Silahlı Qüvvələrin tibb xidməti müasir tələblərə cavab verir

Son illər Silahlı Qüvvələrimizdə həyata keçirilən tikinti, yenidənqurma, təmir və abadlıq işləri şəxsi heyətin mənzil-məişət və yaşayış şəraitini yaxşılaşdırmış, vətənpərvərlik ruhunu və döyüş hazırlığı səviyyəsini ikiqat artırmışdır. Quruculuq işlərinin bir hissəsi də hərbi tibb sahəsinin payına düşür. Bu gün Silahlı Qüvvələrin Baş Klinik Hospitalında həyata keçirilən və sürətlə davam etdirilən kompleks tədbirlər müvafiq istiqamətdə xidmətin keyfiyyətində əsaslı dönüş yaratmışdır.

Hospitalın ərazisində 6 mərtəbəli 300 çarpayılıq cərrahiyyə korpusunun inşa olunaraq istismara təhvil verilməsi və burada Avropa istehsallı yüksək keyfiyyətli tibb avadanlıqlarının quraşdırılması dediklərimizə əyani sübutdur. Ərazidəki 4 mərtəbəli inzibati binanın əsaslı təmir olunması və istismara təhvil verilməsi burada çalışan tibb personalının xidməti imkanlarını ikiqat artırmışdır.

Hazırda ərazidə inşa olunan 8 mərtəbəli müalicə korpusunda mühəndis-kommunikasiya xətlərinin quraşdırılması işləri aparılır. Ərazidə hamam-camaşırxana binasının inşası başa çatmaq üzrədir. Şəhərciyin ərazisində ikinci elektrik yarımstansiyası və iki ədəd hərəsi 500 ton olmaqla su hovuzu tikilir. Hərbçi həkimlərin ixtiyarına verilən geniş idman zalı müasir tələblər səviyyəsində inşa olunub. Əldə olunan uğurlardan biri də hospitalda xüsusi təhlükəli infeksiyalar üçün nəzərdə tutulan laboratoriyanın inşasıdır.

Xarici mütəxəssislərin nəzarəti altında inşa olunan bu laboratoriya ən yaxın müddətdə müasir tibbi avadanlıqlarla təmin olunaraq istismara veriləcəkdir. Hal-hazırda hərbi tibb şəhərciyinin ərazisində ikimərtəbəli yeməkxana binası tikilir. Bu binanın 2-ci mərtəbəsindəki 200 nəfərlik yemək zalı xüsusi olaraq hərbi tibb fakültəsinin kursantları üçün nəzərdə tutulub.

Ümumiyyətlə, tibb xidməti sahəsində ştat strukturu dəyişdirilmiş, şəxsi heyətin sağlamlığını tam təmin etmək məqsədilə böyük tədbirlər planı hazırlanaraq müdafiə naziri tərəfindən təsdiq edilmişdir. Hazırda Silahlı Qüvvələrimizin tibb xidməti sahəsində üç elmlər doktoru, 10-dan çox elmlər namizədi alimlik dərəcəsi almış ali ixtisaslı kadrlar xidmət edir. Şəxsi heyətin sağlamlığını qorumaq sahəsində aparılan işin keyfiyyətini artırmaq məqsədilə həyata keçirilən əsas tədbirlərdən biri də qarnizon poliklinikasının hospitalın tabeliyinə verilərək bu ərazidə yerləşdirilməsidir.

Bundan əlavə, sanitar-epidemioloji nəzarət və məhkəmə tibbi ekspertiza və patoloji anatomiya kimi mərkəzlərin də ərazidə yerləşdirilməsi həyata keçirilən kompleks tədbirlərdəndir. Məhkəmə tibbi ekspertiza və patoloji anatomiya mərkəzində MDB-də və Azərbaycanda analoqu olmayan leyko mikroskopu, "Şimadzu" rentgenoflüoressent spektrofotometr kimi müasir tipli avadanlıqlar quraşdırılıb. Yeri gəlmişkən, ərazidə təmirdə olan 2 ədəd üçmərtəbəli binanın təmiri başa çatdıqdan sonra qarnizon hospitalının da hərbi tibb şəhərciyinə köçürülməsi nəzərdə tutulub.

Regionlardakı iki tibb məntəqəsinin tikilərək istifadəyə verilməsi, Gəncə hərbi şəhərciyində qarnizon hospitalının bəzi bölmələrinin yerləşdirilməsi üçün bir sıra binaların yenidən əsaslı təmir olunması tibb xidməti sahəsində təsdiq olunmuş planın tərkib hissəsidir. Bu plana əsasən, digər hərbi şəhərcik və hərbi hissələrdə yeni binaların tikilməsi, yaxud əsaslı təmir olunması nəzərdə tutulub.

Hazırda Gəncə qarnizonu hospitalının yeni ərazidə ən müasir tələblər səviyyəsində inşası planlaşdırılıb.

Hərbi tibbi kadrların hazırlanması məsələsi də Müdafiə Nazirliyi rəhbərliyinin daim diqqət mərkəzindədir. Hərbi tibb fakültəsinin sərəncamında olan və xüsusi arxitekturaya malik binanın fasadları, otaq və dəhlizlərinin təmiri barədə Müdafiə Nazirinin verdiyi əmr kadr hazırlığı sahəsində yeni keyfiyyət göstəricilərinin əldə olunmasına xidmət edir. Yeri gəlmişkən, Silahlı Qüvvələrin Baş Klinik Hospitalında xidmət edən həkimlərin tam böyük əksəriyyəti cəbhə bölgəsində xidmət keçmiş təcrübəli zabitlərdir.

Onların peşəkarlığı hərbi qulluqçuların sağlamlığına kifayət qədər təminat verir. Hospitalda maddi-texniki təminat yüksək səviyyədədir. Xüsusi təyinatlı dərmanlar üçün əlavə vəsaitlər ayrılır. Ərzağın keyfiyyətinə və nəzərdə tutulmuş normada xəstələrə çatdırılmasına ciddi nəzarət olunur. Bütün bunlar Silahlı Qüvvələrin Baş Klinik Hospitalının ən yaxın müddətdə dünyanın müasir tibb ocaqları ilə bir səviyyədə duracağına əsaslı zəmin yaradır.

İbrahim RÜSTƏMOV,

əməkdar jurnalist

Xalq qəzeti.- 2011.- 12 mart.- S. 5.