göstərdiyi illər ərzində həyata keçirilən bütün iri miqyaslı beynəlxalq və respublika əhəmiyyətli tədbirlərin əsas təşəbbüskarı və təşkilatçısı Mehriban xanım Əliyeva olmuşdur.

Sonda onu da qeyd edək ki, dünya maliyyə-iqtisadi böhranı Azərbaycanın öz iqtisadiyyatını sadəcə neft amili üzərində qurmadığını, əldə olunmuş uğurlu nəticələrdə qeyri-neft sektorunun da mühüm paya malik olduğunu təsdiqləmişdir. 2010-cu ilin uğurlu sosial-iqtisadi nəticələri də bu deyilənlərin həqiqət olduğunu bir daha sübut edir.

Arif ŞƏKƏRƏLİYEV,

əməkdar elm xadimi,

Beynəlxalq Menecment

Akademiyasının üzvü, iqtisad

elmləri doktoru, professor

Xalq qəzeti.- 2011.- 12 mart.- S. 4.