Xətai rayonu: tarixi "Qara şəhər" "Ağ şəhər"ə çevrilir

Bakımızın inkişafı davam edir, şəhərimiz gözəlləşir, abadlaşır. Hazırda yeni böyük layihə icra edilməyə başlanmışdır - "Ağşəhər" layihəsi. Bu layihənin də çox böyük rəmzi mənası vardır. Çünki tarixi "Qaraşəhər" adlandırılan ərazidə yeni inkişaf layihəsi təqdim edilibdir. Beynəlxalq sərgilərdə "Ağşəhər" layihəsi təqdim olunur. Bu layihə kiçik bir şəhərə bərabər inkişaf layihəsi olacaqdır. Yəni, əslində Bakının içində ekoloji cəhətdən ən yararsız yerlərdə, neftlə, neft tullantıları ilə çirklənmiş ərazidə müasir, ekoloji təmiz, gözəl yeni bir tikinti layihəsi icra ediləcəkdir.

Orada yaşayış, ofis binaları, ticarət mərkəzləri, istirahət parkları tikiləcək, dənizə çıxışı olacaq yeni bulvar salınacaqdır...

"Ağşəhər" layihəsinin icrası, mən hesab edirəm ki, şəhərimizin, ölkəmizin, yeni inkişaf strategiyamızın təzahürü kimi də dünya şəhərləri xəritəsində öz yerini tutacaqdır"... Azərbaycan Respublikasının Prezidenti İlham Əliyevin sədrliyi ilə Bakı Şəhər İcra Hakimiyyətində ölkəmizin paytaxtı və şəhərətrafı qəsəbələrin sosial-iqtisadi inkişafına dair keçirilən müşavirədə dövlət başçısının dediyi bu fikirlər Xətai rayonunda böyük ruh yüksəkliyi və dərin sevinc hissi ilə qarşılanmışdır. Çünki haqqında söhbət gedən "Ağşəhər" layihəsi məhz Xətai rayonunun ərazisində gerçəkləşəcəkdir. Daha doğrusu, Xətai rayonu Azərbaycan paytaxtının ən gözəl, cazibədar guşəsinə çevriləcəkdir.

Bu barədə Xətai Rayon İcra Hakimiyyətində keçirilən müşavirədə geniş və əhatəli söhbət açıldı. Bakının və şəhərətrafı qəsəbələrin sosial-iqtisadi inkişafı ilə əlaqədar müşavirədə Prezident İlham Əliyevin giriş və yekun nitqlərində irəli sürülmüş tələblərlə əlaqədar Xətai rayonu qarşısında duran vəzifələr barədə məruzə edən RİH başçısı Razim Məmmədov bildirdi ki, son illərdə ölkəmizin hər yerində gedən quruculuq və abadlıq işlərinin dinamik inkişafı bəhrələrini xətaililər də öz gündəlik həyatlarında görür və hiss edirlər. Böyük qürur hissi ilə demək olar ki, ölkəmizin paytaxtı bu gün, sözün əsl mənasında, dünyanın ən gözəl şəhərlərindən birinə çevrilmişdir. Bu işdə Xətai rayonu sakinlərinin də danılmaz zəhmət payı vardır. Son illərdə rayonumuzda genişmiqyaslı abadlıq-quruculuq işləri uğurla aparılmış, bir sıra infrastruktur layihələri həyata keçirilmişdir. Bunları hamımız bilirik. Bu gün əsas diqqəti problemlərimizə, görüləsi işlərə, qarşıda duran vəzifələrə yönəltməliyik. Bakı Şəhər İcra Hakimiyyətində keçirilən müşavirədə möhtərəm Prezidentimizin proqram xarakterli geniş nitqində qaldırdığı məsələlərin bir çoxu bizim rayona aiddir və birgə səyimizlə onlar öz həllini tapmalıdır.

Rayon icra hakimiyyətinin başçısı R.Məmmədovun məruzəsində, habelə müzakirələrdə iştirak edən RİH başçısının Əhmədli qəsəbəsi üzrə nümayəndəsi Füzuli Ələsgərovun, Xətai Rayon Bələdiyyəsinin sədri Ədalət Fərəcovun, rayon elektrik enerjisi satışı və təchizatı idarəsinin rəisi Nemət Qasımovun və başqalarının çıxışlarında qeyd olundu ki, rayonda elektrik enerjisi, qaz, su və istilik təchizatının yaxşılaşdırılmasına, yeni kanalizasiya xətlərinin çəkilməsinə, bir sıra yaşayış binalarının zirzəmilərində kommunikasiya sisteminin dəyişdirilməsinə, küçə və xiyabanların işıqlandırılmasına, təhsil və səhiyyə müəssisələrinin, mədəniyyət obyektlərinin, bəzi yolların və prospektlərin əsaslı təmirinə ciddi ehtiyac var. Rayonun Əhmədli qəsəbəsində bu məsələlərin həlli xüsusilə kəskin şəkildə durur. Müşavirədə həmçinin müasir istixanaların, quşçuluq fabriklərinin yaradılması, zeytunçuluğun inkişafı, xüsusən evlərin qeydiyyata alınmasında şəffaflığın təmin olunması məsələlərinə də diqqət ayrıldı.

Sonda belə bir inam ifadə olundu ki, Xətai rayonu Bakı Şəhər İcra Hakimiyyətində Azərbaycan Prezidenti İlham Əliyevin sədrliyi ilə keçirilən müşavirədə irəli sürülən vəzifələrin həyata keçirilməsində fəal iştirak edəcək, doğma paytaxtımızın daha da gözəlləşməsinə layiqli töhfəsini verəcəkdir.

Rafiq SALMANOV

Xalq qəzeti.- 2011.- 12 mart.- S. 5.